Jesucristo yare noano tʉho ñahana, tíre duhuena tjiga
5
1 Dutia yoaa mehne yʉhdʉ duaina tí dutiare dahra cohtaina ti dutipeina yoaro sehe jira.
Cristo yaina wahana ti dutipeina mari jiare wijaana,
Cristo mehne yʉhdʉja mari.
à to yʉhdʉchʉ yoarina jina,
to yare ã yoarucuga,
“Tí dutia yoaa mehne yʉhdʉnahca”,
ni tʉhoturo marieno.
2 Mipʉre yʉhʉ Paulo ahrire yahuihtja mʉsare:
“Circuncisiõre mari yoari mehne yʉhdʉnahca”,
mʉsa ni tʉhotuna,
Cristo mʉsare to yoadohorire yaba cjihti jierachʉ yoana nina mʉsa.
3 Jipihtina circuncisiõre mʉsa yoari mehne yʉhdʉ duainare pari turi õ sehe ni yahuihtja yʉhʉ:
Circuncisiõre mʉsa yoari mehne yʉhdʉ duana,
paye Cohamacʉ dutiare yoa pahñoerana,
yʉhdʉsi mʉsa.
4 Dutia yoaa mehne yʉhdʉ duaina jina Cristo sehere cohãre mʉsa.
à yoaina jina,
Cohamacʉ mʉsare to cahĩrire,
mʉsare to yʉhdʉchʉ yoa duarire cahmaerara mʉsa.
5 Wiho mejeta mari sehe Espíritu Santo to tuaa mehne Cohamacʉre wacũ tuaja.
Mari ã wacũ tuachʉ “Noaina,
ñaa buhiri marieina jira”,
ni ñʉna Cohamacʉ marine.
To ã ni ñʉchʉ marine to yʉhdʉchʉ yoahtore masija mari.
6 Cristo Jesu yaina jina circuncisiõre mari yoachʉ ne yaba cjihti jierara.
Circuncisiõre mari yoaerachʉ cʉ̃hʉre ne yaba cjihti jierara.
Wiho mejeta Cristo pinire wacũ tuana painare cahĩnahca mari.
Tí wacũ tuaa sehe wiho waro jia nierara.
Tí waro jia nina.
7 Mʉsa Cristore noano wacũ tuasinimare.
¿Diina baro noaa buheare yʉhdʉrʉca dutiari mʉsare?
8 Ti ya buhea Cohamacʉ mʉsare to pohnare cũriro to ya buhea jierara.
9 Ahri yʉ nihtire wacũga mʉsa:
Mahanocã pão bʉcʉaro trigo yʉbʉre noano sahserʉcʉ sʉra.
(To ã sahserʉcʉ sʉriro seheta yʉ coyea judio masa ya buhea sehere mʉsa cahmarucuchʉ ñʉa payʉ masa mʉsa mehne macaina cʉ̃hʉ tí buheare cahmaboca tina cʉ̃hʉ.)
10 Mari pʉhtoro Cristore wacũ tuaja mari.
à jicʉ ahri yʉ nihtire masija yʉhʉ.
Cristo to yoadohoa mehne paye buheare baharopʉre cahmasi mʉsa.
Tíre masija yʉhʉ.
Mʉsare dojomehne cohtaina dohse jiina jica.
Tinare Cohamacʉpʉ buhiri dahrerohca.
11 Yʉ coyea,
“Dutia yoaa mehne yʉhdʉnahca”,
ti nia buheare yʉ buheriro jichʉ judio masa yʉhʉre ñano yoaeraboa.
Cristo crusai to yariari buheare yʉ buheri buhiri tina ñano yoara yʉhʉre.
Cristo ya buhea mehne judio masa ya buheare yʉ buhe morechʉ yʉhʉre ñano yoaeraboa tina.
12 Mʉsare dojomehne cohtaina mʉsare mahanocã mʉsa pjacʉ macari cahsarocãre yihso dutiina ti basi dihta yihsojaro.
13 Yʉ coyea,
“Dutia mehne yʉhdʉnahca”,
ni tʉhotu dutierara Cohamacʉ mʉsare.
Wiho mejeta “Dutia mehne yʉhdʉnahca”,
ni tʉhotuina jierapanahta “To dutiare yʉhdʉrʉcajihna”,
ni wacũena tjiga.
à yoa mʉsa mehne macainare cahma cahĩna,
tinare dahra cohtaina yoaro seheta yoadohoga tinare.
14 Cʉ̃nota dutiare noano yoana,
Cohamacʉ dutiare yoa pahñona nija mari.
Õ sehe jira tí dutia:
“Mʉ basi mʉ cahĩno seheta mʉ cahai jiina cʉ̃hʉre cahĩga”,
ni dutia tiha.
15 Ã jina wahiquina suaina yoaro sehe mʉsa basi cahma sayoena tjiga.
Tuhsʉ,
cahmachena tjiga.
Mʉsa mehne macaina jipihtinare “Dojomehneri”,
nina noano yoaga mʉsa.
Masa ñaare ti goa pjaare, Espíritu Santo to cahmaa cʉ̃hʉre yahuha Paulo
16 Espíritu Santo to cahmariro seheta jirucuga mʉsa.
à jina mʉsa ñaare mʉsa goa pjaare yoaena tjiga.
17 Ñaare mʉsa goa pjachʉ tíre mʉsa yoachʉ,
Espíritu Santo ñʉ yabira.
To ã ñʉ yabichʉ tí ñaare duhunahca mʉsa.
à jina ñaare mʉsa goa pjana,
tíre yoana,
Espíritu Santore ñʉ tuhtira mʉsa.
à ñʉ tuhtina to cahmano sehe yoaerara mʉsa.
à jina mʉsa goa pjaare mʉsa yoa duaro seheta yoa masierara mʉsa.
18 Ã yoa Espíritu Santo to cahmaare yoaina jina “Dutia mehne mari yʉhdʉnahca”,
ni tʉhotuerara mʉsa.
19 Masa ñaare ti yoaare mari noano masi tuhsʉja.
Õ sehe jira tí:
Numino mehne ñano yoaa,
mʉno mehne ñano yoaa,
wʉana tia,
tó sehe jia ñaare bʉo tiro marieno yoaa,
20,21 “Cohamacʉ jira” ti nia masʉrine ño payoa,
puti sitea,
paye yaya ti yoaa,
ñʉ tuhtia,
cahma sayoa,
doaa,
suaa,
to basi dihta cjʉa duaa,
ñʉ tuhti cahma tju waa,
cʉ̃ curua macaina pa curuare ñʉ tuhtia,
paina yare tuaro cahmaa,
cahaa,
cahaa bose nʉmʉrine dahrea,
tó sehe jia jira ñaare yoaa.
Panopʉ mʉsare cuaro mehne yʉ niriro seheta mipʉ cʉ̃hʉre niihtja:
Tí barore yoaina pʉhtoro Cohamacʉ to sʉho jiropʉre mʉanopʉre ne sʉsi.
22,23 Espíritu Santo sehe marine õ sehe yoaina jichʉ yoara:
Masare cahĩina,
wahcheina,
cuiro marieina,
so suaeraina,
painare noano yoaina,
noaina,
duhuro marieno Cohamacʉ cahmaare yoaina,
painare yʉhdʉrʉca duaeraina,
noano mehne yoaina,
ti ñaa goa pjaare yoaeraina jichʉ yoara marine tiro.
Tó sehe yoainare “Ã yoaena tjiga”,
ne cʉ̃iro nierara.
24 Cristo Jesu yaina jina mari ñaa goa pjaare yoa namoeraja.
25 Espíritu Santo marine Cohamacʉ mehne ã jirucuchʉ yoarohca.
à jina to cahmano seheta yoarucuina jijihna mari.
26 “Painare masi yʉhdʉrʉcaja sã”,
ni tʉhotuina jiena tjijihna mari.
à jina mari mehne suachʉ yoaena tjijihna painare.
à yoana mari mehne macaina noano ti wahachʉ ñʉna tinare sua tʉhotuena tjijihna.