Sacerdotea pʉhtoa, judio masare buheina, bʉcʉna mehne Jesure sinitu ñʉha
20
1 Pa dachoi Cohamacʉ wʉhʉi Jesu masare noaa buheare buhero niha.
To ã buhechʉ sacerdotea pʉhtoa,
judio masare buheina,
bʉcʉna mehne tiro cahapʉ wihia,
tirore õ sehe ni sinitu ñʉha:
2 —Yahuga sãre.
¿Dohseacʉ canʉre ã yoari mʉhʉ?
¿Noa mʉhʉre tíre ã yoa dutiri?
—niha tina Jesure.
3 Ti ã nichʉ Jesu õ sehe ni yʉhtiha tinare:
—Mʉsa sehere sinitu mʉhtaihtja.
Yahuga yʉhʉre.
4 ¿João masare to bautisachʉ diro baro sehe tirore bautisa dutia tiari,
mʉsa tʉhotuchʉ?
¿O Cohamacʉ dutiera tiari?
¿O masa sehe dutia tiari,
mʉsa tʉhotuchʉ?
—ni sinituha Jesu tinare.
5 To ã nichʉ tina sehe ti basi õ sehe niha:
—¿Dohse ni yʉhtinahcari mari?
“Cohamacʉ Joãore dutia tiri jire”,
mari nichʉ,
“¿Dohseana Cohamacʉ Joãore to dutipachʉta tirore tʉho duaerari mʉsa?”
niboca Jesu marine.
à jina “Cohamacʉ Joãore dutia tiri jire”,
ni yʉhti masieraja mari.
6 Ahrina masa sehe “Potocãta João Cohamacʉ yare yahu mʉhtariro jira”,
ni tʉhotura tina.
à ni tʉhotua “João to bautisachʉ Cohamacʉ tirore dutierari jire”,
mari nichʉ tʉhoa marine tãa mehne docaboca masa.
à jina tí cʉ̃hʉre yahu masieraja mari —ni durucuha tina ti basi.
7 Ã ni durucu tuhsʉa tina Jesure õ sehe ni yʉhtiha:
—Joãore bautisa dutirirore sã masieraja —niha tina.
8 Ti ã nichʉ Jesu õ sehe ni yʉhtiha:
—Tí pja pinihta yʉhʉ cʉ̃hʉ mʉsa sinitu mʉhtarire yahueraja mʉsare.
Ahrire yʉ yoarire dutirirore yahueraja mʉsare —niha tiro tinare.
Ñaina dahra cohtaina quitire yahuha Jesu
9 Ã yoa Jesu to tʉhotua mehne piti dahre õ sehe ni buhe dʉcaha masare:
—Wese pʉro se dari cjihtire toaha.
Toa tuhsʉ,
tí wesere painare cʉ̃ bʉhʉsehe coa pahma cũha.
Pahma cũno tí wesere tinare ñʉ wihbo dutiha.
à duti tuhsʉ pa yahpapʉ waha,
yoari pja bajueraha.
10 Tuhsʉ,
se ñiri pja jichʉ wese pʉro to cahamacʉnore wesere ñʉ wihboina cahapʉ warocaha.
Wese macaa to toaa dichare to ya coa macaare na dutiro warocamaha.
à jia ñʉ wihboina sehe to cahamacʉnore wiho piti boca cjãnocaha tirore.
à cjãnocaa,
tina tirore dichare waerapahta tjuaa dutiha tirore.
11 Ã jiro wese pʉro pairo to cahamacʉnore tí wese macaa toaa dichare na dutiro warocamaha tjoa.
à jia wesere ñʉ wihboina tiro cʉ̃hʉre cjã,
ñano yoaha.
à yoa tuhsʉ tirore tí dichare waerapahta tjuaa dutiha tjoa.
12 Tirore ti ã yoari baharo wese pʉro pairo cahamacʉnore warocamaha tjoa.
To ã warocachʉ ñʉa,
wesere ñʉ wihboina sehe tiro cʉ̃hʉre cami dahre,
tí wese dʉhtʉ cahai cohãnocaha tirore.
13 ’Ti ã yoari baharo wese pʉro õ sehe ni tʉhotumaha:
“¿Dohse yoaihcari yʉhʉ?
Õ sehe yoaihtja.
Yʉhʉ yʉ macʉre yʉ cahĩrirore warocaihtja.
Tina tirore ño payoboca”,
ni tʉhotumaha wese pʉro sehe.
14 Ã jia to macʉnore to warocarirore to sʉchʉ ñʉa ñʉ wihboina sehe ti basi õ sehe ni durucuha:
“Ahriro wese pʉro macʉno jira.
Baharo ahri wesere cjʉahtiro jira.
Tirore wajãjihna.
Mari ã yoachʉ ahri wese mari ya wese tjuarohca”,
nimaha tina ti basi.
15 Ã ni tuhsʉa wese pʉro macʉnore wese dʉhtʉ cahai cohã,
wajãnocaha tirore.
¿Ti ã yoachʉ ñʉno dohse yoarohcari wese pʉro wesere ñʉ wihboinare?
—niha Jesu.
16 —Tiro wesere ñʉ wihboinare wajãno taro,
paina sehere wesere ñʉ wihbo dutirohca —ni yʉhtiha Jesu to basi.
To ã nichʉ tʉhoa masa sehe õ sehe niha:
—Marine ã wahaero tjijaro —niha tina.
17 Ti ã nichʉ Jesu sehe tinare õ sehe ni sinituha:
—¿Cohamacʉ yare ti joari pũre õ sehe ni durucua,
dohse nino nijari,
mʉsa tʉhotuchʉ?:
“Ahriro Cristo tãca yoaro seheta jira.
Tãcare wʉhʉ dahreina ti cohãno seheta masa tirore cohãahca.
Ti ã yoapachʉta mipʉre wʉhʉ dahreina wʉhʉre yoaa ti cũ mʉhtari tãcare ti cũno seheta Cohamacʉ tirore pʉhto sõhre”,
ni joaha.
18 Jipihtina tia tãca bui bora pjainare payʉ dihicã peri yihsorohca tia tãca.
Tuhsʉ,
tia tãca masʉno bui bora pjaro,
tahãnocanohca tirore.
à tahãno to pjacʉ cjirore daa manaricã wahachʉ yoarohca.
(Tó seheta yʉhʉre cahmaeraina,
yʉ buhiri dahrehtina ñano yʉhdʉahca) —niha Jesu.
Pʉhtoa ya wapare paina sinituha Jesure
19 To ã nichʉ tʉhoa judio masare buheina sacerdotea pʉhtoa cʉ̃hʉ,
“Jesu wesere ñʉ wihboina quiti mehne marine tuhtiro nina”,
ni tʉhotuha tina.
à ni tʉhotua tina Jesure ñaha duamaha.
à ñaha duapahta tina masare cui niha.
20 Ã cuia,
Jesure ti ñahahtí pjare cohtasiniha tina.
à jia tina quihõno yoaina yoaro sehe ji mahño dutiha painare.
To ñano ni yʉhtichʉ yoa duaa nimaha tirore yahusã duaa.
à jia Jesure sinitu dutia warocaha mahñoinare.
Jesu ñano to ni durucuchʉ tʉhoa tí yahpa macaina bui pʉhtorore peresu yoa dutia taa nimaha.
21 Ã jia tina Jesure mahño cũ õ sehe ni sinitu ñʉmaha:
—Buheriro,
potocã durucuriro,
mahñoa marieriro mʉ jichʉ sã masija.
à jicʉ wiho jiinare,
pʉhtoa cʉ̃hʉre cʉ̃no potori yoara mʉhʉ.
Mʉhʉ Cohamacʉ yare potocã mʉ buhechʉ cʉ̃hʉre sã masija.
22 Yahuga sãre.
¿Ne,
Roma macarirore jipihtina bui pʉhtorore gobierno macaare marine waparo cahmajari,
mʉ tʉhotuchʉ?
¿Mari dutia wapa dutijari,
mʉ tʉhotuchʉ?
—ni sinituha tina Jesure.
23 Ti ã nichʉ tʉhoro Jesu ti ñano yoa duaare masino,
tinare õ sehe ni yʉhtiha:
24 —Mipʉre niñeru tʉre na tahga.
Tí tʉre ñʉjihna —niha.
Tí tʉre ti na wihichʉ ñʉno õ sehe niha Jesu:
—¿Diro baro masʉ wahãjari ahri tʉre?
¿Diro baro wama wahãjari?
—niha Jesu tinare.
—César,
masa bui pʉhtoro jiriro ya masʉ,
to wama cʉ̃hʉ wahãna —ni yʉhtiha tina.
25 Ti ã nichʉ Jesu õ sehe ni yahuha:
—Tí pja pinihta masa bui pʉhtoro yare tiro sehere waga.
Cohamacʉ yare Cohamacʉ sehere waga —niha Jesu tinare.
26 Ã to noano yʉhtichʉ,
masa ti ñʉrocaroi Jesure ñano ni durucuchʉ yoa masieraha tina.
à jia Jesu yʉhtiare tʉhoa,
tina cʉaa waha,
dihta mariea wahaha.
Saduceo curua macaina Cohamacʉ to masoare sinituha Jesure
27 Ã yoa mahainacã saduceo curua macaina Jesu cahapʉ wihiha.
“Cohamacʉ yariainare masosi”,
ni tʉhotuina jiha saduceo curua macaina.
à jia tina õ sehe niha tirore:
28 —Buheriro,
õ sehe ni buhea tiha Moise cjiro:
“Cʉ̃iro to wahmino namo tiriro pohna mariaparota to yariachʉ ñʉno to bahʉrore to wahmino namono cjirore nʉoano cahmana.
à yoaro to wahmino mʉnano to pohna tiboro seheta pohna tiro cahmana to bahʉrore.
à jia to pohna to wahmino mʉnano pohna yoaro sehe jiahca”,
ni joaa tiha Moise cjiro —niha tina.
29 Tíre ni tuhsʉ ahri quitire yahu namoha tjoa Jesure:
—Cʉ̃iro masʉno jiha.
Seis to bahana jiha.
Ti wahmino sehe namo ti,
pohna marieriro yariaa wahaha.
30 Ã jiro pairo to bahʉro cʉ̃hʉ to wahmino namono cjirore nʉoaha.
To ã nʉoari baharo to wahmino yoaro seheta pohna mariaparota tiro cʉ̃hʉ yariaa wahaha.
31 Ã jiro ahriro bahʉro cʉ̃hʉ to wahmino mʉnano yoaro seheta pohna mariaparota yariaa wahaa.
à dihta wahaha cʉ̃iro pohna waro.
Ne pohna mariapahta yaria pihtia wahaha.
32 Ti namono cjiro cʉ̃hʉ ti baharota yariaa wahaha.
33 ¿Ne Cohamacʉ jipihtinare yariaina cjirire to masochʉ diro namono sehe jibocari ticoro pototi?
Tina jipihtina ticorore namo tirina cjiri jiha.
¿Ã jiro diro baro namono jirohcari?
—ni sinituha tina.
34 Ti ã nichʉ Jesu õ sehe ni yʉhtiha:
—Mipʉ macaina wamomaca dʉhtera.
35 Ti ã dʉhtepachʉta paina sehe pa turu macaina sehe ã jierara.
Paina mʉare,
numia cʉ̃hʉre to yainare Cohamacʉ ñaa marieina jichʉ yoarohca.
Tina ti yariari baharo masa mʉjaahca.
à yoa tina tópʉ wamomaca dʉhterara.
36 Ã jia tina anjoa yoaro seheta ne yariasi.
Tina Cohamacʉ to masorina jia,
Cohamacʉ pohna jira.
37 Mipʉre yariarina cjiri ti masa wijaahto sehere mʉsare yahuihtja.
Tíre Moise cjiro noano yahu pahñoa tiha.
To mahadʉcã jʉ̃ri quitire õ sehe ni yahua tiha tiro:
“ ‘Yʉhʉ Abrahã,
Isaa,
Jacobo ti pʉhtoro tjija’,
ni yahure Cohamacʉ yʉhʉre”,
ni joaa tiha Moise cjiro.
38 Ti yariari baharo “Ti pʉhtoro tjija”,
ni yahua tiha Cohamacʉ.
à niparota yariarina cjiri pʉhtoro jierara Cohamacʉ.
“Ti pʉhtoro tjija”,
to nia mehne catiina ti jichʉ masija mari.
Tiro catiina pʉhtoro jira.
Jipihtina masa catira Cohamacʉ to ñʉchʉ —niha Jesu tinare.
39,40 To ã nichʉ tina sehe pari turi Jesure sinitu duaeraha.
à jia mahainacã judio masare buheina õ sehe niha:
—Buheriro,
mʉhʉ noano yʉhtihre —niha tina Jesure.
¿Diro baro coyeiro jijari Cristo?
41 Baharo Jesu õ sehe ni yahuha tinare:
—“Cristo Davi cjiro panamino jirohca”,
ni buhera paina.
¿Dohse yoa tina ã ni buhejari?
42 Davi cjiro to basi Salmopʉ to joari tjupʉ õ sehe ni joaa tiha:
“Cohamacʉ yʉ pʉhtorore õ sehe nire:
‘Õi yʉ poto bʉhʉsehei dujiga.
43 Ã jicʉ mʉhʉre ñʉ tuhtiinare mʉhʉre yʉhdʉrʉcabasaihca yʉhʉ’,
nire Cohamacʉ yʉ pʉhtorore”,
ni joaa tiha Davi cjiro.
44 Ã ni joaro Davi cjiro pʉhtoro tiha Cristore.
Davi cjiro Cristo ñʉchʉno cjiro jiparota Cristore pʉhtoro tiha.
¿Davi cjiro Cristo ñʉchʉno cjiro jiparota dohse jiro baro tiro pʉhtoro tiari Cristore?
—ni yahuha Jesu.
(Cristo sehe Davi cjiro pʉhtoro jira.)
Judio masare buheina ti ñaa yoaare yahuha Jesu
45 Masa payʉ Jesure ti tʉhoro watoi Jesu sehe to buheinare õ sehe ni yahuha:
46 —Mari judio masare buheina ti ñaa yoaare ñʉna noano wacũ masiga.
à jina ti yoaro sehe yoaena tjiga.
Tina yoaa suhti sãa,
masa ti ñʉrocaroi majarea,
pache duaropʉ paina pʉhtoare noano ño payo ti sinino sehe ti piti bocasinichʉ cahmana tina.
à cahmaina jia,
tina mari judio masa buhea wʉhʉsei noaa dujia dihtare bese duji duara.
Tuhsʉ,
bose nʉmʉ jichʉ tó cʉ̃hʉre noaa dujia dihtare cahmana.
47 Tina wapewahya numia ya wʉhʉsere ti ya cʉ̃hʉre mana tí numiare.
à yoaina jia,
tina masa ti ñʉrocaroi yoari pja Cohamacʉre sinimana masare ñʉ dutia.
Ti ã yoachʉ tinare Cohamacʉ pjíro buhiri dahrerohca —niha Jesu tinare.