Paulo noa dutiha
16
1 Mari coyeacoro Febe wama tiricoro mʉsa cahapʉ waharo taro nina.
Ticoro Cencrea wama tiri macai Jesu yainare cahmachuinare yoadohoricoro jira.
2 Ã jiro payʉre yoadohoricoro yʉhʉ cʉ̃hʉre yoadohoricoro jihre ticoro.
Tuhsʉ,
mari pʉhtoro Jesu yacoro jira.
à jina ticorore noano mehne mʉsa mehne ji dutiga.
Tó seheta yoaro cahmana marine Jesu yainare.
à yoana ticorore paye baro to maerachʉ ñʉna ticorore waga mʉsa.
3 Aquila,
to namono Priscila cʉ̃hʉ noajaro.
Jesucristo yare yʉ buhechʉ tina cʉ̃hʉ yʉhʉ mehne dahrare.
4 Tinare mahano wajãmoñore paina yʉhʉre ti wajã duachʉ ti yoadohori buhiri.
à jicʉ tina mehne wahcheja yʉhʉ.
Tuhsʉ,
judio masa jieraina Jesu yaina jipihtina tina cʉ̃hʉ tina mehne wahchera.
5 Aquila ya wʉhʉi cahmachuina cʉ̃hʉ Jesu yaina noajaro.
Yʉ cahĩriro Epeneto cʉ̃hʉ noajaro.
Tiro Asia yahpa macariro tói jiro Cristore wacũ tua mʉhtariro jire.
6 María cʉ̃hʉ noajaro.
Ticoro mʉsa mehne tuaro dahrahre.
7 Yʉ coyea Andrónico,
Junia cʉ̃hʉ noajaro.
Peresui yʉ jichʉ tinata yʉhʉre piti tiina jihre.
à jia yʉ pano Cristore wacũ tua mʉhtare tina sehe.
Paina Jesu to cũrina sehe tinare “Potocãta noaina jira”,
ni durucura.
8 Ampliato cʉ̃hʉ yʉ cahĩriro Jesu yairo jira.
Tiro noajaro.
9 Urbano cʉ̃hʉ noajaro.
Tiro cʉ̃hʉ mari mehne Cristo yare dahrahre.
à yoa yʉ cahĩriro Estaqui noajaro.
10 Apele cʉ̃hʉ noajaro.
Tiro potocãta noano Jesure wacũ tuara.
To yoarire ñʉna tíre masija mari.
Tuhsʉ,
Aristóbulo ya wʉhʉ macaina jipihtina to namono to pohna cʉ̃hʉ noajaro.
11 Yʉ coyeiro Herodiõ noajaro.
à yoa Narciso ya wʉhʉ macaina Jesu yaina noa pihtinocajaro.
12 Ã yoa Trifena,
Trifosa cʉ̃hʉ noajaro.
Tí numia mari pʉhtoro Jesu ya dahraare yoara.
Mari cahĩricoro Pérside cʉ̃hʉ noajaro.
Ticoro mari pʉhtoro yare tuaro yoara.
13 Rufo mari pʉhtoro Jesure noano wacũ tuariro,
to yare noano yoariro noajaro.
To pocoro cʉ̃hʉ noajaro.
Ticoro yʉ poco yoaro sehe jiricoro jira.
14 Asíncrito,
Flegonte,
Herme,
Patroba,
Herma,
paina Jesu yaina tina mehne macaina cʉ̃hʉ noajaro.
15 Tuhsʉ,
Filólogo,
Julia,
Nereo,
to bahoro cʉ̃hʉ,
Olimpa,
paina tina mehne macaina cʉ̃hʉ Jesu yaina noajaro.
16 Ã yoa mʉsa mehne macainare piti bocana,
noano mehne piti bocaga.
Jipihtina Jesu yaina jipihtiro macaina mʉsare noa dutira.
17 Yʉ coyea,
mʉsa mehne macaina cãina mʉsare cahma ñʉ tuhti,
cahma tju wachʉ yoaina jira.
à jia mʉsare Jesu ya buheare dojomehnena.
à jina tó sehe yoainare ñʉna noano yoanohbʉ,
“Dojomehneri”,
nina.
à yoainare piti tiena tjiga.
18 Tó sehe yoaina mari pʉhtoro Jesucristo yare yoaerara.
Ñaare ti goa pjaa dihtare yoara.
Tuhsʉ,
noano tʉho ji coaro dero mahño buhera noano masierainare.
Ti ã mahñochʉ tinare noano tʉhora.
à jina ã yoainare piti tiena tjiga mʉsa.
19 Mʉsa sehe Jesure noano yʉhtiina jira.
Tíre jipihtina masina.
à noano yʉhtiina mʉsa jichʉ wahcheja yʉhʉ.
à jicʉ noano mʉsa yoahtore mʉsa masichʉ cahmaja yʉhʉ.
à yoa ne ñaare yoaeraina mʉsa jichʉ cʉ̃hʉre cahmaja yʉhʉ.
20 Ã jiro Cohamacʉ marine noano jinocachʉ yoariro mahanocã baharo watĩno Satanare yʉhdʉrʉcachʉ yoarohca mʉsare.
à yoa mari pʉhtoro Jesucristo mʉsare noano wahachʉ yoajaro.
21 Timoteo yʉ piti mʉsare noa dutira.
Yʉ coyea judio masa cʉ̃hʉ,
Lucio,
Jasõ,
Sosípatro mʉsare noa dutira.
22 Yʉhʉ Tercio ahri pũre Paulore joabasariro jija.
Yʉhʉ Jesu yairo jicʉ mʉsare Jesu yainare noa dutija.
23 Gayo ya wʉhʉi jinocai nija yʉhʉ Paulo.
To ya wʉhʉi Jesu yaina cahmachuna.
Tiro cʉ̃hʉ mʉsare noa dutira.
à yoa Erasto ahri maca macaina pʉhtoare niñerure ñʉ wihbobasariro mʉsare noa dutira.
Mari coyeiro Jesu yairo Cuarto cʉ̃hʉ mʉsare noa dutira.
24 [Yʉ coyea mari pʉhtoro Jesucristo mʉsare jipihtinare to cahĩa mehne noano yoajaro.
Ãta yoajaro.]
Paulo Cohamacʉre ño payoro joa batoara
25-27 Mari pʉhtoro Jesucristo ya buhea mehne noaa buhea mehne Cohamacʉ mʉsare tirore wacũ tua namochʉ yoa masina.
Panopʉre tí buhea noaa buhea ne masare yahuerari buhea jimaha.
Mipʉre Cohamacʉ yare yahu mʉhtaina cjiri ti joari cjiri mehne tí buheare yahua jira.
Yʉhʉ cʉ̃hʉ tíreta buheja.
Tí buheare Cohamacʉ ã jirucuriro to yahu site dutiro seheta jipihtiro macainapʉ mipʉre masina.
Tí buheare tirota yahu dutiha masa tirore yʉhti,
ti wacũ tuahto cjihto sehe.
à jina tirore “Potocãta noariro,
tuariro jira mʉhʉ”,
ni wahche payojihna.
Tiro cʉ̃irota Cohamacʉ dihta noano masi pahñoriro jira.
Jesucristo to yoadohoa mehne Cohamacʉre ã ño payorucujihna mari.
Ãta yoarucujihna.