Mʉno mehne ñano yoaricorore judio masa pʉhtoa wacũenoca sʉ pjaha
8
1 Jesu tʉ̃cʉpʉ Olivo wama tidʉpʉ wahare.
2 Ã yoa pa dachoi bohrearo jichʉ Cohamacʉ wʉhʉpʉ tiro sʉre tjoa.
To ã sʉchʉ ñʉa masa payʉ tiro cahai cahmachure.
Ti ã cahmachuchʉ ñʉno tiro sehe dujitjiãhno tinare buhe dʉcare.
3 To ã buhero watoi sã coyea judio masa buheina,
fariseo curua macaina mehne tí wʉhʉpʉ numinore na tare.
Ticoro mʉno mehne to ñano yoachʉ waro wacũenoca sʉ pja sʉha tina ticorore.
à sʉ pja sʉa ticorore Cohamacʉ wʉhʉpʉ na sãare tina.
Na sãa sʉ tuhsʉ jipihtina panoi ticorore duhu dapo,
4 õ sehe nire:
—Buheriro,
ahricoro mʉno mehne ñano to yoachʉ waro wacũenoca ticorore sʉ pja sʉhi.
5 Cohamacʉ dutiare Moise cjiropʉ marine to cũri õ sehe nina:
“Mʉno mehne ñano yoaricorore tãa mehne doca,
wajãga”,
nia tiha Cohamacʉ dutia.
Mʉhʉ waro,
¿dohse ni tʉhotujari ahrire?
—ni siniture tina Jesure.
6 Jesu to ñano nichʉ tʉho duaa nimare tina tirore yahusã duaa.
Ti ã sinitupachʉta Jesu sehe puhsa nuju sʉ,
yahpapʉ to wamo pica mehne joare.
7 Ã jiro ã ti ni siniturucuchʉ Jesu sehe wahcãrʉca,
tinare õ sehe ni yahure:
—Mʉsa mehne macariro ñano yoaerariro sehe ticorore tãa mehne doca mʉhtajaro —nire Jesu.
8 Ã ni tuhsʉ pari turi tiro puhsa nuju,
yahpapʉ joare tjoa.
9 Tíre tʉhoa ti ñaa yoarire wacũa,
ti wahmisʉma sehe wijaa mʉhtare.
Ti baharo tina mehne macaina cʉ̃hʉ wijaa pihtia wahare.
à ti wijaa pihtiari baharo numino tói ducuricoro Jesu mehne tjuare.
10 Ã jiro Jesu wahcã nuju sʉ,
ticorore õ sehe ni sinitu ñʉre:
—¿Nohopʉ wahari tina?
¿Mʉhʉre buhiri dahre duamarina mariajari mipʉre?
—nire ticorore.
11 —Mariahna,
pʉhtoro —ni yʉhtire ticoro.
—Yʉhʉ cʉ̃hʉ buhiri dahreraja mʉhʉre.
Wahaga.
à jico ñaare yoa namoeco tjiga —nire Jesu ticorore.]
Buhriaro marine to ñʉ masichʉ yoaro seheta Jesu ahri yahpa macainare Cohamacʉre masichʉ yoara
12 Pari turi Jesu tí wʉhʉpʉ jiinare õ sehe ni yahure:
—Buhriaro marine to ñʉ masichʉ yoaro seheta yʉhʉ ahri yahpa macainare Cohamacʉre masichʉ yoaja.
Yʉhʉre wacũ tuariro jipihtia dachoripe Cohamacʉ mehne ã jirucurohca.
à jiro tiro noaare wacũnohca.
à yoa tiro ñaare wacũ duasi —ni yahure Jesu.
13 To ã nichʉ tirore fariseo curua macaina õ sehe nire:
—Mʉhʉ mʉ basi mʉ jia tiare ã ni durucui nina.
à jia mʉ õ sehe ni,
mʉ mʉ sʉro mʉ nimacanocachʉ tí yaba cjihti jierara —nire tina Jesure.
14 Ti ã nichʉ Jesu õ sehe ni yʉhtire:
—Yʉ tarirore masija yʉhʉ.
Yʉ wahahto cʉ̃hʉre masija yʉhʉ.
Mʉsa sehe ne tíre masierara.
Mʉsa õ sehe nipachʉta yʉ jia tiare mʉsare yʉ yahuri potocã tjira.
15 Mʉsa mʉ sʉro mʉsa ñʉri dihtare masina mʉsa.
à jina noano masierara mʉsa.
à masierapanahta yʉhʉre ñano ni durucura mʉsa.
Yʉhʉ sehe yʉ mʉ sʉro masare ne ã nieraja.
16 Ã jicʉ masa ti jia tiare ñʉ masicʉ yʉ mʉ sʉro ñʉ masieraja.
Yʉhʉ pini yʉ Pʉcʉ yʉhʉre warocariro mehne ñʉ masija.
à jicʉ masa ti jia tiare yʉ ñʉ masia tí potocã tjira.
17 Mʉsare dutia ti joari pũi õ sehe ni yahura:
“Pʉaro masa cʉ̃no potori ti yahuchʉ ti yahua potocã tjira”,
ni yahu joari jira.
18 Yʉhʉre yahuriro mehne sã pʉaro tjija.
Yʉhʉ yʉ jia tiare yahuja.
Tuhsʉ,
yʉ Pʉcʉ cʉ̃hʉ yahura yʉhʉ sehere.
Tirota jira yʉhʉre warocariro —nire Jesu.
19 —¿Nohopʉ jicari mʉ Pʉcʉ?
—ni siniture tina.
—Yʉhʉre mʉsa masierara.
Yʉ Pʉcʉ cʉ̃hʉre masierara mʉsa.
Yʉhʉre masina,
yʉ Pʉcʉ cʉ̃hʉre masiboa mʉsa —ni yʉhtire Jesu tinare.
20 Jesu tinare buhero ã ni durucure Cohamacʉ wʉhʉi ti niñeru duhu sãa caa poca cahai.
To ñano yʉhdʉhti pja dʉhsasinire.
à jia tina mehne to jipachʉta tina tirore ñahaerare.
“Yʉ wahahtopʉre mʉsa sehe waha masisi”, niha Jesu
21 Pari turi Jesu tinare õ sehe ni yahure tjoa:
—Yʉ tariropʉ wahaihca.
Yʉ wahari baharo yʉhʉre macanahca mʉsa.
à jina mʉsa ñaa buhiri tiina yarianahca.
Yʉ wahahtopʉre mʉsa sehe waha masisi —ni yahure Jesu.
22 —“Yʉ wahahtopʉre mʉsa sehe waha masisi”,
¿to nichʉ tʉhoa ahriro to basi wajã yariarohcari ã nino?
—nire sã coyea judio masa ti basi.
23 Ti basi ti ã nichʉ masino õ sehe ni yahure Jesu tinare:
—Mʉsa sehe ahri yahpa macaina jira.
Yʉhʉ sehe mʉano macariro jija.
Ahri yahpai bajuarina jira mʉsa sehe.
Mʉanopʉ tariro jija yʉhʉ sehe.
24 Mʉsa yʉ jia tiare yʉ nirire “Potocã jierara” nina,
mʉsa ñaa buhiri tiina yarianahca mʉsa.
à jicʉ “Mʉsa ñaa buhiri tiina yarianahca mʉsa”,
nimahi mʉsare —nire Jesu tinare.
25 —¿Noa baro jijari mʉhʉ?
—ni siniture tina.
—Wahmanopʉre yʉ nirucuriro seheta jija yʉhʉ.
26 Mʉsare yʉ yahuhti pjíro dʉhsasinina.
Tuhsʉ,
mʉsa ñano yoari buhirire mʉsare yʉ yahuhto cjihto pjíro dʉhsasinina mini.
à jicʉ yʉhʉre warocariro to yahuri cjirire ahri yahpa macainare yahuja.
To yahuri potocã tjira —nire Jesu tinare.
27 “Yʉhʉre warocariro”,
to nichʉ tʉhoa “Mari Pʉcʉ jica”,
ni tʉhotuerare tina.
28 Ti ã ni tʉhotuerachʉ ñʉno Jesu õ sehe ni yahure tinare:
—Yʉhʉre masʉnore Cohamacʉ warocarirore mʉsa yucʉcʉ taño mehne wahcõ daponahca.
Mʉsa ã yoana,
“Tiro Cohamacʉ warocariro tjira”,
ni masinahca.
à jina yʉ mʉ sʉro yʉ yoaerariro yʉ jia tiare masinahca mʉsa.
à jina yʉ Pʉcʉ yʉhʉre to buheri dihtare yahuriro yʉ jia cʉ̃hʉre masinahca mʉsa.
29 Yʉhʉre warocariro sehe yʉhʉ mehne jira.
To cahmaare jipihtia dachoripe yoarucuja.
à jiro yʉhʉre tiro ne cohãerara —nire Jesu tinare.
30 To ã nichʉ tʉhoa,
tirore masa payʉ wacũ tuare.
Cohamacʉ pohnare, ñaare yoaina cʉ̃hʉre yahuha Jesu
31 Ã jia paina judio masa Jesure wacũ tuare.
à jiro Jesu tinare õ sehe ni yahure:
—Yʉ dutiare yoa pahñoina jina,
potocãta yʉ buheina jira mʉsa.
32 Ã jina potocã masinahca mʉsa.
Potocã jiare masina,
ñaa yoaare duhu masinahca.
à jina cahamaca yoaro sehe ji namosi mʉsa —nire Jesu tinare.
33 To ã nichʉ tʉhoa tina õ sehe ni yʉhtire:
—Sã sehe panopʉ macariro Abrahã cjiro panamana ji turiaina jija.
à jina ne paina ti cahamaca jieraja sã.
à jicʉ “Cahamaca yoaro sehe ji namosi” nicʉ,
¿dohse jiro baro sãre ã nijari mʉhʉ?
—ni siniture tina Jesure.
34 Ti ã nichʉ tʉhoro õ sehe nire tiro:
—Potocã mʉsare niita nija.
Jipihtina ñaare yoaina sehe ti ñaa yoaare duhu masierara.
à jia tí ñaa sehe ti pʉhtoro yoaro sehe jira.
à jiina jia cahamaca yoaro sehe jira tina.
35 Cahamacʉno sehe to pʉhtoro ya curua macariro jipihtia dachoripe jirucuerara.
à jiro painare dutiriro jierara.
Tí wʉhʉ macariro sehe to macʉno sehe jipihtia dachoripe potocãta tí curua macariro jira tiro.
(Yʉhʉ sehe Cohamacʉ macʉno jija.
à jicʉ dutiriro jija.
Mʉsa ñaa yoaare duhu dutiihtja.)
36 Ã jina yʉhʉ Cohamacʉ macʉno ñaare yʉ duhuchʉ yoarina jina potocãta ñaare duhurina jira mʉsa.
(Ã jina tí ñaa cahamaca yoaro sehe ji namoerara mʉsa.)
37 Abrahã cjiro panamana ji turiaina mʉsa jichʉ masija.
à jipanahta yʉ yahua sehere tʉho duaerara mʉsa.
à jina yʉhʉre wajã duara mʉsa.
38 Yʉ Pʉcʉ yʉhʉre to masichʉ yoari cjirire yahuja mʉsare.
Yʉ ã yahupachʉta mʉsa pʉcʉ watĩno mʉsare to dutiare yoara mʉsa cʉ̃hʉ —nire Jesu tinare.
39 —Abrahã cjiro panopʉ macariro sã ñʉchʉ cjiro jia tiha.
à jiro watĩno sã pʉcʉ jierara —ni yʉhtire tina.
Ti ã nichʉ Jesu õ sehe ni yʉhtire:
—Abrahã panamana jina,
to yoariro seheta yoaboa mʉsa.
40 Cohamacʉ yʉhʉre potocã to yahuare mʉsare yʉ yahupachʉta yʉhʉre wajã duara mʉsa.
Abrahã cjiro sehe ne ã yoaera tiha.
41 Mʉsa pʉcʉ to yoariro seheta yoara mʉsa —nire Jesu tinare.
To ã nichʉ tina õ sehe ni yʉhtire:
—Wamomaca dʉhtemahnoeraina pohna jieraja sã.
Cʉ̃irota jira sã Pʉcʉ.
Tirota jira Cohamacʉ —nire tina.
42 Ti ã nichʉ Jesu õ sehe ni yʉhtire:
—Cohamacʉ mehne macariro jicʉ,
õpʉre tahi.
à jina Cohamacʉ mʉsa Pʉcʉ to jichʉ yʉhʉre cahĩboa mʉsa.
Yʉ mʉ sʉro taerahi yʉhʉ pinihta.
Cohamacʉ to warocachʉ tahi õpʉre.
43 ¿Dohseana yʉ durucuare tʉhoerajari mʉsa?
Yʉ yahuare tʉhona bihoerara mʉsa.
à jina tʉho duaerara mʉsa.
44 Mʉsa pʉcʉ sehe watĩno jira.
à jina watĩno cahmaa sehere yoa duara mʉsa.
Ahri yahpa wahmanopʉ to ji dʉcachʉpʉ,
mipʉ cʉ̃hʉre tiro masare wajãrucuriro jira.
Tirore potocã durucua mariahna.
à jiro tiro potocã ne durucuerara.
Tiro wahmanopʉre mahño mʉhta dʉcariro jia tiha.
à jiro tiro ã mahñorucuriro jiro,
mahñoare yahura.
45 Yʉhʉ sehe mʉsare potocã yahuja.
à yʉ yahuchʉ yʉhʉre tʉhoerara mʉsa.
46 “Mʉhʉ ñano yoariro jira”,
yʉhʉre ni masierara mʉsa.
¿Potocã mʉsare yʉ yahupachʉta dohseana tʉhoerajari mʉsa?
47 Cohamacʉ pohna sehe to durucuare tʉhora.
To pohna jierana,
to durucuare tʉho duaerara mʉsa —nire Jesu tinare.
Abrahã cjiro to jihto pano Cristo sehe ji mʉhta tuhsʉa tiha
48 To ã nichʉ tʉhoa judio masa tirore õ sehe nire:
—“Mʉhʉ Samaria macariro jira.
à jicʉ tʉho masierariro watĩno to cohtotariro jira mʉhʉ”,
sã niri potocã tjira —nire tina Jesure.
49 Ti ã nichʉ tʉhoro õ sehe ni yʉhtire Jesu:
—Tʉho masierariro,
watĩno to cohtotariro jieraja yʉhʉ.
Yʉ Pʉcʉre ño payoja.
Mʉsa sehe yʉhʉre ño payoerara.
50 Yʉhʉre masa ti ño payohtire macaeraja yʉhʉ.
Yʉ Pʉcʉ sehe masare yʉhʉre ño payo dutira.
Tiro pinihta yʉ jia tiare noano ñʉ masino,
ãta ño payo dutira.
Tuhsʉ,
yʉhʉre ti cahmaerari buhiri buhiri dahreriro jirohca tiro.
51 Potocãta mʉsare nii nija.
Yʉ dutiare yoariro jipihtia dachoripe Cohamacʉ mehne ã jirucurohca —nire Jesu.
52 To ã nichʉ tʉhoa õ sehe nire tina:
—Mipʉ pinihtare tʉho masierariro,
watĩno to cohtotariro mʉ jichʉ sã noano masija.
Abrahã cjiro yariaa wahaha.
Cohamacʉ yare yahu mʉhtaina cjiri cʉ̃hʉ yaria pihtia wahaha.
à jicʉ “Yʉ dutiare yoariro jipihtia dachoripe Cohamacʉ mehne ã jirucurohca” nicʉ,
¿dohse nicʉ ã nijari mʉhʉ?
53 ¿Sã ñʉchʉ cjiro Abrahã yʉhdoro tuajari mʉhʉ?
Tiro cjiro,
Cohamacʉ yare yahu mʉhtaina cjiri cʉ̃hʉ yariaa wahaha.
¿Mʉhʉ sehe diro baro jijari mʉhʉ ã ni durucucʉ?
Mʉhʉ ã niboriro jierara —nire tina.
54 Ti ã nichʉ tʉhoro Jesu õ sehe ni yahu namore:
—Yʉhʉ yʉ basi “Tuariro jija yʉhʉ” nicʉ,
tuariro jieraboca yʉhʉ.
Yʉ Pʉcʉ sehe “Tiro tuariro jira”,
nina yʉhʉre.
“Sã yairo Cohamacʉ”,
mʉsa niriro sehe yʉ Pʉcʉ tjira.
55 Mʉsa sehe yʉ Pʉcʉre ne masierara.
Yʉhʉ sehe tirore masija.
“Tirore masieraja” nicʉ,
mʉsa yoaro seheta mahñoa payʉriro jiboa yʉhʉ.
Potocãta tirore masija.
à jicʉ to dutiare yoaja.
56 Ahri yahpapʉ yʉ tahtore mari ñʉchʉ cjiro Abrahã cjiro masia tiha.
à masino tiro wahchea tiha —nire Jesu.
57 To ã nichʉ tina õ sehe ni yʉhtire:
—Mʉhʉ cincuenta cʉhmari cjʉaerasinica.
Abrahã cjiro panopʉ macariro jira.
¿Mipʉre tiro cjirore mʉhʉ dohsea masiboari?
—nire judio masa Jesure.
58 —Potocã mʉsare niita nija.
Abrahã to jihto pano yʉhʉ sehe ji mʉhta tuhsʉa tii —nire Jesu tinare.
59 To ã nichʉ tʉhoa tina sehe tãare na,
tirore doca duamare.
Ti ã doca duapachʉta Jesu sehe Cohamacʉ wʉhʉi jiriro duhti wijaa wahare.