Cristo to masa mʉjarine yahuha Paulo
15
1 Mipʉre yʉ coyea,
noaa buheare mʉsare yʉ yahurire mʉsare wacũchʉ yoa duaja.
Tí buheare noano cahmare mʉsa.
à cahmana tí buheare ã yʉhtirucure mʉsa.
2 Mʉsa ã cahmachʉ tíre mʉsa ã yʉhtirucuchʉ Cristo mʉsare pichacapʉ wahaborinare yʉhdʉchʉ yoa tuhsʉre.
Mʉsa ã tʉhori baharo Cristo yare mʉsa duhunocachʉ tí mʉsa tʉhori cjiri yaba cjihti jierara.
3 Õ sehe ni yahu mʉhtaihtja mʉsare.
Ahri wiho waro jierara.
Mʉsare buhecʉ yʉhʉre Cristo to yahuri cjirire mʉsare õ sehe ni yahui:
Cohamacʉ yare ti joariro seheta mari ñaa buhirire Cristo yariari jire.
4 Ã yoa Cohamacʉ yare ti joariro seheta Cristo to yariari baharo paina to pjacʉ cjirore copapʉre ti duhu payori baharo tia dacho jiboroi tiro masa wijaari jire.
5 Tiro to ã masa wijaari baharo Pedrore bajuari jire.
To ã bajuari baharo to buheinare bajuari jire tjoa.
6 To ã bajuari baharo cʉ̃ tahata quiniento bui jiinare to yainare tiro bajuari jire tjoa.
Cãina tirore ñʉrina cjiri mipʉre yariarina cjiri jira.
Ti ã jipachʉta payʉ tina mehne macaina cjiri mipʉre jisinina.
7 Baharo Cristo Santiagore bajuari jire tjoa.
à to bajuari baharo jipihtina to buhe duti to cũrinare bajuari jire tjoa.
8 Jipihtina painare to bajuari baharo yʉhʉ cʉ̃hʉre bajuare tjoa.
Wihãrirocã to quihõri dachoi masa bajuerarirocã to masa bajua nʉnʉ tiriro seheta yʉhʉ cʉ̃hʉ Jesure wacũ tua nʉnʉ tiriro jija.
Yʉ ã jiriro jichʉ ti baharopʉ bajuare Jesu yʉhʉ cʉ̃hʉre tjoa.
Yʉhʉreta tiro bajua batoare jʉna.
9 Panopʉre Jesu yainare ñano yoamai.
à yoariro cjiro jicʉ paina Jesu to cũrina jipihtina ti docapʉ waro jija yʉhʉ.
à jicʉ mipʉ cʉ̃hʉre Jesu buhe duti to cũboriro jieramaja yʉhʉ,
yʉ tʉhotuchʉ.
10 Ã jipaihta Cohamacʉ yʉhʉre to cahĩchʉ mipʉre Jesu to cũriro jija yʉhʉ.
à jicʉ tiro yʉhʉre to cahĩchʉ mipʉre to cahmaare yoa pahñoja.
à jicʉ yʉhʉre to cahĩchʉ to yairo ã jinocai nieraja.
Jipihtina paina to cũrina yʉhdoro yʉhʉ sehe tuaro buhei.
à buhecʉ yʉ mʉ sʉro buherahi.
Cohamacʉ yʉhʉre cahĩno yʉhʉre yoadohore.
11 Yʉhʉ sehe ahri buheare yʉ buhechʉ tʉhorina jiboca mʉsa.
O paina sehere tʉhorina jiboca mʉsa.
à jipachʉta yʉhʉ,
yʉhʉ mehne macaina cʉ̃hʉ cʉ̃no potori ahri buheare buheja sã jipihtina Jesu to cũrina.
à sã buhechʉ tʉhona mʉsa sehe ahri buheare noano tʉhore.
Yariarina cjiri ti masa mʉjarine yahuha Paulo
12 Cristo to yariari baharo to masa mʉjarine sã buhepachʉta “Yariarina cjiri ne masa mʉjaerara”,
nina mʉsa mehne macaina cãina.
¿Dohse jiro baro ã nijari tina tíre?
13 Ã jiro yariarina cjiri ti masa mʉjaerachʉ Cristo cʉ̃hʉ ne masa mʉjaeraboa.
14 Ã yoa Cristo to masa mʉjaerachʉ noaa buheare sã yahuri cjiri ne yaba cjihti jieraboa.
To masa mʉjaerachʉ tirore mʉsa wacũ tuaa cʉ̃hʉ yaba cjihti jieraboa.
15 Masa mʉjano mariachʉ sã sehe Cohamacʉ yare mahñona niboa.
Yariarina cjiri ti masa mʉjaerachʉ Cohamacʉ sehe Cristore masa mʉjachʉ yoaeraboa.
To ã yoaerachʉ “Cohamacʉ Cristore masa mʉjachʉ yoari jire”,
sã nina mahñoina jiboa sã.
16 Yariarina cjirire Cohamacʉ masoeraro,
Cristo cʉ̃hʉre tiro masoeraboa.
17 Ã jiro Cristo to masa mʉjaerachʉ tirore mʉsa wacũ tuaa yaba cjihti jieraboa.
à yoa mʉsa ñaa yoari buhiri buhiri tiina jisiniboa mʉsa.
18 Masa mʉjano mariachʉ Cristo yaina cjiri yaria mʉhtaina cjiri pichacapʉ waha tuhsʉboa.
19 Cristore mari wacũ tuari baharo mari yariana masa mʉja masierana jipihtina paina masa yʉhdoro pjacʉoina jiboa mari sehe.
20 Potocãta Cohamacʉ Cristore masa mʉjachʉ yoari jire.
Cristo to masa mʉjari baharo mari cʉ̃hʉ yarianapʉ masa mʉjahtina tjija.
Tiro ã masa mʉjano,
marine sʉho masa mʉja mʉhtariro jira.
21 Õ seheta jira ahri:
Adão mehne masa yaria dʉcaha.
Tó sehe Jesu mehne yariarina cjiri masa mʉjaahca.
22 Adão yaina ji nʉnʉ tiinapʉ mari jipihtina yarianahca.
Tó seheta Cristo yaina mari jichʉ mari yariari baharo marine masa mʉjachʉ yoarohca Cohamacʉ.
23 Cãa curuari Cohamacʉ to quihõriro mʉ sʉchʉ masa mʉjaahca.
Cristo marine sʉho ji mʉhtariro masa mʉja mʉhtari jire.
Baharo tiro ahri yahpapʉ to tjua tachʉ mari to yaina cʉ̃hʉ masa mʉjanahca.
24 Tí pjata pihtiri dacho jirohca.
à jiro jipihtina ñaina pʉhtoare,
dutiinare,
tuainare cohãno Cristo yʉhdʉrʉcarohca.
To ã yoari baharo jipihtina bui to pʉhtoro to jirire Cristo wiarohca Cohamacʉ to Pʉcʉrore.
25 To wiahto pano to Pʉcʉro Cristore ñʉ tuhtiinare to yʉhdʉrʉca pahñohto pano Cristo pinihta jipihtina bui pʉhtoro jirohca.
à jirirota jiro cahmare tirore.
26 Tirore ñʉ tuhtiinare to yʉhdʉrʉcari baharo,
yariaro cʉ̃hʉre cohã batoarohca tiro.
Yariaro pihtia waharohca.
Pari turi yariasi masa.
27 Jipihtina bui dutihtiro cjihtore cũri jire Cohamacʉ Cristore.
Jipihtia pʉro cʉ̃hʉre cũri jire tirore.
Ãta nina Cohamacʉ yare ti joari pũi.
Cohamacʉ sehe tirore cũriro jira.
à jiro “Jipihtina bui dutihtiro cjihtore cũri jire tirore” nino,
“Cohamacʉ bui dutiriro jira tiro”,
nino nierari jire to yare ti joari pũi.
28 Jipihtina bui dutiriro Cristo Cohamacʉ macʉno to jichʉ Cohamacʉ tirore cũriro sehe to macʉno bui dutiriro jirohca.
à jiro Cohamacʉ sehe jipihtina bui pʉhtoro waro jira.
Jipihtia pʉro cʉ̃hʉ jira.
29 ¿Masa mʉjano mariapachʉta dohse yoa paina masa yariarina cjiri ya cjihtire ti bautisarina jijari?
Yariarina cjiri masa mʉjaerachʉ ti ya cjihtire paina bautisarina ti jichʉ tí yaba cjihti jieraboa.
30 Sã sehere sã buheri buhiri dachoripe paina sãre ti ñano yoa duachʉ cua nina sã cʉ̃hʉre.
Sãre ã cuapachʉta masa mʉjano to jichʉ masina ã buherucuja sã.
31 Yʉ coyea,
mari pʉhtoro Jesucristo yaina mʉsa jichʉ tirore wacũ tua namoina mʉsa wahachʉ yʉhʉ sehe tuaro wahche tʉhotuja mʉsare.
Tí potocãta jira.
à yoa,
“Dohse jiri nʉmʉi yʉhʉre yariahto cua nina”,
yʉ nichʉ tí cʉ̃hʉ potocãta jira.
32 Efeso macaina suaina noaa buheare yʉ buheri buhiri yʉhʉre tuhti,
cjãhre.
Masa mʉjano mariachʉ Jesu yairo yʉ jierachʉ,
yʉ ã ñano yʉhdʉri yaba cjihti jieraboa.
Wiho waro ñano yʉhdʉi niboa yʉhʉ.
Yariarina cjiri ti masa mʉjaerachʉ õ sehe niboa mari:
“Baharo curero yarianahca.
Dohse wahasi mari.
à jina chʉ sihnijihna.
Mari mʉ sʉro yoajihna”,
niboa mari.
33 Mahñoare tʉhotuena tjiga mʉsa.
“Ñainare piti tina,
noaa mʉsa yoaa tiare duhunahca mʉsa”,
nina masa.
Tí potocãta jira.
34 Noaare tʉhotuina jiga mʉsa.
Tuhsʉ,
noaare yoaina jiga tjoa.
à yoa ñaare yoa namoena tjiga tjoa.
Cãina mʉsa mehne macaina sehe ne Cohamacʉre masierara.
Mʉsa bʉo tihto sehe mʉsare ã nija.
Yariarina cjiri masa mʉjaina ti pjacʉri cjihtire yahu namoha Paulo
35 Ã yoa mʉsa mehne macariro õ sehe ni sinituboca yʉhʉre:
“¿Dohse yoa yariarina cjiri masa mʉjaahcari?
¿Dohse jia pjacʉri masa mʉjaahcari?”
ni sinituboca.
36 Ã sinituriro tʉho masierariro seheta bisiro coa tara.
Toari yapare mari toari baharo tí yapa baro cahachʉ waro dura.
Tó sehe wahaeraro ne dusi.
Tíre masina mʉsa.
37 Bʉcʉ yucʉpʉre toaeraja mari.
Pja yapari dihtare toaja mari.
Tí yapari trigo yapari jia ji,
o paye yapari baro jia jiboca.
38 Tí yaparire mari toari baharo Cohamacʉ to cahmariro seheta tí yaparire bʉcʉa mʉjachʉ yoara.
à yoaro mostaza yaparire mostaza yucʉ wahachʉ yoara tiro.
Trigo yaparire trigo yucʉ wahachʉ yoara.
Ãta du dutira Cohamacʉ.
39 Jipihtina pjacʉri cʉ̃no potori bajuerara.
Masa pjacʉri sehe cʉ̃no sehe jira.
Wahiquina pjacʉri cʉ̃hʉ soro sehe bajura.
Minichahca pjacʉri cʉ̃hʉ soro sehe bajura.
Wahi cʉ̃hʉ soro sehe pjacʉri tira.
40 Ã yoa mʉano macaa poca cʉ̃hʉ soro sehe bajura.
Tuhsʉ,
ahri yahpa macaina cʉ̃hʉ pjacʉ tira.
à yoa mʉano macaina pjacʉri soro sehe bajura.
à jia ahri yahpa macaa mʉano macaa yoaro sehe jierara.
41 Õ seheta jira.
Sʉ̃ dacho macariro si sitera.
à yoa ñami macariro cʉ̃hʉ soro jira.
Potota buhriara.
Tuhsʉ,
ñahpichoha poca cʉ̃hʉ soro sehe bajua si sitea cjʉara.
Ñahpichoha poca peri cʉ̃hʉre mari ñʉchʉ cãa poca pjiroca sia poca bajura.
à yoa paye poca tuaro sia poca bajura.
42 Tó seheta jira yariarina cjiri ti masa mʉjachʉ.
Masʉno to pjacʉre mari yari baharo to pjacʉ baa waharohca.
Baharo pa pjacʉ soro jiri pjacʉ jipihtia dachoripe catihti pjacʉ masa mʉjanohca.
43 To pjacʉre mari yachʉ yariariro cjiro pjacʉo nina.
Cohamacʉ tirore to masochʉ to pjacʉ noa yʉhdʉari pjacʉ jira.
Tuhsʉ,
to pjacʉ mari yari pjacʉ wiho jiri pjacʉ jira.
Cohamacʉ tirore to masochʉ pinihtare to pjacʉ wiho jiri pjacʉ jieraro,
tua yʉhdʉara.
44 Ahri yahpa macari pjacʉre mari yachʉ tiro yariariro cjiro to masa mʉjachʉ to pjacʉ mʉano macari pjacʉ jirohca.
Ahri yahpa macari pjacʉre mari cjʉana,
mʉano macari pjacʉ cʉ̃hʉre cjʉanahca,
masa mʉjana.
45 Õ sehe ni yahura Cohamacʉ yare ti joari pũi:
“Ahri yahpai ji mʉhtariro Adão wama tiriro catiriro wahaa tiha”,
ni joaa tiha.
To ã jipachʉta Adão yoaro sehe jiriro bato tiriro Cristo sehe catiare waro tari jire.
46 Ahri yahpa macari pjacʉ ji mʉhtari pjacʉ jira.
Baharopʉ mʉano macari pjacʉ jirohca.
47 Õ seheta jira:
Ji mʉhtariro Adão sehe ahri yahpa macariro dihta mehne to yoari pjacʉre pjacʉ tiri jire.
To baharo tariro,
Cristo sehe mʉanopʉ tari jire.
48 Dihta mehne ti yoari pjacʉ ti mʉhtariro to jiriro seheta jipihtina paina dihta mehne to yoari pjacʉ tiina jija mari.
à yoa mʉanopʉ tariro yoaro seheta to yaina jipihtina to yoaro sehe pjacʉ tiina jinahca mari.
49 Dihta mehne to yoari pjacʉ tiriro Adão yoaro sehe bajuja mari.
Baharo mʉano macariro Cristo yoaro sehe bajunahca mari.
50 Yʉ coyea,
mʉsare ahrire yahu duaja:
Ahri yahpa macari pjacʉ di mehne,
dihi mehne jiri pjacʉ pʉhtoro Cohamacʉ to sʉho jiropʉre mʉanopʉre ne wahasi.
Mari pjacʉri baahti pjacʉri jira.
à jia mʉanopʉ jipihtia dachoripe mari jihtopʉre ahri pjacʉri wahasi.
51 Panopʉre masa ti masierari cjirire mipʉre mʉsare yahu duaja:
Mari mehne macaina cãina yariasi.
à jina dóicãta,
mari pjacʉrire cohtotaina jinahca.
52 Corneta to puti batoari dachoi ãta waharohca marine.
Dóicãta,
mari capari wihmitjiã mari ñʉ pjõorocaro sehe õ sehe waharohca.
Corneta to bisiri baharo yariarina cjirire Cohamacʉ masonohca jipihtia dachoripe mari jihtina cjihtire.
Tuhsʉ,
mari pjacʉrire cohtotaina jinahca mari cʉ̃hʉ.
53 Mari pjacʉrire to cohtotachʉ tó pano mari baahti pjacʉri ti jipachʉta mari cohtotari baharo ne baasi.
à yoa mari pjacʉri ti cohtotachʉ tó pano mari yariahti pjacʉri ti jipachʉta ne yariasi.
54 Mari bahti pjacʉri ne baerahti pjacʉrire cohtotarohca.
à yoa mari yariahti pjacʉri ã jirucuhti pjacʉrire cohtotarohca.
Marine to ã cohtotachʉ panopʉ to joariro seheta ã waharohca:
“Ñaina mari jiri buhiri tiare Cristo to cohã pahñori baharo,
Cohamacʉ yariarore cohãnocari jire.
55 Ne pari turi mari yariasi.
à jina yariaro mehne pari turi ñano yʉhdʉsi mari”,
ni joaa tiri jire panopʉre.
56 Mari ñaa buhiri jichʉ pinihta yariaropʉ ñano yʉhdʉnahca.
à yoa Cohamacʉ dutia Moise cjirore to cũri cjirire mari masiri baharo,
buhiri tija mari.
à jiro marine pichacapʉ waha dutira Cohamacʉ dutia.
57 To ã dutipachʉta mari pʉhtoro Jesucristo sehe marine pichacapʉ wahaerachʉ yoara.
To ã yoariro jichʉ masina Cohamacʉ mehne wahche “Noana”,
nija mari.
58 Ã jina yʉ coyea,
yʉ cahĩina,
Cristore wacũ tua duhuena tjiga.
à yoana paina mʉsare noaa buheare ti cohã dutichʉ,
ne cohãena tjiga tíre.
à yoa dachoripe mari pʉhtoro Jesucristo to yoa dutirire noano yoarucuga mʉsa.
Mari pʉhtoro Jesucristo yare mari yoachʉ,
ahri wiho waro jierara.
Ahrire masina to yoa dutirire noano yoarucuga mʉsa.