Espíritu Santo Jesu yaina mehne ji dʉcaha
2
1 Ã yoa Pentecoste wama tiri dacho jichʉ tina jipihtina cʉ̃ wʉhʉi cahmachuha.
2 Tí pjareta wihnono to tuaro taro seheta mʉanopʉ bisiro coa taha.
To ã bisiro coa tachʉ tʉhoha jipihtina tí wʉhʉpʉ jiina.
3 Ã yoa picha pohna yoaro sehe jia tina jipihtina dapu poca bui bajuaha.
Tí picha pohnaricã ñahmanoricã yoaro sehe bajuha.
4 Ã yoa Espíritu Santo tinapʉre sãarʉcʉ sʉa wahaha.
Tinapʉre to sãarʉcʉ sʉa wahachʉ,
paina ya durucuare to durucuchʉ yoaa mehne tina sehe paina ya durucuare noano durucuha.
5 Tí dachorire Jerusalẽpʉ payʉ judio masa,
cʉ̃ curua macaina masa jipahta,
paró paye yahpari macaina jiha.
Cohamacʉre ño payoina jiha.
6 Ã yoa mʉanopʉ coa tachʉ tʉhoa tina Jesu buheina cahapʉ payʉ cahmachu wahcãha.
Cahmachuina masape ya durucuare Jesu buheina ti durucu pahñochʉ tʉhoa,
tina tʉho cʉaa wahaha.
7,8 —Cuenah.
¿Dohse yoaa ahrina Galilea macaina jipahta mari ya durucuare noano durucujari?
Tina mari ya yahpapʉ taina yoaro seheta durucua nina —niha tina sehe.
9,10 —Jipihtina mari durucuare mipʉre durucua nina:
Õpe yahpari macaina mari õre cahmachuina jija:
Partia macaina,
Media macaina,
Elam macaina,
Mesopotamia macaina,
Judea macaina,
Capadocia macaina,
Ponto macaina,
Asia macaina,
Frigia macaina,
Panfilia macaina,
Egipto macaina,
Libia yahpai Cirene cahapʉ jiina,
Romapʉ taina jija mari.
Cãina judio masa waro jija mari.
Paina judio masa dojoina jija mari.
11 Creta macaina cʉ̃hʉ,
Arabia macaina cʉ̃hʉ jira mari mehne.
Mari payʉ paró macaina soro durucua tiina mari jipanata ahrina sehe mari masape curuari macaina durucuare ti durucuchʉ tʉhoja mari.
Tina mari ya durucua mehne Cohamacʉ tuaa mehne to yoarire yahua nina —ni durucuha masa ti basi.
12 Ã niata tina cʉaa waha,
ti ñʉri cʉ̃hʉre ti tʉhori cʉ̃hʉre noano tʉho ñahaeraha.
—¿Ahrina dohse jiro baro paina ya mehne Cohamacʉ yare ã noano durucujari,
mʉsa tʉhotuchʉ?
—ni cahma sinitu ñʉha tina ti basi.
13 Wiho mejeta paina Jesu yaina ti durucuchʉ tʉhoina mehne macaina sehe tinare õ sehe ni bʉjʉpeha:
—¿Dohse ahrina sihbiori sihni cahaa nijari?
—ni bʉjʉpeha paina tinare Jesu yainare.
Pedro masare yahuha
14 Ã jiro Pedro once Jesu to cũrina mehne wahcãrʉcʉ sʉ,
tuaro durucutjiãhno masare õ sehe ni yahuha:
—Mʉsa Judea yahpa macaina,
jipihtina Jerusalẽpʉ jiina,
ahrire masiga mʉsa.
Yʉ yahuchʉ tʉhoga mʉsa.
15 Mʉsa tʉhotua quihõno jierara.
Nueve hora jira mipʉta.
Mari chʉ sihnini hora jierasinica.
à jia ahrina cahaina jierara.
16 Ahrina Cohamacʉ panopʉ to niriro seheta yoaa nina.
Tí pjapʉre Joere Cohamacʉ yare yahu mʉhtariro cjirore,
ahrire yahu dutia tiha Cohamacʉ sehe:
17 “Sohtori tia dachori jichʉ õ sehe jirohca:
‘Yʉ yairo Espíriture masare jipihtinare warocaihtja.
à jia mʉsa pohnapʉ yʉ yare yahuahca.
à yoa mʉsa mehne macaina wahma yapia bajuamehneare ñʉahca.
à jia mʉsa mehne macaina bʉcʉna cahãnopʉ cahãahca.
18 Ã jicʉ yʉ cahamacare,
mʉare,
numia cʉ̃hʉre yʉ yairo Espíriture warocaihtja.
à jia tina yʉ yare yahuahca.
19 Tuhsʉ,
yʉ tuaa mehne bajuamehneare yoa ñoihca mʉanopʉ.
Yahpapʉ cʉ̃hʉre yʉ bajuamehneare ñoihca:
Dire,
pichacare,
mene ñoihca.
20 Tuhsʉ,
sʉ̃ dacho macariro nahitianore cohtotarohca.
Ñami macariro di yoaro sehe sohãriro cohtotarohca.
Õ sehe waharohca Cristo mʉsa pʉhtoro to tahti dacho,
yʉ niri dacho panoi.
Tí dachoi ñʉ cʉaa wahaahca masa.
à jiro wiho jiri dacho jisi.
Tí dacho noari dacho jirohca.
21 Ã jiro õ sehe jirohca.
Jipihtina masa Cristore ti ñaa buhirire cohã duti siniinare tiro tinare pichacapʉ wahaborinare yʉhdorohca’,
nina Cohamacʉ”,
ni joaha Joe.
22 ’Mʉsa Israe masa yʉ yahuchʉ tʉhoga:
Jesu Nazare macariro sehe Cohamacʉ to warocariro jihre.
Jesure to warocarire masa ti masihto sehe Jesu to Pʉcʉro ya tuaa mehne yoa ñohre mʉsare.
Mʉsa tíre masina.
23 Jesure wajã dutina judio masa jierainare wahre mʉsa.
Cohamacʉ panopʉ to cahmariro seheta,
“Ã waharohca”,
to niriro seheta ã yoahre.
à jina mʉsa Jesure crusapʉ wajã dutihre Cohamacʉ dutiare cjʉaerainare.
24 Mʉsa ã yoapachʉta Cohamacʉ sehe Jesure yariariro cjirore masohre.
Pari turi ne yariasi tiro.
Tiro yaria dojoaerara.
à catirucuhtiro jira.
25 Õ sehe nia tiha Davi cjiro panopʉ macariro Cristo to ni durucuboriro seheta:
“Yʉ pʉhtoro yʉhʉ mehne jira mʉhʉ.
Jipihtia dachoripe Cohamacʉ yʉ pʉhtoro yʉ cahai mʉ jichʉ ñʉa tihi yʉ cuierahto sehe.
26,27 Mʉhʉ Cohamacʉ yʉhʉre yariaina ti jiropʉre ne cohãsi.
Yʉhʉre mʉ cahĩrirore ñanopʉ cohãsi mʉhʉ.
Yʉhʉ mʉ cahamacʉno mʉhʉre ño payoriro jija.
Yʉ pjacʉre baa dutisi mʉhʉ.
à jicʉ tuaro wahcheja.
Wahchea mehne durucuja.
à jicʉ mʉhʉre Cohamacʉre noano wacũ tuariro jicʉ ñaa buhiri marieriro jicʉ cuiro marieno noano jinocaja.
28 Yʉhʉre pari turi catichʉ yoaihca mʉhʉ.
Yʉhʉ mehne mʉ jichʉ tuaro wahcheja”,
ni joaa tiha Davi cjiro Cristo to ni durucuboriro seheta.
29 ’Coyea,
õ sehe noano yahuihtja mʉsare Davi cjirore mari coyeiro,
panopʉ macarirore.
Tiro yariaa wahaha.
à jiro tiro to masa copa mipʉre jisinina.
(Ã jiro “Yʉ pjacʉre baa dutisi mʉhʉ”,
ni joaro to basi wama payo yahuro nieraha.)
30,31 Panopʉ Cohamacʉ Davi cjirore õ sehe niha:
“Potocã nii nija.
Mʉ panamana ji turiaina mehne macariro mʉ yoaro seheta ahri yahpa macaina bui pʉhtoro jirohca”,
nia tiha Cohamacʉ Davi cjirore.
Davi Cohamacʉ yare yahu mʉhtariro cjiro jiha.
à jiro Cristore Cohamacʉ to pʉhto sõhtore masino,
Cristo to masa mʉjahtore yahu mʉhta tuhsʉha Davi sehe.
Õ sehe niha:
“Tiro yariaina ti jiropʉre ji dojoasi.
To pjacʉ tói baasi”,
nia tiha Davi cjiro.
32 Ahriro Jesureta Cohamacʉ masohre.
Sã jipihtina tirore ñʉhi.
33 Mipʉre Cohamacʉ poto bʉhʉsehepʉ jira dutiriro jiro.
Tó panopʉ to Pʉcʉro “Espíritu Santore mʉ yainare warocaihtja”,
to ni cũriro seheta wari jire Jesure.
à jiro Jesu sehe ahrinare Espíritu Santore warocari jira.
à jina mipʉre Espíritu to yoaare mʉsa ñʉ,
tʉhona nina.
34 Davi cjiro sehe Jesu to mʉjariro seheta mʉanopʉ mʉjaeraa tiha.
à jiro tiro to basi õ sehe nia tiha:
“Cohamacʉ õ sehe nire yʉ pʉhtorore:
‘Yʉ poto bʉhʉsehei dujiga mʉhʉ.
35 Mʉhʉre ñʉ tuhtiinare mʉhʉre cũihtja mʉ cahamaca yoaro sehe jihtinare’,
nire Cohamacʉ yʉ pʉhtorore”,
nia tiha Davi cjiro.
36 ’Ã jina jipihtina Israe masa ahrire noano masiga mʉsa:
Ahriro Jesure mʉsa crusapʉ wajãriro cjirore mʉsa pʉhtoro sõhre Cohamacʉ sehe.
Tirore mʉsare yʉhdohtirore Cristore cũre Cohamacʉ —ni yahuha masare Pedro.
37 To ã nichʉ tʉhoa tuaro cahya,
pjíro tʉhotua,
masa sehe Pedro cʉ̃hʉre õ sehe ni sinitu ñʉha:
—¿Sã coyea,
dohse yoanahcari sã?
—ni sinitu ñʉha tina.
38 Ti ã ni sinitu ñʉchʉ õ sehe ni yʉhtiha Pedro:
—Mʉsa ñaa yoari buhirire cahyaga.
Mʉsa ñaa tʉhotumari cjirire tʉhotu cohtota,
“Ã tjiri jira” ni,
Cohamacʉreta maca,
tʉhoga.
à yoa Jesu yaina jina,
bautisarina jiga mʉsa jipihtina.
Jesure mʉsa wacũ tuachʉ ñʉno,
mʉsa ñaa yoari buhirire borohca Cohamacʉ.
Tó sehe mʉsa yoachʉ Espíritu Santore warohca mʉsare.
39 Mʉsare,
mʉsa pohnare,
mʉsa panamana ji turiainare,
yoaro macainare,
ã yoa jipihtina Cohamacʉ mari pʉhtoro to beserinare,
“Potocãta yʉhdoihtja mʉsare”,
ni cũha Cohamacʉ —niha Pedro.
40 Tuhsʉ,
tuaro mehne õ sehe ni yahu quihõha tinare:
—Ahri yahpa macaina,
Cohamacʉre ji coaerainare buhiri dahrerohca Cohamacʉ.
Wiho mejeta mʉsa sehe,
tina watoi jiina,
Cohamacʉ yahurire,
“Ã tjira”,
ni bahrañoga mʉsa yʉhdʉhto sehe —yahu quihõha Pedro masare.
41 To ã nichʉ tʉhoa tina payʉ to yahuare noano tʉhoha.
à jiro tinare tiro bautisa dutiha.
Tí dachore Cohamacʉ yaina mehne macaina tres mil masa waha namoha.
42 Ã yoa tina masa Cristo to cũrina mehne dachoripe cahmachu,
tí buheare tʉho nʉnʉ,
tíre yʉhti mʉjaa tiha.
Tina pãore nuha,
cahma witi,
Cohamacʉre sini,
Cristo to cũrina mehne noano jinocaa tiha.
Jesu yaina wahma ji dʉcaina ti jia tiare yahuha
43 Ã yoa Cohamacʉ to tuaa mehne yoa ño mʉjaha to cũrina.
Ti ã yoachʉ ñʉa masa jipihtina ñʉ cʉaa wahaa tiha.
44 Jipihtina Jesure wacũ tuaina cahmachu,
noano jinocaa tiha.
à jia ti yare cahma witia tiha.
45 Ti yare dua,
jipihtinare paye baro maerainare cãina ti cahmaare waa tiha tina.
46 Ã jia dachoripe tina Cohamacʉ wʉhʉ wijaaroi cahmachua tiha.
à yoa cãa wʉhʉse,
ti ya wʉhʉsepʉ cʉ̃hʉre nohopeina cahmachu,
pãore nuha,
wahchea mehne tina cʉ̃noi chʉa tiha.
47 Ti ã cahmachuno watoi “Cohamacʉ noariro jira”,
ni ño payoa tiha.
Paina masa tinare ji coa yʉhdʉa tiha.
à yoaro dachoripe Cohamacʉ painare to yaina to yʉhdohtina wahachʉ yoaa tiha.