2 Timoteo
Paulo Timoteore pari turi joarocaha
1
1 Yʉhʉ Paulo,
ahrire mʉhʉre Timoteore joarocaja tjoa.
“Jipihtina Jesucristore wacũ tuaina mʉanopʉ ã jirucuahca” ni,
cũre marine Cohamacʉ marine yʉhdʉchʉ yoariro.
To ã ni cũrire yahuhtiro cjihtore yʉhʉre bese cũre Jesu.
à cũno Cohamacʉ to cahmano seheta yoaro nire yʉhʉre.
2 Mʉhʉ Timoteo yʉ cahĩriro jira.
Mʉhʉre Jesu yare yʉ buhechʉ tʉhocʉ tirore noano wacũ tua dʉcare mʉhʉ.
à jicʉ yʉ macʉ yoaro sehe jira mʉhʉ.
à jicʉ Cohamacʉ mari Pʉcʉ,
mari pʉhtoro Jesucristo mehne mʉhʉre noa dutija.
à yoa mʉhʉre pja ñʉa,
cahĩa tina ti yoadohoa mehne noano jiga mʉhʉ.
Masare Cristo yare ti yahurire yahuha Paulo
3 Ñamipʉ dachopʉ cʉ̃hʉre Cohamacʉ mehne durucucʉ mʉ ya cjihtire sini payocʉ mʉhʉ mehne wahcheja.
à wahchecʉ Cohamacʉre “Noana”,
nija yʉhʉ.
Panopʉ macaina yʉ coyea Cohamacʉ yare ti yoariro seheta yʉhʉ cʉ̃hʉ “Buhiri tija”,
ni tʉhoturo marieno mipʉre to yare yoaja.
4 Sohõ jiri pjare yʉ wahachʉ mʉ tii nʉnʉ tirire wacũcʉ mʉhʉre tuaro ñʉ duaja mʉhʉ mehne noano wahche duacʉ.
5 Ã jicʉ Jesure potocãta mʉ wacũ tuarire wacũja yʉhʉ.
Mʉ ñʉchocoro Loida,
mʉ poco Eunice cʉ̃hʉ Jesure wacũ tua mʉhtare mʉ pano.
à yoa mipʉre mʉhʉ cʉ̃hʉ tirore mʉ wacũ tuachʉ noano masija yʉhʉ.
6 Ã jicʉ ahrire mʉhʉre wacũchʉ yoa duaja.
Mʉ bui yʉ wamomacarine yʉ duhu payochʉ Cohamacʉ yare mʉ yoahti cjihtire tuaare ware mʉhʉre.
Tí tuaa mehne yoa namoga mʉhʉ.
7 Cohamacʉ marine Espíritu Santore wari jire.
à jiro masare marine cuierachʉ yoara Espíritu Santo.
à yoaro tuaina,
masare cahĩina,
tʉho masiina marine jichʉ yoara tiro.
8 Ã jicʉ mari pʉhtoro ya cjihtire painare yahucʉ,
bʉo tiecʉ tjiga mʉhʉ.
Yʉhʉ to yare yʉ yoari buhiri peresui jiriro jija.
Peresui yʉ jichʉ yʉhʉre bʉo tisãai tjiga mʉhʉ.
Wiho mejeta noaa buheare mʉ buheri buhiri ñano yʉhdʉcʉ “Noanohca”,
niga mʉhʉ cʉ̃hʉ.
Mʉ ã ñano yʉhdʉchʉ Cohamacʉ mʉhʉre yoadohorohca.
9 Cohamacʉ sehe marine pichacapʉ wahaborinare yʉhdʉchʉ yoare.
à yoa noaina to yaina jihtina cjihtire tiro besea tiri jire marine.
Mari noano yoari mehne besera tiri jire marine Cohamacʉ.
To mʉ sʉro to cahmariro seheta yoaro ahri yahpare to bajuamehnehto pano marine cahĩno,
tiro marine besea tiri jire.
Marine ã cahĩno marine yʉhdʉchʉ yoahtirore Jesucristore warocari jire Cohamacʉ.
10 Mipʉre Jesucristore marine yʉhdʉchʉ yoahtirore warocaro,
marine potocãta to cahĩare noano masichʉ yoaro niri jire Cohamacʉ.
Jesu marine to yainare pichacapʉ wahaerachʉ yoare.
à yoaro “Yʉhʉre wacũ tuana Cohamacʉ mehne ã jirucunahca” nino,
buhriaro marine to ñʉ masichʉ yoaro seheta noaa buheare marine masichʉ yoaro tari jire tiro.
11 Tí buhea noaa buheare yahuhtiro cjihtore to cũhtiro cjihtore besea tiri jire yʉhʉre.
12 Ã to beseriro jicʉ mipʉre ñano yʉhdʉja yʉhʉ.
Õ sehe ñano yʉhdʉpacʉta yʉhʉ bʉo tieraja.
Yʉ wacũ tuarirore Jesure masija yʉhʉ.
Tuariro jira tiro.
à jiro yʉhʉre to yare buhe duti cũno noano yoadohorohca yʉhʉre.
à yoa ahri yahpapʉ to tjua tahto pano,
“Mʉhʉre yʉhdʉchʉ yoaihtja”,
to niriro seheta sohtori tiarohca yʉhʉre.
Yʉhʉre yʉhdʉchʉ yoarohca tiro.
Tíre noano masija.
13 Mʉhʉre noano yʉ yahurire yoa pahñoga.
Cristo Jesu yaina jina tirore noano wacũ tuaja mari.
à yoa painare noano cahĩja.
à jicʉ tirore ã wacũ tuarucuga mʉhʉ.
Tuhsʉ,
painare noano cahĩrucuga.
14 Espíritu Santo mari mehne jiriro to yoadohoro mehne noaa buheare noano yoaga.
Quihõno buhega.
Soro ni buhecʉ tjiga.
15 Jipihtina Asia yahpa macaina Jesu yaina yʉhʉre yoadoho duaeraa cohã wahcãa wahare.
Tina mehne macaina pʉaro Figelo,
Hermógenes ãta yoare tina cʉ̃hʉ.
Ti ã cohã wahcãrire masi tuhsʉra mʉhʉ.
16,17 Ti ã cohãpachʉta Onesíforo sehe payʉ tahari yʉhʉre yoadohoro noano yajeri sãachʉ yoare.
à yoaro peresui yʉ jichʉ tiro yʉhʉre bʉo tisãaerare.
à jiro Romai yʉ jichʉ ã macarucuri jire yʉhʉre.
à macarucuro yʉhʉre bocare.
à jiro tirore,
jipihtina to ya wʉhʉ macaina cʉ̃hʉre pja ñʉnohca Jesu mari pʉhtoro.
To ã yoahto sehe tirore sini payoja.
18 Ã yoa ahri yahpapʉ Jesu mari pʉhtoro to tjua tahti dachoi tirore pja ñʉnohca.
To ã yoahto sehe tirore sini payoja.
Efesoi payʉ tahari yʉhʉre to yoadohorire noano masina mʉhʉ.