Pedro Jerusalẽ macainare Jesu yainare yahuha
11
1 Ã yoa judio masa jieraina cʉ̃hʉ Cohamacʉ yare ti noano cahmachʉ Jesu to cũrina sehe ti coyea Judeapʉ jiina mehne tʉhorocaha.
2 Ã jia Pedro Jerusalẽpʉ to tju sʉchʉ ñʉa judio masa Jesu yaina mahainacã tirore õ sehe ni tuhtiha:
3 —¿Judio masa jierainare dohse jiro baro ñʉi sʉri mʉhʉ?
¿Dohse jiro baro tina mehne chʉri mʉhʉ?
—ni tuhtiha Pedrore tina.
4 Ti ã nichʉ tʉhoro Pedro to yoari cjirire yahu pahñoha tinare.
Õ sehe ni yahuha:
5 —Yʉhʉ Jopepʉ jicʉ Cohamacʉre sinii nihi.
à jiro yʉhʉre õ sehe bajuahre.
Pjiri cahsaro pititia sohtoarire dʉhteri cahsaro mʉanopʉ yʉ cahai to duji tachʉ ñʉhi.
6 Ã jicʉ tí cahsarore noano ñʉhi “¿Yaba baro tí cahsaropʉre jijari?”
nicʉ.
à jicʉ ñʉhi tí cahsaropʉre jiinare:
Tí cahsaro puhichapʉre payʉ wahiquina,
bʉa tiniina,
chihchõina,
wʉina peri cʉ̃hʉ jire.
7 Ã jicʉ yʉhʉre to durucuchʉ tʉhohi.
“Pedro,
wahcãrʉcaga.
Wajã chʉga ahrinare”,
nino coa tahre yʉhʉre.
8 To ã nichʉ tʉhocʉ õ sehe nihi yʉhʉ:
“Pʉhtoro,
ne tina barore chʉeraja yʉhʉ.
Ñainare,
Cohamacʉ to chʉ dutierainare ne chʉera tihi yʉhʉ”,
nihi yʉhʉ.
9 Wiho mejeta mʉanopʉ pari turi yʉhʉre durucuro coa tahre tjoa.
“Cohamacʉ ‘Noaina jira’ to niinare,
‘Ñaina jira’,
nii tjia mʉhʉ”,
nino coa tahre yʉhʉre.
10 Ã jiro tia taha sã ã ni durucuri baharo tí cahsaro mʉanopʉ mʉjahre tjoa.
11 Yʉ ã ñʉno watoi tiaro mʉa sã jiri wʉhʉpʉ sʉri jihre.
Tina Cesarea macariro to warocarina jiri jihre.
12 Ã jiro Espíritu Santo sehe yʉhʉre tina mehne waha dutiro,
“ ‘Tina ñaina jira’,
nii tjia tinare”,
ni yahuhre yʉhʉre tiro.
à jia ahrina seis mehne yʉ coyea Jesu yaina mehne Cesarea macariro ya wʉhʉpʉ sãahi sã.
13 Ã jiro tiro sãre õ sehe ni yahuhre:
“Anjo yʉ wʉhʉi ducuchʉ ñʉhi yʉhʉ.
Õ sehe ni yahuhre yʉhʉre:
‘Jopepʉ Simore Pedro wama tirirore na ta dutiga.
14 Tiro mʉhʉre mʉ coyea mehne mʉsare jipihtinare pichacapʉ wahaborina mʉsa yʉhdʉhtore yahurohca’,
nihre anjo yʉhʉre”,
ni yahuhre Cesarea macariro yʉhʉre.
15 Ã yoa yʉ durucuro watoi Espíritu Santo sehe tinapʉre sãarʉcʉ sʉahre,
marine to yoa mʉhtariro seheta.
16 Ã jicʉ Jesu to yahurire wacũhi yʉhʉ.
Õ sehe ni yahuhre tiro:
“João mʉsare bautisaro,
copʉ yoamahre.
Yʉhʉ sehe tí yʉhdoro yoaihtja mʉsare.
Baharo Espíritu Santore mʉsa mehne jirucuchʉ yoaihtja mʉsare”,
ni yahuha.
17 Ã jiro Jesucristo mari pʉhtorore mari wacũ tuachʉ ñʉno Cohamacʉ to Espíritu Santore wahre marine.
à jiro Cohamacʉ marine to Espíritu Santore to wariro seheta judio masa jieraina cʉ̃hʉre tiro wahre.
Cohamacʉ to ã yoachʉ ñʉcʉ tirore yʉhdʉrʉca masieraja yʉhʉ —niha Pedro tinare,
judio masare Jesu yainare.
18 To ã nichʉ tʉhoa,
tina tirore ne ni namoeraha.
à ni namoeraa,
Cohamacʉre wahche payo,
tina õ sehe niha:
—Tí pja pini judio masa jieraina cʉ̃hʉre Cohamacʉ cahĩri jira.
Ti ñaa yoari buhiri tiare masi,
Cohamacʉre cahma,
tina cʉ̃hʉ Cohamacʉ mehne ã catirucuahca —niha tina.
Antioquíai paina Jesu yaina jiha
19 Ã yoa Estebãre ti wajãri baharo masa Jesu yainare ñano yoaha.
Ti ã yoachʉ ñʉa Jesu yaina duhti sitea wahaha.
à jia tina Feniciapʉ,
Chiprepʉ,
Antioquíapʉ cʉ̃hʉre waha site,
tópʉre judio masa dihtare Cohamacʉ yare yahua timaha tina.
20 Wiho mejeta paina Jesu yaina mehne macaina Chipre macaina,
Cirene macaina,
Antioquíapʉ sʉ,
judio masa jierainare Jesu yare buheha Cohamacʉ tinare to yʉhdohto sehe.
21 Ti ã buhechʉ,
Cohamacʉ tinare yoadohoha.
à jia masa payʉ Cohamacʉre cahma dʉca,
mari pʉhtoro Jesure wacũ tuaha.
22 Ã yoa “Antioquía macainapʉ Jesure cahmaca”,
ni tʉhorocaha Jerusalẽ macaina Jesu yaina.
Ti ã tʉhorocari baharo Jerusalẽ macaina Bernabé wama tirirore Antioquíapʉ warocaha.
23 Tópʉ sʉro,
Cohamacʉ yoadohoa mehne judio masa jieraina to yaina ti wahachʉ ñʉno,
tuaro wahcheha.
Tuaro wahche,
tiro tó macainare õ sehe ni yahuha:
—Jesure ã wacũ tuarucuga.
To yare ne duhuena tjiga —ni yahuha tiro jipihtina tinare.
24 Bernabé noariro jiro,
Espíritu Santo dutiare yoariro Jesure noano wacũ tuaha tiro.
à jia to buheri baharo Jesure wacũ tuaina payʉ waha namoha tjoa.
25 Baharo tiro Tarso wama tiri macapʉ Saulore macano wahaha.
26 Tópʉ tirore boca sʉha.
To boca sʉri baharo Antioquíapʉ na majare tjuaaha Saulore.
Tópʉ ti sʉri baharo cʉ̃ cʉhma waro tina Cohamacʉ yaina mehne cahmachu,
payʉ masare buheha tina.
à jia Antioquíapʉ Cristo yaina Cristiano wama ti dʉcaha.
27 Tí pjare Cohamacʉ yare yahu mʉhtaina Jerusalẽpʉ jiina cjiri waha,
Antioquíapʉ sʉha.
28 Ã ti sʉri baharo tina mehne macariro Agabo wama tiriro Jesu yaina watoi ducuro,
Espíritu Santo to tuaa mehne yahuha tinare.
“Jipihtiro yahpapʉre tuaro jʉcaro waharohca”,
ni yahuyuha tiro.
Tí pjare chʉa marieni pja jichʉ jipihtina bui pʉhtoro Claudio jiha.
29 Ã jia Cristo buheina,
jipihtina ti cjʉaro puro ti coyeare wa duaa ti basi cahma durucuha.
“Judea yahpa macaina Jesu yainare niñerure warocajihna”,
niha tina ti basi.
30 Ti ã niri baharo Bernabé Saulo mehne tí niñerure na wahcãbasaha.
Tópʉ sʉa Judea yahpa macainare Jesu yaina pʉhtoare waha tí niñerure pja cʉoinare tju wa dutia.