Noa buheare cohãrina cjirire yahuha Paulo Timoteore
4
1 Espíritu Santo ahrire noano yahura:
Pihtiri dacho panocã cãina masa Jesu ya buheare cohãahca.
à cohãa mahñoa buheare watĩa ya buhea sehere tʉho nʉnʉahca tina.
2 Tí buheare mahñorucuina yahuahca masare.
Tina mahñorucuina sehe “Ñaa buhiri mariahna sãre”,
ni tʉhotuina jira.
à jia tina ti ñaa yoaare ne tʉhotuerara.
3 Õ sehe ni buheahca tina:
“Namo tiena tjiga.
Ahri chʉare chʉena tjiga”,
ni buheahca tina.
Ti ã chʉ dutierapachʉta Cohamacʉ chʉare bajuamehneno mari chʉhti cjihtire noaare cũri jire tiro.
Mari Cristore wacũ tuaina jichʉ noaa buheare mari masiina jichʉ,
mari ya cjihtire tí chʉare bajuamehnea tiri jire tiro.
Tí chʉare cjʉana tirore “Noana”,
mari nichʉ cahmana tiro.
4 Jipihtia Cohamacʉ to bajuamehneri cjiri noaa jira.
à jina to bajuamehneri chʉare nana,
Cohamacʉre “Noana” nina,
tíre marine cohãeraro cahmana.
Tíre marine chʉ ji coaro cahmana.
à jicʉ paina ti chʉ dutierachʉ tʉhoecʉ tjiga tinare.
5 To bajuamehnea noaa ti jichʉ yahu tuhsʉa tiri jire Cohamacʉ.
à jia tirore “Noana”,
mari ni wahcheri baharo tí chʉa to yoari chʉa noaa waro jia nina.
Jesucristore dahra cohtarirore noarirore yahuha Paulo Timoteore
6 Ahri yʉ yahurire Jesu yainare mari coyeare buhecʉ Jesucristore dahra cohtariro noariro jira mʉhʉ.
à buhecʉ noaa buheare,
quihõno mʉ tʉhori cjirire mʉhʉre ti yahuriro seheta noano mʉ masirire yahuriro jiihca mʉhʉ.
7 Ã jicʉ ti mʉ sʉro ti buherire,
Cohamacʉ ya jieraare tʉhoi tjiga.
Cohamacʉ cahmaa sehere yoaporiro jiga mʉhʉ.
8 Mʉ mʉrocapochʉ noa curera.
Mʉ mʉrocaporiro yʉhdoro Cohamacʉ cahmaare mʉ yoapochʉ noa yʉhdʉara mʉhʉre.
Cohamacʉ cahmaare yoapocʉ mipʉre noano jiihca mʉhʉ.
Mʉ yariari baharopʉ cʉ̃hʉre masa mʉjacʉ noano jiihca mʉhʉ.
9 Tí potocãta jira.
Jipihtina tíre yʉ nirire masiinare “Potocãta jira”,
nino cahmana tinare.
10 Jipihtina tíre ti nihti cjihtire Cohamacʉ cahmaare ti yoahti cjihtire mari tuaro dahraja.
à jina ñano yʉhdʉja mari,
paina marine ñano ti yoachʉ.
Cohamacʉ catiriro,
jipihtinare pichacapʉ wahaborinare yʉhdoriro jira.
Tirore wacũ tuaina pinihtare tiro yʉhdorohca.
à jina to yʉhdohto cjihtore masina,
cohtaja mari.
11 Ahri jipihtia yʉ nirire dutiga Jesu yainare.
à yoa tíre buhega mʉhʉ.
12 Wahmʉno mʉ jichʉ ñʉa paina Jesu yaina mʉhʉre yʉhdʉrʉca duaboca.
Ti ã yoaerahto sehe õ sehe yoa ñoga tinare.
Masare cahĩga.
à yoa Jesure wacũ tuarucu,
buhiri marieriro jiga.
Wahmʉno jipaihta mʉ ã yoachʉ ñʉa mʉhʉre yʉhdʉrʉcasi tina.
à jia mʉ durucurire tʉhoa,
mʉ yoarire ñʉa mʉhʉre ñʉ cũahca.
13 Ã jicʉ mʉ cahapʉ yʉ sʉhto pano Jesu yainare Cohamacʉ yare ti joari pũre buhe tuhsʉ,
mʉsa cahmachupe tahari tinare ã yahurucuga.
14 Jesu yaina mehne macaina pʉhtoa Cohamacʉ yare yahu tuhsʉ mʉ bui ti wamomacarine duhu payore.
Ti ã duhu payochʉ Cohamacʉ ya cjihtire mʉ yoa masihto sehe cũre mʉhʉre Cohamacʉ.
To ã cũrire boecʉ tjiga.
à yoa tíre ã yoarucuga.
15 Ahri dutiare tuaro cahmaga.
à cahmacʉ ahri dutiare ã yoarucuga mʉhʉ.
Mʉ ã yoari baharo noaare mʉ yoa namochʉ jipihtina ñʉahca.
16 Mʉhʉ sehe noano yoaga,
“Soro yoari”,
nicʉ.
à yoa noano buhega mʉhʉ,
“Soro buheri”,
nicʉ.
à jicʉ mʉ basita pichacapʉ wahaboriro yʉhdoriro jiihca.
à jia mʉhʉre tʉhorina cʉ̃hʉ pichacapʉ wahaborina yʉhdʉrina jiahca.