Colosenses
Colosa macainare joarocaha Paulo cʉ̃hʉ
1
1,2 Yʉhʉ Paulo mari coyeiro Timoteo mehne mʉsare Colosa macainare joarocaja sã.
Yʉhʉ Jesucristo to yare buhe dutiro to cũriro jija.
Cohamacʉ to cahmano seheta Jesu yʉhʉre to yare buhehtirore cũre.
à jina mʉsare sã coyea Cristore wacũ tuarucuinare joarocaja.
à jina Cohamacʉ mari Pʉcʉ mehne mʉsare noa dutija.
à jina tiro mehne noano jiga mʉsa.
Jesu yainare Paulo sini payoha Cohamacʉre
3 Mʉsa ya cjihtire Cohamacʉre sini payona “Noana”,
ã nirucuja sã.
Tiro sehe mari pʉhtoro Jesucristo Pʉcʉro jira.
4,5 Tirore “Noana”,
nirucuja sã mʉsa jia tiare tʉhorocana.
To ya buhea potocã jia buheare mʉsa tʉhoriro seheta jipihtia dachoripe mʉanopʉ mʉsare jichʉ yoarohca Cristo sehe.
To ã yoahtiro jichʉ tíre mʉsa ã cohtarucu wama tira.
à jina Cristo Jesure wacũ tua wama tira mʉsa.
Tuhsʉ,
to yainare cahĩ wama tira mʉsa.
Mʉsa ã jiina jichʉ Cohamacʉ mehne wahche tirore “Noana”,
nija sã.
6 Jipihtiropʉre Jesu yaina potocã jia buheare noaa buheare ti yahuchʉ tʉhoa masa Cohamacʉ yare cahmaa,
noaa sehere cohtota namoa nina.
Mʉsa cʉ̃hʉ noaa buheare Cohamacʉ mʉsare to cahĩare quihõno mʉsa tʉho dʉcari baharo tina yoaro sehe Cohamacʉ yare cahmana,
noaa sehere cohtota wama tira mʉsa.
7 Ahrireta mʉsa cʉ̃hʉre Epafra noaa buheare yahuri jire.
Tiro sã tuaro cahĩriro sã mehne Cristore dahra cohtariro,
Cristo yare ne duhuerariro jira.
Mʉsare sã buhe masierachʉ tiro sehe sãre cohtotariro jiro,
mʉsare buheri jire.
8 Tiro jira mʉsa jia tiare sãre yahuriro.
Espíritu Santo to yoadohoa mehne Jesu yainare mʉsa cahĩrire yahure sãre.
9 Ã jina mʉsare tʉhorocana mʉsare sã tʉhorocari dachoihta dóihta ã sini payorucuja sã Cohamacʉre.
Cohamacʉ to cahmaare mʉsa masi pahñohto sehe tirore sini payoja sã.
Espíritu Santo yoadohoro mehne Cohamacʉ yare noano masiina mʉsa jihto sehe sini payoja sã.
10 Õ seheta sini payoja sã mari pʉhtoro Cristo to cahmano seheta noano mʉsa yoahti cjihtire.
Mʉsa ã yoachʉ ñʉno tiro wahcherohca.
à jina jipihtia noaare mʉsa yoahto sehe sini payoja.
Cohamacʉre mʉsa masi namohto sehe sini payoja.
11 Ahri yʉ yahuhti cʉ̃hʉre sini payoja sã.
Cohamacʉ ya tuaa noa yʉhdʉara.
Cohamacʉ tí tuaa mehne mʉsa tuahtore mʉsare sini payoja.
Õ seheta sini payoja mʉsa ñano yʉhdʉpanahta wahchea mehne mʉsa cʉ̃no pjahto sehe.
12 Cohamacʉ to yaina cjihtire marine jichʉ yoari jire.
à yoaro to waare cjʉahtina cʉ̃hʉre yoari jire marine tiro.
To jiropʉ buhriaropʉ mari cjʉahtire warohca tiro.
To ã yoachʉ ñʉna tirore mʉsa “Noana”,
nihto cjihtore sini payoja sã mʉsare.
13 Tirota marine pichacapʉ wahaborinare yʉhdʉchʉ yoari jire.
Tó panore ñaare yoa duhu masieramai mari.
Ñariro sehe nahitianoi jiriro marine dutiriro jisiniri jimare.
Cohamacʉ sehe to macʉnore to cahĩrirore pʉhtoro sõno mʉanopʉ marine jichʉ yoari jire.
à jina to macʉno mehne jinahca.
14 To macʉno mehne marine yʉhdora Cohamacʉ.
To macʉno to yariaro mehne mari ñaa yoari buhirire bori jire Cohamacʉ.
Masa Cohamacʉ mehne ti cahma ti pʉ bʉhʉseheri ti ñʉ tuhtichʉ ñʉno Cristo bosaha
15 Jesu Pʉcʉrore ñʉmahnoerara.
To macʉno sehe to Pʉcʉro to dohse jia tiare ñona masare.
Tiro to macʉno jipihtina pano jipihtia pano ji tuhsʉri jire.
à jiro jipihtia pʉro,
jipihtina bui pʉhtoro jira tiro.
16 Cohamacʉ to dutichʉ to macʉno sehe to Pʉcʉro mehne jipihtinare,
jipihtiare bajuamehneri jire.
Mʉanopʉ jiare ahri yahpapʉ jia cʉ̃hʉre bajuamehneri jire.
Mari ñʉrire mari ñʉerari cʉ̃hʉre bajuamehneri jire.
Mʉano macaina ñʉmahnoerainare pʉhtoare,
dutiinare,
jipihtinare bajuamehneri jire.
à jia jipihtina to yaina cjihti jimari jire.
Jipihtia cʉ̃hʉ to ya cjihti jimari jire.
17 Jipihtina pano jipihtia pano Cristo ji tuhsʉri jire.
à yoa to tuaa mehne jipihtia cʉ̃hʉ jipihtina cʉ̃hʉ mipʉre jia nina.
18 Mari to yaina jipihtina to pjacʉ yoaro seheta to ya curua macaina jija.
à jiro tiro mari dapu mari pʉhtoro jira.
Tiro yariaro masa mʉja mʉhtariro jira jipihtina bui pʉhtoro,
jipihtia pʉro jiro taro.
19 Cristo to Pʉcʉro mehne cʉ̃no potori to jiro seheta jira.
To ã jichʉta cahmana Cohamacʉ sehe.
20 Jipihtina to Pʉcʉrore cahma ñʉ tuhtia tiri jire.
à ti cahma ñʉ tuhtichʉ ñʉno Cristo tinare “Ñʉ tuhtiena tjiga”,
ni yahuri jire.
Mʉano macainare ahri yahpa macaina cʉ̃hʉre to Pʉcʉrore “Ñʉ tuhtiena tjiga”,
ni yahuri jire Cristo.
à yoa mʉano macaa ahri yahpa macaa cʉ̃hʉ noano ti jichʉ cahmari jire tiro.
à mari ñʉ tuhtirire duhuchʉ yoa duari jire tiro crusapʉ yariaro to di cohãno.
To Pʉcʉro to cahmariro seheta ã yoari jire Cristo.
21 Mʉsa cʉ̃hʉre ãta yoari jire tiro.
To Pʉcʉrore ñʉ tuhtiina tiro mehne jieraina jimari jire mʉsa cʉ̃hʉ.
Ñaare yoari jimare mʉsa.
22 Ã jimarina mʉsa jipachʉta tiro to yariaro mehne to Pʉcʉrore mʉsare ñʉ tuhtierachʉ yoari jire tiro.
à yoari jire tiro noaina ñaa buhiri marieina mʉsare to yoahto cjihtore.
Mʉsa ã jichʉ tiro mʉsare tó sehe jiinapʉre to Pʉcʉrore warohca.
23 Ãta warohca tiro mʉsa tirore wacũ tuarucuchʉ.
Ãta yoarohca tiro noaa buheare mʉsa tʉhorire mʉsa boerachʉ tí buheare mʉsa ã yʉhtirucuchʉ.
Tí buheare noaa buheare jipihtina ahri yahpapʉre jiina tʉhori jire.
à jicʉ yʉhʉ cʉ̃hʉ Paulo Cristore dahra cohtariro jicʉ,
tí buheareta yahuriro jija.
Jesu yainare tina mehne macainare yoadohohtinare cũha Paulo
24 Cristo mari ñano yoari buhirire ñano yʉhdʉri jire.
à jicʉ yʉhʉ cʉ̃hʉ mʉsare yʉ buheri buhiri ñano yʉhdʉcʉ wahcheja.
à ñano yʉhdʉcʉ Cristo marine to cũrire yoa sohtori tii nija.
à jicʉ wahcheja.
Cristo yare mari yoari buhiri mari ñano yʉhdʉ namohto dʉhsasinina mini.
à jicʉ tirore mʉsa wacũ tuahtore ñano yʉhdʉcʉ,
wahcheja yʉhʉ.
To pjacʉ yoaro sehe jiina to ya curua macaina jira mʉsa.
25 Jesu yainare yoadohohtirore cũre Cohamacʉ yʉhʉre.
Mʉsa ya cjihtire yoahtirore yʉhʉre cũre tiro.
To yare jipihtiropʉre yahu pahñohtirore cũre yʉhʉre.
26 Tí to yare panopʉre payʉ tjururi macainare yahu pahñoera tiri jire Cohamacʉ.
Mipʉre ahri tjuru macainare to yainare tíre noano yahu pahñonocare jʉna.
27 “Judio masa jieraina ya cjihtire yʉ ya buhea noa yʉhdʉara”,
ni to yainare tíre yahuri jire.
Pano to yahuerari cjirire yahuri jire.
Õ sehe jira to ya:
Cristo to yaina mehne jira.
To ã jichʉ to yaina mʉanopʉ Cohamacʉ cahapʉ noa yʉhdʉaropʉ jiahca.
Tí jira panopʉ ti masierari cjiri Cohamacʉ ya.
28 Cristoreta yahuja.
Jipihtinare cuisãana tinare buheja sã.
Noano masia mehne buheja sã noano Cristore masare masichʉ yoana tana.
à buheja sã to yare noano yoaina ñaa buhiri marieina tinare jichʉ yoana tana.
29 Ahri jira yʉ dahraa.
Cohamacʉ to ya tuaa mehne yʉhʉre to wari tuaa mehne tuaro dahraja yʉhʉ,
to yare buhecʉ.