Ñano yoarucurirore yahuha Paulo
2
1 Mipʉre mari pʉhtoro Jesucristo ahri yahpapʉre to tjua tahtore,
tirore mari cahmachu mari piti bocahtore yahu namo duaja yʉhʉ.
Õ seheta tuaro yahu duaja mʉsare,
sã coyea:
2 Paina mʉsare õ sehe niboca:
“Mari pʉhtoro to tjua tahti dacho,
pihtiri dacho jiropʉ nina”,
niboca mʉsare.
Ti ã nichʉ tʉhona,
tʉho cʉaena tjiga.
à yoa tʉho wisiena tjiga.
“Cohamacʉ yʉhʉre ãta niri jire”,
niboca mʉsare pairo.
Pairo cʉ̃hʉ mʉsare buhero ãta niboca.
Pairo cʉ̃hʉ ãta ni joarocaboca,
“Yʉhʉ Paulo tjija”,
ni mahño joarocaro.
3 Paina mʉsare ti ã mahñochʉ tʉhoena tjiga mʉsa.
Tí dachoi ahri yahpa to pihtihto panocã payʉ masa Cohamacʉre duhuahca.
à jiro tí dachoi ñano yoarucuriro pichacapʉ wahahtiro bajuarohca jipihtina ti ñʉhtiro cjihtore.
4 Tiro Cohamacʉ warore,
paina bajueraina masa ti ño payoina cʉ̃hʉre jipihtina masare ño payo dutisi ñano yoarucuriro.
Tiro õ sehe ni tʉhoturohca.
“Ahrina jipihtina bui pʉhtoro jija yʉhʉ”,
ni tʉhoturohca.
à jiro Cohamacʉ wʉhʉi dujiro “Yʉhʉ sehe Cohamacʉ jija”,
ninohca.
5 Mʉsa mehne jisinicʉ tíreta yahui.
¿Tíre wacũerajari mʉsa?
6 Mipʉre pairo sehe ñano yoarucurirore ne ji dutierasinina.
à yoa tirore ji dutierarirore masina mʉsa.
Tiro sehe to dutichʉ to quihõri dacho jichʉ ñano yoarucuriro bajuarohca.
7 Mipʉre masa ti ñʉenoi tiro yoaro seheta paina ñaare yoa tuhsʉra.
Ti ã yoapachʉta ñaare yoa dutierariro to wahahto pano tiro ñano yoarucuriro sehe jisi.
8 To wahari baharo pinihtare ñano yoarucurirota bajuarohca.
Baharo mari pʉhtoro Jesucristo tirore yʉhdʉrʉcarohca.
Ahri yahpapʉ to si sitea mehne tjua taro,
to dʉsero mehne putirocaro,
tirore wajã boarohca.
9 Ñano yoarucuriro sehe watĩno tuaa mehne taro,
payʉ bajuamehnerire,
mahñoa bajuamehnerire yoa ñonohca.
10 Payʉ ñaa to yoa ñoa mehne to ã mahñochʉ pichacapʉ wahahtina sehe tirore tʉhoahca.
Tina sehe noaa buheare cahmaerare.
Ti ã cahmaerachʉ Cohamacʉ tinare pichacapʉ wahahtinare yʉhdosi.
Tina pinihta ñano yoarucuriro mahñoriro to yoarire “Potocã tjira”,
niahca.
11 Ã jiro noaa buheare ti cahmaerari buhiri Cohamacʉ tinare wisiomehnenohca.
à wisiaa mahñoare cahmaahca tina.
12 Ã jiro jipihtina noaa buheare tʉho duaerainare,
ñaa dihtare yoa ji coainare tirota buhiri dahrerohca.
“Cohamacʉ mʉsare beseha to yaina jichʉ yoaro taro”, ni yahuha Paulo
13 Mʉsa sã coyea,
mari pʉhtoro Jesu to cahĩina jira mʉsa.
Dóipʉta wahmanopʉreta mʉsare pichacapʉ wahaborinare to yʉhdohtina cjihtire Cohamacʉ beseri jire mʉsare.
Mʉsare beseri jire Espíritu Santo to tuaa mehne to yaina ñaa marieina mʉsare jichʉ yoaro taro.
à jiro noaa buheare “Potocã tjira”,
nihtina mʉsa jichʉ ñʉno mʉsare beseri jire.
To ã beserina mʉsa jichʉ ñʉna Cohamacʉre wahche,
“Noana”,
nirucuja sã.
14 Noa buheare mʉsare sã buhechʉ Cohamacʉ mʉsare beseri jire mari pʉhtoro Jesucristo to masa mʉjariro seheta mʉsa cʉ̃hʉ mʉsa masa mʉjahto cjihtore.
15 Ã jina yʉ coyea,
noano wacũ tuaina jiga mʉsa.
à jina sã durucua mehne sã joarocaa pũri mehne mʉsare sã buherire noano wacũga mʉsa.
à yoa tí buheare yʉhdʉrʉcaena tjiga.
16 Mari pʉhtoro Jesucristo to basi,
Cohamacʉ mari Pʉcʉ cʉ̃hʉ marine cahĩa,
jipihtia dachoripe marine wahchechʉ yoare.
Marine cahĩa marine pichacapʉ wahaborinare yʉhdoahca.
à jina Cohamacʉ to yʉhdohtore noano masina wahcheja mari.
17 Jesucristo,
mari Pʉcʉ mehne mʉsare noano yoajaro pjíro mʉsa wahchehto sehe.
à yoa jipihtia noaare mʉsa yoahto sehe,
mʉsa noano durucuhto sehe Cohamacʉre mʉsare sini payoja.