Numia Jesure yoadohoha
8
1 Baharo bʉjʉa macaripʉ daa macaricãpʉ cʉ̃hʉre sʉ,
Cohamacʉ masare pʉhtoro to noano sʉho jiare noaa buheare yahuha Jesu.
Doce to buheina sehe tiro mehne jiha.
2 Ã yoa numia cʉ̃hʉ watĩa ti cohtotari numia cjiri,
dohatia numia cjiri Jesu noaa numia to yoari numia tiro mehne tiniha.
“María”,
ti nimaricorore “Magdalena”,
ni pisua tiha ticorore.
Ticorore siete watĩare Jesu cohã wioha tó pano.
à jiro ticoro cʉ̃hʉ Jesu mehne tiniha.
3 Cuza wama tiriro Herodere dahra cohtaina pʉhtoro cjiro namono Juana cʉ̃hʉ Jesu mehne tiniha.
Susana wama tiricoro cʉ̃hʉ paye numia mehne payʉ ti cjʉaa mehne tirore yoadohoha.
Jesu wesere toari masʉno quitire yahuha
4 Ã yoa payʉ macari macaina Jesu cahapʉ cahmachuha.
Ti ã cahmachuri baharo Jesu to tʉhotua mehne quiti dahre tinare õ sehe ni yahuha buhero taro:
5 —Toari masʉno toaro,
to toaa yaparire doca site cũno wahaha.
To ã doca site cũ wahcãchʉ paye yapari mahai bora caha sʉha.
Ti ã bora caha sʉchʉ paye yaparire masa tʉ diho cũha.
à jia paye yaparire minichahca duji ta,
chʉnocaha.
6 Ã yoa paye yapari sehe tãa wapa bui dihta se mininocã bui bora caha sʉha.
Tí yahpapʉ co mariaha.
à jia tí yapari du wija tarucuma ñaia wahaha.
7 Paye yapari sehe tja watoi bora caha sʉha.
Tja sehe tí toaa mehne duha.
Tja sehe dia yʉhdʉa waha,
toaare wajãnocaha.
8 Paye yapari noari yahpai bora caha sʉha.
Noano dua jia noano dicha tiha.
à jia payʉ dicha tiha —niha Jesu.
à ni tuhsʉ õ sehe tuaro ni namoha:
—Ahrire tʉho duaina noano tʉhoga mʉsa —niha tiro.
Jesu quiti mehne to buherire yahuha
9 Baharo to buheina tí quitire masi duaa,
Jesure õ sehe ni sinituha:
—¿Ahri quiti mehne dohse ni yahui nijari mʉhʉ?
—ni sinituha tina.
10 Ti ã nichʉ Jesu õ sehe ni yʉhtiha:
—Cohamacʉ masa bui pʉhtoro to noano sʉho jiare panopʉ paina ti masierari cjirire mʉsare masichʉ yoarohca Cohamacʉ.
Paina sehere ã yoaerara tiro.
Tinare quiti mehneta buheihtja.
Yʉ ã yoachʉ tina yʉ buheare tʉhopahta masisi —niha Jesu to buheinare.
Jesu wesere toari masʉno quitire yahu pahñoha
11 Ã ni tuhsʉ tinare õ sehe ni yahu namoha:
—Õ sehe ni yahura ahri quiti:
Toaa yapari noaa buhea yoaro sehe jira.
12 Ã yoa maha dʉhtʉ cahai boraa yapari sehe noaa buhea yoaro sehe jira.
Cãina masa noaa buheare ti tʉhochʉ ñʉno watĩno sehe ta,
tí buheare masi dutierara masare,
minichahca tí yaparire ti chʉ cohãno seheta yoaro.
To ã yoaerachʉ tina Cohamacʉre wacũ tuaboa.
Ti ã wacũ tuachʉ ñʉno Cohamacʉ sehe tinare pichacapʉ wahaborinare yʉhdoboa.
13 Ã yoa tãa wapa bui dihta se mininocã bui boraa yapari noaa buhea yoaro sehe jira.
à jia masa noaa buheare tʉho,
wahchea mehne tíre tʉho nʉnʉ wahcãna.
à tʉho nʉnʉpahta tãa wapa buicã jia yucʉ nʉhcori mariea yucʉ yoaro seheta ahrina masa cʉ̃hʉ yoari pja cʉ̃no pjaerara.
à cʉ̃no pjaeraa yʉ yare ti cahmari buhiri paina tinare ti ñano yoachʉ ñʉa yʉ yare duhunocahna.
14 Ã yoa tja watoi boraa yapari noaa buhea yoaro sehe jira.
à jia masa noaa buheare tʉhopahta,
ahri yahpa macaare wacũ nʉnʉ yʉhdʉara.
Niñerure bʉjʉa cahma,
paye baro cʉ̃hʉre payʉ cahma,
tíre goa pja yʉhdʉara tina.
Ti ã yoachʉ tí sehe noaa buheare dʉcatara.
Ti ã dʉcatachʉ masa noaa sehere yoaerara.
Dicha maria yucʉ yoaro seheta jira.
15 Ã yoa noari yahpai boraa yapari noaa buhea yoaro sehe jira.
à jia masa noaa buheare tʉhoa,
noano mehne tí buheare yʉhdʉrʉcaerara.
à jia yucʉcʉ dicha tiro seheta noaa buheare tʉhoina sehe Cohamacʉ to cahmano seheta noaare yoara —niha Jesu.
Jesu sihãria quitire buheha
16 Ã ni tuhsʉ paye quiti mehne piti dahre buheha tiro:
—Ne sihãriare ti sihãri baharo tiare dihi biato docai cũerara masa.
à yoa tiare coãri casario docai cũerara.
Mʉanopʉ tiare duhu payora wʉhʉpʉ sãa taina ti noano ñʉ sãahto sehe.
17 Jipihti ti masierari cjirire baharo masa masiahca.
Sihãria to buhriachʉ mari ñʉ masino seheta panopʉ ti masierari cjirire masiahca masa.
18 ’Ã jina mʉsa tʉhona noano tʉho nʉnʉga.
Noano tʉho nʉnʉriro,
noano masinohca.
Tʉho nʉnʉerariro “Mahanocã tʉhoja”,
to nipachʉta tí sehere boa waharohca —niha Jesu.
Jesu coyea tirore pjiha
19 Baharo Jesu bahana ti pocoro mehne tiro cahapʉ wahaa nimaha.
Masa payʉ jichʉ to cahapʉ sʉeraha.
20 Ã jiro cʉ̃iro Jesure õ sehe ni yahuha:
—Mʉ poco mʉ bahana mehne sopacapʉ ducuhre.
Mʉhʉre ñʉa taa niyuhti —niha tiro Jesure.
21 To ã nichʉ Jesu õ sehe ni yahuha jipihtinare:
—Cohamacʉ ya buheare tʉhoina,
tíre yʉhdʉrʉcaeraina tinata yʉ poco yʉ bahana yoaro sehe jira —niha Jesu tinare.
Jesu wihnonore yʉsʉ dutiha
22 Pa dachoi Jesu to buheina mehne dohoriapʉ samu:
—Basa,
pahãjihna —ni,
tina jipihtina tia mehne bʉcʉpariropʉ pahãa wahaha.
23 Ã pahãno carĩa wahaha Jesu.
Ti ã pahãrucuchʉ waro tuaro wihnono taha.
Wihnono to tachʉ bʉjʉa pahcõri wahcã,
tinare mionocamaha.
à to wahachʉ minihto cua yʉhdʉaha tinare.
24 Ã wahachʉ ñʉa Jesu cahai waha,
tirore wahcõha.
—Buheriro,
mari mini yariana tana nijã —niha tina.
Ti ã nichʉ Jesu sehe wahcã,
wihnonore “Tó purota wã duhuga”,
niha.
à ninota pahcõri cʉ̃hʉre “Yʉsʉa wahaga”,
niha.
To ã nichʉta wihnono yʉhdʉa wahaha.
à yoa pahcõri cʉ̃hʉ yʉsʉ boraa wahaha.
25 Ã wahari baharo Jesu tinare õ sehe niha:
—¿Mʉsa yʉhʉre wacũ tuaerasinijari?
—niha tiro.
To ã nichʉ tina sehe cui,
cʉaa waha,
ti basi õ sehe ni durucuha:
—Cue,
¿dohse jiriro baro masʉno jijari ahriro?
Ahri wihnono,
pahcõri cʉ̃hʉ to dutichʉ yʉhdʉrʉcaerara tirore —niha tina ti basi.
Watĩa ti cohtotarirore noariro wahachʉ yoaha Jesu
26 Ã yoa tina sie coapʉ Gerasa macaina ya yahpapʉ pahã sʉha.
Tí yahpa Galilea yahpa potoihta jiha.
27 Tói Jesu to maja sʉrʉcʉ sʉchʉ waro tó macariro watĩa ti cohtotariro tiro cahapʉ taha.
Tiro yoari pja suhti marieriro jiro,
to wʉhʉpʉre ne jieraha.
à yoa masa copari tãa copari watoi jia tiha tiro.
28,29 Ã jia payʉ tahari watĩa tirore ñahaha.
à jiro tiro peresui to jichʉ to wamomacarine dahporire comaa dari mehne dʉhteriro jiparota,
tiro tí darire nuha mʉjaha.
à yoa watĩa sehe tirore masa marienopʉ na wahcãa tiha.
à yoa tiro Jesure ñʉroca õ tuaro sañurucu,
Jesu panoi na tuhcua caha sʉha.
To ã yoachʉ ñʉno Jesu sehe tirore õ sehe ni dutiha:
—Watĩa,
duhuga ahrirore —niha Jesu.
To ã nichʉ tʉhoro watĩa ti cohtotariro tuaro sañurucu,
õ sehe ni sinituha Jesure:
—Jesu,
¿Cohamacʉ Jipihtina Bui Jiriro macʉno yabare yoai tai nijari mʉhʉ yʉhʉre?
Yʉhʉre,
ñano yoai tjiga —niha watĩa ti cohtotariro.
30 To ã nichʉ Jesu sehe õ sehe ni sinituha tirore:
—¿Yabariro wama tijari mʉhʉ?
—niha.
Payʉ watĩa tiro mehne jiha.
à jiro õ sehe niha watĩa ti cohtotariro:
—Watĩa payʉ wama tija sã —ni yʉhtiha watĩa ti cohtotariro tiro.
31 —Cʉãri copapʉ sãre waha dutiecʉ tjiga —ni,
tuaro siniha watĩa sehe.
32 Tí pjare tói tʉ̃cʉ dahpotoi yesea payʉ chʉa niha.
Ti tói chʉchʉ ñʉa watĩa õ sehe ni siniha Jesure:
—Sina yesea cahapʉ warocaga sãre ti pjacʉripʉ sã sãahto sehe —ni siniha watĩa.
Ti ã sinichʉ tʉhoro “Jai.
Wahaga”,
niha Jesu.
33 To ã dutichʉ,
watĩa masʉno mehne jirina cjiri sehe wahaa,
yesea pjacʉripʉ sãa wahaha.
à yoa tinare ti sãari baharo,
yesea jipihtina bʉcʉpariro dʉhtʉ cahapʉ pari cʉnʉpʉ mʉroca buha,
tí taropʉ bora ñoja,
mini yaria pihtia wahaha.
34 Yeseare ñʉ wihboina yesea ti ã minichʉ ñʉa,
cui,
mʉrocaa wahaha.
à mʉroca wahcã pjiri macapʉ cʉ̃hʉre,
daa macaricãpʉ cʉ̃hʉre tíre ti ñʉrire yahu sitea wahaha.
35 Ti ã yahuchʉ tʉhoa,
masa sehe payʉ ti ã waharire ñʉa wahaha.
à jia Jesu cahai sʉ,
watĩa ti cohtotariro cjirore to suhti tiriro,
tʉho masiriro to dujichʉ ñʉha tina.
Tí jipihtiare ñʉa,
tina cui niha.
36 Watĩa ti cohtotariro cjiro noariro to waharire ñʉina,
ti ñʉrire painare noano yahu pahñoha.
37 Tí pjata Gerasa yahpa macaina payʉ Jesure tuaro cuia,
tirore pa sehepʉ waha dutiha.
Ti ã waha dutichʉ Jesu dohoriapʉ samu,
waharo taro niha.
38 Watĩa ti cohtotariro cjiro Jesu to wahahto pano tuaro siniha tirore:
—Mʉhʉ mehne waha duaja —ni sinimaha.
39 To ã nichʉta Jesu tirore õ sehe ni yʉhtiha:
—Mʉ ya macapʉ wahaga.
à wahacʉ Cohamacʉ mʉhʉre to yoarire yahuga painare —niha Jesu.
To ã niri baharo waha to ya macapʉ sʉro watĩa ti cohtotariro cjiro sehe Jesu tirore to yoarire jipihtina to ya maca macainare yahuha.
Jairo maconore yʉhdʉchʉ yoa, cahã ñʉricoro cʉ̃hʉre yʉhdʉchʉ yoaha Jesu
40 Pari turi Jesu tí bʉcʉpariropʉ pahãa wahaha tjoa.
To pahã tariropʉta masa payʉ tirore cohtaa niha.
à cohtaa,
tirore piti bocasiniha wahchea mehne.
41,42 Tói judio masa buheri wʉhʉ pʉhtoro Jairo wama tiriro Jesu cahai sʉ,
to dahpori cahai na tuhcua caha sʉha tirore ño payoro.
To macono yariaro niha.
Ticoro cʉ̃corota jiricoro doce cʉhmari cjʉaricoro jiha.
à jiro tiro to ya wʉhʉpʉ Jesure pji wahcãha.
“Jai” ni,
tiro mehne wahaha Jesu cʉ̃hʉ.
Mahai ti ã wahachʉ payʉbia masa tirore nʉnʉ ti wahcã,
bihsaro sʉrʉcʉ sʉha tirore.
43 To ã bihsaro wahachʉ numino doce cʉhmari waro ã cahã ñʉrucuricoro tói jiha.
Tó pano duhturuare jipihtia to niñeru mehne wapamaha ticoro co wa dutiro.
Ti ã co wapachʉta mʉnanota jirucunocaha ticoro.
44 Ã jiro ticoro Jesu baharo masa payʉ watoi wihi,
Jesu suhtirore to ñaha ñʉchʉta to cahã ñʉa pihtia wahaha.
45 To ã ñaha ñʉchʉ tʉhoturo Jesu õ sehe ni sinituha:
—¿Noa yʉ suhtirore ñaha ñʉri?
—niha tiro.
Jipihtina “Yoaerahi”,
niha.
à jia Pedro cʉ̃hʉ õ sehe niha:
—Buheriro,
bihsa nina.
à jia masa payʉ mʉhʉre pihanocahna.
¿Dohseacʉ ã ni sinitujari mʉhʉ?
—niha tina Jesure.
46 Ti ã nichʉ Jesu õ sehe ni yʉhtiha:
—Michapucacã yʉhʉ noaricoro wahachʉ yoahi cʉ̃corore.
à jicʉ yʉhʉre to ñaha ñʉchʉ masija —niha tiro.
47 To ã nichʉ tʉhoro ticoro duhti masieraro,
teterericoro Jesu cahai na tuhcua caha sʉha tirore ño payoro.
à jiro jipihtina masa ti tʉhoroi to dohatiare,
Jesure to ñaha ñʉrire to noaricoro to waharire yahuha ticoro.
48 To ã ni yahu tuhsʉchʉ Jesu ticorore õ sehe ni yahuha:
—Maco,
yʉhʉre mʉ wacũ tuaa mehne noaricoro tjuara mipʉre.
Wahchea mehne wahaga —niha ticorore.
49 To ã nino watoi Jairo ya wʉhʉi jiriro yahuro wihiha:
—Mʉ macocã yariaa wahahre.
à jicʉ buherirore pji tai tjiga —niha tiro.
50 To ã nichʉ tʉhoro,
Jairore õ sehe ni yahuha Jesu:
—Cahya tʉhotui tjiga.
Yʉhʉre wacũ tuaga.
Tí dihtare yoaga.
Mʉ ã yoachʉ ticorocã masaa waharohca —niha Jesu.
51 Ã ni tuhsʉ to wʉhʉpʉ sʉ,
Pedro,
João,
Santiago,
dohatiricoro pʉcʉsʉma tópeinata na sãaha.
Paina sehere Jesu sãa dutieraha.
52 Tói jipihtina masa ti ñahacaha tiiro watoi sãa sʉha Jesu.
—Tiiena tjiga.
Ticorocã yariaerare.
Carĩno nica —niha tiro.
53 To ã nichʉ tʉhoa tina sehe ticoro yariaricoro to jichʉ masia,
Jesure bʉjʉha.
“Ã nimacanocano nina”,
ni bʉjʉha.
54 Ã yoa Jesu ticorocã wamomacare ñaha,
õ sehe ni pisuha:
—Maharicorocã wahcãga —niha.
55 To ã nichʉta yariaricoro masaa waha,
tí pjata wahcãrʉcʉ sʉha ticorocã.
To wahcãri baharo Jesu ticorore chʉare wa dutiha.
56 To ã masachʉ ñʉa to pʉcʉsʉma ñʉ cʉaa wahaha.
à jiro Jesu tíre painare yahu dutieraha.