Cohamacʉ marine cahĩno, pja ñʉno yʉhdʉchʉ yoaha marine
2
1 Cohamacʉ yʉhdʉrʉcaina,
ñaa buhiri tiina yariaina cjiri yoaro sehe jiri jimare mʉsa,
Cohamacʉ to ñʉchʉ.
2 Panopʉre ahri yahpa macaina Cohamacʉre yʉhdʉrʉcaina yoaro sehe yoarucuri jimare mʉsa cʉ̃hʉ.
à yoana watĩno to dutiro seheta yoarucuri jimare mʉsa.
Tiro watĩno ahri yahpai dutiriro Cohamacʉre yʉhdʉrʉcaina pʉhtoro jira.
Watĩa pʉhtoro cʉ̃hʉ jira tiro.
3 Panopʉre jipihtina mari ã dihta yoarina jimai.
Mari ñaa dihtare goa pjamai.
Mari mʉ sʉro,
mari tʉhotu,
mari cahmano seheta yoamai.
à yoaina jina jipihtina paina yoaro seheta,
mari cʉ̃hʉ ñaa buhiri tiina jirucumai.
Mari ã jiina jiri buhiri,
Cohamacʉ to buhiri dahreborina jimai.
4 Mari ã jiina jipachʉta,
Cohamacʉ marine tuaro pja ñʉno,
noano cahĩri jire marine.
5 Ã cahĩ yʉhdʉro,
Cohamacʉre yʉhdʉrʉcaina,
yariaina yoaro seheta mari jipachʉta Cristo mehne marine catichʉ yoari jire.
6 Ã jiro Cristo yaina mari wahachʉ,
Cohamacʉ Cristo mehne marine maso,
ã yoa mʉanopʉ Cristo mehne dujihtinare marine sõ dapori jire,
tiro mehne dutihtina cjihti mari jihto sehe.
Cristo yaina jina,
ãta wahaina baro jija mari,
Cohamacʉ to ñʉchʉ.
7 Õ seheta noano yoara tiro marine to pja ñʉrire,
to tuaro cahĩrire baharopʉ jihtinare masichʉ yoaro taro.
Cristo yaina mari jichʉ ñʉno ã yʉhdʉchʉ yoara tiro marine.
8 Cristore wacũ tua,
mari noano tʉhochʉ ñʉno Cohamacʉ marine pichacapʉ wahaborinare yʉhdʉchʉ yoara.
Marine pja ñʉno,
marine cahĩno marine yʉhdʉchʉ yoara.
Mari mʉ sʉro mari noano yoaa mehne Cohamacʉ cahapʉ waha masieraja mari.
Cohamacʉ sehe marine yʉhdʉchʉ yoara.
à jiro tiro mehne mari ã jirucuhtore cũna marine.
9 To ã cũchʉ mari mʉ sʉro noaare mari yoari wapa jierara tí.
“ ‘Sã mʉ sʉro yʉhdʉhi’,
niboca”,
nino õ sehe dutiri jire tiro:
Mari mʉ sʉro yʉhdʉ dutierara marine.
10 Cristo yaina jichʉ yoare marine Cohamacʉ sehe noaa dihtare yoahtina mari jihto sehe.
Panopʉ noaare mari yoahtire cũ tuhsʉa tiri jire tiro marine.
Cristore cjʉana mari noano jija
11 Ã jina panopʉ mʉsa jia tirire mipʉ cʉ̃hʉre wacũga mʉsa.
Cristo yaina jierasinina judio masa jieraina jina mʉsa coyea yoaro sehe yoarina jiri jimare mʉsa.
Circuncisiõre yoaeraina jire mʉsa mipʉ mʉsa jiro seheta.
Mʉsa ã yoaeraina jichʉ ñʉna sã judio masa sehe circuncisiõ yoaina sehe mʉsare õ sehe nia tii.
“Circuncisiõre yoaeraina jia,
Cohamacʉ yaina jierara”,
nia tii mʉsare.
Circuncisiõre yoaina mʉa pjacʉrire mahanocã cahsarocãre yihso narina jira.
12 Panopʉ Cristo yaina jierari jimare mʉsa.
Sã judio masa sehe Cohamacʉ to beseina jia tii.
Sã ã jichʉ “Mʉsare yʉhdʉchʉ yoaihtja”,
ni cũa tiha Cohamacʉ sãre.
Mʉsa sehe to ã ni cũrina jierari jimare.
à yoa Cohamacʉ to beserinare ñʉ tuhtiina jisiniri jimare mʉsa.
Mʉsa ñaa buhirire pichacapʉ wahahtina jiri jimare mʉsa.
Cohamacʉ maeraina jina pichacapʉ butiborina jia tiri jimare mʉsa.
13 Mipʉ sehere Cristo Jesu yaina jira mʉsa.
Panopʉ Cohamacʉre ñʉ tuhtiina jipanahta,
mipʉre to yaina jira mʉsa.
Cristo mʉsa ñaa buhiri crusapʉ to di cohãri mehne Cohamacʉ yaina jichʉ yoare mʉsare.
14 Sã judio masare cahma ñʉ tuhtiina mʉsa jichʉ ñʉno Cristo marine “Mʉsa basi cahma ñʉ tuhtiena tjiga”,
ni yahure.
Masare noano yahuriro jira tiro.
Sã judio masa,
judio masa jieraina mehne pʉa curua mari jichʉ ñʉno,
tiro cʉ̃ curuata yoare marine.
Dʉcatari sahrĩnore ti tju site cohãno yoaro sehe mari cahma ñʉ tuhtirire duhuchʉ yoare tiro.
15,16 Õ sehe tíre yoare tiro:
Mari ñaa buhirire crusapʉ yariaro marine pichacapʉ wahaborinare yʉhdʉchʉ yoare.
à yʉhdʉchʉ yoaro to yaina jichʉ yoare marine.
à yoaro pʉa curua mari jimarirore cʉ̃ curuata wahma curua jichʉ yoare marine.
à yoaro panopʉ mari cahma ñʉ tuhtiina mari jimarirore marine cʉ̃noi noano jichʉ yoare.
à yoaro judio masa sã dutia cjirire cohãre tiro.
Tí dutia marine pʉa curua ji dutiri jimare.
Mipʉre cʉ̃ curuata jija mari.
Cristo Cohamacʉ yaina jichʉ yoare marine.
17 Ã yoa Cristo noaa buheare marine yahuro tari jire.
Mʉsa judio masa jieraina Cohamacʉ yare cjʉaeraina jiri jimare.
Mʉsa ã jichʉ ñʉno mʉsare yahuro tari jire tiro.
Sã judio masa sehe Cohamacʉ yare cjʉai.
Sã cʉ̃hʉre yahuro tari jire.
à yahuro taro jipihtina marine cʉ̃ curuata noano mehne ji dutiro tari jire tiro.
18 Mipʉre jipihtina mari judio masa,
judio masa jieraina cʉ̃hʉ Cohamacʉ mari Pʉcʉ mehne noano ji masija mari.
Espíritu Santo to yoadohoa mehne mari Pʉcʉ mehne noano ji masija mari.
Cristo sehe marine ã noano jichʉ yoari jire.
19 Ã jina mipʉre pa dihta macaina yoaro sehe jierara mʉsa.
Mipʉre Cohamacʉ yainare ñʉ tuhtiina jierara mʉsa.
Cohamacʉ yaina mehne macaina jira mʉsa.
To ya curua macaina jira mʉsa.
20 Cohamacʉ ya durucuare yahu turiaina,
sã cʉ̃hʉ to yare buhe dutiro to cũrina jina to ya durucuare mʉsare yahu dʉcai sã,
wahma wʉhʉre Cohamacʉ ya wʉhʉre ti dahre dʉcariro seheta.
Tí wʉhʉi ti cũ mʉhtari tãca yoaro sehe jiriro Cristo sehe marine yʉhdʉchʉ yoariro mariachʉ mari ne yʉhdʉeraboa.
21 Ã jiro to tuaa mehne marine to yainare cʉ̃ curuata jichʉ yoare tiro,
Cohamacʉ wʉhʉre ñaa marieni wʉhʉre ti dahreboriro seheta.
To ã yoachʉ to tuaa mehne noaina wahaja mari,
Cohamacʉ to ñʉchʉ.
Mari ã jichʉ ñʉno,
tirota mari mehne jirucura.
22 Ã jina Cristo yaina jina jipihtina paina to yaina mehne cʉ̃ curua wahare mʉsa cʉ̃hʉ.
Mʉsa ã wahachʉ Cohamacʉ to Espíritu Santo mʉsa mehne jiro nina,
Cohamacʉ ya wʉhʉi to jiboro seheta.