Jerusalẽpʉ Jesu yaina cahmachuha
15
1 Ã yoa Judea yahpa macaina mahainacã Antioquíapʉ sʉa,
Jesu yainare õ sehe ni buhe dʉcaha tina:
—Cohamacʉ to dutiare Moise cjirore cũno õ sehe ni cũha.
Jipihtina ti pjacʉre mahari cahsarocãre ti yihsohtore yahu cũha Moise cjirore.
Mʉsa tíre yoaerachʉ Cohamacʉ mʉsare yʉhdosi —ni buheha tina tó macainare.
2 Ti ã ni buhechʉ tʉhoa Judea yahpa macaina sehe cahma sayoha Paulo cʉ̃hʉre Bernabé mehne.
Ti ã cahma sayori baharo Jesu yaina sehe Paulore,
Bernabére paina tó macaina cʉ̃hʉre Jerusalẽpʉ warocaha.
Judea yahpa macaina ti buherire Jesu to cũrinare Jesu yaina pʉhtoa cʉ̃hʉre sinitu ñʉ dutia warocaha Paulo cʉ̃hʉre.
3 Ã jia Jesu yaina tinare ti warocachʉ waha,
Fenicia yahpare sʉ,
yʉhdʉ wahcã,
Samaria yahpapʉ sʉha.
Tí macaripʉ sʉa,
judio masa jieraina Cohamacʉ yare ti cahma dʉcarire yahuha tina tó macainare.
Ti ã yahuchʉ tʉhoa tó macaina Jesu yaina tuaro wahcheha.
4 Ã yoa tina Jerusalẽpʉ ti sʉchʉ ñʉa tó macaina Jesu yaina,
Jesu to cũrina,
to yaina pʉhtoa mehne wahchea mehne noano piti bocaha tinare.
Ti ã piti bocachʉ Paulo,
Bernabé mehne Cohamacʉ to tuaa mehne ti yoarire yahuha tina Jerusalẽ macainare.
5 Wiho mejeta tópʉ fariseo curua macaina Jesu yaina mahainacã jiha.
à jia tina tópʉre wahcãrʉca,
õ sehe ni yahuha:
—Tinare judio masa jierainare ti pjacʉre mahari cahsarocãre yihsoro cahmana.
“Cohamacʉ Moise cjirore to dutirire yoaga mʉsa cʉ̃hʉ”,
nino cahmana tinare —niha tina fariseo curua macaina cʉ̃hʉ.
6 Ti ã nichʉ tʉhoa Jesu to cũrina,
to yaina pʉhtoa mehne ti ã nirire cahnoa taa,
cahmachuha.
7 Ã cahmachua tina payʉ ti durucuri baharo Pedro wahcãrʉca,
õ sehe ni yahuha tinare:
—Coyea,
panopʉ yʉhʉre mʉsa mehne jirirore Cohamacʉ õ sehe yoa dutiro yʉhʉre cũre.
Tiro yʉhʉre noaa buheare judio masa jierainare yahu dutiro cũre.
Tinare Jesure wacũ tua dutiro yʉhʉre tinare buhe dutire.
8 Cohamacʉ masa ti tʉhotuare masina.
à jiro tiro judio masa jierainare to yaina to yoarire ñono taro tiro Espíritu Santore ware tinare,
marine to yoariro seheta.
9 Ã waro tiro marine tina cʉ̃hʉre cʉ̃no potori noano yoare.
Tina tirore ti wacũ tuachʉ ti ñaa buhirire bore tiro.
10 Mari sehe Cohamacʉ Moise cjirore to cũri dutiare cʉ̃no pjaeraja.
Mari ñʉchʉsʉma cjiri cʉ̃hʉ cʉ̃no pjaeraha.
¿Ã mari cʉ̃no pjaerapachʉta dohse yoana Jesu yainare judio masa jierainare tíre yoa duti duajari mʉsa?
à yoa dutina Cohamacʉ tinare to yoarire “Quihõno wahaerara”,
nina nica mʉsa.
11 Wiho mejeta õ sehe sã tʉhotuja.
Mipʉre judio masa jieraina yoaro seheta mari cʉ̃hʉre mari pʉhtoro Jesu cahĩa mehne Cohamacʉ yʉhdorohca.
Dutiare mari yoaa mehne marine yʉhdosi —niha Pedro tinare.
12 To ã nichʉ tʉhoa jipihtina dihta mariea wahaha.
Ti ã dihta mariachʉ Paulo,
Bernabé mehne judio masa jieraina watoi Cohamacʉ tuaa mehne ti yoa ñorire yahuha tinare.
13 Ã ti yahu tuhsʉri baharo Santiago õ sehe ni yahuha:
—Coyea,
tʉhoga yʉhʉre.
14 Cohamacʉ judio masa jierainare to yaina cjihtire to coã yoarire yahu tuhsʉhre Pedro.
15 Panopʉ macaina Cohamacʉ yare yahu mʉhtaina cjiri ti yahuriro seheta ã wahahre judio masa jierainare.
Õ sehe ni Cohamacʉ yare joaa tiha tina:
16 “Panopʉ Davi cjiro ya curua macaina ti pʉhtoa jiri cjiri pihtia wahare.
Baharo tjua taihca yʉhʉ.
à jicʉ pari turi to ya curua macarirore pʉhtoro sõihca.
17 Yʉ ã yoari baharo jipihtina paina judio masa jieraina yʉhʉre pʉhtoro tiahca tina.
‘Yʉ yaina jiga’,
yʉ ni pjirocarina sehe yʉhʉre cahmaahca.
18 Ãta nina mari pʉhtoro.
Panopʉ tiro ahrire masare yahua tiri jire”,
ni joaa tiha Cohamacʉ yare yahu mʉhtaina cjiri.
19 ’Ã jicʉ õ sehe ni tʉhotuja yʉhʉ.
Judio masa jierainare Cohamacʉ yare wahma cahma dʉcainare payʉ yoa dutiena tjijihna mari.
20 Wiho mejeta tinare joa,
warocajihna mari.
Õ sehe ni joarocajihna:
“Ñaa chʉare,
‘Cohamacʉ jira’,
ti nia masʉrine ti waa chʉare chʉena tjiga.
Tuhsʉ,
numia mehne ñano yoaena tjiga.
Numia cʉ̃hʉ mʉa mehne ñano yoaena tjiga.
à yoa wamʉa ti ñaha wajãinare wahiquinare chʉena tjiga.
Dire sihniena tjiga”,
ni yahu joarocajihna.
21 Yoari pja judio masa buhea wʉhʉsepʉ Sabado jichʉ Cohamacʉ Moise cjirore to cũri dutiare buhea tire masa.
à yoa jipihtia macaripʉ Moise cjiro to yahuare buhea tire.
(Ã jina yʉ niriro seheta judio masa jierainare Jesu yainare joarocajihna,
judio masa sehe tina mehne “Suari”,
nina) —niha Santiago.
22 Tí pjare Jesu to cũrina,
Jesu yaina pʉhtoa,
jipihtina Jesu yaina mehne pʉaro tina mehne macainare beseha ti warocahtinare.
Antioquíapʉ Paulo,
Bernabé mehne ti wahachʉ wahahtinare tinare bese warocaha.
à jia tina Judare,
Sila mehne warocaha.
Juda sehe Barsaba pʉaro wama wama tiha.
Ti coyea Jesu yaina tinare ño payoha.
23 Tinare ti beseri baharo Jesu yaina joarocari pũre warocaha tina mehne.
Õ sehe ni joaha tina:
“Jesu to cũrina,
to yaina pʉhtoa,
mʉsa coyea Jesu yaina mehne sã noa dutija mʉsare.
Jipihtina judio masa jierainare Antioquíapʉ,
Siriapʉ,
Ciliciapʉ jiinare mʉsare Jesu yainare noa dutija sã.
24 Sã mehne macaina mʉsa cahapʉ sʉa,
mʉsare payʉ dutiare yoa dutiyuhti.
à yoaa mʉsare cariboyuhti.
Tina Cohamacʉ dutiare Moise cjirore to cũri cjiripʉre,
mahari cahsarocãre yihsoa cʉ̃hʉre yoa dutiyuhti.
Wiho mejeta sã sehe tinare tíre buhe dutina warocaerahi.
25,26 Ã jina sã jipihtina cʉ̃no potori mʉsa cahapʉ warocahtinare sã besehi.
Mari cahĩinare Paulo,
Bernabé mehne Cristo Jesu mari pʉhtoro yare cuiro marieno ti buhechʉ payʉ tahari paina tinare wajãmoñoha.
Ti ã wajãmoñochʉ mahanocã mehne yʉhdʉha tina.
Tina mehne sã beserinare mipʉre warocaja.
27 Ã jina Judare,
Sila mehne mʉsa cahapʉ warocaja.
Sã joarocarire tina sehe mʉsare yahuahca.
28 Espíritu Santo to wacũno seheta sã cʉ̃hʉ tʉhotuja.
Õ sehe jira tí:
Paye dutiapʉre cũeraja mʉsare.
Ahri dutia dihtare cũnahca mʉsare:
29 Ñaa chʉare,
‘Cohamacʉ jira’,
ti nia masʉrine ño payo ti duhu payoa chʉare chʉena tjiga.
Dire sihniena tjiga.
Wamʉare ti ñaha wajãinare wahiquinare chʉena tjiga.
à jina numia mehne ñano yoaena tjiga.
Numia cʉ̃hʉ mʉa mehne ñano yoaena tjiga.
Ahri yʉ yoa dutierare yoaerana noaare yoana nica mʉsa.
Tó puro tjira mʉsare sã yahu duaa”,
ni joarocaha Jesu yaina Jerusalẽpʉ jiina.
30 Tí pũre joa tuhsʉ,
waha Antioquíapʉ wahainare.
Ti wari baharo waha,
Antioquíapʉ sʉha.
Ti tópʉ sʉri baharo payʉ masare cahmachu duti,
ti joari pũre wiaha tinare.
31 Tí pũre ti buheri baharo tina yajeri sãa,
noano wahcheha.
32 Ã jia Juda,
Sila mehne Cohamacʉ yare yahu mʉhtaina jia,
yoari pja Jesu yainare Cohamacʉ yare yahuha.
Ti ã yahuchʉ tʉhoa,
Jesu yaina sehe wahche,
noano tʉhotuha.
33 Ã jia Juda,
Sila mehne tópʉ mahaa dachoricã ti jiri baharo Jerusalẽpʉ ti tjuaa wahachʉ tó macainare ti coha sitichʉ,
“Noano wahaga mʉsa”,
niha Antioquía macaina.
à jia Juda cʉ̃hʉre warocarinare noa dutirocaha.
Ti ã niri baharo Juda sehe tjuaa wahaha.
34 [Wiho mejeta Sila sehe tópʉta tjuanocaha Antioquíapʉta.]
35 Ã jia Paulo Bernabé cʉ̃hʉ mahaa dachoricã tjuasiniha tí macai tjoa.
Tói tina paina payʉ mehne Jesu yare buheha.
Pari turi Paulo noaa buheare buhe tinino wahaha
36 Ã yoa mahaa dachoricã baharo Paulo õ sehe ni yahuha Bernabére:
—Jipihtinare mari buhe dʉcarinare “¿Dohse jijari tina?”
ni,
ñʉna wahajihna tjoa —niha Paulo cʉ̃hʉ ti basi.
37 Ã ni tuhsʉ,
Bernabé sehe João Marcore tina mehne naa duamaha.
38 To ã naa duapachʉta tó pano tiro tina mehne Panfiliapʉ sʉro tina mehne tjuaeraha.
Ti yoaare cʉ̃no pjaeraro tjuaa wahaha.
à jiro Paulo pari turi tirore naa duaeraha.
39 To naa duaerachʉ ñʉno Bernabé Paulo mehne pʉaro ti basi cahma durucu cahno masieraa,
soro dihta wahaa wahaha.
Bernabé sehe Chipre wama tiri nʉcopʉ Marcore na pahãa wahaha.
40 Paulo sehe Silare piti ti wahcãa wahaha.
Ti buhea wahahto pano Jesu yaina tinare waroca,
“Cohamacʉ mʉsare noano ñʉ wihbojaro”,
niha.
Ti ã niri baharo Paulo Sila mehne wahaa wahaha.
41 Ã wahaa,
Siria yahpapʉ,
Cilicia yahpapʉ cʉ̃hʉre sʉa,
tópʉ Jesu yainare noano yajeripohna ti,
Jesure wacũ tua namochʉ yoaha tinare.