“Cohamacʉre ji coachʉ yoa duana õ sehe yoaga”, ni yahuha Paulo
4
1 Mipʉre Jesu mari pʉhtoro to dutiro mehne mʉsare õ sehe ni yahu batoaja:
“Cohamacʉre ji coachʉ yoa duana õ sehe yoaga”,
ni buhei sã mʉsare.
Sã ã buheri baharo sã buheriro seheta yoayuhti mʉsa.
Mʉsa ã yoariro seheta yoa namoga.
Tíre tuaro yoa dutija mʉsare.
2 Jesu mari pʉhtoro to buhe dutiro mehne mʉsare sã buherire noano masina mʉsa.
3 Ahrire mʉsare yahu namoihtja:
Mʉsa õ sehe jichʉ cahmana Cohamacʉ:
Ñaare yoaeraina,
Cohamacʉ yare yoaina jiga.
à jina numia mehne ñano yoaena tjiga.
Mʉsa cʉ̃hʉ numia mʉa mehne ñano yoaena tjiga.
4 Ñano yoapero marieno,
ño payoro mehne mʉsa namosãnumiare cjʉaga.
Cohamacʉ mʉsa tíre masichʉ cahmana.
5 Cohamacʉre cahmaeraina Cohamacʉre masieraina ñaare goa pjaa,
numia mehne ñano ti yoariro seheta yoaena tjiga mʉsa cʉ̃hʉ.
6 Mʉsa ã yoachʉ cahmaerara Cohamacʉ to yairore mʉsa coyeirore mʉsa ñano yoaerahto sehe.
Mʉsa ã ñano yoana mʉsa coyeirore yʉhdʉrʉcana nica.
Mari pʉhtoro Cohamacʉ tí ñaare ti yoachʉ ñʉno buhiri dahrehtiro jinocanota nina.
à jina tíre yahu tuhsʉi mʉsare “Tí buhirire buhiri tiri”,
nina.
7 Ñaare yoahtina cjihtire beserari jire marine Cohamacʉ.
Ñaare yoaeraina cjihtire beseri jire marine.
8 Ã jina jipihtina mʉsa ahri sã buherire yʉhdʉrʉcana,
masa ya buhea sehere yʉhdʉrʉcana nierara mʉsa.
Cohamacʉ ya sehere yʉhdʉrʉcana nina.
Tiro mʉsare Espíritu Santore wariro jira.
9,10 Mʉsa coyeare Jesu yainare mʉsa cahĩhtire Cohamacʉ mʉsare buhe tuhsʉri jire.
To ã buhechʉ potocãta Jesu yainare Macedonia macainare jipihtinare noano cahĩna mʉsa.
Mʉsa ã cahĩchʉ ñʉna “Mʉsa coyeare cahĩga”,
ni buheraja mʉsare.
Tinare cahĩ tuhsʉra mʉsa.
à ni buhe namoerapanahta ahri sehere mʉsare dutija.
Mipʉre painare mʉsa cahĩno seheta cahĩ namoga mʉsa.
11 Ã yoa mʉsa basi cahma ñʉ tuhtiro marieno jiga mʉsa.
Painare soro ni durucuena tjiga.
à ñʉnocahga tinare.
à jina mʉsa ya dahraa sehere noano dahraga.
Panopʉta mʉsare ã yoa dutii.
12 Ãta yoaga mʉsa,
paina mʉsare ti ño payohto sehe,
paina yare mʉsa cariboerahto sehe.
Ahri yahpapʉre Jesu to tjua tahtore yahuha Paulo
13 Coyea,
mipʉre yariarina cjirire yahuihtja mʉsare:
Jesure cahmaeraina Cohamacʉ cahapʉ wahasi.
à jia tina mehne macaina ti yariachʉ ñʉa tuaro cahyara.
Yariarina cjiri ti wahahtore quihõno noano mʉsa masichʉ cahmaja sã,
paina ti cahyariro seheta mʉsa cahyaerahto sehe.
14 Jesu to yariari baharo masa mʉjari jire.
“Ti potocãta jira”,
nija mari.
à niina jina ahri cʉ̃hʉre “Potocãta jira”,
nija mari.
Cohamacʉ sehe to yaina cjirire yariarina cjirire masa mʉjachʉ yoaro,
baharopʉ Jesu mehne na tarohca.
Tí cʉ̃hʉre “Potocãta jira”,
nija mari.
15 Jesu to tjua tachʉ to yaina yariarina cjiri catiina pano masa mʉja mʉhtaahca.
Mari pʉhtoro Cohamacʉ ya yahua tjira ahri.
16 Õ sehe jirohca Jesu to tjua tachʉ:
Mari pʉhtoro to basi tuaro sañurucu mʉhtanohca.
à jiro to anjoa pʉhtoro tuaro pisurohca.
à to pisuchʉ Cohamacʉ to corneta bisiro coa tarohca.
Ti ã yoachʉ Jesu yaina yariarina cjiri masa mʉja mʉhtaahca.
17 Baharo catiinare,
yariarina cjiri mehne Cohamacʉ mʉanopʉ me yehsea cururipʉ mʉjachʉ yoarohca.
To ã yoachʉ mari pʉhtoro Jesure piti bocanahca mari.
à piti bocana jipihtia dachoripe mari pʉhtoro Jesu mehne jirucunahca mari.
18 Ahri yʉ yahurire mʉsa mehne macainare yahuga.
à ni yahuna wahchenahca mʉsa jipihtina.