6
1 Mipʉre mʉsa pohnare yahuihtja.
Mari pʉhtoro Cristo yaina jina mʉsa pʉcʉsʉmare noano yʉhtiina jiga.
Mʉsa ã yoana,
quihõno yoana nina.
2,3 Õ sehe nia tiri jire Cohamacʉ dutia:
“Mʉsa pʉcʉsʉmare noano ño payoga”,
ni dutia tiri jire tiro.
Ahri dutia mehne Cohamacʉ yahu namoa tiri jire.
Õ sehe nia tiri jire:
“Mʉsa pʉcʉsʉmare ño payona,
ahri yahpapʉ yoari pja wahchea mehne jinahca mʉsa”,
ni yahua tiri jire.
à ni yahuro ahri dutiare mari yʉhtichʉ mari noano wahahtore coã cũno nia tiri jire.
à jina to niriro seheta mʉsa pʉcʉsʉmare ño payoga.
4 Mipʉre ti pʉcʉsʉmare yahuihtja:
Mʉsa pohnare ã tuhtirucuena tjiga,
“Suachʉ yoari”,
nina.
Mari pʉhtoro Cristo to cahĩa mehne to yoadohoa mehne tinare noano bʉcʉoga.
à yoa quihõno ti yoaerachʉ ñʉna tinare noano yahuga.
5 Mipʉre dahra cohtainare yahuihtja:
Cua pisaro mehne,
ño payoa mehne ahri yahpa macainare mʉsa pʉhtoare,
mʉsare dahra dutiinare noano yʉhtiina jiga.
Mahñono marieno noano yʉhtiina jiga.
Cristore mʉsa yʉhtiro seheta tinare yʉhtiga mʉsa.
6 Ti ñʉrocaro dihtare yʉhtiina jiena tjiga.
Tó sehe yoaina masa dihtare tinare ñʉ jicoachʉ cahmana.
Mʉsa sehe Cristore dahra cohtaina mʉsa jiro seheta mʉsa pʉhtoa cʉ̃hʉre ã yʉhtirucuga.
Cohamacʉ to cahmano seheta noano wahchea mehne yʉhtiina jiga.
7 Ã jina Cristore yʉhtiina mʉsa jiro seheta wahchea mehne yʉhtiga mʉsa pʉhtoa cʉ̃hʉre.
Masa dihtare yʉhtiina jierara mʉsa.
8 Ã yoana ahrire wacũga mʉsa:
Mari jipihtina noaare mari yoachʉ ñʉno mari pʉhtoro Cristo noano yoarohca marine.
Dahra cohtainare,
dahra cohtaina jieraina cʉ̃hʉre noano yoarohca.
9 Mipʉre pʉhtoare dahra dutiinare yahuihtja:
Mʉsare dahra cohtainare noano yoaga.
Tinare noano yʉ yoa dutiriro seheta yoaga mʉsa cʉ̃hʉ tinare.
Tinare noano mehne dutiga,
tuhtiro marieno.
Mʉano macariro Cohamacʉ potocãta ti pʉhtoro jira.
Mʉsa yairo pʉhtoro jira tiro cʉ̃hʉ.
à jina jipihtina mʉsa tirore dahra cohtaina dihta jira.
à jiro tiro cʉ̃no potori ñʉna mʉsare jipihtinare.
à jina mʉsare dahra cohtainare noano mehne dutiga,
tuhtiro marieno.
Cristo yaina watĩnore ti dʉcataare yahuha Paulo
10 Ahrire yahu batoihtja mʉsare:
Cristore noano wacũ tuaina jiga mʉsa.
Mari pʉhtoro Cristo mʉsa mehne jira.
à jina tua yʉhdʉriro to jia mehne wacũ tuaina jiga.
11 Watĩno marine mahñono,
ñano yoa dutira marine.
Cohamacʉ marine dʉcatara ñaare mari yoaerahto sehe.
Marine to dʉcataa surara to dʉcatari suhtiro,
comaa suhtiro yoaro sehe jira.
à jina tí suhtirore mʉsa sãano seheta Cohamacʉ to dʉcataare noano cjʉa pahñoga.
12 Jesu yaina mari jichʉ,
marine ñʉ tuhtiina masa waro jierara.
Mʉano macaina ñaina,
tuaina,
tina sehe jira marine ñʉ tuhtiina.
Watĩa ahri yahpa macaina pʉhtoa jira.
à jia tina cʉ̃hʉ jira marine Jesu yainare ñʉ tuhtiina.
13 Ã jina mipʉre dʉcatari suhtirore mʉsa sãano seheta Cohamacʉ mʉsare to dʉcatahto sehe to yare noano cjʉa pahñoga.
à yoana watĩno mʉsare to ñano yoa dutichʉ,
mʉsare to ñano yoa duachʉ,
tirore dʉcatanahca.
à yoa tirore yʉhdʉrʉcanahca.
14 Ã yoana tuaina jiga.
Cohamacʉ mʉsare to dʉcatahto cjihtore õ sehe yoaga mʉsa:
Surara to comaa suhtirore to tʉã dihori dare sari dare noano tʉã diho to dʉcatariro seheta,
Cohamacʉ yare potoca yahuare noano wacũga mʉsa,
watĩnore mʉsa dʉcatahto sehe.
à yoa,
surara to comaa suhtiro mehne to yajeripohnare to dʉcatariro seheta Cristo to yoadohoa mehne quihõno yoaina jiga mʉsa,
watĩnore mʉsa noano dʉcatahto sehe.
15 Surara to dahpo suhti mehne to dahporire to noano dʉcatariro seheta noaa buheare noano masiga mʉsa,
watĩnore mʉsa dʉcatahto sehe.
Tí buhea marine noano jichʉ yoara.
16 Surara to dʉcatari tʉ mehne to dʉcatariro seheta Cristore noano wacũ tuarucuga mʉsa,
watĩnore mʉsa dʉcatahto sehe.
Bʉea yucʉ mehne mʉsare to bʉeboro seheta watĩno mʉsare ñano yoachʉ yoa duara.
à jina Cristore noano wacũ tuana,
watĩnore dʉcatanahca mʉsa.
17 Surara to comaa chapea mehne to dapure to dʉcatariro seheta mʉsare pichacapʉ wahaborinare Cristo to yʉhdʉchʉ yoarina jiga mʉsa,
watĩnore mʉsa dʉcatahto sehe.
Surara to ñosari pjĩ mehne to dʉcatariro seheta Cohamacʉ ya buheare noano masiga mʉsa,
noano mʉsa dʉcatahto sehe.
à jina painare noano yahuga to yare.
Tí Cohamacʉ ya buheare Espíritu Santo marine yahura.
18 Ã watĩnore mʉsa dʉcatana Cohamacʉre dachoripe ã sinirucuga.
Espíritu Santo to yoadohoa mehne ã sinirucuga.
à yoana noano wacũ masiga.
à sinina,
pumena tjiga.
Jipihtina Cohamacʉ yainare ã sini payorucuga.
19 Ã yoana yʉhʉ cʉ̃hʉre sini payoga Cohamacʉre.
Õ sehe ni sini payoga:
Noaa buheare,
panopʉ ti masierari cjirire noano yʉ yahuhto sehe sini payoga yʉhʉre.
à jina cuiro marieno yʉ yahuhto sehe sini payoga yʉhʉre.
20 Cristo to yare yahu dutiro yʉhʉre warocare.
Yʉ ã yahuri buhiri peresupʉ jija mipʉre.
Õi jipacʉta cuiro marieno to yare yʉ yahuhto sehe sini payoga yʉhʉre.
To yare yahuhtiro jiita nija yʉhʉ.
Paulo noa duti batoaha
21 Mipʉre Tíquico mʉsa cahapʉ sʉro yʉ jia tiare mʉsare yahu pahñonohca.
Tiro mari coyeiro mari cahĩriro jira.
à jiro mari pʉhtoro Cristore dahra cohtariro ã jirucura.
22 Sã jia tiare mʉsare yahu duticʉ tirore warocai nija mʉsa noano wahchehto sehe.
23 Cohamacʉ mari Pʉcʉ mari pʉhtoro Jesucristo cʉ̃hʉ mʉsare Jesu yainare tirore wacũ tuainare noano jichʉ yoajaro.
à jiro mʉsare noano cahma cahĩchʉ yoajaro.
24 Jipihtina mari pʉhtoro Jesucristore cohtotaro marieno cahrucuinare mʉsare noano jichʉ yoajaro.