Jesu to buheinare payʉ wahire bocachʉ yoaha
5
1 Pa nʉmʉ Jesu Genesare wama tiri bʉcʉpariro dʉhtʉ cahapʉ sʉha.
Tói to jichʉ ñʉa payʉ masa Cohamacʉ yare tʉho duaa tirore nʉnʉ ti sʉha.
Noano wahpa tarʉcʉ sʉha masa peri.
2 Pʉaria bʉso padʉroi pahsaa bʉsore Jesu ñʉha.
Tí bʉso macaina wahi wajãina maja sʉrʉca,
ti wañʉyucʉrire cosaa niha.
3 Ã jiro Jesu Simo yariapʉ samua wahaha.
Samu tuhsʉ tia dohoriare dia dʉhtʉ cahai coãriare siõ buhu dutiha.
Tuhsʉ,
dohoriapʉ duji,
masare buheha.
4 Buhe tuhsʉ,
Jesu Simore õ sehe niha:
—Dacho maca cureroi siõ wioga.
à jina mʉhʉ mehne macaina mehne mʉsa wañʉyucʉre doca ñoga wahi ñahana —niha Jesu.
5 To ã nichʉ tʉhoro Simo Jesure õ sehe ni yʉhtiha:
—Pʉhtoro,
wahi maca bohreamahi sã micha ñamine.
Bohreapanahta ne cʉ̃irocã wajãerahti sã.
à wajãerapanahta mʉ dutiro seheta doca ño ñʉnahtja —ni yʉhtiha Simo.
6 Ã ni tuhsʉ tina doca ñoha.
à ti doca ñochʉ ti wañʉyucʉre payʉ wahi sãaha.
Payʉ ti sãachʉ wañʉyucʉ tʉhnʉa wahamaha.
7 Ã wahachʉ ñʉa tina paria macainare tina mehne macainare pjirocaha:
—Mʉsa cʉ̃hʉ yoadohona tagã sãre —ni pjirocaha Simo cʉ̃hʉ.
Tina ti ã yoadohori baharo pʉria bʉso noano minipahro bocaha wahire.
8 Simo Pedro ã wahi payʉ ti sãachʉ ñʉno,
Jesu panoi na tuhcua caha sʉ,
tirore õ sehe ni yahuha:
—Yʉ pʉhtoro,
mʉhʉ mehne jiboriro jieraja yʉhʉ.
Ñariro jija yʉhʉ.
à jicʉ mʉ cahai ji masieraja —niha Simo Pedro Jesure.
9 Tiro,
jipihtina tiro mehne macaina cʉ̃hʉ payʉ wahi sãachʉ ñʉa,
cʉaa wahaha tina cʉ̃hʉ.
10 Pʉaro Simo Pedro mehne macaina Zebedeo pohna Santiago to bahʉro João mehne,
tina cʉ̃hʉ ñʉ cʉaa wahaha.
Ti ã cʉachʉ ñʉno Jesu Pedrore õ sehe ni yahuha:
—Cʉaecʉ tjiga.
Mipʉre mʉhʉ wahire ñaha cahmachuriro mʉ jiro seheta Cohamacʉ yaina cjihtire pji cahmachuriro jiihca mʉhʉ —niha Jesu Simo Pedrore.
11 To ã niri baharo tina ti bʉsore bʉcʉpariro dʉhtʉ cahapʉ waja mo cũnoca,
ti ya jipihtiare tóihta cũnoca,
Jesu mehne wahaa wahaha.
Jesu cami barirore noariro wahachʉ yoaha
12 Ã yoa Jesu pa macai to jichʉ cami bariro tirore piti bocaha.
à piti bocaro tiro Jesure ñʉ,
na tuhcua caha sʉ,
õ sehe ni tuaro siniha:
—Pʉhtoro,
mʉhʉ yoa duacʉ yʉhʉre noariro yoa masina mʉhʉ —ni siniha.
13 To ã niri baharo Jesu tirore ña payoro õ sehe niha:
—Tíre yoa duaja.
Mipʉre noariro jiga mʉhʉ —niha.
To ã nichʉta to cami bari cjiri yati mʉa wahaha.
14 Ã jiro Jesu tirore õ sehe ni dutiha:
—Ahri yʉ õ sehe yoarire painare yahui tjiga.
Sacerdote cahai wahaga mipʉre.
à jicʉ mʉ pjacʉre noari pjacʉ to waharire ñoga tirore.
Cohamacʉ dutia Moisere to cũri to niriro seheta yoaga.
à yoacʉ sacerdotere pʉaro minichahcare waga noariro mʉ waharire sacerdoteare ñoi tai —niha cami bariro cjirore.
15 “Yahui tjia”,
to nipachʉta jipihtiropʉ masa tirore yahu site namoha.
Ti ã yahu sitechʉ tʉhoa masa payʉ tiro cahapʉ sʉha.
Dohatiina noaina waha duaa,
tina cʉ̃hʉ tiro cahapʉ sʉha.
16 Ti ã sʉpachʉta Jesu masa marienopʉ Cohamacʉre sinino wahaha.
Jesu pjacʉ bʉharirore noariro wahachʉ yoaha
17 Pa dachoi Jesu to buhechʉ fariseo curua macaina,
judio masare buheina cʉ̃hʉ tói dujiha.
Tina jipihtina Galilea yahpai jia macari macaina,
Judea yahpai jia macari macaina,
Jerusalẽ macaina jiha.
Ti ã jichʉ ñʉno Jesu Cohamacʉ tuaa mehne dohatiinare noaina wahachʉ yoaha.
18 Mahainacã mʉa pjacʉ bʉharirore to coãri cahsaro mehne yo wʉa wihiha.
à jia tirore Jesu cahai cũ duaa,
wʉhʉpʉ yo sãa duamaha tina tirore.
19 Ã sãa duapahta masa payʉ jichʉ tina tirore yo sãa masieraha.
à jia tirore wʉhʉ buipʉ yo mʉjaha.
Yo mʉja sʉ,
mahanocã muji pahmare nawe,
tí copai pjacʉ bʉharirore to coãri cahsaro mehneta duhu boroha Jesu cahai jiina watoi.
20 “Jesu ahrirore to dohatiare yʉhdʉchʉ yoarohca”,
ni tʉhotuha tina.
Ti ã ni tʉhotuchʉ masino Jesu pjacʉ bʉharirore õ sehe ni yahuha:
—Coyeiro,
mʉ ñaare yoari buhiri tiare yʉhʉ cohã tuhsʉja —niha Jesu tirore.
21 To ã nichʉ tʉhoa fariseo curua macaina,
judio masare buheina cʉ̃hʉ ti basi õ sehe ni tʉhotumaha:
“Ahriro ã ni durucuero tjijaro.
Tiro masʉno mari yoaro sehe jiro,
ñaare to yoari buhiri tiare cohã masierara.
Cohamacʉ dihta masa ti ñaare yoari buhiri tiare cohã masina”,
ni tʉhotumaha tina.
22 Jesu ti ã ni tʉhotuare masino,
õ sehe niha:
—¿Dohse yoana ã ni tʉhotujari mʉsa?
23 “Mʉ ñaa yoari buhiri tiare yʉhʉ cohã tuhsʉja”,
yʉ nichʉ,
“Mahñoriro jira”,
yʉhʉre nina mʉsa noano masierapanahta.
“Wahcãrʉca wahaga”,
yʉ nichʉ yʉ niri potocã jia jichʉ dóihta masinahca.
24 Yʉhʉ masʉno Cohamacʉ warocariro ahri yahpai ti ñaare yoari buhiri tiare cohã masija yʉhʉ.
Masa ti ñaare yoari buhiri tiare cohãhtiro cjihtore cũre Cohamacʉ yʉhʉre.
Yʉ ã cohãrine mʉsa masihto sehe õ seheta yoa ñoihtja mʉsa ñʉhti cjihtire —niha Jesu.
à ni tuhsʉ pjacʉ bʉharirore õ sehe niha:
—Mʉhʉre niita nija.
Wahcãrʉcaga.
Mʉ coãri cahsarore na wahcãga mʉ ya wʉhʉpʉ —niha tirore.
25 To ã nichʉ tʉhorota jipihtina ti ñʉrocaroi wahcãrʉca,
to coãri cahsarore na,
to ya wʉhʉpʉ tjuaa wahaha.
à waharo tiro Cohamacʉre ño payoro,
wahchea mehne noano durucuha.
26 To ã yoachʉ ñʉa masa sehe jipihtina cʉaa wahaha.
Tina cʉaa waha,
Cohamacʉre ño payoa,
wahchea mehne noano durucuha:
—Michare soro jiare ñʉhi sã —niha tina.
Jesu Levíre piha
27 Ã yoa tuhsʉ waha,
Leví wama tirirore to dahrari tahtiapʉ jirirore boca sʉha Jesu.
Leví sehe pʉhtoa ya cjihtire masare wapa na cohtariro jiha.
à boca sʉro tirore õ sehe niha:
—Yʉhʉ mehne macariro cjihto taga mʉhʉ —niha tiro Levíre.
28 To ã nichʉ Leví sehe jipihtia to dahraare duhunoca,
Jesu mehne wahaa wahaha.
29 Baharo Leví ya wʉhʉi bose nʉmʉ Jesure yoa payoro niha.
Tói payʉ wapa na cohtaina,
paina cʉ̃hʉ Leví mehne dujiha.
30 Tina mehne Jesu cʉ̃hʉ ti dujichʉ ñʉa mahainacã fariseo curua macaina,
judio masare buheina mehne sua,
Jesu buheinare õ sehe ni sinitu ñʉha:
—¿Dohseana ñano yoaina,
wapa na cohtaina mehne chʉjari mʉsa?
—ni tuhtiha tina.
31 Ti ã nichʉ tʉhoro Jesu yʉhtiha tinare.
Õ sehe ni piti dahre buheha:
—Dohatieraina duhturure macaerara.
Dohatiina dihta duhturure macana.
Ñaare yoaina dohatiina yoaro sehe jira.
32 Ã jicʉ ñaare yoainare yahui tai nihi yʉhʉ Cohamacʉre cahma duticʉ.
Ti basi “Noaina jija sã”,
ni tʉhotuinare yahui tai nierahi yʉhʉ —niha Jesu.
Chʉ duhuare Jesure sinituha paina
33 Ã yoa mahainacã masa Jesure õ sehe ni sinitu ñʉha:
—João buheina payʉ tahari Cohamacʉre ño payoa taa chʉ duhura.
à yoaa,
tina payʉ tahari Cohamacʉre sinina.
Fariseo buheina cʉ̃hʉ ti yoaro seheta yoara.
Ti ã yoapachʉta mʉ buheina sehe Cohamacʉre ño payoa taa chʉ duhuerara.
¿Dohse yoa ã yoaerajari tina?
—niha tina Jesure.
34 Ti ã nichʉ Jesu to tʉhotua mehne quiti dahre buhero taro tinare õ sehe ni yʉhtiha:
—Õ sehe jira ti:
Wamomaca dʉhteropʉ ti pjirocaina wamomaca dʉhteriro mehne jia,
chʉ duhu masierara.
Tó seheta yʉ buheina cʉ̃hʉ yʉhʉ mehne jia,
chʉ duhu masierara.
Yʉhʉ wamomaca dʉhteriro yoaro sehe jija.
Wamomaca dʉhteriro bose nʉmʉ to yoachʉ tiro mehne macaina chʉeraina jierara.
35 Yʉ Pʉcʉ Cohamacʉ yʉhʉre to naari baharo pinihtare yʉ buheina mehne jisi yʉhʉ.
à jia tí pjapʉta yʉ buheina cʉ̃hʉ chʉ duhuahca —niha Jesu.
36 Panopʉ macaa buhea wahma buhea mehne ti buhe more duachʉ ñʉno õ sehe ni namoha Jesu tinare piti dahre buhero:
—Ne wahma suhtirore mahari cahsarocã tʉhrẽ na,
mʉnano suhtirore sere õno cahmaerara.
Mari ã sere õna wahma cahsarore tʉhrẽ cohãna nija.
à yoa wahma cahsaro mʉnano suhtiro mehne cʉ̃no potori bajuerara.
(Tó seheta mʉna buhea wahma buhea mehne piti dahre buheraro cahmana.)
37 ’Ã yoa ne se co bisia core wahiquiro cahsaro wajuru mehne mʉna wajuru mehne posaeraro cahmana.
Mari ã yoachʉ se co bisia pahmoapʉ mʉna wajurure tʉhrẽnocahna.
To tʉhnʉchʉ se co cʉ̃hʉ,
wajuru cʉ̃hʉ cohõa wahara.
38 Ã yoa se co wahma core wahma wajurupʉ posaro cahmana.
Mari ã yoachʉ se co cohõera,
wajuru cʉ̃hʉ cohõerara.
(Tó seheta wahma buhea mʉna buhea mehne buhe moreraro cahmana.)
39 Mʉna core masa ti sihniri baharo,
wahma core cahmaerara tina.
Õ sehe nia tire masa:
“Mʉna co wahma co bui curero noaa jira”,
nia tire masa —niha Jesu tinare.