Cristo wiho jiriro to sãari baharo, jipihtina bui pʉhtoro cjihto wahaha
2
1,2 Cristo mʉsare noano yajeripohna tichʉ to yoachʉ Cristo to cahĩa mehne mʉsa wahchena,
yʉhʉre noano wahchechʉ yoaga mʉsa.
à yoa Espíritu Santo jipihtina mʉsa mehne to jichʉ painare cahĩina,
pja ñʉina jina,
yʉhʉre noano wahchechʉ yoaga mʉsa.
Ahri yʉ nihtire mʉsa yoachʉ wahcheihca:
Cʉ̃no potori noano yajeripohna tiga mʉsa.
Tuhsʉ,
cʉ̃no potori tʉhotuina ji,
mʉsa basi cahma cahĩga.
à yoa cʉ̃no mehne noano jiga.
3 Mʉsa ya dihtare tʉhotuina,
painare yʉhdʉrʉca duaina jiena tjiga.
à tʉhotunocaina jiga mʉsa.
à jina painare noano ño payo,
õ sehe ni tʉhotuga:
“Tina sehe yʉ yʉhdoro noaina jira”,
ni tʉhotuga.
4 Cʉ̃iro painare yoadoho duaeraboca.
To ya cjihti dihtare tʉhoturiro jiboca.
Tiro yoaro sehe yoaena tjiga.
Paina cʉ̃hʉre yoadohoga.
5 Cristo Jesu painare yʉhdʉrʉca duaerariro to jiriro seheta mʉsa cʉ̃hʉ painare yʉhdʉrʉca duaeraina jiga.
6 Tiro sehe Cohamacʉ waro jiparota “Cohamacʉ mehne cʉ̃no potori yʉ jiare ne wijaasi yʉhʉ”,
ni tʉhotuerari jire tiro.
7 Ã ni tʉhotueraro tiro Cohamacʉ mehne cʉ̃no potori to jiare wijaa,
õpʉ taro,
masʉnota masa bajuaro,
tiro dahra cohtariro yoaro sehe ji dʉcari jire.
8 Ã jiro tiro masʉno cʉ̃no potori pjacʉ tiriro jiro,
wiho jiriro waro sãari jire.
à sãano “Crusapʉ wajãga tirore”,
ti nichʉ tiro yʉhdʉrʉcaerari jire.
Crusapʉta yariahtiro jiparota tiro yʉhdʉrʉcaerari jire.
9 Ã jiro Cohamacʉ jipihtina ti ño payohtirore cũri jire Jesure.
à jiro jipihtina bui pʉhtoro sõri jire Cohamacʉ tirore,
10 jipihtina mʉano macaina,
ahri yahpa macaina,
yariaina cjiri yahpa puhichapʉ jiina cʉ̃hʉ Jesu wamare tʉhoina ti na tuhcua caha sʉ ti ño payohto sehe.
11 Ã pʉhtoro sõri jire tirore Cohamacʉ jipihtina “Jesucristo mari pʉhtoro jira”,
ti nihtiro cjihtore.
à nia Cohamacʉre mari Pʉcʉre ño payoa nina.
Cristo yaina buhriaro yoaro sehe jia, noaare masare yahu, masichʉ yoara
12 Ã jina yʉ cahĩina yʉ coyea Jesu yaina mʉsa mehne yʉ jichʉ mʉsa yʉhtirucuriro seheta,
mipʉ yʉ yoaropʉ jichʉ cʉ̃hʉre pano mʉsa yʉhtiriro yʉhdoro yʉhtiga yʉhʉre.
à jina pichacapʉ wahaborina to yʉhdʉchʉ yoarina jina,
Cristo yoaro sehe wahana tana,
Cristo to yoadohoro mehne ñaa marieina jiga.
à jina ño payoa mehne papero marieno Cohamacʉ yare yoaga.
13 Cohamacʉ noaa sehere mʉsare cahmachʉ yoaro nina to cahmano seheta mʉsa yoahto sehe.
à jiro tíre mʉsa yoahtore yoadohoro nina Cohamacʉ.
(To ã yoachʉ tí yʉ niriro seheta Cohamacʉ yare yoaga mʉsa.)
14 Jipihtiare yoana nureno marieno,
mʉsa basi jiape ni durucuro marieno yoaga.
15 Cohamacʉ pohna jira mʉsa.
à jina nureno marieno jipihtiare yoaga mʉsa ñaa buhiri marieina,
ñaare yoaeraina mʉsa jihto cjihto sehe.
à yoaga mʉsa masa mahñoina,
ñaina watoi dojomehneno marieno mʉsa jihto cjihto sehe.
Tina ñaina watoi jina buhriaro to ñʉ masichʉ yoaro seheta noaa buheare buhena masichʉ yoara mʉsa ahri yahpa macainare.
16 Tí buheare mʉsa tʉho ñahari baharo Cohamacʉ mehne ã jirucuhtina wahare mʉsa.
Tí buheare ahri yahpa macainare mʉsa ã buhechʉ ñʉcʉ mʉsa mehne wahcheihca.
à jicʉ mʉsare yʉ buherire “Wiho waro buherari jica yʉhʉ”,
niihca yʉhʉ.
à jicʉ Cristo ahri yahpapʉ to tjua tachʉ mʉsa mehne wahcheihca.
à jicʉ bʉoro yʉhdʉsi yʉhʉ.
17,18 Cristore mʉsa wacũ tuachʉ Cohamacʉ mʉsare ñʉ jicoarohca.
To ã ñʉ jicoachʉ masicʉ mʉsare Cristo yare yʉ buheri buhiri yʉhʉre ti wajã duapachʉta wahcheihtja.
à jina mari jipihtina cʉ̃no potori wahchenahca.
Tó seheta mʉsa cʉ̃hʉre cahyaro marieno wahchero cahmana yʉhʉ mehne,
yʉ yariari baharo.
Timoteore, Epafrodito cʉ̃hʉre yahuha Paulo
19 Mari pʉhtoro Jesu to cahmachʉ soaro mehne Timoteore mʉsa cahapʉ waroca duaja yʉhʉ mʉsa jia tiare masicʉ tacʉ.
à masiipʉta wahcheihca.
20 Tiro Timoteo yʉ yoaro seheta mʉsa noano jihto cjihtore potocãta pjíro tʉhotura mʉsare.
Pairo to yoaro sehe jiriro mariahna yʉhʉ mehne.
21 Paina sehe jipihtina ti cahmaa dihtare yoa duaa,
Cristo Jesu to cahmaa sehere yoa duaerara.
22 Timoteo sehe noano yoariro to jiare masina mʉsa.
Yʉ macʉ yoaro seheta tiro yʉhʉ mehne noaa buheare yahua tihre.
23 Ã jicʉ pʉhtoa yʉhʉre ti dohse yoahtore masicʉta,
Timoteore mʉsa cahapʉ waroca duaja.
24 Ã yoacʉ mari pʉhtoro Jesu to yoadohoa mehne soaro mehne yʉhʉ cʉ̃hʉ mʉsa cahapʉ wahaihtja.
25,26 Yʉhʉre yoadoho dutina mʉsa Epafroditore warocari jire yʉ cahapʉ.
Tiro yʉ coyeiro Jesu yairo yʉhʉ mehne dahrariro,
yʉ piti,
Cohamacʉ yare buhe tuariro jira.
Tiro mʉsare tuaro wacũrocara.
à jiro to dohatirire mʉsa tʉhochʉ masino tiro sehe pjíro cahya tʉhotuhre.
à pjíro to tʉhotuchʉ ñʉcʉ “Tirore mʉsa cahapʉ waroca tjuro cahmana yʉhʉre”,
ni tʉhotuja yʉhʉ mipʉre.
27 Potocãta tiro tuaro dohatihre.
Mahano yariabiho yʉhdʉhre.
To ã tuaro dohatipachʉta Cohamacʉ tirore pja ñʉno,
yʉhdʉchʉ yoahre.
Tiro to yariachʉ yʉhʉ sehe pano yʉ cahyariro yʉhdoro tuaro cahyaboa.
à jiro Cohamacʉ yʉhʉ cʉ̃hʉre pja ñʉhre tirore yʉhdʉchʉ yoaro.
28 Ã jicʉ mipʉ pinihtare soaro mehne tirore mʉsa cahapʉ waroca duaja pari turi mʉsa tirore ñʉ,
mʉsa yajeri sãahto sehe.
Mʉsa ã wahchechʉ ñʉcʉ yʉhʉ cʉ̃hʉ wahcheihtja.
29 Ã jina tirore Epafroditore mari pʉhtoro yairore mari coyeirore noano wahchea mehne piti bocaga.
à yoana painare tiro yoaro sehe jiinare ño payoa mehne ñʉga.
30 Tiro Cristo yare yoadohomahno mahano yariabiho yʉhdʉre.
Mʉsa sehe yʉhʉre yoadoho masierachʉ tiro sehe yʉhʉre yoadohomahre.
à yoaro yariamahre tiro.