Tito
Paulo Titore joarocaha
1
1 Yʉhʉ Paulo Cohamacʉre dahra cohtariro,
Jesucristo yare buhe dutiro to cũriro jija.
Cohamacʉ to beserina Jesure ti wacũ tuahti cjihtire noaa buheare ti masihti cjihtire Jesu buhe dutiro yʉhʉre cũre.
Tí buhea Cohamacʉ to dutiro seheta mari yoahtire yahura.
2 Ã jicʉ jipihtia dachoripe Cohamacʉ yaina mʉanopʉ ti jirucuhto cʉ̃hʉre buheja tinare.
Cohamacʉ ne mahñoa marieriro ahri yahpare to bajuamehnehto pano õ sehe ni cũa tiri jire marine:
“Mʉanopʉ ã jirucunahca”,
ni cũa tiri jire marine.
3 Ã jiro to quihõri pjai Cohamacʉ to ni cũrire yahu dutire masare.
Tó seheta yʉhʉre ni yahu dutire tiro.
Marine pichacapʉ wahaborinare yʉhdoriro jira tiro.
4 Mʉhʉre Titore Jesu yare buhei.
Yʉ ã buhechʉ tʉhocʉ Jesure wacũ tua dʉcare mʉhʉ.
à jicʉ mʉhʉ potocãta yʉ macʉ yoaro sehe jicʉta nina.
Mʉhʉre ahrire joarocai nija.
Cohamacʉ mari Pʉcʉ mehne,
Jesucristo marine yʉhdoriro mehne mʉhʉre noa dutija.
Mʉhʉre pja ñʉa,
cahĩa ti yoadohoa mehne noano jiga mʉhʉ.
Creta wama tiri nʉcoi Tito to yoahtire yahu quihõha Paulo
5 Creta wama tiri nʉcoi mʉhʉre yʉ cũchʉ Jesu yaina ti buhehto cjihto dʉhsasinire tí pjare.
à jicʉ ti yoahtire yahuhtiro cjihtore cũi yʉhʉ mʉhʉre.
à yoa macaripe macaina Jesu yaina pʉhtoa cjihtire bese duticʉ cũi mʉhʉre.
6-8 Tina pʉhtoa Cohamacʉre dahra cohtaina jira.
à jicʉ tinare besecʉ noainare besega soro yoaerainare.
à besecʉ,
cãa numiata namo tiinare,
“Painare yʉhdʉrʉcaja”,
ni tʉhotuerainare,
suaerainare,
cahaerainare,
cahmacherainare,
paina yare mahñoa mehne tuaro na duaerainare besega.
à besecʉ ti wʉhʉsere sãa sʉinare noano ñʉ wihboinare,
noaa sehere noano ji coainare,
tʉho masiinare,
noaare yoarucuinare,
ñaa marieinare,
ñaare yoaerainare,
caparo marieno dahrainare besega.
à yoa mʉ besehtina pohnare õ sehe jiina jiro cahmana:
Jesure wacũ tuaina,
noano yoarucuina,
jipihtinare noano yʉhtiina jiro cahmana pʉhtoa pohnare.
9,10 Ã yoa noaa buheare quihõno mari buherucuriro seheta ne duhueraina jijaro pʉhtoa mʉ besehtina.
à jia tina noaa buheare yahuina jiahca paina tí buhea mehne ti wahchehto sehe.
à yoaa noaa buheare ñʉ yabiinare buhea,
ti ya mahñoa ti jichʉ masichʉ yoaahca tina.
à jicʉ noano besega Jesu yaina bui pʉhtoa jihtinare.
Payʉ ti pʉhtoare yʉhdʉrʉcaina,
noano tʉhotu durucueraina,
mahñoina jira mipʉre.
à yoaina judio masa pinihta ñabiaro yoaa nina.
Ti ya buhea ti potocã jierachʉ tinare masichʉ yoaro cahmana.
11 Tina judio masa sehe niñerure wapata duaa mahño buhera.
à yoaeraro cahmana tinare.
à buhea cãa wʉhʉse macainare jipihtinare Cohamacʉ ya sehere cohãchʉ yoaa nica tinare.
Ti ã yoachʉ tinare ã yoa dutieraro cahmana.
12 Ti yare panopʉ yahuriro tina mehne macariro jiparota õ sehe ni yahuri jire:
“Creta nʉco macaina ã mahñorucuina jira.
Tina nʉcʉ macaina wahiquina yoaro sehe suaina jira.
à yoa ã chʉrucuina jia ne dahra duaeraa,
capa bʉjʉina jira”,
niri jire tiro to ya nʉco macainare.
13 To ã nia potocã tjira.
Ti ã jichʉ ñʉcʉ tinare tuaro tuhtiga Jesu ya buhea sehere noano ti masihto cjihtore.
14 Ã jicʉ judio masa panopʉ macaina ti mʉ sʉro ti nimacanocari cjirire,
Jesu yare potocã jiare cahmaeraina ti dutia cʉ̃hʉre Creto macaina ti tʉho nʉnʉerahto cjihtore tuhtiga tinare.
15 Buhiri marieina noa dihtare tʉhotura.
Ñaare yoarucuina,
Jesure wacũ tuaeraina sehe ñaa dihtare tʉhotura.
Tina ti tʉhotua sehe ñaa yʉhdʉara.
à jia noa sehere bese masierara.
16 Tina “Cohamacʉre masija sã” nipahta,
ñaare yoara.
à yoaina ti jichʉ ñʉna Cohamacʉre masieraina ti jichʉ masija mari.
à jia tina ñaa yʉhdʉaina,
Cohamacʉ yare yʉhdʉrʉcaina jira.
Ne noaare yoa masierara.