Paulo, Bernabé mehne Iconioi jiha
14
1 Ã yoa Iconiopʉ sʉ,
Paulo Bernabé mehne judio masa buheri wʉhʉpʉ sãa,
Jesu yare noano durucu mihnia mehne yahuha.
à jia payʉ masa Jesure wacũ tua dʉcaha,
judio masa cʉ̃hʉ,
judio masa jieraina cʉ̃hʉ.
2 Wiho mejeta judio masa Jesure cahmaeraina cʉ̃hʉ tina mehne jiha.
Tina judio masa jierainare Jesu yaina mehne ti suachʉ yoaha tjoa.
Ti ã yoachʉ judio masa jieraina ñano tʉhotuha Jesu yainare.
3 Ti ã tʉhotuchʉ ñʉa Paulo,
Bernabé mehne tópʉ yoari pja jia,
cuiro marieno mari pʉhtoro Jesu yare noano buheha.
Cohamacʉ masare to cahĩare buheha.
à buhea Cohamacʉ to tuaa mehne yoa ñoha tina,
“Ahri buhea potocã tjira”,
nia.
4 Wiho mejeta tí maca macaina dacho macai judio masa ya buheare cahmaina tjuaha.
Dacho macaihta Jesu ya buheare cahmaina cʉ̃hʉ tjuaha.
Tina pʉa curua tjuaha.
5 Ã jia judio masa jieraina,
judio masa ti pʉhtoa mehne Jesu to cũrinare ñano yoa duama,
tãa mehne doca wajã duamaha tinare.
6 Ti ã yoa duarire masia,
Paulo Bernabé mehne Licaonia yahpapʉ duhti wahcãa wahaha.
Tí yahpai jia macaripʉ Listra,
ã yoa Derbepʉ sʉha.
7 Tópʉ sʉa,
noaa buheare buheha tjoa tí macari macainare,
tó cahai jiina cʉ̃hʉre.
Listrai Paulore tãa mehne docaha
8 Ã yoa Listrai tini masierariro jiha.
Tiro wahma masa bajuaropʉta tini masierariro jiro ne tinieraa tiha.
9,10 Ã jiro tiro Paulo to buhechʉ tʉhoha.
To tʉhoro watoi Paulo sehe tiro dihtare ñʉha.
—Ahriro Jesure wacũ tuara.
à jiro tiro noariro waha duara —ni tʉhotuha.
à ni tʉhoturo tuaro mehne durucutjiãhno õ sehe niha Paulo tirore:
—Wahcãrʉcaga —niha Paulo tirore.
To ã nichʉ tʉhorota tini masierariro sehe pu sʉrʉcʉ sʉ,
wahaa wahaha.
11 Paulo to ã yoachʉ ñʉa masa ti ya mehne,
Licaonia ya mehne õ sehe ni sañurucuha:
—Ahrina cohamana,
mʉa yoaro sehe bajuina mʉanopʉ jiina mari cahapʉ duji tari jira —ni sañurucuha tina.
12 Ã jia tina cohamanare ti ni pisua wamari mehne tinare ni wama pisuha.
Tina Bernabére “Zeus”,
ni pisuha.
à yoa Paulo buhe mʉhtariro to jichʉ ñʉa,
“Hermes”,
ni pisuha tina tirore.
13 Ã jiro Zeusre ño payoina ya wʉhʉ tí maca dʉhtʉ cahai jiha.
à jiro Zeus yaina ti sacerdote sehe wachʉare cohori mehne macapʉ sãa tari sopaca cahapʉ na taha.
Zeusre ño payo duaro to wachʉare jʉ̃ mʉono,
Paulore,
Bernabére wa duamaha tiro,
to masa mehne.
14 Ti ã yoachʉ ñʉa Paulo,
Bernabé mehne ti basi ti ya suhtire tʉhrẽrocaha ti cahyaare masare ñoa.
Tʉhrẽroca tuhsʉ masa watoi mʉrocaa,
õ sehe ni sañurucu wahcãha tina:
15 —Mʉsa õ sehe yoaena tjiga.
Sã cʉ̃hʉ mʉsa yoaro seheta masa jija.
Õ sehe mʉsa yoaa ne yaba cjihti jierara.
à jina mʉsare buhena tahi mʉsa õ sehe yoaare duhu dutina tana.
Ahri cohamana mʉsa niare,
mʉsa yoaa,
wiho jia masʉri jira.
Tí masʉrine cohãga.
à jina Cohamacʉre catiriro sehere ño payoga.
Cohamacʉ sehe mʉanore,
yahpare,
pjiri mare,
jipihtiare yoariro jira.
16 Panopʉre tiro jipihtia macari macaina ti yoarire ã ñʉnocaha.
17 Wiho mejeta tiro to jia tiare ñona masare.
Tiro masare noaare yoa,
coro tachʉ yoa,
dichare wa,
masare chʉare ã warucura.
To ã wachʉ masa wahchera.
Tó seheta tiro to jia tiare ñona masare —niha Paulo,
Bernabé mehne.
18 Wiho mejeta ti ã nichʉ tʉhopahta masa wachʉare wajã jʉ̃ mʉo tinare ño payo duamaha.
Tó sehe ti ño payo duachʉ ñʉa tinare ã yoa dutieraha Paulo cʉ̃hʉ.
Ti ã yoaare duhu duaerapahta duhuha tó macaina sehe.
19 Ã yoa paina judio masa Antioquía macaina,
Iconio macaina cʉ̃hʉ Listrapʉ sʉha.
Tópʉ sʉa,
Paulore ñano durucuha tjoa judio masa.
Ti ã ni durucuchʉ tʉhoa masa tiro mehne suaha.
à suaa tãa mehne docaha tirore.
Tãa mehne tirore doca tuhsʉ “Ahriro yariaa wahara” nia,
tí maca dʉhtʉ cahapʉ tirore waja sʉ cũnoca,
wahaa wahaha.
20 Ti ã yoari baharo Jesu yaina Paulore ñʉa wahaha.
Tiro cahai ti cahmachurʉcʉ sʉchʉ waro Paulo wahcãrʉca,
tina mehne macapʉ wahaa wahaha.
à yoa pa dachoi tiro Bernabé mehne Derbepʉ wahaha.
21 Tópʉ sʉ,
tina noaa buheare tó macainare ti yahuri baharo,
payʉ masa Jesure wacũ tuaina ji dʉcaha.
à yoa baharo tina ti sʉa macaripe Listra,
Iconio,
Antioquíapʉ majare tjuaa wahaha.
22 Tí macaripʉ sʉa tí macari macainare Jesu yainare noaa buheare yahua,
tinare noano yajeripohna tichʉ yoaha.
à Jesure wacũ tuarucu dutia õ sehe ni yahuha tinare:
—Cohamacʉ to jiropʉre mari sʉhto pano,
tuaro marine ñano yʉhdʉro cahmana —ni yahuha.
23 Ã jia macaripe macainare Jesu yainare ti pʉhtoa cjihtire cũha Paulo Bernabé mehne.
Cũ tuhsʉ,
ti chʉ duhuri baharo Cohamacʉre õ sehe ni sini payoha:
—Pʉhtoro,
ahrina mʉ yainare ñʉ wihboga —ni sini payoha tina Cohamacʉre ti wacũ tuarirore.
Paulo Bernabé mehne Antioquíapʉ ti ji mʉhtari macapʉ tjuaa wahaha
24 Ti ã yoari baharo tina Pisidia yahpapʉ jirina cjiri wahaa wahaha Panfilia yahpapʉ.
25 Tópʉ sʉ,
Pergepʉre tina buhe tuhsʉ Atalia wama tiri macapʉ wahaa wahaha.
26 Tí macapʉ sʉ,
Antioquíapʉ tjuaa,
dohoria mehne pahãa wahaha.
Tí macaihta panopʉ ti jisinichʉ Jesu yaina Cohamacʉ yare buhe dutia Paulo cʉ̃hʉre warocaha.
à warocaa:
—Cohamacʉ mʉ cahĩa mehne ahrinare ñʉ wihboga —ni warocaha tina.
à tju sʉa tinare ti buhe dutirire buhe tuhsʉha Paulo,
Bernabé mehne.
27 Antioquíapʉ ti tju sʉri baharo Jesu yaina mehne cahmachu,
Cohamacʉ to tuaa mehne ti yoarire yahu pahñoha tina.
Judio masa jieraina cʉ̃hʉ Cohamacʉ yaina ti waharire yahuha tina.
28 Ã jia Paulo cʉ̃hʉ tópʉre Jesu yaina mehne yoari pja jiha.