Surara pʉhtoro cahamacʉnore to dohatichʉ Jesu noariro wahachʉ yoaha tirore
7
1 Tí quitire masare yahu tuhsʉ Jesu cʉ̃hʉ Capernaupʉ sʉha.
2 Tói jiriro cien surara pʉhtoro to cahamacʉnore tuaro cahĩha.
To cahamacʉno sehe dohatiriro jiro,
yariaro cahariro jimaha.
3 Ã jiro Jesu to yoaare tʉhoro,
judio masa bʉcʉnare Jesu cahapʉ warocaha pʉhtoro sehe.
—Dohatirirore noariro wahachʉ yoai taga —ni yahu dutiro warocaha pʉhtoro bʉcʉnare.
4 Tina Jesu cahapʉ sʉa,
õ sehe ni tuaro mehne yahuha tirore:
—Surara pʉhtoro sãre warocahre.
To cahamacʉnore dohatirirore to yʉhdʉchʉ cahmahre tiro.
Tiro pʉhtoro sehe noariro jira.
To ã jichʉ yoadohoga tirore.
5 Mari ya maca macainare tiro cahĩna.
à jiro tiro sã buheri wʉhʉre ti yoari wapa wapare —niha bʉcʉna Jesure.
6 Ti ã ni yahuchʉ tʉhoro Jesu sehe tina mehne wahaha.
Surara pʉhtoro ya wʉhʉ cahacãi to sʉro cahachʉ pʉhtoro sehe tiro mehne macainare Jesure õ sehe ni yahu dutiro warocaha:
—Pʉhtoro,
noanohca.
Tai tjiga.
Noariro jieraja yʉhʉ.
Ya wʉhʉi mʉhʉre sãa ta dutiboriro jieraja yʉhʉ.
7 Ã jicʉ mʉ cahai wahaeraja.
Yʉ ã jipachʉta mʉ masia mehne noariro wahachʉ yoaga mʉhʉ tirore.
Mʉ ã yoachʉ yʉ cahamacʉno noariro waharohca.
8 Yʉhʉre yʉ bui jiina paina pʉhtoa dutira.
à jicʉ yʉhʉ cʉ̃hʉ surarare dutija.
Cʉ̃irore “Wahaga”,
yʉ nichʉ tiro wahara.
Pairore “Taga”,
yʉ nichʉ tiro tara.
Yʉ cahamacʉnore “Ahrire yoaga”,
yʉ nichʉ tíre tiro yoara.
(Mʉhʉ cʉ̃hʉ dutirirota jira.
à jiro mʉ dutiriro seheta tiro dohatiriro yʉhdʉrohca) —ni yahu dutiha surara pʉhtoro.
9 To ã nichʉ tʉho cʉaa waharo,
payʉ masa tiro mehne jiinare majarerʉcʉ sʉ,
õ sehe ni yahuha:
—Mʉsare niita nija.
Tiro surara pʉhtoro Israe masʉno jierariro Cohamacʉre tuaro wacũ tuara.
To cahamacʉnore yʉ noariro wahachʉ yoahtire masi tuhsʉra.
Israe masare ne ahriro yoaro sehe jiinare ñʉerasinija —niha Jesu.
10 To ã niri baharo surara pʉhtoro Jesu cahai to warocarina sehe ti pʉhtoro ya wʉhʉpʉ tjuaa wahaha.
Tju sʉ dohatiriro to noariro jichʉ ñʉha tina.
Jesu wapewahyoro macʉnore masoha
11 To ã yoari baharocã Nai wama tiri macapʉ Jesu to buheina mehne payʉ masa mehne wahaha.
12 Tí macare sãari sopaca cahai to sʉchʉ yariarirore masa na wijaa taa niha.
Yariariro pocoro wapewahyoro jiha.
Cʉ̃irota jiriro yariaha.
à jia tó macaina masa payʉ ticoro mehne wahaha.
13 To ã wahachʉ ñʉno Jesu ticorore pja ñʉha.
—Tiieco tjiga —niha Jesu ticorore.
14 Ã nino yariariro to masa putihi ña payoha.
To ã ña payochʉ ñʉa tí putire wʉaina sehe sʉrʉcaha.
—Macʉ,
yʉhʉ mʉhʉre õ sehe nija.
Wahcã nuju sʉga —niha Jesu.
15 To ã niri baharo yariariro cjiro wahcã nuju sʉ,
durucuha.
à jiro Jesu tirore to pocorore waha.
16 To ã yoachʉ ñʉa tina jipihtina cuia wahaha.
à jia tina Cohamacʉre ño payoa,
õ sehe niha:
—Cohamacʉ yare yahu mʉhtariro masi yʉhdʉariro mipʉ pinihtare mari watoi jira —niha tina.
—Cohamacʉ marine to yainare yoadohoro wihi tuhsʉhre —niha paina.
17 Ã jia jipihtina Judea yahpa macainare tó dʉhtʉ cahai jia macari macainare Jesu to yoarire masa yahu site pahñoha.
João masare bautisariro to buheinare Jesure sinitu dutiha
18,19 Ã yoa Jesu to yoarire ñʉa Joãore yahuha to buheina.
à ti yahuchʉ tʉhoro pʉarore tiro cahai pjiroca,
Jesure sinitu dutiro warocaha João.
Õ sehe ni sinitu dutiha:
—¿João “Yʉ baharo pairo tarohca”,
to niriro tjijari mʉhʉ?
¿To niriro mʉ jierachʉ pairore cohtanahcari sã?
—ni sinitu dutiha João pʉaro to buheinare.
20 Ã yoa tina Jesu cahai sʉ,
sinituha tirore:
—João masare bautisariro mʉhʉre sinitu dutiro warocahre sãre.
¿João “Yʉ baharo pairo tarohca”,
to niriro tjijari mʉhʉ?
¿To niriro mʉ jierachʉ pairore cohtanahcari sã?
—ni sinituha tina Jesure.
21 Tí pjata payʉ dohatiinare,
watĩa ti cohtotainare,
capari ñʉerainare noaina wahachʉ yoaha Jesu.
22 Ã jiro João warocainare Jesu õ sehe ni yʉhtiha:
—Mipʉre mʉsa ñʉrire mʉsa tʉhorire Joãore yahuna wahaga:
Õ sehe niga:
“Capari ñʉeraina ñʉna.
Tini masieraina tinina.
Cami bʉcʉ baaina noaina wahara.
Tʉho bocaeraina tʉhoa wahara.
Yariaina masaa wahara.
Tina jipihtinare noaina wahachʉ yoahi yʉhʉ.
à yoa pjacʉoinare noaa buheare yahuja.
23 Yʉhʉre tʉhoriro ‘Potocã tjira’,
niriro tiro wahcheriro jira”,
Joãore ni yahuna wahaga —niha Jesu.
24 João buheina ti wahari baharo Jesu sehe João to jia tiare yahu dʉcaha payʉ masare:
—Masa marienopʉ sʉna tjare wihnono to wãroca cohtotachʉ yoariro seheta to buheare cohtota mʉjarirore ñʉna sʉerare mʉsa.
à yoariro jierare João.
25 “Noa suhti tirirore ñʉna wahajihna”,
nierare mʉsa masa marienopʉ wahana.
Noaa suhti tiina wapa bʉjʉare cjʉaina pʉhtoa ya wʉhʉsepʉ jira.
Masa marienopʉ jierara.
26 Masa marienopʉ sʉna Cohamacʉ yare yahu mʉhtarirore ñʉna sʉhre mʉsa.
Potocã tjira.
João Cohamacʉ yare yahu mʉhtariro jira.
Paina Cohamacʉ yare yahu mʉhtaina yʉhdoro jiriro jira tiro.
27 Panopʉ Cohamacʉ yare ti joari pũi Joãore õ sehe ni yahu joaa tiha:
“Mari Pʉcʉ to macʉnore õ sehe niha:
‘Mʉ pano mʉhʉre yahuyuhtirore warocai nija’,
niha Cohamacʉ”,
ni yahu joaa tiha panopʉre Joãore.
28 Mʉsare potocã niita nija.
Paina jipihtina bui jira João.
Ahri turupʉre to ã jipachʉta mʉanopʉre Cohamacʉ masare pʉhtoro to noano sʉho jiropʉre jipihtina docapʉ jiriro pinihta João bui jira —niha Jesu masare.
29 To ã nichʉ tʉhoa jipihtina masa,
pʉhtoa ya cjihtire wapa na cohtaina mehne João to bautisarina jia õ sehe ni tʉhotuha Cohamacʉre.
“Cohamacʉ quihõno yoariro jira”,
ni tʉhotuha tina.
30 Fariseo curua macaina sehe judio masare buheina cʉ̃hʉ João to bautisanohrina ji duaeraha.
à jia tinare Cohamacʉ to yaina to yoa duachʉ cahmaeraha.
31 Ã yoa Jesu pari turi õ sehe ni yahuha:
—¿Mipʉ macaina masa yabaina yoaro sehe jijari tina,
mʉsa tʉhotuchʉ?
32 Tina macanacã yoaro sehe jira.
Paina ti cahmano sehe ti yoaerachʉ tó wahaerara tinacãre.
Pache duaropʉ pape dujia,
õ sehe ni pisurucura tinacã ti basi:
“Mʉsa basahti cjihtire sã putipemahi.
¿Dohseana mʉsa basaerari sã tíre putipechʉ?
Sã tuaro ñahacaha tiipe,
sañurucumahi.
¿Mʉsa sehe dohseana sã mehne tiiperari?”
nirucuina yoaro seheta jira mipʉ macaina cʉ̃hʉ.
(Mipʉ macaina ti cahmano seheta sã yoaerachʉ ñʉa tó wahaerara tina cʉ̃hʉre.)
33 João bautisariro Cohamacʉre ño payoro taro ne chʉeraro,
vinore sihnierare.
To ã sihnierachʉ ñʉna “Watĩno to cohtotariro jira”,
nimahre mʉsa tirore.
34 Yʉhʉ masʉno Cohamacʉ warocariro jicʉ,
yʉhʉ chʉ sihnija.
Yʉ ã yoachʉ ñʉna õ sehe nina mʉsa yʉhʉ sehere.
“Ñʉga.
Ahriro pjíro chʉriro,
cahariro jira.
Pʉhtoa ya cjihtire wapa na cohtaina,
ñano yoaina cʉ̃hʉ ti piti tiriro jira ahriro”,
nina mʉsa yʉhʉre.
à nina macanacã yoaro sehe durucuina jira mʉsa.
(Mʉsa cahmano sehe sã yoaerachʉ tó wahaerara mʉsare.
Ne wahcherara mʉsa.)
35 Ã masierapanahta sã yoa ñorire ñʉna,
Cohamacʉ yare sã masichʉ masinahca mʉsa —ni yahuha Jesu.
Simo wama tiriro fariseo curua macariro ya wʉhʉi jiha Jesu
36 Fariseo curua macariro to wʉhʉpʉ chʉ dutiro pjiha Jesure.
To ã pjichʉ Jesu to ya wʉhʉpʉ sʉ,
ti chʉri mesa cahai nuju sʉha.
37,38 Tí macapʉre ñaare ñaare yoarucuricoro cjiro jiha.
Jesu fariseo curua macariro ya wʉhʉpʉ to dujichʉ ticoro tʉhoha.
à tʉho tuhsʉ alabastro mehne yoariare me sitia posa tiriare na ta,
Jesu baharo bʉhʉsehei wihi tarʉca,
tiiha.
à tiiro Jesu dahporire to yahco co mehne wayo,
to pjoari mehne pahã cohãha.
To dahpori wʉachʉ ñʉ ticoro to dahporire wihmi,
me sitia mehne pio payoha.
39 To ã yoachʉ ñʉno fariseo curua macariro Jesure pjiriro to basi õ sehe ni tʉhotumaha:
“Ahricoro tirore ñaha ñʉricoro ñaare yoarucuricoro jira.
Ahriro Jesu Cohamacʉ yare yahu mʉhtariro jiro tíre masiboa”,
ni tʉhotumaha.
40 To ã ni tʉhotuare masino Jesu õ sehe ni yahuha tirore:
—Simo mipʉ pinihtare mʉhʉre yahu duaja —niha Jesu.
—Buheriro,
¿yʉhʉre dohse ni yahu duajari mʉhʉ?
—ni yʉhtiha Simo.
41 To ã nichʉ Jesu õ sehe ni piti dahre buhe yʉhtiha:
—Pʉhtorore pʉaro wapamoina jiha.
Cʉ̃iro wapamoriro quinientos niñeru tʉrire wapamoha.
Pairo sehe cincuenta niñeru tʉrire wapamoha.
42 Ã jia tina ti wapamoare ti wapa bihoerachʉ ñʉno pʉhtoro ti wapamoare wapa dutieraha.
¿Mipʉ pinihtare diro sehe wapamoriro sehe to pʉhtorore cahĩ yʉhdʉrohcari?
—ni sinituha Jesu.
43 Simo õ sehe ni yʉhtiha:
—Bʉah,
pjíro wapamoriro mahanocã wapamoriro yʉhdoro to pʉhtorore cahĩ yʉhdʉboca —niha Simo.
—Potocã ni yʉhtihre mʉhʉ yʉhʉre —niha Jesu.
44 Ã ni tuhsʉ tirore pio payoricorore majare ñʉ,
Jesu Simore õ sehe ni yahu namoha:
—Ahricorore ñʉga mʉhʉ.
Mʉ ya wʉhʉpʉ yʉ sãa wihiri baharo yʉ dahporire cosahti core yʉhʉre waerare mʉhʉ.
Ahricoro sehe to yahco co mehne yʉ dahporire wayo,
to pjoari mehne pahã cohãhre yʉhʉre.
45 Mʉhʉ sehe yʉhʉre piti boca wihmierare.
Ahricoro sehe õi yʉ dujiro puro yʉ dahporire wihmihre.
46 Mʉhʉ sehe yʉ dapure se mehne pio payoerare.
Ticoro sehe yʉ dahporire me sitia mehne pio payohre.
47 Ã nicʉ mʉhʉreta yahui nija.
Ahricoro to ñaa yoari cjiri payʉbia jira.
à jiricoro jiparota ticoro tuaro cahĩhre yʉhʉre.
à jicʉ ñaare to yoari buhirire cohãhi.
à jia ñaare ti yoari buhirire mahanocã yʉ cohãnohrina mahanocã cahĩna yʉhʉre —niha Jesu Simore.
48 Ã ni tuhsʉ tiro ticorore õ sehe ni yahuha:
—Mipʉ pinihtare ñaare mʉ yoari buhirire boja —niha Jesu.
49 To ã nichʉ tʉhoa Jesu mehne dujiina ti basi õ sehe ni durucuha:
—¿Dohse jiriro baro jijari ahriro ñaa buhirire boriro?
—niha tina ti basi.
50 Ã ni tuhsʉ,
Jesu numinore õ sehe ni yahuha:
—Yʉhʉre mʉ wacũ tuachʉ mʉhʉre pichacapʉ wahaboricorore yʉhdoja.
Cuiro marieno mʉ wʉhʉpʉ tjuaa wahaga —niha Jesu ticorore.