10
1 Yʉ coyea,
Israe masare pichacapʉ wahaborinare Cohamacʉ to yʉhdohtore,
tuaro yʉ yajeripohna mehne cahmasãamaja yʉhʉ.
à jicʉ Cohamacʉ tinare to yʉhdohto cjihtore sini payoja yʉhʉ.
2 Potocãta tina Cohamacʉ cahmaare tuaro yoa duamana.
à yoa duapahta to cahmaa warore masierara.
3 Tuhsʉ,
tinare Cohamacʉ to noaina wahachʉ yoaborire tina tʉho ñahaerare.
à tʉho ñahaeraa,
ti mʉ sʉro noaare yoa duapahta bihoerare.
Ti ã yoachʉ tinare Cohamacʉ to wacũ tua dutiriro seheta ti yoaerachʉ ñʉno,
tiro sehe tinare “Noaina jira”,
ni ñʉerare.
4 Wiho mejeta Cristore wacũ tuaina sehere “Noaina jira”,
ni ñʉna Cohamacʉ.
à jina dutia yoaa mehne yʉhdʉeraja mari.
Cristo mehne yʉhdʉja.
5 Moise cjiro panopʉ macariro õ sehe ni joaa tiha:
“Cohamacʉ to dutirire ne cʉ̃no dʉhsaro marieno mari yoa pahñochʉ Cohamacʉ yʉhdorohca marine”,
ni joaa tiha tiro.
6,7 To ã ni joapachʉta mipʉre masa Cristore ti wacũ tuachʉ ñʉno Cohamacʉ tinare “Noaina jira”,
ni ñʉna.
Tí buhea noaina ti wahachʉ yoari buhea õ sehe ni yahura:
Cristo to basi ahri yahpapʉ wihi tuhsʉri jire.
Tuhsʉ,
masa mʉja tuhsʉri jire.
à jina õ sehe ni tʉhotuena tjiga mʉsa:
“¿Diro sehe mʉanopʉ Cristore na tabasaro wahabocari marine to yʉhdohto sehe?
¿Diro sehe yariaina cahapʉ Cristore masobasa na tabocari?
Tirore na taboriro mariahna”,
ni tʉhotuena tjiga mʉsa.
8 Õ sehe ni yahura Cohamacʉ yare ti joari pũi:
“Cohamacʉ ya buheare mari macachʉ to buhea õi jira.
To buheare masi tuhsʉra mʉsa.
à yoa to buheareta durucua tire mʉsa”,
ni joaa tiha.
Tí buheare Cristore wacũ tuaa buheare masare yahuja sã.
9 Tí buhea õ sehe ni yahura:
“Jesu mari pʉhtoro jira”,
ni mari yahuchʉ,
“Cohamacʉ Jesure yariariro cjirore potocãta masore”,
ni mari wacũ tuachʉ,
Cohamacʉ marine pichacapʉ wahaborinare yʉhdorohca.
10 Jesure mari wacũ tuachʉ Cohamacʉ sehe marine “Noaina jira”,
ni ñʉnohca.
Jesure mari wacũ tuaare painare mari yahuchʉ tiro marine pichacapʉ wahaborinare yʉhdorohca.
11 Õ sehe nina Cohamacʉ yare ti joari pũi:
“Cohamacʉre wacũ tuaina tirore ti wacũ tuaa mehne ne cahyasi”,
niha Cohamacʉ yare ti joari pũi.
12 Judio masare,
judio masa jieraina cʉ̃hʉre Cohamacʉ cʉ̃no potorita yoadohora.
Mari pʉhtoro jipihtina bui pʉhtoro jira tiro.
à jiro tirore to yoadohoare siniinare jipihtinare noano waro yoadohorohca tiro tinare.
13 Õ sehe ni joaa tiha panopʉre:
“ ‘Yʉ buhiri tiare cohãbasa,
yʉhʉre yʉhdoga’,
ni mari pʉhtorore masa ti sinichʉ tinare pichacapʉ wahaborinare mari pʉhtoro yʉhdorohca”,
ni joaa tiha Cohamacʉ yare.
14 Wiho mejeta masa sehe Cristore wacũ tuaeraa,
tirore ã ni sini masierara tina.
Tuhsʉ,
to buhea cʉ̃hʉre tʉhoeraa,
tirore wacũ tua masierara.
à yoa to buheare yahuriro mariachʉ cʉ̃hʉre tíre tina masisi.
15 Tuhsʉ,
to buheare yahuhtinare Cohamacʉ sehe to warocaerachʉ to buheare yahu masierara.
à ni joaa tiha Cohamacʉ yare ti joari pũi:
“Noa buheare yahuhtina ti tachʉ noano wahcheja mari”,
ni joaa tiha panopʉre.
16 Tí ã ni joari jipachʉta masa payʉ noaa buheare tʉho duaerara.
Ãta ni joaa tiha Isaia cjiro:
“Yʉ pʉhtoro,
tinare mari yahurire tina ne tʉho duaerare”,
ni yahua tiha Isaia cjiro Cohamacʉre.
17 Ã jia masa noaa buheare tʉhoa Cristore wacũ tuare.
Ti tʉhoa sehe noaa buhea sehe Cristo ya buhea waro jira.
18 Ã jicʉ ahrire õ sehe ni sinitu ñʉ duaja mʉsare:
¿Israe masa Cohamacʉ yare tʉhoerari,
mʉsa tʉhotuchʉ?
Potocãta tina tʉhoa waro tʉhomare.
Ãta nina Cohamacʉ yare ti joari pũ cʉ̃hʉ:
“Cohamacʉ noa putiariro to jia tiare yahuina jipihtiropʉ yahu sitea wahare.
à jia jipihtiro macainapʉ to yare tʉho sahseare”,
ni joaa tiha panopʉre.
19 Pari turi mʉsare õ sehe ni sinitu ñʉ duaja tjoa:
¿Israe masa tʉhopahta noano masierari tina,
mʉsa tʉhotuchʉ?
Masia timaha tina.
Ahrire yahu namocʉ Moise cjiro to nirire yahu mʉhtaihtja.
Õ sehe ni joaa tiha tiro:
“Õ sehe ni yahura Cohamacʉ Israe masare:
‘ “Tʉho masieraina,
ñaina jira”,
ni mʉsa ñʉina sehere yʉ yaina cjihti wahachʉ yoaihtja.
Yʉ ã yoachʉ mʉsa sehe tina mehne sua,
tinare ñʉ tuhtinahca.
à yoacʉ mʉsare suachʉ yoaihtja yʉhʉ’,
ni yahure Cohamacʉ Israe masare Israe masa jierainare to yaina jichʉ yoaro taro”,
ni joaa tiha Moise cjiro.
20 Tuhsʉ,
Isaia cjiro cʉ̃hʉ cuiro marieno õ sehe nia tiha:
“Õ sehe nina Cohamacʉ:
‘Yʉhʉre macaeraina sehe yʉhʉre bocahre.
à jicʉ yʉhʉre cahmaerainare tinare yʉhʉre masichʉ yoahi yʉhʉ’,
nire Cohamacʉ”,
ni joaa tiha Isaia cjiro judio masa jierainare.
21 Tuhsʉ,
Israe masa sehere õ sehe ni joaa tiha Isaia cjiro:
“Õ sehe nina Cohamacʉ:
‘Tina yʉhʉre yʉhdʉrʉcaina,
yʉhʉre cahmaeraina jira.
à jicʉ tinare ti ñaare cahya duticʉ “Yʉ yaina wahaga”,
ã nirucumai tinare.
Wiho mejeta tina sehe yʉhʉre ne yʉhti duaerare’,
nire Cohamacʉ”,
ni joaa tiha Isaia cjiro.