Saulo Jesu yainare ñano yoaha
8
1 Estebã to ã yariachʉ ñʉno,
“Noana”,
niha Saulo sehe.
Tí dachoreta Jesu yainare Jerusalẽ macainare ñano yoa dʉcaha Saulo mehne macaina sehe.
Ti ã yoa dʉcachʉ Jesu yaina Judea yahpapʉ,
Samaria yahpapʉ yoaropʉ duhti site wahcãa wahaha.
Ti pʉhtoa,
Jesu to cũrina dihta wahaeraha.
2 Ã yoa paina Cohamacʉre ño payoina Estebã pjacʉ cjirore tãca copapʉ,
duhu sãa,
tiro cjirore tuaro tii payoha tiro cjirore tina.
3 Wiho mejeta Saulo sehe Jesu yainare ñabiaro yoaa timaha.
Tiro ti wʉhʉsepʉ sãa,
mʉare,
numiare ñaha wahcã,
peresupʉ biha dapoa tiha.
Samariai Jesu yare buheha Felipe
4 Ã yoa yoaropʉ waha siteina cjiri nohoi ti waharoi Jesu yare buhea tiha.
5 Cʉ̃iro tina mehne macariro Felipe cʉ̃ maca,
Samaria wama tiri yahpai jiri macapʉ sʉ,
Cristo masare yʉhdoriro ya quitire buheha tí maca macainare.
6 To ã buhechʉ,
tó macaina sehe tirore tʉho cahmachu,
Cohamacʉ to tuaa mehne to yoa ñochʉ ñʉha tina.
à jia tina jipihtina cʉ̃no potori to yahuare noano tʉho nʉnʉa tiha.
7 Payʉ masa watĩa sãanohrina tiro cahai ti wihichʉ ñʉno,
watĩa sehere tiro wijaa dutia tiha masapʉ jirinare.
To wijaa dutichʉ,
tina watĩa sehe tuaro sañurucu,
wijaa wahaha.
Tuhsʉ payʉ pjacʉ bʉhainare,
pari yuri tiniina cʉ̃hʉre pjacʉ noaina wahachʉ yoaa tiha.
8 To ã yoa ñochʉ ñʉa tí maca macaina payʉ masa wahchea tiha.
9 Tí pjare Simo wama tiriro tí maca macariro yairo jiha.
à jiro yaya ti yoarire yoa ñoa tiha Samaria macainare.
To ã yoa ñochʉ ñʉa,
tó macaina ñʉ cʉaa waha,
tirore cua pisaro ñʉina jiha.
—Yʉhʉ masi pahñoriro jija —nimaha Simo sehe tinare.
10 To ã yoachʉ ñʉa masa sehe õ sehe nia timaha:
—Ahriro Cohamacʉ ya tuaare cjʉariro jira.
Cohamacʉ yoaro sehe tuariro jira —nia timaha tirore masa,
pʉhtoa mehne.
Tina jipihtina noano tʉho nʉnʉha tirore.
11 Tiro yaya ti yoaa mehne yoari pja yoa ñoa tiha tinare.
To ã yoa ñochʉ ñʉa tina cʉaa wahaha.
à cʉaa waha,
tina tirore ño payoa tiha.
12 Wiho mejeta ti ã ño payopachʉta Felipe sehe pʉhtoro Cohamacʉ to sʉho jiare,
Jesucristo yare noaa buheare yahuha.
To ã yahuchʉ tina tirore noano tʉhoha.
Ti ã noano tʉhochʉ ñʉno mʉare,
numia cʉ̃hʉre bautisaha Felipe.
13 Ã jiro Simo cʉ̃hʉ Felipere noano tʉhoa tiha.
à jiro tiro cʉ̃hʉre bautisaha.
To ã yoari baharo Felipe mehne tjuaa tiha tiro.
Felipe sehe Cohamacʉ tuaa mehne to yoa ñochʉ ñʉno Simo ñʉ cʉaa wahaa tiha.
14 Ã yoa Samaria yahpa macaina Cohamacʉ yare ti tuaro cahmachʉ tʉhoa Jerusalẽpʉ jiina tʉhorocaa tiha tinare.
à ti cahmachʉ tʉhoa Pedrore,
João cʉ̃hʉre warocaa tiha Samaria yahpapʉ.
15 Tópʉ sʉa Pedro cʉ̃hʉ Cohamacʉre siniha:
“Ahrina Samaria yahpa macaina mʉhʉre ño payoinare mʉ Espíritu Santo sãajaro”,
ni sini payoha tina Cohamacʉre.
16 Tina Samaria yahpa macaina Jesucristo yaina jia to bautisarina jiha.
Tí dihtare masiha tina.
à jiro Espíritu Santo tinare sãaerasiniha.
17 Ã jia Pedro,
João mehne Samaria yahpa macainare ti wamomacarine ti dapupoca bui ti duhu payori baharo Espíritu Santo tinare sãari jire.
18 Ã yoa Pedro cʉ̃hʉ ti wamomacari mehne ti duhu payochʉ ñʉha Simo.
Espíritu Santo tinare to sãachʉ cʉ̃hʉre ñʉha tiro.
à ñʉriro jiro,
tí tuaare cahmano niñeru mehne wapa duamaha.
19 Õ sehe nimaha Simo:
—Yʉhʉ cʉ̃hʉre waga ahri tuaare.
Yʉhʉ cʉ̃hʉ yʉ wamomacari mehne masa dapupoca bui duhu payoi tai nija Espíritu Santo tinare to sãahto sehe.
à jicʉ ahri yʉ yoahti wapare wapa duaja —nimaha Simo tinare.
20 To ã nichʉ tʉhoro Pedro õ sehe niha:
—Mʉhʉ niñeru mehne Cohamacʉ ya tuaare mʉ nuchʉ duari buhiri mʉ niñeru mehneta pichacapʉ wahaga mʉhʉ.
Cohamacʉ mʉ tʉhotuare masina.
Mʉhʉ ñariro jisinina.
21 Ã jicʉ ahrire sã yoaare yoa masierara mʉhʉ.
Ahri mʉ yoaa baro jierara.
22,23 Paina ti cjʉaare ñʉcʉ suariro jira mʉhʉ.
à jicʉ ñaa yoaare ne duhu masierara mʉhʉ.
à jicʉ ahrire mʉ ñaa yoarire cahyaga mʉhʉ.
Cohamacʉre mʉ ñaa tʉhotuare to bohto sehe siniga mʉhʉ.
Mʉ ã yoachʉ ñʉno tiro mʉ ñaa buhirire boboca,
pa tehe nino —ni yahuha Pedro tirore.
24 To ã nichʉ tʉhoro Simo õ sehe ni yʉhtiha tirore:
—Yʉhʉre sini payoga mʉsa Cohamacʉre mʉ niriro sehe yʉ wahaerahto sehe.
Tí buhiri pichacapʉ waha duaeraja yʉhʉ —niha Simo tirore.
25 Baharo Pedro João mehne Cohamacʉ yare yahuha:
“Jesu to masa mʉjachʉ ñʉhi sã”,
ni payʉ Samaria yahpai jia macari macainare noaa buheare buheha.
Tinare Cohamacʉ yare buhe tuhsʉ,
Jerusalẽpʉ tjuaa wahaha.
Felipe Etiopía yahpa macarirore buheha
26 Ã yoa Cohamacʉ yairo anjo Felipere õ sehe ni yahuha:
—Mipʉre sur sehepʉ wahaga.
Jerusalẽ cahai jiri mahapʉ Gazapʉ wahari mahapʉ,
masa marienopʉ jiri mahapʉ wahaga —ni yahuha anjo Felipere.
27 To ã nichʉ tʉhoro tiro sehe tí mahapʉ wahaa tiha.
Baharo tí mahapʉ cʉ̃iro masʉnore piti bocaro taro niha.
To piti bocahtiro jiha Etiopía yahpa macariro pʉhtoro.
Tiro numiare cahmaerariro eunuco masʉno jiha.
à jiro Candace wama tiricoro Etiopía macaricoro pʉhtorocoro yare niñerure jipihtiare ñʉ wihboriro jiha.
Wiho jiriro jieraha.
Tiro Jerusalẽpʉ Cohamacʉre ño payoro waha tuhsʉha.
28 To ya macapʉ tunuria mehne tjua taro tiapʉ wahaparota buhero niha.
Cohamacʉ yare yahu mʉhtariro Isaia cjiro to joari pũre buhero niha.
29 Ã jiro Espíritu sehe Felipere õ sehe ni yahua tiha:
—Siro tunuriapʉ wahariro cahapʉ wahaga —niha Espíritu tirore.
30 To ã nichʉ tʉhoro Felipe sehe tunuria cahapʉ mʉroca wahcã,
Isaia cjiro to joarire Etiopía macariro to buhechʉ tʉhoha.
à tʉhoro Felipe õ sehe ni sinituha tirore:
—¿Mʉ buheare tʉho ñahajari mʉhʉ?
—niha tiro.
31 To ã nichʉ tʉhoro Etiopía macariro õ sehe ni yʉhtiha:
—Pairo yʉhʉre yahu yʉhdoriro mariachʉ noano masieraja yʉhʉ.
Õi yʉhʉre yahu dujii taga yʉ pari wahpa —ni yʉhtiha tiro Felipere.
—Jai —ni nuju sʉha to cahai.
32 Ã yoa Cohamacʉ yare Etiopía macariro to buheri pũ õ sehe niha:
“Ovejare ti ñaha wajãriro seheta tiro cʉ̃hʉre ñaha wajãahca masa.
à jiro ovejacã to pjoare ti sachʉ to sañurucueraro seheta tiro masʉno cʉ̃hʉ dihta marieriro jirohca.
33 Tirore tina bʉjʉpeahca.
à jia tiro to ñano yoaerapachʉta tina sehe ñano yoaahca tirore.
Tiro ahri yahpapʉ to jichʉ tina tirore wajãahca.
à jiro tiro pohna marieriro yariaa waharohca”,
ni joaha tí pũpʉre.
34 Tí pũ to ã ni yahuchʉ ñʉno,
Etiopía macariro õ sehe ni sinituha:
—Yahuga yʉhʉre.
¿Õ sehe Isaia cjiro to niriro diro baro jicari ahriro?
¿Isaia cjiro to basi yahuro nicari?
¿O pairore yahuro nicari?
—ni sinituha Etiopía macariro.
35 To ã ni sinitu ñʉchʉ tʉhoro Felipe sehe tí pũre ñʉ,
Jesu yare yahuha Etiopía macarirore.
36 Ã yoa tina tia mehne waha,
mácapʉ sʉha.
—Ñʉga,
õi máca jira.
Ahri mácapʉ yʉhʉre bautisaga —niha Etiopía macariro.
37 [—Jesure mʉ noano wacũ tuachʉ ñʉcʉ mʉhʉre bautisaihtja —niha Felipe tirore.
—Jesure wacũ tuaja yʉhʉ.
Tiro Cristo Cohamacʉ macʉno jira.
Tíre noano masija yʉhʉ —niha Etiopía macariro.]
38 Ã ninota tiro tunuria uturirore yʉsʉo dutiha.
Tia to yʉsʉ caha sʉri baharo wijaaha tina.
Wijaa,
tí mácapʉ sʉ,
ñumurʉcʉ sʉha tina.
Tói ñumurʉcʉ sʉ,
Felipe sehe tirore bautisaha.
39 Bautisa tuhsʉ ti maja sʉrʉcʉ sʉchʉ Cohamacʉ to Espíritu Felipere naa wahaha.
To ã wahari baharo Etiopía macariro noano wahcheriro to ya yahpapʉ tjuaa wahaha.
To ã yoari bato tichʉ ne pari turi Felipere ñʉeraha.
40 Ã yoa tuhsʉ Azotopʉ sʉha Felipe sehe.
Tuhsʉ,
payʉ macarine noaa buheare buheha masare.
Pʉ Cesareapʉ buhe batoa tiha.