1 Timoteo
Paulo Timoteore joarocaha
1
1,2 Yʉhʉ Paulo ahrire mʉhʉre Timoteore joarocaja.
Cohamacʉ marine pichacapʉ wahaborinare yʉhdoriro jira.
Jesucristo yare buhe dutiro to cũriro jija yʉhʉ.
To Pʉcʉro,
to Macʉno Jesu mehne ti dutiriro seheta ti cũriro jija yʉhʉ.
Jesuta marine yʉhdora.
à jina marine to yʉhdohtore masina,
tíre cohtaja mari.
Mʉhʉre Timoteore Jesu yare buhei.
Yʉ ã ni buhechʉ tʉhocʉ Jesure wacũ tua dʉcare mʉhʉ.
à jicʉ mʉhʉ potocãta yʉ macʉ yoaro sehe jicʉta nina.
Cohamacʉ mari Pʉcʉ mehne,
mari pʉhtoro Jesucristo mehne mʉhʉre noa dutija.
à yoa mʉhʉre cahĩa,
pja ñʉa ti yoadohoa mehne noano jiga mʉhʉ.
Paulo mahñoa buheare buhe dutieraha
3 Sohõ jiri pjare Macedonia yahpapʉ wahacʉ mʉhʉre Efesoi cũ yʉhdʉ wahcãi.
Tói cãina ti ya buheare mahñoa buheare buheina jire.
Tí buheare mʉ buhe dutierahtiro cjihtore cũi yʉhʉ mʉhʉre.
4 Tina ti mʉ sʉro ã buhemacanocahna.
à yoa ti coyea panopʉ macaina cjiri ti mʉ sʉro ti buherire ã buherucura.
Tí buhea mehne paina mehne cahma sayorucura.
Cohamacʉ marine to dutirire noano yoachʉ yoaerara tina ã buhea.
Cohamacʉ ya sehere yoana tirore wacũ tuaja.
à jicʉ ti mʉ sʉro ti buherire buhe dutierahtiro cjihtore cũi mʉhʉre.
5 Ã cũi mʉhʉre Jesu yaina painare ti cahĩhti cjihtire.
Ñaa buhiri mariea mehne,
noaa wacũa mehne,
potocã Cohamacʉre wacũ tuaa mehne painare ti cahĩhti cjihtire ã cũi mʉhʉre.
6 Cãina ahri noaa buheare cohã tuhsʉ paye buhea sehere cahmana tjoa.
à ti cahmachʉ,
tí buhea sehere ti cahma sayochʉ tó wahaerara.
Tí buheare ti cahma sayoa yaba cjihti jierara.
7 Tina Cohamacʉ dutiare buheina ji duamana.
à buhe duapahta tí buheare tina ti basi noano masierara.
Tí buheare masiina yoaro sehe buhepahta tí buheare ne masierara tina.
8 Cohamacʉ dutiare Moise cjiro marine to cũri cjirire quihõno mari buhechʉ noaa dutia jira.
Tíre mari noano masija.
9,10 Tí dutiare buhena ahrire masino cahmana:
Tí dutia noaare yoainare ti buhehti cjihti jierara.
Ahrina sehere ti buhehti cjihti jira.
Pʉhtoare cohã duainare,
dutiare yʉhdʉrʉcainare,
ñaa dihtare yoainare,
ñano buhiri tiinare,
Cohamacʉre ño payoerainare,
Cohamacʉ yare cahmaerainare,
ti pʉcʉsʉmare wajãinare,
ti pocosãnumia cʉ̃hʉre wajãinare,
paina masare wajãinare,
numia mehne ñano yoainare,
mʉa mehne ñano yoaa numiare,
cahma numia mehne ti ñano yoariro seheta mʉa sahsero o numia sahsero jipahta ti pjacʉri mehne ñano yoainare,
masa pohnare paina cʉ̃hʉre duhti yacainare,
mahñoinare,
painare mahñoa mehne yahusãinare Cohamacʉ dutia Moise cjiro marine to cũri cjiri sehe tinare buhehti cjihti jira.
à yoa paina jipihtinare noaa buheare yʉhdʉrʉcainare buhehti cjihti jira Cohamacʉ to dutia.
11 Tí buhea noaa buhea sehe noariro Cohamacʉ to ya buheata jira.
Tí buhea sehere yʉhʉre Cohamacʉ buhe dutire.
Cohamacʉ Paulore to pja ñʉare yahuha tiro
12 Ã yʉ buhechʉ Jesucristo mari pʉhtoro yʉhʉre tuaare waro yʉhʉre yoadohora.
“Paulo noano buherohca yʉ yare”,
ni tʉhoture Jesu yʉhʉre.
à jiro yʉhʉre besero tirore yoadohohtiro cjihtore cũre yʉhʉre.
To ã yoachʉ “Noana”,
nija yʉhʉ tirore.
13 Tó panopʉre Cristore yʉ ñano durucupachʉta,
to yainare ñano yʉ yoapachʉta,
tiro yʉhʉre beseri jire.
Tirore masierasinicʉ tirore ñano yoacʉ “Ñano yoai nica yʉhʉ”,
ni tʉhotueracʉrʉ.
Yʉ ã masierasinichʉ ñʉno tiro pja ñʉre yʉhʉre.
14 Ã pja ñʉno,
Cohamacʉ mari pʉhtoro yʉhʉre tuaro cahĩno,
noano yoare yʉhʉre.
à yoa Cristo Jesure wacũ tuachʉ yoare yʉhʉre tiro.
à yoaro painare cahĩchʉ yoare yʉhʉre Cohamacʉ.
15 Yʉhʉ sehe paina yʉhdoro ñaa yʉhdʉariro jimai.
Ñaina mari jipachʉta Jesucristo ahri yahpapʉ tari jire ñainare pichacapʉ wahaborinare yʉhdohtiro cjihto.
Tí potocã tjira.
To ã jiriro jichʉ jipihtina tíre masijaro.
16 Ñaa yʉhdʉariro yʉ jipachʉta tiro yʉhʉre pja ñʉre.
à pja ñʉno Jesucristo suaro marieno yʉhʉre to noano yoarire masichʉ yoaro nire painare baharo tirore wacũ tuahtinare masichʉ yoaro taro.
à wacũ tuahtina mʉanopʉ ã jirucuahca.
17 Cohamacʉ jipihtia dachoripe masa bui pʉhtoro jira.
Tiro ne yariaerara.
Mari mehne to jipachʉta tirore ñʉeraja mari.
Tiro dihta Cohamacʉ waro jira.
“Potocãta noariro,
tuariro jira tiro”,
nijihna tirore.
Jipihtia dachoripe tirore ño payojihna.
Ãta yoajihna.
18 Timoteo,
yʉ macʉ yoaro sehe jira mʉhʉ.
à jicʉ mipʉre ahrire mʉhʉre dutija:
Mari coyea Jesu yaina Cohamacʉ yare yahu mʉhtaina baharo mʉ yoahtire ti ni mʉhtariro seheta mʉhʉre dutija.
Cristo yare noano yahurucuga.
à yoa ñano yʉhdʉpaihta tirore wacũ tua duhui tjiga mʉhʉ.
Tuhsʉ,
to yare quihõno buherainare poto yahuga duhuro marieno.
19 Jesure ã wacũ tuarucuga.
Ñaa buhiri marieriro jiga.
Noaa dihtare yoaga.
Cãina tíre yoaeraa Jesu yare cohãna.
à cohãa tirore wacũ tua duhure.
20 Ãta yoare Himeneo,
Alejandro mehne.
“Watĩno to cahmano seheta yoawahnojaro mʉsare”,
ni cũi tinare,
ñano Cohamacʉre ti durucu namoerahto sehe.