Oveja butiriro quitire yahuha Jesu
15
1 Ã yoa pa dachoi payʉ pʉhtoa yare wapa na cohtaina paina “Ñaare yoaina”,
ti niina mehne Jesure tʉhoa taha.
2 Ti ã yoachʉ ñʉa fariseo curua macaina,
judio masare buheina cʉ̃hʉ Jesure ñʉ tuhtia,
õ sehe niha ti basi:
—Ahriro ñainare piti tira.
à jiriro jirota tina mehne chʉra —ni durucuha tina ti basi.
3 Ti ã ni durucuchʉ Jesu to tʉhotua mehne õ sehe ni piti dahre buheha tinare:
4 —¿Cien oveja pʉro cʉ̃iro oveja butichʉ ñʉno dohse yoarohcari tiro?
Õ sehe yoarohca.
Tiro noventa y nueve ovejare ti chʉri campopʉ cũ,
butirirore macano waharohca.
Ovejare bocaropʉ duhurohca.
5 Tirore bocaro wahcherohca.
à jiro to comapariaca buipʉ tirore cjã payo,
to wʉhʉpʉ na tjuaa waharohca.
6 Na tju sʉ,
to cahai jiinare,
to coyeare pji cahmachunohca.
“Yʉ oveja butirirore boca tuhsʉhi.
à jina yʉhʉ mehne wahchega”,
ninohca tiro tinare.
7 Potocã niita nija mʉsare.
Noventa y nueve oveja payʉ ti jiriro seheta,
payʉ masa õ sehe ni tʉhotura:
“Ñano yoaeraja.
à jicʉ yʉ ñaare cahya,
yʉ tʉhotumari cjirire tʉhotu cohtotasi yʉhʉ”,
ni tʉhotura payʉ masa.
Ti ã ni tʉhotuchʉ ñʉa mʉano macaina Cohamacʉ cahai jiina wahcherara.
Pairo sehere wahchera.
Butiriro oveja cʉ̃irota to butiriro seheta to pʉro tirore to bocariro seheta cʉ̃iro ñariro to ñaare cahyachʉ,
“Ñano yoaeraja”,
ni to tʉhotumari cjirire tʉhotu to cohtotachʉ,
Cohamacʉre to cahmachʉ ñʉa,
Cohamacʉ cahai jiina tuaro wahchera —niha Jesu.
Niñeru tʉ butiri quitire yahuha Jesu
8 Ã ni yahu tuhsʉ,
paye quiti mehne piti dahre yahu namoha tjoa:
—¿Diez niñeru tʉri cjʉaricoro cʉ̃ tʉ butichʉ ñʉno dohse yoarohcari ticoro?
Õ sehe yoarohca ticoro.
Sihãriare sihã,
wʉhʉre coha,
noano maca pahñonohca.
Tí tʉre bocaropʉ duhurohca.
9 Tí tʉre boca tuhsʉ,
to cahai jiinare,
to coyeare pji cahmachunohca.
“Niñeru tʉ ya tʉ yʉhʉre butiri tʉre bocahi.
à jina yʉhʉ mehne wahchega”,
ninohca ticoro.
10 Potocã niita nija mʉsare.
Tó seheta cʉ̃iro ñariro to ñaare cahyachʉ,
“Ñano yoaeraja”,
ni to tʉhotumari cjirire tʉhotu to cohtotachʉ Cohamacʉre to cahmachʉ Cohamacʉ yaina anjoa sehe tuaro wahcheahca —niha Jesu.
To macʉno butiri quitire yahuha Jesu
11 Ã ni yahu tuhsʉ Jesu paye quiti mehne piti dahre yahu namoha tjoa:
—Bʉcʉro pohna pʉaro mʉa jiha.
12 Dʉhsariro sehe õ sehe niha to pʉcʉrore:
“Mai,
mʉ yariari baharo yʉhʉre mʉ wahtire yʉhʉre wa bahrañoga”,
niha tiro to pʉcʉrore.
To ã nichʉ ti pʉcʉro pʉaropʉreta to pohnare witira to cjʉari cjirire.
13 Mahaa dachoricã baharo dʉhsariro to yare jipihtiare na,
yoaropʉ pa yahpapʉ wahaa wahaha.
Tópʉ sʉro tʉho masierariro seheta yoa,
to niñerure to yare yoa site pahñonocaha.
14 To yoa site pahñori baharo tí yahpapʉre ne chʉa marieni pja ji dʉcaha.
à jiro tiro jʉca baaha.
15 Ã jiro tí yahpa macaa dahraare macaha.
To bocachʉ to pʉhtoro yesea cohtariro sõha tirore.
16 Ã jiro tiro yeseare nu,
ti chʉare chʉ duamaha.
To ã chʉ duapachʉta tí chʉare tó macaina waeraha tirore.
17 Ã yoa tirore tói wacũa taha jʉna.
“Yʉ pʉcʉre dahra cohtaina sehe bʉjʉa chʉare chʉca.
Ti chʉ dʉhaa cʉ̃hʉ bʉjʉa dʉhsaca.
Ti ã noano yʉhdʉro watoi yʉhʉ sehe õi jicʉ,
jʉca yariai nija.
18 Mipʉre yʉ pʉcʉ cahapʉ tjuaihtja.
Yʉ pʉcʉ cahapʉ sʉcʉ õ sehe niihtja tirore:
‘Mai,
Cohamacʉre ñano yoahi.
Mʉhʉ cʉ̃hʉre ñano yoahti.
19 Ñariro jija.
Mʉ macʉ jiboriro jieraja yʉhʉ.
Mʉhʉre dahra cohtaina seheta yoaga yʉhʉre’,
niihtja yʉ pʉcʉre”,
ni tʉhotuha tiro.
20 Ã ni tʉhoturota wahcãrʉca,
to pʉcʉro cahapʉ tjuaa wahaha.
Tópʉ to sʉriro tjua tachʉ to pʉcʉro sehe yoaropʉta to macʉnore ñʉha.
’To ã wihichʉ ñʉno to macʉnore pja ñʉha.
à pja ñʉno to cahai mʉroca wahcã tirore cjã suhsu mʉa,
to wahsupui wihmiha to pʉcʉro to macʉnore.
21 “Mai,
Cohamacʉre ñano yoahi.
Mʉhʉ cʉ̃hʉre ñano yoahti.
Ñariro jija yʉhʉ.
Mʉ macʉ jiboriro jieraja yʉhʉ”,
niha tiro to pʉcʉrore.
22 To ã nichʉ tʉhoro to pʉcʉro sehe dahra cohtainare pjiha:
“Cjero,
noa yʉhdʉri suhtirore na tahga.
à jina yʉ macʉre sãaga.
Sãa tuhsʉ,
to wamomaca sãari sorore sãa,
to dahporire dahpo suhti cʉ̃hʉre sãaga.
23 Sãa tuhsʉ,
dihi tirirocã wachʉcãre wajãga.
Bose nʉmʉ yoajihna.
24 Ahriro yʉ macʉ yariariro seheta wahare.
à wahaparota mipʉre catira tiro.
To butiboriro seheta jirirore mipʉre bocahi.
à jina bose nʉmʉ yoajihna”,
niha to pʉcʉro.
To ã niri baharo bose nʉmʉ dahre dʉcaha tina.
25 ’Tí pjare to wahmino sehe wesepʉ jiha.
Wesepʉ jiriro coha tjua taro wʉhʉ cahai sʉro,
ti basaare tʉhorocaha tiro.
26 Ã tʉhorocaro,
cʉ̃iro dahra cohtarirore pjiroca,
tirore sinitu ñʉha tiro:
“¿Dohse yoa basaa niri?”
ni sinitu ñʉha tiro dahra cohtarirore.
27 “Mʉ bahʉ tju wihihre.
Tiro noariro,
catiriro to tju wihichʉ mʉ pʉcʉ dihi tiriro wachʉcãre wajã dutihre”,
ni yʉhtiha dahra cohtariro.
28 To ã ni yahuchʉ to wahmino sehe tuaro suaro,
wʉhʉpʉ sãa taeraha.
To sãa taerachʉ ñʉno to pʉcʉro sopacapʉ wijaa ta,
“Sãa taga” ni,
tuaro pjimaha to macʉnore.
29 “Tʉhoga,
Mai.
Yoari pja mʉhʉre dahra cohtariro seheta mʉhʉre yoadohomahi.
à jicʉ mʉ dutiare ne cʉ̃ taha yʉhdʉrʉcaera tihi.
Yʉ mʉhʉre dahra cohtapachʉta yʉhʉre ne waerare mʉhʉ.
Ne cʉ̃iro wahiquirocãre ne waera tire mʉhʉ yʉhʉre yʉ piti tiina mehne yʉ bose nʉmʉ dahrehti cjihtire.
30 Wiho mejeta ahriro mʉ macʉ sehe ñaina numia mehne mʉ yare yoa site pahñoyuhti.
Tíre yoa site pahño tuhsʉ,
tiro wʉhʉpʉ to tju wihichʉ dihi tirirocãre wachʉcãre wajã dutiyuhti mʉhʉ to chʉhtiro cjihtore”,
niha to wahmino to pʉcʉrore.
31 “Macʉ,
yʉhʉ mehne jipihtia dachoripe mʉ jichʉ jipihtia ya mʉ ya cʉ̃hʉ jira.
32 Mʉ bahʉ sehe yariariro seheta wahare marine.
à yoa mipʉre tiro catiriro jira.
Tiro butiboriro seheta jire.
To ã wahari baharo mipʉre tirore bocahi.
à jina to tju wihichʉ mari bose nʉmʉ yoa wahchechʉ noana”,
niha tiro to macʉnore —niha Jesu tinare.