Jesu yaina pʉhtoa ti yoahtire yahuha Paulo
3
1 Masa Jesu yaina pʉhtoa ji duaa,
noaare yoa duaa nica tina.
Tí potocãta jira.
2 Jesu yaina pʉhtoare besecʉ õ sehe jiinare besega:
Buhiri marieinare besega “Paina tinare ñano ni yahusãri”,
nicʉ.
à yoa cãa numiata namo tiinare,
noano tʉho masiinare,
quihõno yoainare,
paina ti ño payoina,
masare wahchea mehne ti wʉhʉre sãa ta dutiinare,
painare noano buhe mihniinare besega mʉhʉ.
3 Ã besecʉ cahaerainare,
cahmacherainare,
masare noano yoainare,
cahma sayoerainare,
niñerure cahĩerainare besega mʉhʉ.
4 Ã yoa mʉ beseina ti ya wʉhʉ macainare noano yahuina,
ti pohnare noano ño payoa mehne yʉhtichʉ yoaina,
noano yahuina jijaro.
5 Tinare yʉhtichʉ yoa masieraa,
noano yahu masieraa,
Jesu yaina cʉ̃hʉre noano yahu,
yʉhtichʉ yoa masieraboca tina.
6 Jesu yaina pʉhtoa ji duaina Jesu yaina wahma sãaina jia,
tina pʉhtoa ji masierara.
Wahma sãainare Jesu yaina pʉhtoa mʉsa cũchʉ tina “Noa yʉhdʉaina jija”,
ni tʉhotuboca.
Ti ã ni tʉhotuchʉ Cohamacʉ tinare buhiri dahre dutirohca watĩnore to yoariro seheta.
Watĩno cʉ̃hʉ ãta ni tʉhotua timaha Cohamacʉre yʉhdʉrʉca duaro.
7 Ã yoa pʉhtoa ji duaina Jesu yaina jieraina ti ño payoina jiro cahmana tinare.
Noano yoaina ti jichʉ ñʉa paina ño payoahca tinare.
à jia masa tinare ñano quiti dahresi.
à jiro watĩno tinare dojomehne masisi.
Jesu yainare yoadohoina ti yoahtire yahuha Paulo
8 Ã yoa Jesu yainare yoadohohtina sehere besecʉ õ sehe jiinare besega:
Tina masa ti ño payoinare,
noano potocãta durucuinare,
cahaerainare,
niñerure cahĩerainare,
mahñoa mehne wapata duaerainare,
9 Cohamacʉ to yahuri buhea to nino seheta yoainare,
ñaa buhiri marieinare besega mʉhʉ.
10 Tinare mʉ besehto pano Jesu yainare yoadohoina ji duainare ti yoarire ñʉga mʉhʉ.
Tinare mʉ ã ñʉri baharo tina sehe ñaa buhiri marieina,
ñaare yoaeraina jia,
Jesu yainare yoadohoina sãajaro tina.
11 Ã yoa ti namosãnumia õ sehe ti jichʉ cahmaja mari.
Masa ti ño payoa numia,
masa noaa numia,
ñano quiti dahrera numia,
tʉho masia numia,
jipihtiare noaare yoarucua numia ti jichʉ cahmaja mari.
12 Jesu yainare yoadohohtinare besecʉ cãa numiata namo tiinare,
ti pohnare paina ti wʉhʉ macaina cʉ̃hʉre noano yʉhtichʉ yoainare besega.
13 Ã jia mʉ beseina Jesu yainare ti yoadohochʉ paina tinare noano ñʉ ji coaahca.
à jia tina yoadohoina sehe noaa buheare,
Jesucristore ti wacũ tuaa cʉ̃hʉre cuiro marieno buheahca tina.
Cohamacʉ ya buheare yahuha Paulo
14,15 Mipʉre mʉ cahapʉ waha duai nimaja.
à waha duapaihta mipʉre wahaerasinicʉ ahri pũi yahu,
mʉhʉre joarocai nija.
Jesu yaina cahmachuina watoi mʉsa dohse yoahtore mʉhʉre yahu joarocai nija,
“Michapucaca yʉhʉ wahaerasiniboca”,
nicʉ.
Jesu yaina Cohamacʉ catiriro yaina jira.
To yaina potocã jia buheare Cohamacʉ ya buheare cjʉara.
à cjʉaa,
tíre buherucura.
16 Ahri potocã tjira.
Marine Cohamacʉ to buheri cjiri,
panopʉ mari noano masierari cjiri noa yʉhdʉa buhea jira.
Ahri buhea õ sehe jira:
Tiro Cristo mari pjacʉ seheta pjacʉ tiriro masa bajuari jire.
Noariro,
ñaa marieriro to jichʉ ñore Espíritu Santo sehe.
Anjoa cʉ̃hʉ tirore ñʉri jire.
à yoa buhe duti to cũrina paye yahpari macainare to yare buhei sã.
à jia ahri yahpai masa payʉ tirore wacũ tuare.
Baharo mʉanopʉ Cohamacʉ naahre tirore.
Tí jira noaa buhea.