Niñeru ñʉ wihbo cohtariro tʉho masiriro quitire Jesu yahuha
16
1 Ã yoa ahri quitire to buheinare õ sehe ni yahuha Jesu:
—Pache pʉro ya niñerure ñʉ wihbo cohtariro niñerure noano to ñʉ wihboerachʉ ñʉno pairo sehe yahusãha pache pʉrore:
“Tiro mʉ niñerure yoa sitero nina”,
ni yahusãha tirore.
2 To yahusã tuhsʉri baharo niñeru ñʉ wihbo cohtarirore pjirocaha.
à pji tuhsʉ,
to wihichʉ ñʉno,
tirore pʉhtoro õ sehe niha:
“Pairo yʉ niñerure mʉ yoa siterire yʉhʉre yahure.
à jicʉ mipʉre yʉ yare ñʉ wihboriro jisi mʉhʉ.
à jicʉ yʉ yare mʉ yoari cjirire yahu pahño joaga.
Mʉhʉre cohãi nija”,
niha to pʉhtoro tirore.
3 To ã niri baharo õ sehe ni tʉhotuha ñʉ wihboriro to basi:
“Yʉ pʉhtoro yʉhʉre cohãno taro nica.
Yʉhʉ tuaeraja.
à jicʉ tuaro dahraare bihoeraja.
Tuhsʉ,
painare yʉhʉ niñerure sinicʉ bʉobiaro yʉhdʉboca yʉhʉ.
¿Dohse yoaihcari yʉhʉ?
4 Mipʉ pinihtare yʉ yoahtire masija yʉhʉ jʉna.
Õ sehe yʉ yoachʉ yʉ dahraa maerachʉ yʉ pʉhtorore wapamoina yʉhʉre cahĩahca.
à jia ti wʉhʉsepʉ sãa dutiahca yʉhʉre”,
ni tʉhotuha tiro.
5 Ã ni tʉhoturo tiro jipihtina to pʉhtorore wapamoinare pjirocaha.
Pjiroca tuhsʉ,
cohtaha.
à cohtaro wihi mʉhtarirore õ sehe ni sinituha tiro:
“¿Yʉ pʉhtorore noho puro wapamojari mʉhʉ?”
niha tiro.
6 To ã nichʉ wapamoriro sehe õ sehe ni yʉhtiha:
“Cien tambores sere olivo dicha mehne ti yoari sere wapamoja tirore”,
ni yʉhtiha tiro.
To ã ni yahuchʉ niñeru ñʉ wihboriro sehe õ sehe ni yahuha:
“Õi jira mʉ wapamonore joa õri pũ.
Dujiga.
à jicʉ mʉ wapamonore dacho macai na,
dacho macai joa cahnoga”,
niha ñʉ wihboriro wapamorirore.
7 Ã ni tuhsʉ pairo wapamorirore sinituha tiro:
“¿Mʉhʉ waro,
noho puro wapamojari?”
niha tjoa.
“Cien waju trigo yapari wajure wapamoja yʉhʉ”,
niha wapamoriro niñerure ñʉ wihborirore.
“Õi jira mʉ wapamonore joa õri pũ.
Mʉ wapamonore ochenta joa cahnoga”,
niha ñʉ wihboriro.
8 To ã noano mahño mihnichʉ ñʉno “Ahriro mahñoriro noano masiriro jica”,
ni tʉhotuha to pʉhtoro niñerure ñʉ wihborirore.
Ahri dacho macaina,
Cohamacʉre cahmaeraina ti yare cahnorire ti niñeru ti ñʉ wihborire Cohamacʉ yaina yʉhdoro masica tina —niha Jesu.
9 Ã ni tuhsʉ Jesu õ sehe ni yahu namoha:
—Ahri quitire ã ni yahucʉ,
mʉsare õ sehe niita nija.
Mʉsa cjʉaare,
pjacʉoinare mʉsa wachʉ,
tina sehe mʉsare cahĩahca.
Mʉsa ã yoachʉ mʉsa cjʉaa pihtiari baharo mʉsa mʉanopʉ sʉchʉ mʉsare cahĩahca tópʉre.
10 ’Wiho jiina ya dahraare quihõno yoana,
pʉhtoa ya dahraa cʉ̃hʉre quihõno yoanahca.
Wiho jiina ya dahraare quihõno yoaerana,
pʉhtoa ya dahraa cʉ̃hʉre quihõno yoasi mʉsa.
11 Ã jina ahri yahpai mʉsa cjʉaa mehne mʉsa noano yoaerana Cohamacʉ mʉsare to yoa dutia cʉ̃hʉre noano yoasi mʉsa.
12 Ã jiro pairo yare mʉsa noano yoabasaerachʉ ñʉno mʉsa ya cjihtire wasi mʉsare.
13 ’Cʉ̃iro Cohamacʉ sehere wacũno,
tuabiaro niñeru sehere wacũerara.
Niñeru sehere tuabiaro wacũno Cohamacʉ sehere wacũerara.
Niñeru dihtare cahmariro jiro Cohamacʉre wahchechʉ yoaerara.
Cohamacʉ cʉ̃hʉre,
niñeru cʉ̃hʉre pʉarore cahma yʉhdʉrʉcahto basioerara mʉsare.
Niñerure cahma yʉhdʉariro Cohamacʉre noano ño payo masierara —niha Jesu.
14 To ã nichʉ tʉhoa fariseo curua macaina sehe tirore bʉjʉpeha.
Tina sehe niñerure cahĩha.
à jia bʉjʉpeha.
15 Ti bʉjʉpechʉ tʉhoro Jesu tinare õ sehe ni yahuha:
—Masa ti ñʉrocaroi mʉsa noano yoamana.
Mʉsa ã yoachʉ “Noaina,
quihõno yoaina jira”,
nimana masa mʉsare.
Cohamacʉ sehe mʉsa tʉhotuare masina.
Masa “Noa yʉhdʉara”,
ti nirire Cohamacʉ sehe soro ni tʉhotu,
tíre ñʉ yabira —niha Jesu.
Cohamacʉ to dutiare, pʉhtoro to sʉho jiare yahuha Jesu
16 Ã ni tuhsʉ õ sehe ni namoha Jesu:
—João masare bautisariro to jihto pano Moisere to cũri dutia mehne Cohamacʉ marine dutire.
Cohamacʉ yare yahu mʉhtaina cjiri ti joari cjiri mehne cʉ̃hʉre marine dutire.
Mipʉ sehere João to buhe dʉcari baharo noaa buheare,
Cohamacʉ masare pʉhtoro to noano sʉho jia cʉ̃hʉre masi dʉcara masa.
à masia masa ti mʉ sʉro ti tuaa mehne Cohamacʉ masare pʉhtoro to noano sʉho jirore sãa duamana.
17 ’Moisere to cũri dutiai Cohamacʉ to niriro seheta yoa pahñonohca tiro.
Cohamacʉ yare yahu mʉhtaina cjiri ti joari cjiripʉ cʉ̃hʉre to niriro seheta yoa pahñonohca tiro.
Mʉano cʉ̃hʉ ahri yahpa cʉ̃hʉ ti pihtia wahapachʉta Cohamacʉ to niriro seheta yoa pahñonohca —niha Jesu.
Namonore cohãare yahuha Jesu
18 Ã ni tuhsʉ õ sehe ni namoha Jesu:
—Masʉno to namonore cohãno,
pacorore namo tiro,
tiro ticoro mehne ñano yoaro nina.
Tuhsʉ,
masʉno pairo to cohãricorore namo tiro,
tiro cʉ̃hʉ ticoro mehne ñano yoaro nina —niha Jesu.
Pache pʉro cʉ̃hʉre, Lázaro cʉ̃hʉre to yahuri quitire buheha Jesu
19 Ã yoa paye quiti mehne piti dahre yahuha Jesu:
—Tí pjapʉre pache pʉro jiha.
To suhti sehe wapa bʉjʉbiaha.
Tuhsʉ,
dachoripe tiro noaa dihtare chʉro,
payʉ cjʉaha tiro.
20 Ã yoa tí pjare pairo pjacʉoriro,
Lázaro wama tiriro jia tiha.
Tiro to pjacʉ payʉ cami tiriro jiha.
To ã jiriro jichʉ paina sehe tirore pache pʉro ya wʉhʉpʉ na sʉha.
21 Ã jiro pjacʉoriro sehe pache pʉro to chʉri mesa docai yahpai dujiro to chʉ site boroare chʉmaha.
“To chʉ site boroare chʉcʉ yapicʉhca yʉhʉ”,
ni tʉhotumaha tiro.
à jia dieya to camine nehnea taa tiha.
22 Baharo pjacʉoriro to yariaa wahachʉ,
Abrahã cahapʉ paraíso wama tiropʉ anjoa tirore naa mʉjaha.
Pache pʉro cʉ̃hʉ to baharocãta yariaa wahaha.
To yariachʉ tirore yaha.
23 Ã yoa pache pʉrore tuaro pichaca jʉ̃ha.
To ã tuaro jʉ̃chʉ,
pichacapʉ jiro mʉanopʉ jirirore Abrahãre ñʉha.
Lázaro cʉ̃hʉre ñʉha.
24 Ñʉ tuhsʉ,
tiro Abrahãre pisurocaha:
“Coyeiro Abrahã,
pja ñʉga yʉhʉre.
Pichacapʉ yʉhʉ ñano yʉhdʉi nica.
Yʉ ã wahachʉ Lázarore yʉhʉre warocaga.
Tiro core to wamo picapʉ soha,
yʉ ñahmanore co mehne nehojaro.
Tóre yʉsʉojaro tiro”,
niha pache pʉro.
25 To ã nichʉ Abrahã tirore õ sehe ni yahuha:
“Coyeiro,
catiriro jicʉ jipihtiare mʉhʉ noaare cjʉahre.
Lázaro sehe dachoripe ñano yʉhdʉhre.
Mipʉ sehere mʉhʉ ñano yʉhdʉchʉ tiro sehe õpʉre wahchea mehne jinocahno nina.
26 Ã yoa mari watoi cʉãri copa jira.
à jia õre jiina tópʉre waha masierara.
Tuhsʉ tóre jiina õpʉ ta duaina ta masierara”,
niha Abrahã pache pʉrore.
27 To ã nichʉ pache pʉro õ sehe ni namoha:
“Coyeiro,
tuaro sinija mʉhʉre.
Lázarore yʉ pʉcʉ ya wʉhʉpʉ warocaga.
28 Yʉhʉ cʉ̃ wamomaca pihtiina bahana tija.
Lázaro tinare yahujaro.
Tina õre ñano yʉhdʉropʉre taea tjijaro”,
niha tiro.
29 To ã nichʉ Abrahã sehe õ sehe ni yʉhtiha:
“Cohamacʉ dutiare Moise marine to cũri cjirire,
Cohamacʉ yare yahu mʉhtaina ti joari cjirire cjʉara mʉ bahana.
à jia mʉ bahana tíreta tʉhojaro”,
niha Abrahã.
30 To ã nichʉ pache pʉro sehe yʉhtiha:
“Coyeiro Abrahã,
tíre cjʉapahta noano tʉhosi.
Lázaro yariariro masariro tina cahapʉ to sʉchʉ ñʉa tina sehe ti ñaare cahya,
noaare cohtotaahca.
à jia noaare yoaahca yʉ bahana sehe”,
niha pache pʉro cjiro.
31 To ã nichʉ Abrahã sehe õ sehe ni yahuha:
“Mʉ bahana Moise to cũri pũ to yahuare,
Cohamacʉ yare yahu mʉhtaina cjiri ti yahuare tʉhoeraina jira.
à jia Lázaro yariariro cjiro masariro to jipachʉta tina Cohamacʉre tʉho duasi”,
niha Abrahã —ni yahuha Jesu.