“Cohamacʉ pohnare õ sehe jiro cahmana”, ni yahuha Paulo
5
1 Ã yoa Cohamacʉ pohna to cahĩina jina Cohamacʉ to jiro sehe jiga mʉsa.
2 Ã jina painare ã cahĩrucuga.
Cristo marine cahĩno,
mari ñaa buhiri yariari jire.
à yariaro Cohamacʉre ji coachʉ yoari jire tiro.
à jina marine to cahĩriro seheta mʉsa cʉ̃hʉ painare cahĩga.
3 Ã jina Cohamacʉ yaina jina ne numia mehne ñano yoaena tjiga.
Numia cʉ̃hʉ mʉa mehne ñano yoaena tjiga.
Paye ñaare tó sehe jia ñaare yoaena tjiga.
Paye barore cahma yʉhdʉrʉcaena tjiga.
Ne ã yoaeraro cahmana mʉsare,
Cohamacʉ yaina jina.
4 Ã yoana bʉoro durucueraro cahmana mʉsare.
Tʉho masieraina yoaro sehe durucueraro cahmana mʉsare.
à jina ñano ni bʉjʉperaro cahmana mʉsare.
Ahri sehere yoaro cahmana mʉsare.
Cohamacʉ mehne durucuga mʉsa.
à durucuna tirore “Noano yoahre mʉhʉ sãre”,
nino cahmana.
5 Paye barore goa pjana,
tíre tuaro cahmana,
“Cohamacʉ jira”,
ti nia masʉrine ti ño payoro seheta yoana nija mari tíre.
à yoa numia mehne ñano yoaina,
ñaa dihtare tʉhotuina,
paye barore goa pjaina Cohamacʉ Cristo mehne pʉhtoro ti sʉho jiropʉ ne wahasi tina.
Tíre noano masija mari.
6 Õ sehe yoaina ti yoari buhiri buhiri dahrerohca Cohamacʉ tirore yʉhdʉrʉcainare.
à jina paina mʉsare “Ahri ñaa jierara”,
ti ni mahñochʉ tʉhoena tjiga.
7 Ã jina tó sehe yoa yʉhdʉrʉcainare ne piti tiena tjiga.
8 Cristo yaina mʉsa jihto pano ã jirina cjirita jire mʉsa cʉ̃hʉ nahitianoi jiina yoaro seheta.
Mipʉ sehere to yaina jina buhriaroi jiina ti ñʉ masino seheta,
Cohamacʉre noano masina mʉsa.
Cohamacʉ yaina noaare yoara.
à jina tó seheta yoaga mʉsa cʉ̃hʉ.
9 Ã jina Cristo yaina jina buhriaroi jiina yoaro seheta noaare,
Cohamacʉ cahmaare,
mahñono marieno yoarucunahca mʉsa.
10 Noaare mari yoachʉ ñʉno mari pʉhtoro Cristo wahchera.
Tó sehe jiare,
mari pʉhtorore wahchechʉ yoaa sehere masi wahcãga mʉsa.
à masina tíre yoaga.
11 Cristore cahmaeraina nahitianoi jiina yoaro seheta ñaa ti yoaa,
ñaa waro jira.
à jina tina yoaro seheta mʉsa sehe yoaena tjiga.
Noaa buheare Cristo yare yahuga tinare.
à yoa ti ñaa yoaare tinare masichʉ yoaga buhriaroi mari ñʉ masino seheta.
12 Masa ti ñʉenoi tina ñano yoa cohtara.
Ti ã yoarire durucuna mari bʉo tiboa.
à yoaa ñaputiaro yoara tina.
13 Ã jina tinare noaa buheare mari yahuna ñaputiina ti jia tiare masichʉ yoana nija mari tinare buhriaroi mari ñʉ masino seheta.
14 Tó seheta noaa buheare tinare yahuna,
ñaina ti jia tiare masi pahñochʉ yoana nija tinare.
à jia õ sehe ni yahura paina:
“Ne,
carĩina ti tʉhoeraro seheta yʉhʉre tʉho duaeraina,
tʉhoga mʉsa carĩina ti wahcãno seheta.
à yoana yariaina tʉhoeraina ti jiro seheta Cohamacʉ yare tʉhoeraina ji namoena tjiga.
Mʉsa ã yoachʉ ñʉno,
Cristo buhriaro yoaro sehe jiriro mʉsare noano masichʉ yoarohca”,
ni yahura.
15 Ã jina dachoripe noano yoaga mʉsa.
Tʉho masieraina yoaro sehe jiena tjiga.
Tʉho masiina jiga.
16 Mipʉ macaina masa ñabiaro yoarucura.
à jina mʉsa sehe noaare,
Cristo yare mʉsa yoa masino seheta ã yoarucuga mʉsa.
17 Ã yoana tʉho masieraina jiena tjiga.
Cohamacʉ to cahmaa sehere noano masiga.
à masina tíre yoaga.
18 Ã yoa cahaena tjiga.
Cahainare ñano wahahto cua yʉhdʉara.
à jina pahmoa core pjíro cahmaena tjiga.
Espíritu Santo sehere pjíro cahmaga mʉsa mehne to noano jihto sehe.
Tirore noano yʉhtiina jiga.
19 Mʉsa basi Cohamacʉre ño payoa basaare cahma durucuga.
à yoa Salmore Cohamacʉ yare basaare,
paye tirore ño payoa basaa cʉ̃hʉre tirore basa payoga mʉsa.
Noano wacũ ño payoa mehne basa payoga.
à yoana mari pʉhtoro Cristore wahche payoga.
20 Cohamacʉ mari Pʉcʉ jipihtiare mʉsare to warire,
to yoari cʉ̃hʉre wahchena,
“Noana”,
ã nirucuga mʉsa tirore.
Mari pʉhtoro Jesucristo yaina jina mari Pʉcʉre “Noana”,
ã nirucuga mʉsa.
“Mʉsa cʉ̃hʉ wʉhʉ macaina Jesu yaina jina, õ sehe yoaga”, ni yahuha Paulo
21 Ã yoa mʉsa mehne macainare noano ño payoa mehne cahma yʉhtiina jiga Cristore noano ño payoina jina.
22 Mʉsa namosãnumiare yahuihtja mipʉre.
Mari pʉhtoro Cristore mari yʉhtiriro seheta mʉsa manʉsʉmare noano mehne yʉhtia numia jiga.
23 Jesucristo marine yʉhdʉchʉ yoare to pjacʉ yoaro sehe jiina to ya curua macaina mari jihto sehe.
à yoa mari to ya curua macaina mari pʉhtoro to jiro seheta mʉsa manʉsʉma mʉsa namosãnumia bui pʉhtoa jira.
24 Cristo yaina jina tirore ã yʉhtirucuja mari.
Tó seheta mʉsa manʉ tia numia mʉsa manʉsʉmare noano yʉhtirucua numia jiga.
25 Mʉsa manʉsʉmare yahuihtja tjoa mipʉre.
Cristo marine to yaina jichʉ yoaro taro,
marine cahĩno,
mari yaro jiborirore yariari jire.
à jina marine to cahĩriro seheta mʉsa cʉ̃hʉ mʉsa namosãnumiare noano cahĩrucuga.
26 Cristo ya buheare tʉhona Cohamacʉ yaina wahahi mari.
à jina to ya buheare “Quihõno jira”,
ni mari tʉhoturi baharo,
mari ñaa buhirire cosawere tí buhea mehne.
Co mehne marine ti bautisachʉ cʉ̃hʉre mari ñaa buhirire Cristo to cosawerire ñona nija mari.
27 Ã cosawere tiro marine to yaina cjihti yoaro taro.
To ã cosawechʉ ne ñaa buhiri marieina jinahca,
Cohamacʉ to ñʉchʉ.
28 Mʉsa namosãnumiare cahĩna,
mʉsa basi mʉsa pjacʉrire mʉsa cahĩno seheta tí numiare cahĩga.
Mari namore cahĩina jina mari pjacʉre cahĩina jija.
29,30 Ne mari pjacʉrire ñano wahachʉ cahmaeraja.
Mari chʉare chʉna noano yoana nija mari pjacʉrire.
Cristo yaina jina to pjacʉ yoaro sehe to ya curua macaina jija mari.
à jiro marine noano yoara tiro.
Cristo marine to noano yoariro seheta mari cʉ̃hʉ mari pjacʉre noano yoaja.
(Ã jina mari namosãnumia cʉ̃hʉre ãta noano yoaro cahmana marine.)
31 Ãta nina Cohamacʉ yare ti joari pũi:
“Ã yoa mʉno to pʉcʉsʉmare wijaaro to namono mehne jirohca.
à jia tina pʉaro jipahta cʉ̃iro yoaro sehe jiahca”,
ni joaa tiri jire panopʉre.
32 Ahri to joari cjirire paina noano tʉhoerari jire.
Tíre õ sehe ni yahuihtja mʉsare.
Õ sehe ni yahuro nica:
“Cristo to yaina mehne cʉ̃ pjacʉ yoaro seheta cʉ̃ curuata jira”,
ni yahuro nica.
33 Ã jicʉ mʉsare õ sehe ni yahu namoihtja tjoa:
Mʉsa pjacʉrire mʉsa cahĩno seheta mʉsa namosãnumiare cahĩga.
à yoa mʉsa manʉsʉmare noano ño payoga mʉsa.