Saulo Jesucristore ñʉno tirore wacũ tua dʉcaha
9
1 Wiho mejeta tí pjare Saulo Jesu yainare ã ñʉ tuhtirucusinino,
“Tinare wajãihtja” nino,
tiro sacerdotea pʉhtoro cahapʉ wahaha.
2 Tópʉ sʉro tiro joaa pũrine õ sehe ni siniha sacerdotea pʉhtorore:
—Joaa pũrine waga yʉhʉre yʉ tuahti pũri cjihtire.
Tí pũripʉ mʉ wama mʉ joa payochʉ,
yʉhʉ sehe tí pũri mehne,
mʉ dutiro mehne Damascopʉ wahaihtja.
Tópʉ sʉ,
judio masa mari buhea wʉhʉsepʉ Jesu yaina mʉa,
numia cʉ̃hʉre boca sʉcʉ,
tinare ñaha dʉhte,
õpʉ Jerusalẽpʉ na majare tjuaa taihtja —ni siniha Saulo sacerdotea pʉhtoare.
3 Ti pũrine na tuhsʉ,
tiro waha,
Damasco cahai to sʉro cahachʉ waro mʉanopʉ wacũenoca si siteroca boroha tirore.
4 Wacũenoca to ã si siteroca borochʉta tiro yahpapʉ bora caha sʉro,
õ sehe ni durucuchʉ tʉhoha:
—Saulo,
Saulo,
¿dohseacʉ mʉhʉ yʉhʉre ñano yoajari?
Mʉhʉ yʉhʉ mehne suacʉ yʉhʉre yʉhtieracʉ,
mʉ basita ñano yʉhdʉra —nino coa taha.
5 —Pʉhtoro,
¿diro baro jijari mʉhʉ?
—ni sinitu ñʉha Saulo sehe.
—Yʉhʉta jija Jesu,
mʉ ñano yoarucuriro —niha Jesu Saulore.
6 [To ã nichʉ õ sehe ni sinituha Saulo:
—Pʉhtoro,
¿dohse yʉ yoachʉ cahmajari mʉhʉ?
—niha Saulo.]
—Wahcãrʉcaga mʉhʉ.
Macapʉ wahaga.
Tí macapʉ mʉ sʉchʉ tó macariro mʉ yoahtire yahurohca mʉhʉre —niha Jesu Saulore.
7 To ã nichʉ Saulo mehne macaina sehe to durucua dihtare tʉhoha.
Wiho mejeta Jesu sehere ñʉeraha.
To ã wahachʉ ñʉa,
cuia,
tina durucu masieraha.
8 Ã jiro Saulo yahpapʉ coãriro wahcãrʉca,
to ñʉchʉ to capari bajueraha.
à jia tina to wamomacare ñaha,
Damascopʉ tʉã wahcãa wahaha tirore.
9 Tópʉ sʉro,
tiro tia dacho waro ne ñʉera,
chʉera,
ne sihniera tiha.
10 Ã yoa cʉ̃iro Jesu to buheriro Anania wama tiriro Damascoi jiha.
à jiro Jesu bajua tiha Ananiare.
à bajuaro õ sehe ni pisuha tirore:
—Anania,
¿jimajari mʉhʉ?
—niha Jesu.
—Jimajã —ni yʉhtiha Anania tirore.
11 To ã nichʉ Jesu sehe õ sehe ni yahuha tirore:
—Potori Maha wama tiri mahapʉ wahaga.
à wahacʉ Juda ya wʉhʉpʉ cʉ̃iro Tarso macariro Saulo wama tirirore macaga.
Tiro Cohamacʉre sinino nica.
12 Tiro cahãnopʉre tirore mʉ yoahtire ño tuhsʉhi yʉhʉ.
Õ sehe jiare ñʉhre tiro:
Mʉhʉ mʉ wamomacarine tiro bui duhu payo,
to capari noaa wahachʉ ñʉhre tiro to cahãnopʉre —niha Jesu Ananiare.
13 To ã nichʉ tʉhoro Anania sehe õ sehe ni yʉhtiha:
—Pʉhtoro,
tiro mʉ yainare,
noainare Jerusalẽ macainare nu ñano yoa mʉjayuhti.
Payʉ masa yʉhʉre ã ni yahure.
14 Ã yoa õ cʉ̃hʉre tiro jipihtina mʉhʉre cahmainare peresu yoaro taro niyuhti.
Sacerdotea pʉhtoa tirore ã yoa dutiyuhti —ni yʉhtiha Anania Jesure.
15 To ã nichʉ Jesu sehe õ sehe ni yahuha tirore:
—Tiro Saulo sehe yʉ beseriro jira.
Tiro yʉ ya buheare judio masa jierainare,
ti pʉhtoare,
ã jichʉ Israe masa cʉ̃hʉre buherohca.
à jicʉ wahaga mʉhʉ.
16 Payʉ tahari yʉ yare yoaro tiro ñano yʉhdʉrohca.
Tíre tirore masichʉ yoaihtja —niha Jesu Ananiare.
17 To ã niri baharo Anania sehe waha,
sʉ,
Saulo to jiri wʉhʉpʉ sãaha.
Sãa sʉ,
to wamomacarine Saulo bui duhu payo,
õ sehe ni yahuha tirore:
—Coyeiro Saulo,
mʉ capari mʉ ñʉhto sehe,
Espíritu Santo mʉhʉ mehne to jihto sehe,
to dutiriro seheta mʉ yoahto sehe,
mari pʉhtoro Jesu sehe mahapʉ mʉhʉre bajuariro yʉhʉre warocahre —ni yahuha Anania Saulore.
18 To ã nichʉta to caparire wahi nʉtʉri yoaro sehe bajua to caparipʉ wahãa pahna borachʉ ñʉha Saulo.
To ã ñʉ tuhsʉri baharo to wahcãrʉcʉ sʉchʉ pairo sehe tirore bautisaha.
19 Tirore to bautisa tuhsʉchʉ,
tiro sehe chʉ,
tuariro wahaha.
Saulo Damascoi Jesu yare buhe dʉcaha
à yoa Saulo mahaa dachoricã Damasco macaina Jesu yaina mehne jiha.
20 Dói tí dachorita tiro judio masa buhea wʉhʉsepʉ sʉ,
Jesu Cohamacʉ macʉno to jiare yahu dʉcaha masare.
21 To ã yahuchʉ ñʉa jipihtina tirore tʉhoina cʉaa wahaha.
—Cho,
ahriro Jerusalẽpʉre Cohamacʉ yainare Jesure cahmainare ñano yoariro cjiro jira.
à yoa tirota jimana õ macaina Jesure cahmaina cʉ̃hʉre ñaha,
dʉhte,
sacerdotea pʉhtoare wiaboriro.
à yoa duaro õpʉre tari jimahre tiro —niha masa tirore tʉhoina.
22 Wiho mejeta Saulo sehe cui tʉhoturo marieno buhe mihni wahcãa tiha.
“Ahriro Jesu potocãta Cristo,
marine yʉhdohtiro jira”,
to ni yahu mihnichʉ,
tó macaina judio masa ti ni yʉhti yʉhdʉrʉcaborirore bocaeraha.
23 Ã jia payʉ dachori baharo judio masa tirore wajã duaa,
ti basi durucua tiha.
24 Wiho mejeta Saulo tirore ti wajã duachʉ masiha to basi.
Tina tí macare sahrĩno tãa mehne ti yoari sahrĩno macaa sopacarire dachopʉre ñamipʉ cʉ̃hʉre cohtaa tiha tirore wajã duaa.
25 Ti ã wajã duachʉ ñʉa ñamipʉ Saulo buheina tirore pʉhʉro pjiri pʉhi na sãa,
tí maca macari sahrĩno baharo bʉhʉsehei duhu boroha tirore.
Tó sehe ti yoachʉ yʉhdʉha tiro.
Saulo Jerusalẽi jiha
26 Ã yoa Saulo Jerusalẽpʉ sʉro,
tópʉ Jesu yaina mehne tiro ji duamaha.
Wiho mejeta tina tirore “Jesu buheriro jierara ahriro” nia,
tirore cui niha.
27 Ti ã cuipachʉta Bernabé sehe tirore na wahcãha Jesu to cũrina cahapʉ.
à jiro Saulo mahai Jesure to ñʉrire,
Jesu Saulore to durucurire,
ã jichʉ Damascopʉ cuiro marieno Jesu yare to buhe dʉcarire yahuha Bernabé sehe.
28 To ã ni yahuri baharo Saulo sehe tina mehne sãano,
Jerusalẽpʉ tina mehne jia tiha.
29 Tiro cuiro marieno judio masare Jesu yare yahu yʉhdʉrʉcaro niha.
Tina judio masa griego masa yare durucuina jiha.
à yoa Saulo to ã yahu yʉhdʉrʉcachʉ,
tina tirore wajã duamaha.
30 Ti ã wajã duachʉ ñʉa,
Saulo mehne macaina Jesu yaina sehe tirore Cesareapʉ na duhti wahcãa wahaha.
Tópʉ tirore sʉho jirucuma Tarsopʉ warocaha tirore.
31 Ã yoa jipihtiropʉ,
Judea yahpapʉ,
Galilea yahpapʉ,
Samaria yahpapʉ cʉ̃hʉre Cohamacʉ yaina noano jia tiha.
Tí pjare ne masa ñano yoaera tiha tinare.
à jia noano buheha tina.
Tina Cohamacʉ yare buhe,
tirore masi namo,
noano yʉhtia tiha.
à yoa Cohamacʉre cua pisaro ñʉa tiha.
Espíritu Santo tinare to yoadohochʉ tina sehe payʉ wahaa tiha.
Pedro Eneare noariro wahachʉ yoaha
32 Ã yoa Pedro jipihtia macaripʉ waharo,
Jesu yaina Lida macaina cahapʉ cʉ̃hʉre sʉha tiro.
33 Tópʉ sʉro Enea wama tirirore boca sʉha.
Enea pjacʉ bʉhariro jiro,
ocho cʉhmari waro ti pũpaha cũriro coãa tiha.
34 Ã jiro Pedro sehe tirore õ sehe niha:
—Enea,
Jesucristo mʉhʉre noariro wahachʉ yoara.
Wahcãrʉcaga.
Mʉ pũpaha coãri cahsarore cahnoga —niha Pedro tirore.
To ã nichʉta tiro wahcãrʉcaha.
35 Ã jia jipihtina Lida macaina,
Sarón macaina tirore ñʉa,
tina ti ñaa yoaare duhu,
Jesure wacũ tuaa tiha.
Dorca wama tiricorore masoha Pedro Jesu to tuaa mehne
36 Ã yoa Jope wama tiri macai Jesure ño payoricoro Tabita wama tiricoro jiha.
To wama Tabita griego ya dʉsero mehne Dorca jira.
Ticoro noaare yoaro payʉ waa tiha pjacʉoinare.
37 Ã jiro tí pjare ticoro dohati wahcõ,
yariaa wahaa tiha.
To yariachʉ ñʉa,
tina ticorore noano cosa,
mʉano macari tahtiapʉ cũa tiha ticorore.
38 Lida wama tiri maca Jope cahai jire.
To ã jichʉ Jesu buheina Jope macaina Pedro Lidapʉ to jichʉ tʉhorocaa tiha.
à tʉhorocaa,
pʉaro warocaha Pedro cahapʉ.
Tiro cahapʉ sʉa Pedrore õ sehe ni yahuha tina:
—Soaro mehne sã jiropʉ wahaga —ni yahuha tina.
39 Ti ã nichʉ tʉhoro tina mehne wahaa wahaha tiro.
Tópʉ tirore ti na sʉri baharo mʉano macari tahtiapʉ na mʉjaa wahaha tirore.
à jia jipihtina wapewahya tiro cahai sʉrʉca,
tiia tiha.
Tabita tina mehne jisininopʉ payʉ suhtire yoaa tiha.
à jia tina to yoari suhti cjirire ñoha Pedrore.
40 Wiho mejeta Pedro tinare tí tahtiapʉ jiinare wijaa dutiha.
Ti wijaari baharo tiro na tuhcua caha sʉ,
Cohamacʉre ticorore sini payoha.
à jiro to pjacʉ cjirore majare ñʉ:
—Tabita wahcãga —niha tiro.
To ã nichʉta ticoro sehe ñʉ wahcõ,
Pedrore ñʉ,
wahcã nuju sʉha.
41 To wahcã nuju sʉchʉ ñʉ,
tiro to wamomacare ñaha,
tʉã wahcõ dapoha ticorore.
à jiro tiro tó macainare Jesu yainare,
wapewahyare pjiroca,
ticorore catiricorore wiaha tinare.
42 To ã yoari baharo jipihtina Jope macaina tíre masia,
payʉ masa Jesure wacũ tua dʉcaa tiha.
43 Baharo Jopepʉ Simo wahiquina cahsarire cahnoriro mehne payʉ dachori Pedro tiro mehne jia tiha.