Israe masa Cohamacʉ to beserina jira
9
1,2 Yʉ coyea Israe masare wacũcʉ tuaro cahyaja.
Cristore cahmaerara tina.
à jicʉ ñano cahya yajeripohna tija yʉhʉ.
Tí yʉ ã ni yahua potocãta jira.
Yʉhʉ Cristo yairo tjija.
à jicʉ mʉsare “Cahyaja”,
yʉ nia sehe potocãta jira.
Mʉsare ã nicʉ mahñoi nieraja.
Espíritu Santo yʉ ã mahñoerachʉ masino,
yʉhʉre “Quihõno mʉ cahyarire yahure mʉhʉ” ni,
yʉhʉre masichʉ yoare.
3 Israe masa yʉ coyea yʉ ya yahpa macaina pichacapʉ wahaahca.
Cohamacʉre tinare yʉhdo duti duacʉ õ sehe ni duamaca yʉhʉ sehe:
“Ti ya buhirire yʉhʉ sehe pichacapʉ wahaihtja.
à jiro ti yaro jiborirore yʉhʉ sehere buhiri dahrejaro Cristo”,
ni duamaca yʉhʉ.
4 Tina yʉ coyea Israe cjiro panamana ji turiaina jira.
Tinare to pohna cjihtire cũha Cohamacʉ.
Tuhsʉ,
to si sitea mehne ti watoi jia tiha.
Tinare jipihtinare to noano wahachʉ yoaa cʉ̃hʉre yahu cũ mʉhtaa tiha.
Tuhsʉ,
Moise cjirore to dutiri cʉ̃hʉre dóipʉta tinare Israe masareta cũ mʉhtaa tiha.
Tirore ti ño payohti macaa cʉ̃hʉre tinareta cũ mʉhtaa tiha.
Tuhsʉ,
masare to yʉhdohto cʉ̃hʉre yahu cũa tiha tinare Cohamacʉ.
5 Sã ya curuari waro doce curuari waro jira.
Sã ñʉchʉsʉma ji mʉhtarina cjiripʉ ti panamana jia tiha.
Ti panamana ji turiainapʉ jija sã Israe masa.
à jiro mari yoaro sehe pjacʉ tiriro taro,
sã coyeiro Israe masʉno waro jire Cristo.
Tiro Cohamacʉta jira.
à jiro tiro jipihtina bui pʉhtoro jira.
Jipihtia dachoripe tirore noano ño payojihna mari.
à ño payorucujihna.
6 Paina Israe cjiro panamana ji turiaina jipahta Cohamacʉ yaina waro jierara.
à jina tina to yaina ti jierachʉ ñʉna õ sehe ni tʉhotuboca mʉsa:
“ ‘Israe masare yʉ yaina jichʉ yoaihtja’,
niparota cãinare Cohamacʉ to niriro seheta yoaerara”,
ni tʉhotuboca mʉsa.
à ni tʉhotuena tjiga.
7 Õ sehe jira:
Paina Abrahã panamana ji turiaina ti jipachʉta “Abrahã panamana ji turiaina waro jira”,
ni ñʉerara Cohamacʉ tinare.
à jiro õ sehe nia tiha Cohamacʉ:
“Mʉ macʉ Isaa panamana ji turiaina tina pinihta potocãta mʉ panamana ji turiaina waro jiahca”,
ni yahu cũa tiha Cohamacʉ Abrahãre.
8 To ã ni yahu cũchʉ ahrire masinahca mari:
Abrahã cjiro panamana jipihtina waro Cohamacʉ pohna jieraca.
Cohamacʉ to ni cũrire noano tʉhoina tirore wacũ tuaina sehe tinata jica Cohamacʉ pohna.
à jia tinata jira Abrahã cjiro panamana ji turiaina waro.
9 Õ sehe niha Cohamacʉ Abrahã cjirore:
“Pa cʉhma ahri pja baroihta yʉ tjua tachʉ mʉ namo Sara wihãrirocãre cjʉarohca mʉ macʉre”,
nia tiha Cohamacʉ Abrahã cjirore.
à nino Cohamacʉ Abrahã cjiro macʉno to masa bajuahtore yahu cũyuro nia tiha.
10 Baharo Isaa cjiro namono Rebeca wama tiricoro pʉaro pohna tia tiha.
Ti pʉcʉro Isaa sã ñʉchʉ cjiro jia tiha.
11,12 Ã jia ti pohna ti masa bajuerasinipachʉta,
noaare,
ñaa cʉ̃hʉre ti yoaerasinipachʉta Cohamacʉ ti pocoro cjihtore õ sehe nia tiha:
“To bahʉro sehe to wahminore dutirohca.
à jiro to pʉhtoro jirohca”,
nia tiha ticorore.
Cohamacʉ to cahmano seheta besera tiro.
à jiriro jiro cʉ̃irocãre besero ticorore ãta ni yahua tiha.
à jiro masa ti yoaare ñʉeraparota to cahmano seheta tiro to yaina cjihtire besera.
13 Ãta ni joaa tiha to yare ti joari pũi:
“ ‘Jacobo sehere cahĩa tihi.
Esaú sehere cahĩera tihi’,
niha Cohamacʉ”,
ni joaa tiha panopʉ.
14 ¿Tíre wacũna dohse ni tʉhotubocari mari?
¿Ti yoahtire ñʉeraparota cʉ̃irore ã besero Cohamacʉ quihõno yoaro nierabocari,
mʉsa tʉhotuchʉ?
Jierara.
15 Õ sehe nia tiha Cohamacʉ Moise cjirore:
“Diro yʉ pja ñʉ duarirore pja ñʉihtja”,
nia tiha tiro Moise cjirore.
à jiro cʉ̃irore ã besero quihõno yoaro niha Cohamacʉ.
16 Ã jina mari mʉ sʉro mari cahmano sehe Cohamacʉre marine pja ñʉchʉ yoaeraja mari.
Tuhsʉ,
ne mari noaare mari yoari wapa cʉ̃hʉre marine pja ñʉerara tiro.
To mʉ sʉro to pja ñʉ duaina sehere pja ñʉna.
17 Egipto macaina pʉhtoro faraõ cʉ̃hʉre to cahmano seheta yoaa tiha tiro.
Õ sehe nia tiha Cohamacʉ faraõre:
“Egipto macaina pʉhtoro cjihtore cũi nii mʉhʉre yʉ tuare jipihtinare yʉ ñohto cjihtore.
Tuhsʉ,
jipihtia yahpari macaina yʉhʉre ti masihto cjihtore pʉhtoro sõi nii yʉhʉ mʉhʉre”,
nia tiha Cohamacʉ faraõre.
Tó seheta nina Cohamacʉ yare ti joari pũi.
18 Ã jiro to pja ñʉ duainare to mʉ sʉro pja ñʉna tiro.
Tuhsʉ,
paina sehere to mʉ sʉro yʉhtierachʉ yoara tiro.
To cahmano seheta yoara tiro.
19 To ã yoariro jichʉ ñʉna yʉhʉ sehere õ sehe niboca mʉsa:
“Cohamacʉ marine to cahmano seheta to yoachʉ mari sehe tirore yʉhdʉrʉcana bihosi.
¿Mari ã yʉhdʉrʉcana bihoerapachʉta dohse jiro baro marine buhiri dahre duajari tiro?”
ni susini sinituboca mʉsa yʉhʉre.
20 Tíre õ sehe ni yʉhtija mʉsare:
¿Masa wiho jiina jipanahta Cohamacʉre tuhtijari mʉsa?
Dihi biato dahrerirore “¿Dohseacʉ yʉhʉre õ sehe jiri biato yoari mʉhʉ?”
tí biato to ni sinituboriro seheta nina nica mʉsa Cohamacʉre.
Tó sehe ni masierara mʉsa.
21 Dihi biato dahreriro dihi mehne to yoa duaro seheta yoara.
à yoaro cʉ̃ria dihica mehne noaare cũhti biatore yoa masina tiro.
Tia dihica mehneta wiho jiare cũhti biato cʉ̃hʉre yoa masina tiro.
Tiro yoaro seheta Cohamacʉ cʉ̃hʉ to yoa duaro seheta yoara.
22 Ã jiro Cohamacʉ pichacapʉ to cohãhtinare ti ñaa yoarire to ñʉ yabiare,
to tuaa cʉ̃hʉre ñono taro,
tinare dói buhiri dahre duamaha.
à dói buhiri dahre duaparota,
yoari pja ti ñaa yoaare ã ñʉnocasiniha.
à jiro tinare buhiri dahrerasiniha.
23 Ãta yoaha Cohamacʉ noabiariro to jiare,
to tuaa cʉ̃hʉre mari masihto cjihtore.
Panopʉ marine to pja ñʉina cjihtire tiro beseri jire jipihtia to tuaare to noaa cʉ̃hʉre mari cjʉahto cjihto sehe.
24 Ã jina mari sehe to beserina jinata nija.
à jia to beserina sehe cãina judio masa dihta jierara.
Cãina judio masa jieraina cʉ̃hʉ jira to beserina.
25 Ãta nina judio masa jierainare Cohamacʉ yare Osea cjiro to joariro seheta:
“Pano yʉ yaina jieraina cjiri cʉ̃hʉre baharopʉ tinare ‘Yʉ yaina jira’,
niihtja.
à yoa pano yʉ cahĩeraina cjiri cʉ̃hʉre baharopʉ tinare ‘Yʉ cahĩina jira mʉsa’,
niihtja”,
nia tiha Cohamacʉ.
26 “ ‘Yʉ yaina jierara mʉsa’,
Cohamacʉ to nia yahpari macaina tina Cohamacʉ catiriro pohnata jiahca”,
ni joaa tiha Osea cjiro panopʉre.
27 Tuhsʉ,
panopʉ macariro Isaia cjiro cʉ̃hʉ Israe masare õ sehe ni yahua tiha:
“Pjiri ma macaa padʉ yaparicãre mari quihõna bihoeraja.
Israe masa tí yaparicã peri payʉ ti jiro sehe jiina ti jipachʉta mahainacã Cohamacʉ yʉhdorohca tinare.
28 Cohamacʉ ahri yahpa macainare payʉ masare to nino seheta cjero mehne potocãta buhiri dahre bahrañonohca”,
nia tiha Isaia cjiro.
29 Ã yoa pari turita Isaia cjiro õ sehe ni joaa tiha tjoa:
“Mari pʉhtoro jipihtina bui pʉhtoro mahainacã mari mehne macainare yʉhdoeraro,
marine judio masare jipihtinare butichʉ yoaboa tiro.
Sodoma macainare,
Gomorra macaina cʉ̃hʉre to butichʉ yoariro seheta mari cʉ̃hʉre butichʉ yoaboa tiro”,
ni joaa tiha Isaia cjiro yʉ coyea Israe masare.
Judio masa noaa buheare cahmaeraha
30 Ã tjira.
à jina ahrire masi namoga mʉsa:
Judio masa jieraina Cohamacʉre macaerapahta tirore bocare.
Jesucristore ti wacũ tuachʉ ñʉno,
“Buhiri marieina,
noaina jira”,
ni ñʉre tinare Cohamacʉ.
31 Wiho mejeta judio masa sehe “Cohamacʉ dutiare mari yoachʉ tiro marine yʉhdorohca”,
nia Cohamacʉ Moise cjirore to dutiare yoapahta,
bihoerare.
Ti ã bihoerachʉ ñʉno,
Cohamacʉ “Noaina jira”,
ni ñʉerare tinare.
à jia noaina ji duapahta bihoerare.
32 Õ sehe yoaa,
tina bihoerare:
Tina Cohamacʉre wacũ tuaro marieno ti mʉ sʉro Moise cjirore to dutirire yoa duamare,
to yaina ji duaa.
Mari piti dahre buhechʉ Cristo tãca yoaro sehe jiriro jira.
Ti mʉ sʉro yoainare Cristo pʉha tu borachʉ yoari tãca yoaro sehe jiriro jira.
Mʉroca wahcãriro sehe tãcapʉ pʉha tu,
bora sʉ caharo to wacũ wahcãnopʉre ne sʉerara.
(Pʉha tu borariro yoaro seheta tina Cristore tãca yoaro sehe jirirore cahmaeraina Cohamacʉ cahapʉ ne sʉsi.)
33 Ãta ni joaa tiha Cohamacʉ yare ti joari pũi:
“Jerusalẽ wama tiri macai pʉha tu borachʉ yoari tãca yoaro sehe jirirore cũja.
Mari piti dahre buhechʉ õ sehe jira:
Mʉroca wahcãriro tãcapʉ doca wahã sʉ bora sʉ caharo to wacũ wahcãnore sʉerara.
Tãca yoaro sehe jirirore cahmaeraina sehe tiare pʉha tu bora,
ti wacũ wahcãnopʉre ti sʉeraro seheta Cohamacʉ cahapʉ sʉsi.
Wiho mejeta tirore wacũ tuaina sehe tiro mehne ã wahcherucuahca”,
ni joaa tiha.