Paulo Jesu to cũriro to jia tiare yahuha
9
1 Jesu to yare buhe dutiro to cũriro jija.
à jicʉ paina to cũrina ti yoaro seheta yoa masija yʉhʉ cʉ̃hʉ.
Mari pʉhtoro Jesure ñʉriro tjija yʉhʉ cʉ̃hʉ.
à jina Jesu yare yʉ buhechʉ mʉsa sehe tíre noano tʉhorina jina to yaina wahare mʉsa.
à to yaina waharina jina Jesu to cũriro yʉ jichʉ masi tuhsʉra mʉsa.
2 Paina yʉhʉre yahuwajaa “Tiro Jesu to cũriro jierara”,
niboca.
Ti ã nipachʉta mʉsare yʉ buheri baharo Jesu yaina wahana,
“Jesu to cũriro jira” ni,
yʉhʉre masi tuhsʉra mʉsa.
à jina paina ti yahuwajapachʉta mʉsa sehe to cũriro yʉ jia tiare masina.
3 Yʉhʉre yahuwajainare õ seheta ni yʉhtiihtja:
4 Mʉsare yʉ buheri baharo yʉ chʉhtire yʉ sihnihti cʉ̃hʉre yʉhʉre waboa mʉsa yʉ buheri wapa.
5 Ã jicʉ namo tiriro jicʉ yʉ namo Jesu yacoro to jichʉ ticoro mehne tini masiboa yʉhʉ.
Paina Jesu to cũrina,
Jesu bahana,
Pedro cʉ̃hʉ ti namosãnumia mehne ti tiniriro seheta yʉhʉ cʉ̃hʉ tini masiboa.
6 Yʉhʉ Bernabé mehne mʉsare noaa buheare sã buhepachʉta sãre ne paye barocã waerare mʉsa.
à jina sã basita sã chʉhti cjihtire dahra wapatai sã.
¿Sã dihtare wapataro marieno buhero cahmajari,
mʉsa tʉhotuchʉ?
7 Ahrina yʉ yahuhtina sehe ti dahrari wapa wapatara.
Cʉ̃iro surara to dahrachʉ to pʉhtoa tirore wapara.
To basi wapaerara.
Chʉare toariro cʉ̃hʉ to toari dicha tichʉ tíreta chʉ masina.
à yoa ovejare ñʉ wihboriro to nuina pẽchore sihni masina tiro.
8 “Ti dahrari wapare waparo cahamana”,
nicʉ masa ti dutia dihtare mʉsare yahueraja.
Cohamacʉ to dutiapʉ to niri cjiri cʉ̃hʉre mʉsare yahui nija.
9 Moise cjirore to cũri dutiare to yare ti joari pũi õ sehe ni yahura:
“Wachʉ trigo yaparire to dahpori mehne suhtiwerirore to chʉ duachʉ to dʉserore dʉcataena tjiga”,
nia tiri jire Cohamacʉ dutia.
10 Ã dutiro wachʉare nino nierari jire.
à dutiro marine nino niri jire marine buhero taro.
Wesere sahariro cʉ̃hʉ tí dichare narina cʉ̃hʉ ti dahrari baharo dicha tiri pja jichʉ ti wapatahtore cohtara tina.
(Ã jina dahrainare ti dahrari wapare waro cahmana marine.)
11 Mʉsare Cohamacʉ yare noaa buheare buhei sã.
¿Sã ã buhechʉ mʉsa sehe sãre chʉare waeraro cahmajari,
mʉsa tʉhotuchʉ?
Waro cahmana.
Mʉsa wachʉ noaboa sãre.
12 Ã waerarina jipanahta paina chʉare mʉsare ti sinichʉ mʉsa tina sehere wara.
Tina mʉsare ti chʉare sinichʉ sã sehe tina yʉhdoro mʉsare chʉare siniborina jimaja.
à wa dutiborina jipanahta sã sehe “Sãre waga”,
ne nierahi.
“Cristo ya buheare mʉsapʉ cahmaeraboca” nina,
sãre chʉa mariapachʉta mʉsare ne sinierahi.
13 Cohamacʉ wʉhʉi dahraina tí wʉhʉihta ti chʉare nana.
à yoa Cohamacʉre ti ño payori mesai cohtaina wahiquirore ti jʉ̃rirore mahanocã na chʉra tina cʉ̃hʉ.
¿Tíre masierari mʉsa?
14 Tó seheta ti yoariro seheta noaa buheare buheinare ti buheri wapare ti chʉhtire tinare waro cahmana mʉsare.
Ãta yoa dutire mari pʉhtoro Jesu.
15 Ã jicʉ mʉsare siniboriro jipaihta yʉhʉ ne paye barore sinierahi mʉsare.
à jicʉ ahrire mipʉre joacʉ paye barore wapa cahmai tai joai nieraja.
Mʉsare ne wapa cahma duaeraja.
Yariahtiro jipaihta ne wapa cahmasi yʉhʉ mʉsare.
Wapa marieno buhecʉ ji coa yʉhdʉaja.
à jicʉ mʉsare yʉ buheri wapa ne wapata chʉsi.
16 Noaa buheare buhe dutiro yʉhʉre cũre Cohamacʉ.
Tíre buheri masʉno jinocaihta nija yʉhʉ.
Noaa buheare buheracʉ pjacʉoriro jiboa yʉhʉ.
à jicʉ tí buheare buhecʉ “Painare masi yʉhdʉrʉcaja”,
niboriro jieraja yʉhʉ.
17 Noaa buheare yʉ mʉ sʉro buhecʉ yʉ buheri wapa wapaa naboa yʉhʉ.
Cohamacʉ yʉhʉre to yare buhe dutiro cũre yʉhʉre.
à jicʉ yʉ mʉ sʉro buheraja.
18 ¿To yare ã buhecʉ yaba barore wapatajari yʉhʉ?
Õ sehe jira yʉ wapataa:
Noaa buheare buhecʉ mʉsare ne paye barore sinieracʉ wapa marieno tí buheare buheja mʉsare.
Yʉ ã nirire masicʉ wahcheja.
Yʉ wahcheata jira yʉ wapataa.
19 Ne masare dahra cohtariro jierapaihta jipihtinare dahra cohtariro yoaro sehe jija yʉhʉ payʉ paina masa Jesu yaina ti wahahto sehe.
20 Ã jicʉ yʉ coyea judio masa mehne jicʉ,
ti yoaro seheta yoaja yʉhʉ Jesu yaina ti wahahto sehe.
Cohamacʉ to dutia cjirire Moise cjirore to cũri cjirire ño payoriro jierapaihta,
tí dutia dihtare ño payoina mehne jicʉ tí dutiare ño payoriro baro yoaro seheta jija yʉhʉ.
Ãta yoaja yʉhʉ tina Jesu yaina ti wahahto sehe.
21 Ã jicʉ Cristo yairo jicʉ Cohamacʉ dutiare Moise cjirore to cũri cjirire yʉhdʉrʉca duaeraja.
Tí dutiare yʉhdʉrʉca duaerapaihta tí dutia marieina mehne jicʉ tí dutia marieriro yoaro seheta jija.
Ãta yoaja yʉhʉ tina cʉ̃hʉ Jesu yaina ti wahahto sehe.
22 Jesure noano masieraina mehne jicʉ ti yoaro seheta jija.
“Masi pahñoriro jija”,
nieraja yʉhʉ.
Ãta yoaja yʉhʉ tina cʉ̃hʉ Jesu yaina ti wahahto sehe.
à jicʉ jipihtina masa ti jiriro seheta jija yʉhʉ cãina tina Jesu yaina to yʉhdʉchʉ yoaina ti wahahto sehe.
23 Ahrire yoaja noaa buheare jipihtina ti tʉhohto cjihtore.
Yʉ ã yoachʉ ñʉno Jesu to buheriro seheta tiro yʉhʉ cʉ̃hʉre noano yoara.
(Ã jicʉ masa ti jia tiro seheta jija.)
24 Õ seheta jira mari piti dahre buhechʉ.
Mʉrocapeina mʉrocaa tina jipihtina mʉrocara.
Ti ã mʉroca pihtipachʉta mʉroca yʉhdʉrʉcariro sʉ mʉhtana.
à sʉ mʉhtariro wapatara.
à jina ti mʉrocariro seheta mʉsa cʉ̃hʉ Cohamacʉ cahmaare yoaga mʉsa wapatahto sehe.
25 Jipihtina mʉrocaina ti pjacʉre dojomehneare duhunoca noano mʉrocapora ti mʉroca tuahto sehe.
Tuhsʉ,
ti noano mʉrocahto cjihtore quihõno chʉa,
quihõno carĩa,
noano yoara tina.
Ãta yoara tina mʉroca sʉ,
ti wapatahto sehe.
à jia ti ã yoa wapataa pũri mehne ti yoari soro jira.
Tí soro ñaco baaerara.
Mari sehe Cohamacʉ yare noano buheja to yare mari wapatahto sehe.
Tí wapataa pinihta ne baaerara.
26 Ã jicʉ yʉhʉ pa sehe mʉrocariro yoaro sehe yoaeraja.
Potori da mʉrocariro yoaro sehe yoaja yʉhʉ.
Tuhsʉ,
cahmacheperiro pa sehe dota moñoroca mʉjariro yoaro sehe yoaeraja.
à yoa duaeracʉ Cristo yare quihõno yoa duaja.
27 Ã jicʉ mʉrocapeina,
cahmachepeina cʉ̃hʉ ti pjacʉrire ti buheriro seheta ti noano quihõno ti yoariro seheta yʉhʉ cʉ̃hʉ yʉ pjacʉ mehne noaa dihtare yoapoja.
à yoaeracʉ painare buheriro jipaihta yaba cjihti jieraboa yʉhʉ sehe.