Painare Jesu yainare Corinto macaina niñeru ti wahtire yahuha Paulo
16
1 Mipʉre painare Jesu yainare mʉsa niñeru wahtire yahu duaja mʉsare.
Galacia yahpa macainare Jesu yainare yʉ dutiriro seheta mʉsa cʉ̃hʉ yoaga.
2 Somanaripe domingo jichʉ jipihtina mʉsa Jesu yainare wahti cjihti niñerure mahanocã waga.
Mahanocã cjʉana mahanocã waga.
à yoa pji curero cjʉana pji curero waga.
Somanaripe mʉsa ã yoachʉ mʉsa cahapʉ yʉ sʉchʉ mʉsa warocahti cjihti niñeru ji tuhsʉrohca.
3 Mʉsa wahtire,
mʉsa warocahtina cʉ̃hʉre yahuri pũre joaihtja.
à jicʉ mʉsa cahapʉ sʉcʉ tí pũre Jerusalẽpʉ wahahtinare mʉsa beserinare waihtja.
à wa tuhsʉcʉ Jesu yainare mʉsa warocari niñerure nahtina cjihtire tinare warocaihtja Jerusalẽpʉ.
4 Tí macapʉre yʉ yoahti jichʉ yʉhʉ cʉ̃hʉ wahaihca.
Yʉ ã wahachʉ yʉhʉ mehneta tina wahaahca.
To tinihto cjihtore yahuha Paulo
5 Macedonia yahpa macainare masa boca yʉhdʉihca yʉhʉ tinare.
Yʉhdʉ wahcã,
mʉsa cahai Corintopʉ sʉihca.
6 Tópʉ sʉcʉ mʉsa mehne mahaa dachoricã jiboca yʉhʉ pa tehe nicʉ.
Yoa cureri pja puhiro puro mʉsa mehne jiboca yʉhʉ.
à jina pa sehepʉ yʉ wahachʉ mʉsa cʉ̃hʉ yʉhʉre yoadohoroca masina.
7 Mahaa nʉmʉricã ji duaeraja yʉhʉ mʉsa mehne.
à jicʉ Cohamacʉ cahmachʉ yoa cureri pja mʉsa mehne jiihtja yʉhʉ.
8 Ã ji duapaihta Pentecoste bose nʉmʉri jichʉpʉ Efesoi jisiniihca yʉhʉ.
9 Õi Efesoi mipʉre mari pʉhtoro Jesu yare tʉho duaina payʉ jira.
Ti ã tʉho duachʉ tinare yahuja.
Yʉ ã yahuchʉ yʉhʉre ñʉ yabiina payʉ jira.
10 Timoteo yʉ yoaro seheta mari pʉhtoro yare yoara.
To ã yoariro jichʉ mʉsa cahapʉ to sʉchʉ noano mehne tirore piti boca,
tiro mehne noano wahchea mehne jiga mʉsa.
11 Ã yoana tirore ñʉ yabiro marieno noano mehne piti bocaga mʉsa.
Tuhsʉ,
to coha sitichʉ noano mehne tirore yoadohorocaga yʉ cahapʉ to tjua tachʉ.
Tiro paina Jesu yaina mehne ti tahtore cohtana nija sã.
à jina noano mehne yoadohorocaga tinare.
12 Apolo mari coyeiro Jesu yairo mʉsare to ñʉno wahachʉ tuaro cahmamahi.
à jicʉ tirore waha dutimahi paina Jesu yaina mehne to wahahto cjihtore.
Yʉ ã waha dutipachʉta mipʉre tiro waha duaerare.
à jiro baharo tirore yoaa mariachʉ mʉsa cahapʉ waharohca tiro.
Paulo noa duti batoaha
13 Noano wacũ masiga mʉsa.
Cristore wacũ tua duhuena tjiga mʉsa.
Ne cuieraina jirucuga mʉsa.
à yoa Cohamacʉ tuaa mehne wacũ tuaina jirucuga mʉsa.
14 Dohse jiare mʉsa yoana,
painare cahĩa mehne tíre yoaga mʉsa.
15 Mipʉre yʉ coyea mʉsare ahrire yahu duaja:
Estéfana ya wʉhʉ macaina Acaya yahpa macaina noaa buheare tʉho mʉhtaina,
ti ya yahpai Cristore wacũ tua mʉhtaina jire tina sehe.
Tuhsʉ,
painare mari coyeare Jesu yainare noano yoadohorucure tina.
Tíre mʉsa masina.
16 Tina yoaro sehe jiinare,
paina Cristo yare yoadohoinare mʉsa noano yʉhtichʉ cahmaja yʉhʉ.
17 Estéfana,
Fortunato,
Acaico cʉ̃hʉ yʉ cahapʉ wihi tuhsʉhre.
Õi ti jichʉ pjíro mehne wahcheja yʉhʉ.
Mʉsa mariachʉ mʉsare tuaro wacũi nimahi yʉhʉ.
à jicʉ tina ti wihichʉ wahcheja yʉhʉ.
18 Tina mehne jicʉ noano yajeripohna tiriro wahahi yʉhʉ mʉsa cʉ̃hʉ tina mehne mʉsa wahcheriro seheta.
Tinare noano ño payoa mehne tʉhoga mʉsa.
à yoa paina tina yoaro sehe jiina cʉ̃hʉre ño payoa mehne tʉhoga.
19 Asia yahpa macaina Jesu yaina mʉsare noa dutira.
à yoa Aquila,
Priscila,
ti ya wʉhʉi cahmachuina mehne Cristo to cahĩa mehne mʉsare pjíro noa dutira.
20 Õ macaina Jesu yaina jipihtina mʉsare noa dutira.
Mʉsa mehne macainare noano mehne piti bocasinia.
21 Yʉhʉ,
Paulo yʉ basi ahri dihtare joaja.
Mʉsare noa dutija.
22 Mari pʉhtoro Jesucristore pairo to cahĩerachʉ,
Cohamacʉ tirore buhiri dahrejaro.
Mari pʉhtoro cjero tjua tajaro.
23 Yʉ coyea mari pʉhtoro Jesucristo mʉsare jipihtinare to cahĩa mehne noano yoajaro.
24 Yʉhʉ Jesucristo yairo jicʉ,
to yaina mʉsa cʉ̃hʉ mʉsa jichʉ mʉsare tuaro cahĩja.