1 Tesalonicenses
Paulo cʉ̃hʉ joarocaha Jesu yainare Tesalónica macainare
1
1 Yʉhʉ Paulo,
Silvano,
Timoteo sã tiaro ahri pũ mehne mʉsare noa dutija.
Mʉsa sehe Tesalónica macaina mari Pʉcʉ Cohamacʉ yaina jira.
Mari pʉhtoro Jesucristo yaina cʉ̃hʉ jira mʉsa.
à jina Cohamacʉ mari Pʉcʉ,
mari pʉhtoro Jesucristo ti cahĩa mehne mʉsare noa dutija.
Cohamacʉ yoadohoa mehne noano jiga mʉsa.
Jesu yaina Tesalónica macaina sehe Jesure noano wacũ tuaha
2 Cohamacʉre sinina,
jipihtina Jesure mʉsa wacũ tuaare wacũna “Noabiara sãre”,
nirucuja sã mʉsare.
Cohamacʉre sinina,
mʉsa ya cjihtire ã sini payorucuna nija sã.
3 Mʉsa sehe Jesucristore noano wacũ tuayuhca.
à wacũ tuana,
Jesu yare yoayuhca mʉsa.
Jesucristore,
paina cʉ̃hʉre cahĩyuhca mʉsa.
à cahĩna,
Jesu yare tuaro yoana niyuhca mʉsa.
Jesucristore mari pʉhtorore wacũ tuarucuyuhca mʉsa.
à wacũ tuarucuna mʉsare to yʉhdohtore masina,
tíre cohtana niyuhca mʉsa.
à yoa tirore wacũ tua duhuerayuhca mʉsa ñano yʉhdʉpanahta.
Cohamacʉ mari Pʉcʉre sinina,
tíre mʉsa ã yoarire wacũja sã.
4,5 Sã coyea,
Cohamacʉ to cahĩina jira mʉsa.
Mʉsare to beserire masija sã.
Sohõ jiri pja mʉsare noaa buheare buhena ã yahunocana nierahi mʉsare.
Espíritu Santo to tuaa mehne noaa buheare buhena nii mʉsare.
à buhena tí buhea quihõno jichʉ noano masii sã.
à jina mʉsa watoi sã jina,
sã yoarire masina mʉsa.
Mʉsare yoadohona ã yoai sã.
Mʉsare buheina jina Cohamacʉ to beserina mʉsa jichʉ masija sã.
6 Sohõ jiri pjapʉre mʉsa ñano yʉhdʉina jina,
noaa buheare cahmare mʉsa.
Mʉsa ã cahmachʉ,
Espíritu Santo sehe mʉsare noano wahchechʉ yoare.
To ã yoachʉ mʉsa sehe sãre ñʉ cũ,
sã yoariro seheta yoare.
à yoana Jesu cʉ̃hʉre ñʉ cũre mʉsa.
7 Ã jia Jesu yaina Macedonia yahpa macaina,
Acaya yahpa macaina cʉ̃hʉ Jesu yare mʉsa yoarire masire.
à masia tina cʉ̃hʉ mʉsare ñʉ cũ,
mʉsa yoariro seheta yoara.
8 Macedonia yahpa macaina Acaya yahpa macaina cʉ̃hʉ mari pʉhtoro yare mʉsa buhechʉ tʉhorocare.
Cohamacʉre mʉsa wacũ tuarire tʉhorina sehe tina dihta jierare.
Jipihtiro macaina mʉsa wacũ tuarire tʉhoyuhti.
à jia sã tinare yahuerapachʉta tíre masi tuhsʉre tina.
9 Ã jia mʉsa cahai sã tinirire,
sãre mʉsa noano piti bocarire yahure tina jipihtiro macainare.
à yoa Cohamacʉ sehere wacũ tuana,
“Cohamacʉ jira”,
mʉsa nia masʉrine mʉsa cohãnocarire,
Cohamacʉ ya sehere mʉsa yoarire yahure tina jipihtiro macainare.
Tiro Cohamacʉ sehe catiriro,
Cohamacʉ waro jira.
10 Ã yoaa “Cohamacʉ macʉnore mʉanopʉ tahtirore Tesalónica macaina cohtaa nina”,
ni yahura masa mʉsare.
To macʉnore yariariro cjirore Cohamacʉ masori jire.
To ã masochʉ to macʉno Jesu sehe marine ñabiaro to buhiri dahreborinare yʉhdori jire.