“Sã ya cjihtire Cohamacʉre sini payoga”, ni joaha Paulo cʉ̃hʉ
3
1 Mipʉ sã coyea,
sã ya cjihtire Cohamacʉre sini payoga mari pʉhtoro Jesu to buhea payʉ masare sã buhehto sehe.
To buheare mʉsa noano cahmariro seheta paina cʉ̃hʉ tí buheare ño payoa mehne ti cahmahto sehe sini payoga mʉsa Cohamacʉre.
2 Cãinata Jesure wacũ tuara.
Paina sehe to yare tʉho duaeraa,
Jesure wacũ tuaerara.
à jina ñaina masa sãre ti ñano yoa duachʉ Cohamacʉre sini payoga mʉsa sãre to yoadohohto sehe.
3 Mari pʉhtoro Jesu to niriro seheta yoariro jira.
à jiro mʉsare tirore wacũ tuachʉ yoarohca.
à yoa tuhsʉ,
watĩno mʉsare to ñano yoa dutichʉ tiro mʉsare yoadohorohca.
4 Cohamacʉ mʉsare to yoadohorire masija sã.
à jina mʉsare sã dutiriro seheta mʉsa yoachʉ cʉ̃hʉre masija sã.
à yoa ãta yoarucunahca mʉsa.
Tí cʉ̃hʉre masija sã.
5 Cohamacʉ mʉsare to cahĩare mʉsare masichʉ yoajaro.
à jina Cristo yoaro sehe ñano yʉhdʉpanahta cʉ̃no pjaina jichʉ yoajaro mʉsare mari pʉhtoro.
Marine tuaro dahraro cahmana
6 Jesucristo mari pʉhtoro to dutiro mehne õ sehe ni dutija mʉsare:
Jesu yainare dahra duaerainare,
mʉsare sã buheriro seheta yoaerainare,
tinare piti tiena tjiga.
à ñʉnocahga tinare.
7 Sohõ jiri pja mʉsa mehne sã jichʉ tuaro sã dahrachʉ ñʉre mʉsa.
à jina sã yoariro seheta mʉsa cʉ̃hʉre dahraro cahmana.
Tíre noano masina mʉsa.
8 Ã jina mʉsa chʉare wapa marieno chʉerahi sã.
à yoa dachopʉre,
ñamipʉ cʉ̃hʉre tuaro dahrai sã “Mʉsa chʉare sã siniri”,
nina.
9 Sã buheri wapa mʉsare wapa cahmaboa sã.
à wapa cahmaborina jipanahta wapa cahmaerana tuaro dahrai sã,
mʉsa sehe sãre mʉsa ñʉ cũhto sehe.
10 Mʉsa mehne jina,
õ sehe ni buhei mʉsare:
“Dahraeraina chʉea tjijaro”,
ni buhei sã mʉsare.
11 Cãina mʉsa mehne macaina ne dahra duaerayuhca.
à dahra duaeraa,
painare ã yahu wajamacanoca,
caribobiaro yoayuhca tina.
12 Mari pʉhtoro Jesucristo to dutiro mehne ã dahra duaerainare õ sehe nija:
Noano wahchea mehne dahrajaro tina ti noano jihto sehe,
ti ya chʉare ti chʉhto sehe.
13 Sã coyea,
mʉsa sehe noaare yoarucuna pumena tjiga.
14 Cãina tó macaina ahrire sã joarocarire yʉhdʉrʉcaboca.
Ti ã yoachʉ ti yoarire noano ñʉga.
à ñʉna tinare piti tiena tjiga ti bʉoro wahahto sehe.
15 Ã piti ti duhupanahta tinare ñʉ tuhtiena tjiga.
Tina mʉsa coyea,
Jesu yaina tjira.
Ti ã jichʉ ti yʉhdʉrʉcarire yahuga tinare tíre ti yoaerahto sehe.
Paulo tinare noa duti batoaha
16 Mari pʉhtoro Jesu marine noano jichʉ yoariro mehne dachoripe noano jirucuga mʉsa.
à jicʉ “Mari pʉhtoro mʉsa jipihtina mehne jirucujaro”,
nicʉ mʉsare noa dutija.
17 Yʉhʉ Paulo,
yʉ wamomaca mehneta mipʉre yʉ basita joa batoai nija:
à joacʉ mʉsare noa dutija.
Jipihtia yʉ joarocaa pũrine õ sehe dihta yʉ wamomaca mehne joa batoaja yʉhʉ.
Yʉ õ sehe dihta yʉ joa batoachʉ ñʉna yʉ joarocari pũ to jichʉ masinahca mʉsa.
18 Mari pʉhtoro Jesucristo to cahĩa mehne noano yoajaro mʉsare jipihtinare.