Ñano yʉhdʉparota Jesu yairore cʉ̃no pjaro cahmana
2
1 Mʉhʉ sehe yʉ macʉ yoaro sehe jiriro,
Jesucristo marine noano yoariro to yoadohoro mehne tirore wacũ tuarucuga.
2 Ã yoacʉ payʉ masare yʉ buherire mʉ tʉhorire paina cʉ̃hʉre buhega mʉhʉ.
Tina mʉ buheina Cohamacʉ yare yoarucuina jijaro.
à jia painare buhe turiaina jijaro.
3 Surara ñano yʉhdʉparota to cʉ̃no pjariro seheta mʉhʉ cʉ̃hʉ Jesu yairo jicʉ ñano yʉhdʉcʉ cʉ̃no pjaga mʉhʉ.
4 Surara to pʉhtoro dutia sehere yoara tirore wahchechʉ yoaro taro.
à yoaro tiro surara jieraina yoaro sehe wiho jiare yoaerara tiro.
(Mʉhʉ cʉ̃hʉ tó seheta Cohamacʉ dutia dihtare yoaga.)
5 Mʉrocaperiro mʉroca dutiina ti dutiare quihõno yoaeraro to mʉroca yʉhdʉri wapare na masierara.
(Ã jicʉ mʉrocaperiro ti dutiare quihõno to yoariro seheta Cohamacʉ dutiare quihõno yoa pahñoga mʉhʉ.)
6 Ã yoa wese dahrariro wapʉ tiro mehne noano dahrariro sehe tí wese maca dichare noano na mʉhta,
noano wapatara.
(Ã jicʉ mʉhʉ cʉ̃hʉ tiro yoaro sehe Cohamacʉ yare mʉ noano yoachʉ tiro mʉhʉre noano yoarohca.)
7 Jipihtiare noano masichʉ yoarohca Jesu mari pʉhtoro mʉhʉre.
à jicʉ mipʉre mʉhʉre yʉ nirire noano wacũ tʉhotuga.
8 Ã jicʉ Jesucristore wacũga.
Tiro pʉhtoro Davi cjiro panopʉ macariro to panamino ji turiariro jia tiri jire.
à jiro yariaro masa mʉjari jire tiro.
Noaa buheare buhecʉ to ã waharireta buhei nija.
9 To yare buhecʉ ñano yʉhdʉja yʉhʉ.
à jicʉ tíre yʉ buheri buhiri ñaare yoariro yoaro sehe peresupʉ jija yʉhʉ.
Yʉ ã jipachʉta Cohamacʉ ya durucuare buhe duhuchʉ yoa masierara masa.
10 Ã yoa Cohamacʉ to beserinare buhecʉ payʉ tahari ñano yʉhdʉja yʉhʉ,
tina cʉ̃hʉ Jesucristo yaina ti jihti cjihtire.
To yaina jia tina pichacapʉ wahaborina sehe to yʉhdʉchʉ yoahtina jiahca.
à jia tina Cohamacʉ mehne ã jirucuahca.
11 Ahri yʉ yahuhti potocã tjira:
Cristo crusapʉ to yariariro seheta wahana,
yariaina ti yoaare ti duhuriro seheta mari ñaa yoarire mari duhuna,
Cristo mari mehne macariro ã jirucurohca.
12 Ã yoa to yare mari yoari buhiri ñano yʉhdʉpanahta cʉ̃no pjana pʉhtoro to sʉho jiropʉre tiro mehne pʉhtoata jinahca mari cʉ̃hʉ.
“Cristore sã masieraja”,
mari nichʉ,
tiro cʉ̃hʉ marine ãta ninohca.
13 Tirore mari yʉhdʉrʉcachʉ ñʉno to niriro seheta marine yoarohca.
To niriro seheta yoariro jira tiro.
Ne mahñoerara tiro.
Cohamacʉ to ñʉ ji coainare, to yare buheinare yahuha Paulo Timoteore
14 Ahrire mʉhʉ mehne macainare wacũchʉ yoaga.
Ti mʉ sʉro durucu ti yʉhdʉrʉcaa yaba cjihti jierara.
à jia tinare tʉhoinare ñano yoachʉ yoaa,
tinare dojomehnena.
à jicʉ mari pʉhtoro to ñʉrocaroi õ sehe ni yahuga tinare.
“Ã ni durucuena tjiga mʉsa”,
niga tinare.
15 Mʉhʉ sehe Cohamacʉ yare noano buhega.
à yoa Cohamacʉ yare tuaro yoaga.
Mʉ ã yoachʉ ñʉno “Noano yoare mʉhʉ”,
ninohca Cohamacʉ mʉhʉre.
à jicʉ mʉ buherire to ñʉchʉ bʉo tisi mʉhʉ.
à jicʉ to buheare noano masiga mʉhʉ.
Tíre quihõno buhega.
16 Ti mʉ sʉro durucu yʉhdʉrʉcaina ñaare ã yoarucu,
Cohamacʉ yare yoaerara.
à jicʉ ti ã ni durucuare ã ñʉnocahga.
Tinare tʉhoi tjiga mʉhʉ.
17 Tina ti durucua sehe camino to ñano baa mʉjano yoaro sehe jira.
Camino to ñano baa mʉjano seheta ti durucua cʉ̃hʉ paina Jesu yainare ñaina wahachʉ yoaahca.
à durucuina mehne macaina Himeneo,
Fileto cʉ̃hʉ jira.
18 Tina “Jesu yaina masa mʉja tuhsʉhre”,
ni buhea,
noaa buheare duhunocahre tina.
à soro buhea cãina Jesu yainare tirore wacũ tua duhuchʉ yoahre tina.
19 Ti ã ñano buhepachʉta Cohamacʉ ya buhea sehe ne cohtotaerara.
Õ sehe nina to buhea:
“Mari pʉhtoro Jesu to yainare masina”,
nina.
à yoa õ cʉ̃hʉre nina:
“Jipihtina,
‘Jesu yaina jija’,
niina ñaare duhunocajaro”,
ni yahura Cohamacʉ ya buhea.
20 Mari piti dahre buhechʉ masa pja wahwari yoaro sehe jira.
Pjiri wʉhʉi uru,
plata mehne ti yoaa wahwari jira.
Tuhsʉ,
tí wʉhʉi paye wahwari yucʉcʉ mehne,
dihi mehne ti yoaa wahwari jira.
Uru,
plata mehne ti yoaa wahwari noaare ti posahti jira.
Paye wahwari wiho jiare ti posahti jira.
21 Ã yoa ñaare yoaerariro uru wahwa noari wahwa yoaro sehe jirohca.
à jiro tiro sehe Jesu ya dihtare yoarucuriro jirohca.
Wʉhʉ pʉro noari wahwa mehne noaare to yoariro seheta,
ñaare yoaerariro Jesu ya cjihtire noaare yoarohca.
22 Wahmʉno jira mʉhʉ.
à jicʉ wahma yapia ñaare goa pja ti yoariro seheta yoai tjiga mʉhʉ.
à jicʉ noaare yoaga.
Jesure wacũ tuarucuga.
Tuhsʉ,
tirore,
masa cʉ̃hʉre cahĩga.
à yoa mʉhʉ mehne macaina Jesu yaina mehne jicʉ cahmacheno marieno noano jiga mʉhʉ.
Tina Cohamacʉre yʉhtiina tirore sinirucuina cʉ̃hʉ ãta yoajaro.
23 Ã jicʉ tʉhoturo marieno ti durucu yʉhdʉrʉcaare mʉhʉ cʉ̃hʉ tʉho nʉnʉi tjiga.
Tuhsʉ,
mʉhʉ cʉ̃hʉ durucu yʉhdʉrʉcai tjiga.
à durucu yʉhdʉrʉcaa masa ti basi cahma suara.
24 Cohamacʉre dahra cohtarirore durucu yʉhdʉrʉcaeraro cahmana.
à yoa jipihtinare noano yoariro,
buhe mihniriro,
dóicãta suaerariro tirore jiro cahmana.
25 Ã jiro paina tiro mehne ti durucu yʉhdʉrʉcachʉ tiro tinare yahuro noano mehne suaro marieno yʉhtiro cahmana tirore.
To ã yʉhtichʉ ñʉa Cohamacʉ to yoadohoa mehne tina sehe ti ñaa yoaare cahyaboca.
à jia noaa buheare masi dʉcaboca.
26 Tinare watĩno sehe peresu yoaro sehe jiinare cjʉamare to cahmaare yoahtina cjihtire.
à jia quihõno ti tʉhoturi baharo noaa buheare masia,
watĩnore cohãnocaahca.