Cristo yaina jina cʉ̃ curuata jija mari
4
1 Ã jicʉ yʉhʉ,
mari pʉhtoro Cristo to cahmaare yʉ yoari buhiri peresupʉ jiriro jicʉ,
mʉsare õ sehe ni tuaro dutija:
Cohamacʉ to yaina cjihtire mʉsare besea tiri jire.
à to beserina jina to cahmano seheta yoaina jiga mʉsa.
2 “Sã pinihta masi yʉhdʉrʉcaina jija”,
ni tʉhotuina jiena tjiga.
Painare noano mehne yoaga suaro marieno.
Mʉsa mehne macaina mʉsare ti ñano yoapachʉta tinare cahĩa mehne noano yoaga.
3 Ã jina Espíritu Santo to yoadohoa mehne noano mehne cʉ̃no mehne jirucuga mʉsa.
à yoana cahmachea marieno jinahca mʉsa.
4 Cʉ̃ pjacʉ yoaro seheta cʉ̃ curuaihta jija mari.
à yoa Espíritu Santo cʉ̃irota jira.
Cohamacʉ to yaina cjihti mʉsare besea tiha mʉsare yʉhdʉchʉ yoaro taro.
à jina to yʉhdʉchʉ yoahtore cohtasinina mʉsa.
Cʉ̃nota jira mʉsa cohtaro.
5 Mari pʉhtoro Cristo cʉ̃irota jira.
To yahua,
mari wacũ tuaa cʉ̃hʉ cʉ̃nota jira.
To yainare bautisarire yahua cʉ̃hʉ cʉ̃nota jira.
6 Ã jiro Cohamacʉ cʉ̃irota jira.
Tiro jipihtina Pʉcʉro jira.
à jiro jipihtina mari pʉhtoro jira.
Jipihtinare marine to cahmano seheta yoachʉ yoa masina tiro.
Jipihtina mari mehne jira.
à yoa jipihtiropʉ jira tiro.
7 Cʉ̃ curua mari jipachʉta jipihtina marine cãinare mari yoa masihtire cũre marine Cristo.
Tiro to cũriro seheta yoa masija mari.
Tiro marine ã cũno paye barore to ã wanocaboriro seheta yoaro nire tiro.
8 Ãta nina Cohamacʉ yare ti joari pũpʉ:
“Cohamacʉre ñʉ tuhtiinare to yʉhdʉrʉcari baharo tiro tinare naa mʉjaa wahare.
à naa mʉjano tiro payʉ ã wanocare ahri yahpa macaina sehere”,
ni joaa tiha panopʉre.
9 “Tiro mʉjaa wahare”,
to nichʉ wahmanore mʉanopʉ jiriro ahri yahpapʉre to tari cʉ̃hʉre mari masija.
Ahri yahpapʉre to duji tarire mari masija.
10 Ã jiro õpʉre duji tariro tirota jira mʉjaa wahariro.
Jipihtiro bui mʉjaa wahari jire tiro,
jipihtiropʉ jiro taro.
11 Tiro jira “Ahri yahpa macainare payʉ ã wanocariro”,
ti niriro.
Masare to ã wanocano seheta tiro payʉ ti yoa masihtire cũri jire masare.
Õ sehe cũri jire tiro:
Cãinare Cristo to yare yahu duti to warocahtinare cũri jire.
Painare Cohamacʉ ya durucuare yahu turiahtinare cũri jire.
Noaa buheare buhe tinihtinare painare cũri jire.
Cristo yaina cahmachuinare ñʉ wihboina cjihtire,
noano buhehtina cjihtire cũri jire painare.
12 Tó sehe yoa,
dahrahtina cjihtire cũri jire marine painare to yainare mari yoadohohto sehe Cohamacʉre mari masi noano namohto sehe.
à cũri jire marine to yainare tirore mari wacũ tua namohto sehe.
13 Ã jina mari jipihtina noano mehne cʉ̃no mehne jinahca.
Ãta jiro cahmana marine Cristore wacũ tuaina jina.
à jina mari jipihtina Cohamacʉ macʉnore noano masinahca.
à yoana Cristo tuariro,
noano masiriro to jiriro seheta mari cʉ̃hʉ noano masiina,
Cohamacʉre noano wacũ tuaina wahanahca.
14 Mari ã wahana macanacã yoaro sehe jisi mari.
Macanacã noano tʉho masierasinica.
Paina ti buhechʉ “Ahri potocã jira”,
ni ti mahño mihnia mehne ti mahñochʉ tinacã yoaro sehe jiina soro jia buheare cahmana.
à yoa paina ti soro buhechʉ tí buhea sehere cahmana tjoa.
Pjiri ma macaa pahcõri ti ã cohtotarucuro seheta tó sehe ã cohtotarucuina jira tinacã yoaro sehe jiina.
Tina yoaro sehe jisi mari.
15 Õ seheta yoanahca mari:
Mari mehne macainare cahma cahĩna,
potocã noaa buheare cahma yahunahca mari basi.
à yoana macanacã bʉcʉa tʉho masiina ti wahariro seheta mari cʉ̃hʉ tuaina,
Cohamacʉ yare noano masiina wahanahca.
Cristo to jiro sehe wahanahca.
Tiro jira mari dapu.
16 To yaina jina to pjacʉ yoaro sehe cʉ̃ curuaihta jija mari.
à jina mari capari,
mari cahmori,
mari dahpori cʉ̃ pjacʉi ti noano jiro seheta mari cʉ̃hʉ payʉ jipanahta cʉ̃no potori noano jija.
Mari ã cʉ̃no potori mari jihto sehe Cristo yoadohora.
à jina mari wamomaca mari pjacʉre to noano yoadohoriro seheta mari noano yoadohoja paina Cristo yainare.
Mari mehne macainare Cristo yainare noano cahĩna,
tinare noano yoadohona,
tuaina Cristore wacũ tua namoina wahanahca mari.
Cristo yaina wahana mari ñaa yoaare duhu, noaa sehere cohtotaja mari
17 Ã yoa mari pʉhtoro Cristo to dutiro mehne õ sehe niihtja mʉsare:
Cohamacʉre cahmaeraina waro yoaro sehe yoaena tjiga mʉsa.
Tina ti tʉhotua sehe ñaa dihta jira.
à jia ti tʉhotua yaba cjihti jierara.
18 Ã jia nahitianoi ti ñʉ masieraro seheta tina Cohamacʉ yare ne masieraputiara.
To yare ne tʉhoeraputiara.
Tʉho duaerara tina.
à jia Cohamacʉ to noano ji dutiriro seheta jierara tina.
19 Ã jia tina ñaare yoaa ne bʉo tieraputiara.
à yoa ne cahyaerara.
Ñaare ti goa pjaa dihtare yoarucura.
Jipihtia ti ñaare yoaare duhu duaerara.
20 Mʉsa sehe ã yoaerare,
Jesure masi dʉcana.
21 Potocã to yare tʉhoina mʉsa jichʉ,
Jesu yare noano masiina mʉsa jichʉ mʉsa sehere tina yoaro sehe yoa dutierara tiro.
22 Ã jina ñano wete tia suhtire mʉsa tjuwe cohãno seheta panopʉ mʉsa yoari cjirire duhunocahga.
Tí pjare ñaare yoarucuina mʉsa jichʉ tí ñaa sehe mʉsare dojomehneno niri jimare.
“Ñaare yoana,
noano wahchenahca”,
ni tʉhotuina jipanahta ne potocã wahcherare mʉsa.
23 Ã yoa mʉsa tʉhotuare noaa sehere Cohamacʉ to cahmano seheta cohtotaro cahmana mʉsare.
24 Ã jina noaa sehere cohtotaina jiga mʉsa.
Tó sehe jiina Cohamacʉ yoaro seheta jira.
Mʉsa ã jiina jina,
noaare yoarucunahca.
à yoana ñaare ñʉ yabinahca.
25 Ã jina mahño namoena tjiga mʉsa.
Mʉsa mehne macainare quihõno yahuga,
mahñono marieno.
Mari cʉ̃ pjacʉ yoaro sehe cʉ̃ curua macainata jina nija.
à jina mʉsa mehne macainare mahñoena tjiga.
26 Paina mehne suana,
ñaano yoaena tjiga.
à jina suana,
cʉ̃ dacho waro noano suarucuena tjiga.
27 Yoari pja suana,
watĩno to cahmano sehe yoana nica.
à yoaena tjiga watĩno mʉsare “Dojomehneri”,
nina.
28 Mʉsa mehne macaina Jesu yaina mʉsa jihto pano yacaina jirina cjiri pari turi yacaena tjiga.
à yoana mipʉ sehere noano dahraga mʉsa wapataa mehne pjacʉoinare mʉsa yoadohohto sehe.
29 Ne ñano durucuena tjiga “Painare dojomehneri”,
nina.
Noaare durucuna painare yoadohora Cohamacʉ cahmaare mʉsa masi namohto sehe.
à jina noaa dihtare durucuga.
30 Ñaare yoana Espíritu Santore cahyachʉ yoana nica mʉsa.
à yoaena tjiga.
Mipʉre pihtiri dacho pano Cristo marine to naahto pano Cohamacʉ to Espíritu Santo marine ñʉ wihbora ñaare mari yoaerahto sehe.
à jiro Cohamacʉ yaina mari jiare masichʉ yoara tiro marine.
à jina tirore cahyachʉ yoaena tjiga.
31 Ã jina ne painare ñano yoa namoena tjiga.
Cahma sayo namoena tjiga.
Painare sua,
ñano ni sañurucu namoena tjiga.
Painare ñano quiti dahre namoena tjiga.
Ne painare ñano ni tʉhotu namoena tjiga.
32 Ã yoa mʉsa mehne macainare noano mehne noano yoaga.
Cristo yaina mʉsa jichʉ ñʉno mʉsa ñaa buhirire bonocahre Cohamacʉ.
Tó seheta mʉsa cʉ̃hʉ paina mʉsare ti ñano yoachʉ ñʉna ti ñaa yoarire bonocahga.