Zaqueo Jesure piti bocaha
19
1 Ã yoa Jesu Jericópʉ sʉ,
tí macapʉ yʉhdʉ wahcãno taro niha.
2 Pache pʉro Zaqueo wama tiriro pʉhtoa ya cjihtire wapa na cohtaina pʉhtoro tói jiha.
3 Ã jiro tiro Jesure “¿Diro baro jicari?”
ni ñʉ masino taro Jesure ñʉ duamaha.
à to ñʉ duapachʉta yahparirocã to jichʉ masa payʉ tirocãre dʉcataha.
4 Ã jiro tiro masare mʉroca yʉhdʉa waha,
sicómoro wama tidʉ yucʉcʉpʉ mʉjaha Jesure ñʉno taro.
Baharo curero tʉ cahai Jesu yʉhdʉaro taro niha.
à jiro Zaqueo tʉi cohtaro niha.
5 To ã cohta pisaro watoi Jesu sehe tʉ dahpotoi sʉrʉca,
Zaqueore ñʉroca mʉo,
tirore õ sehe niha:
—Zaqueo mipʉre mʉ wʉhʉi tjuasiniihtja yʉhʉ.
à jicʉ cjero duji taga —niha Jesu tirore.
6 To ã nichʉ Zaqueo sehe soaro mehne duji ta,
tuaro wahchea mehne to wʉhʉpʉ pji wahcãha Jesure.
7 To ã ni piti bocachʉ ñʉa,
jipihtina masa ti basi õ sehe ni durucuha:
—Ahriro Jesu ñaare yoariro ya wʉhʉpʉ tinino waha duara —ni durucuha jipihtina ti basi.
8 Zaqueo sehe piti boca tuhsʉ tói ducu,
Jesure õ sehe ni yahuha:
—Pʉhtoro tʉhoga yʉhʉre.
Jipihtia yʉ yare dacho macai pjacʉoinare waihtja.
à jicʉ yʉhʉ pairore cien niñeru tʉrire mahño mariro jicʉ,
cuatro cientos niñeru tʉrire wapa bui payoihtja tirore —niha Zaqueo Jesure.
9 To ã nichʉ Jesu sehe õ sehe ni yahuha tirore:
—Michare mʉhʉre mʉ wʉhʉi jiina cʉ̃hʉre pichacapʉ wahaborinare Cohamacʉ yʉhdo tuhsʉra.
Mʉhʉ cʉ̃hʉ Abrahã cjiro coyeiro jira.
10 Yʉhʉ masʉno Cohamacʉ warocariro pichacapʉ wahaborinare macai tai nii.
Tópʉ wahaborinare noano yʉhdoi tai nii —niha Jesu Zaqueore.
Niñeru tʉri uru tʉri quitire yahuha Jesu
11 Ã yoa tirore tʉhoinare Jesu paye quiti mehne piti dahre yahuha.
Mahanocã dʉhsaha Jerusalẽpʉ to sʉhto.
à jia tirore tʉhoina õ sehe ni tʉhotuha:
“Pʉhtoro Cohamacʉ mipʉre sʉho ji dʉcaro taro nina”,
ni tʉhotuha tina.
12 Ti ã ni tʉhotuchʉ Jesu õ sehe ni yahuha tinare:
—Cʉ̃iro pʉhtoro sãahtiro to ya yahpa macaina bui pʉhtoro jihtiro yoaropʉ waharo taro niha.
Tópʉre to sʉchʉ ñʉno ti bui pʉhtoro tirore pʉhtoro sõno taro niha.
Pʉhtoro sãahtiro ya maca macaina bui pʉhtoro sõno taro niha tirore.
Baharo to ya wʉhʉpʉ tju wihiro taro niha.
13 Wahmanore to wahahto pano pʉhtoro diez dahra cohtainare pjirocaha.
à pjirocaro,
tiro tinare cãinare típe tʉri niñeru tʉri wapa bʉjʉa tʉri uru tʉrire waha.
Wa tuhsʉ,
õ sehe ni yahuha tinare:
“Yʉhʉ yʉ mariachʉ ahri niñeru mehne mʉsa wapata namohtire macaga”,
niha tiro dahra cohtainare.
14 Pʉhtoro sãahtiro to jipachʉta to ya maca macainata tirore cahmaeraha.
à cahmaeraa,
ti warocahtinare tirore pʉhtoro sõhtirore yahu dutia warocaha.
“Ahriro sã pʉhtoro jichʉ cahmaeraja sã”,
niha tina ti yahu duti warocaina sehe.
15 Ã ti cahmaerapachʉta baharo ti pʉhtoro sãaha tiro.
à pʉhtoro sãa tuhsʉro tiro to wʉhʉpʉ tjua taha.
à tju wihiro tiro dahra cohtainare to niñeru mehne ti wapata namoare masino taro,
tinare pjirocaha.
16 To pjirocari baharo,
wihi mʉhtariro tirore yahuha:
“Pʉhtoro mʉ niñeru tʉ,
yʉhʉre mʉ wari tʉ mehne diez tʉri wapata namohi yʉhʉ”,
niha dahra cohtariro to pʉhtorore.
17 “Noano yoari jire mʉhʉ.
Mʉhʉ noariro dahra cohtariro jira.
Mʉhʉ mahanocã mehne yʉ dutiriro seheta yoa pahñoriro jicʉ mipʉ diez macari macaina ti pʉhtoro cjihto wahaihca mʉhʉ”,
niha pʉhtoro dahra cohtarirore.
18 To baharo wihiriro tiro mehne macariro õ sehe niha:
“Pʉhtoro,
mʉ niñeru tʉ,
yʉhʉre mʉ wari tʉ mehne cinco tʉri wapata namohi yʉhʉ cʉ̃hʉ”,
ni yahuha to pʉhtorore.
19 “Cinco macari macaina pʉhtoro cjihto wahaihca mʉhʉ”,
niha pʉhtoro tirore.
20 To ã niri baharo pairo dahra cohtariro wihi,
õ sehe ni yahuha:
“Pʉhtoro,
mʉ niñeru tʉ õi jira.
Suhtiro cahsaro mehne coma,
tí tʉre wihbohi.
21 Mʉhʉ tuaro dahra dutiriro jira.
Paina yare mana mʉhʉ.
Tuhsʉ,
tuaro dahra dutiriro jicʉ dahraerariro jipacʉta mʉhʉ paina ya dahrari wapare nana.
à yoa toaerariro jipaihta dichare nariro jira mʉhʉ.
à jicʉ mʉhʉre cui nihi”,
niha to pʉhtorore “Wapataerahi yʉhʉ”,
ni yahuro.
22 “Mʉhʉ ã nicʉ ñano yoariro jira mʉhʉ.
Yʉhʉre mʉ ã niri buhiri mʉhʉre buhiri dahreihtja yʉhʉ.
Yʉhʉ mʉhʉre tuaro dahra dutiriro yʉ jichʉ masina mʉhʉ.
Paina yare yʉ nachʉ toaerariro jipai dichare nariro yʉ jichʉ masina mʉhʉ.
23 Yʉ ã jiriro jichʉ ñʉpacʉta ya tʉre niñeru wihbori wʉhʉpʉ cũerare mʉhʉ.
Tíre ti wasori wapa wapata namoboa mʉhʉ.
¿Dohseacʉ ã yoaerari mʉhʉ?
Tíre mʉ yoachʉ tju wihicʉ wapata namoboa yʉhʉ”,
niha ti pʉhtoro.
24 Ã ni tuhsʉ tiro cahai ducuinare dutiha:
“Niñeru tʉre maga tirore.
Diez tʉrire cjʉarirore waga”,
niha pʉhtoro.
25 To ã nichʉ tina sehe õ sehe ni yahuha tirore:
“Pʉhtoro,
diez tʉri cjʉariro payʉ cjʉa tuhsʉra”,
niha tina.
26 Ti ã nichʉ pʉhtoro õ sehe ni yʉhtiha:
“Mʉsare niita nija.
Jipihtina cjʉainare wa namoihtja.
Cjʉaerariro sehere mahanocã to cjʉapachʉta tíre maihtja.
27 Mipʉ pinihta yʉhʉre ñʉ tuhtiinare yʉhʉre ti pʉhtoro ji dutierainare yʉ cahai na tahga.
à yoana yʉ ñʉrocaroi wajãga tinare”,
niha pʉhtoro dahra cohtainare —ni buheha Jesu.
Jerusalẽpʉ sʉha Jesu
28 Ã ni tuhsʉ Jesu paina pano Jerusalẽpʉ wahaha.
29 Ã yoa tina Jerusalẽpʉ ti sʉhto panocã tʉ̃cʉ Olivo wama tidʉ dʉhtʉ cahai jiri maca Betfagé wama tiri maca cahai,
ã jichʉ Betania wama tiri maca cahai sʉ mʉhtaha.
Tí macari pʉa maca cahai Jesu sʉro,
to buheina pʉarore warocaro taro,
õ sehe ni yahu quihõha:
30 —Sí macapʉ burrocãre nana wahaga.
Tópʉ sʉna,
burrocãre ti dʉhte daporirocãre boca sʉnahca.
Tiro ne cʉ̃iro ti pisamahnoerarirocã jica.
Tirocãre bocana,
yuta dare pjã,
na tabasaga yʉhʉre.
31 Tirocãre mʉsa pjãchʉ ñʉno,
cʉ̃iro dohse jiriro “¿Dohse yoana tana burrocãre dʉhte dapori dare pjãjari mʉsa?”
to nichʉ tʉhona õ sehe ni yʉhtiga tirore:
“Mari pʉhtoro burrocãre cahmarocasinire”,
ni yahuga tirore —ni yahu duti warocaha to buheina pʉarore.
32 To ã nichʉ tina pʉaro sehe to niriropʉ sʉha.
Ti ã sʉchʉ jipihtia Jesu to niriro seheta wahaha.
33 Ã jia tina tirocãre ti pjãchʉ ñʉa tirocã pʉa tinare õ sehe ni sinituha:
—¿Dohse yoana tana burrocãre dʉhte dapori dare pjãjari mʉsa?
—ni sinituha tina.
34 —Mari pʉhtoro burrocãre cahmarocasinire —ni yʉhtiha tina.
35 Ã ni yahu tuhsʉ tirocãre Jesu cahapʉ na sʉha.
Na sʉ tuhsʉ ti bui sãa suhtire tirocã bui pjũpaha payo tuhsʉchʉ ñʉ,
Jesu sehe tirocã bui to mʉja pjachʉ yoadohoha tina.
36 Jesu tirocã bui to pisachʉ to wahahto pano masa ti bui sãa suhtire tjuwe na,
to wahahti mahai saño cũ mʉhtaha,
Jesure ño payoa.
37 Tina Jerusalẽ cahacãpʉ sʉ,
Olivo wama tidʉi dujiari mahapʉ sʉha.
Tópʉ Jesu to buhechʉ tʉhoina payʉ jipihtia Cohamacʉ tuaa mehne to yoa ñorire,
noaa to yoarire ti ñʉri cjirire wacũa,
Cohamacʉre “Noariro,
tuariro jira”,
ni sañurucuha.
à yoa Cohamacʉre ño payoa,
õ sehe ni sañurucuha:
38 —Ahriro Cohamacʉ to warocariro,
mari pʉhtoro noano jijaro.
Mʉano macaina noano jijaro.
Mʉano macariro Cohamacʉ,
mʉhʉ tuariro waro jira —ni ño payoha tina.
39 Ti ã nichʉ tʉhoa fariseo curua macaina mahainacã ti watoi jiina Jesure õ sehe ni yahuha:
—Buheriro,
mʉ buheinare dihta mariea dutiga —niha tina.
40 —Mʉsare niita nija.
Tina ti sañurucuerachʉ tãa peri sehe sañurucuboa —niha Jesu fariseo curua macainare.
41 Ã ni tuhsʉ Jesu Jerusalẽ cahacãpʉ sʉ,
tí macare ñʉrocaro,
tiiha.
42 Õ sehe niha tiro:
—Jerusalẽ macaina mipʉ pinihtare mʉsare pichacapʉ wahaborinare Cohamacʉ to yʉhdohtore mʉsa masichʉ noa yʉhdʉaboa.
à jipachʉta mipʉre mʉsa tíre ne tʉho duaerare.
à jiro Cohamacʉ tíre mʉsare masi dutierare.
43 Mʉsare ñʉ tuhtiina mʉsa jiri macare soroahca.
à yoaa mʉsare tina wijaaro wasi.
44 Tí pjata tina mʉsa ya macare cohã pahñoahca.
Mʉsa cʉ̃hʉre wajãahca.
Mʉsare ñʉ tuhtiina noano cohã pahñoahca mʉsa ya macare.
Cohamacʉ pichacapʉ wahaborinare mʉsare to yʉhdohtore mʉsa masi duaerare.
Mʉsa masi duaerari buhiri mʉsare ñʉ tuhtiinare Cohamacʉ mʉsare cohã dutirohca —niha Jesu Jerusalẽ macainare.
Cohamacʉ wʉhʉpʉ Jesu sʉha
45 Ã yoa Jerusalẽpʉ sʉro,
Jesu Cohamacʉ wʉhʉpʉ sãa wahaha.
à yoaro pache duainare tí wʉhʉpʉ jiinare boca sʉro,
tinare cohã wionocaha.
46 Õ sehe niha tiro tinare:
—Õ sehe nina Cohamacʉ yare ti joari pũi:
“Yʉ wʉhʉ Cohamacʉ mehne durucuri wʉhʉ wama tirohca”,
niha to yare ti joari pũi.
To ã nipachʉta mʉsa sehe ahri wʉhʉi duana,
mʉsa basi cahma yacara mʉsa —niha Jesu.
47 Ã yoa dachoripe Cohamacʉ wʉhʉpʉ Jesu buheha.
à jia sacerdotea pʉhtoa,
judio masare buheina,
masa pʉhtoa cʉ̃hʉ tirore ti wajãhti cjihtire wacũ macaha.
48 Masa jipihtina tirore ã tʉhorucua,
to buheare noano tʉho nʉnʉina jiha.
Ti ã noano tʉho nʉnʉchʉ ñʉa,
Jesure wajã duaina sehe tirore ti wajãhtire bocaerasiniha.