João masare bautisariro masare Cohamacʉ yare yahuha
3
1 Tí pjare ti bui pʉhtoro jiriro Tiberio wama tiriro to pʉhtoro jiri baharo quince cʉhmari wahaha.
Tuhsʉ,
Poncio Pilato wama tiriro sehe Judea yahpa macaina pʉhtoro jiha.
à yoa Herode wama tiriro sehe Galilea yahpa macaina pʉhtoro jiha.
To bahʉro Felipe sehe Iturea yahpa macaina,
Traconite yahpa macaina cʉ̃hʉ ti pʉhtoro jiha.
Tuhsʉ,
Lisanias wama tiriro Abilinia yahpa macaina pʉhtoro jiha.
2 Tí pjare Ana,
Caifa mehne jipihtina sacerdotea bui pʉhtoa jiha.
Ahrina jipihtina ti jiri pjare João Zacaria macʉno masa marienopʉ jirirore Cohamacʉ sehe tirore to yare buhe dutiha.
3 Ã jiro Jordão wama tiri ma dʉhtʉ cahai jiri yahpai jipihtiropʉ João buhero wahaha:
—“Noaina jija sã”,
ni mʉsa tʉhotumari cjirire tʉhotu cohtota,
Cohamacʉre cahmaga mʉsa.
à yoana tíre mʉsa yoarire ñona tana,
bautisaina jiga.
Mʉsa ã cohtotachʉ ñʉno Cohamacʉ mʉsa ñaa buhirire borohca —ni buhea tiha tiro.
4 Isaia cjiro panopʉ macariro Cohamacʉ yare yahu mʉhtariro to joariro seheta ahriro Joaõ yoaro niha.
Õ sehe ni joaa tiha Isaia cjiro João to buhehtore:
“Masa marienopʉ durucu sañurucuriro õ sehe ni buherohca:
‘Mari pʉhtoro to tahto pano “Noaina jija sã”,
ni mʉsa tʉhotumari cjirire tʉhotu cohtota,
Cohamacʉre cahmaga mʉsa.
5 Pja wʉhtʉri,
pja buri cʉ̃hʉre noari wapa mari yoariro seheta,
tuhcua maharine potoa mahari mari yoariro seheta,
ñaa maharine noaa maharine mari yoariro seheta,
wetere mʉsa cosariro seheta mʉsa ñaa tʉhotuare cohtota,
cahno mʉhtaga mʉsa.
6 Mʉsa ã yoachʉ Cohamacʉ mʉsare pichacapʉ wahaborinare to yʉhdʉchʉ yoachʉ ñʉahca jipihti ahri yahpa macaina’,
ninohca tiro sañurucu yahuriro sehe”,
ni joaa tiha Isaia cjiro panopʉre.
7 Masa payʉ João cahai wihia tiro tinare bautisachʉ cahmaha tina.
à jiro tiro tinare õ sehe ni yahuha:
—Agãa ñima tiina yoaro seheta masare dojomehneina,
cui duhti duaina jira mʉsa.
Mʉsa ñaa yoarire mʉsa cahya,
duhu duaerari buhiri Cohamacʉ to buhiri dahrehto pano duhti masierara mʉsa.
8 Potocãta mʉsa ñaa tʉhotumarine cohtotaina jina,
Cohamacʉre cahmaina jina,
tíre mʉsa yoaa mehne ñoga.
Õ sehe ni tʉhotu wisiena tjiga.
“Panopʉ macariro Abrahã mari ñʉchʉ cjiro jia tiha.
à jina to panamana jina mari Cohamacʉ yaina jija”,
ni tʉhotu wisiena tjiga mʉsa.
Mʉsare niita nija.
Abrahã panamana mʉsa jiina jimana mʉsa.
Mʉsa ã jipachʉta tí mʉsa ã jia yaba cjihti jierara.
Cohamacʉ sehe ahri tãa mehne Abrahã coyeare dahre masina.
à jiro Abrahã coyea mʉsa jia wiho waro jira tãa ti wiho waro jiro seheta.
9 Õ sehe jira:
Masa yucʉri yoaro seheta jira.
Cohamacʉ sehe coma mehne yucʉrire cjã cohãriro yoaro sehe jira.
à jiro noaa dicha maria yucʉre nʉhcõri mehnepʉta cjã cohãnohca tiro.
Tíre to cjã cohãri baharo,
pichacapʉ jʉ̃ cohãnohca tiro.
(Ãta yoaro taro nina masa cʉ̃hʉre tirore cahmaerainare) —ni yahuha João masare.
10 To ã nichʉ tʉhoa masa sehe tirore õ sehe ni sinitu ñʉha:
—¿Dohse yoanahcari sã?
—niha tina Joãore.
11 —Pʉa suhtiro cjʉariro suhti marierirore cʉ̃no waga.
à yoa mʉsa chʉa cjʉana paina cʉ̃hʉre waga —niha João.
12 Mahainacã pʉhtoa ya cjihtire wapa na cohtaina cʉ̃hʉ tinare to bautisachʉ cahmaha.
à jia João cahai wihia,
tirore õ sehe ni sinituha:
—¿Buheriro,
sã sehe dohse yoanahcari sã?
—niha tina tirore.
13 —Mʉsa pʉhtoa ti wapa na dutiro purota masare wapa naga.
Mahño na namoena tjiga —ni yahuha João tinare.
14 Paina surara tirore õ sehe ni sinituha tjoa:
—¿Sã sehe dohse yoanahcari?
—niha tina tirore tjoa.
—Masa ti niñerure maena tjiga.
à yoana mahñoa mehne ti niñerure naena tjiga.
Mʉsare ti waparo purota wahchega —ni yahuha João.
15 Masa Cristore Cohamacʉ to warocahtirore cohtaa niha.
à jia õ sehe ni tʉhotu dʉcaha tina Joãore.
“Ahriro João sehe Cristo jiboca”,
ni tʉhotumaha tina.
16 Ti ã nichʉ tʉhoro João jipihtinare õ sehe ni yahuha:
—Yʉ baharo yʉ yʉhdoro tuariro tarohca.
Noa yʉhdʉariro jira tiro.
Tiro yoaro sehe jieraja yʉhʉ sehe.
à jicʉ tirore tʉhotucʉ,
“Wiho jiriro jija yʉhʉ”,
ni tʉhotuja yʉhʉ.
Yʉhʉ sehe mʉsare bautisacʉ co mehne yoamahi.
Tiro sehe yʉ yʉhdoro yoarohca.
Espíritu Santore masa mehne ã jirucuchʉ yoarohca.
Wiho mejeta paina sehere ti ñaare tʉhotumari cjirire tʉhotu cohtota duaeraina sehere tiro pichaca mehne buhiri dahrerohca.
17 Yʉ baharo tariro cahsarire cohãriro yoaro sehe jira.
Cahsarire cohãriro to batiro mehne jipihtia to trigo yapari cahsarire putiwera.
à yoa tuhsʉ trigo sehere to wihbori wʉhʉi cũnohca.
Tó seheta yoarohca ti tirore cahmainare yʉ baharo tariro.
To putiwea cahsari sehere tiro jʉ̃nohca.
Tí cahsarire to jʉ̃ri pichaca ne yatisi.
(Ãta yoarohca tiro yʉ baharo tariro tirore cahmaerainare) —ni yahuha João.
18 Payʉ to ã ni yahua mehne masare noaa buheare yahuha João.
19 Tuhsʉ,
pʉhtoro Herode sehe to bahʉro Felipe namonore to namo tiri buhiri,
pjíro ñaare to yoari buhiri cʉ̃hʉre João tirore yahumaha.
20 To ã ni yahuri buhiri Herode sehe ñaare yoa namoha,
Joãore peresu yoaro.
João Jesure bautisaha
21 Joãore ti peresu yoahto pano paina masare João sehe bautisaro niha.
Tinare bautisaro Jesu cʉ̃hʉre bautisaha.
To ã bautisachʉ,
Jesu diapʉ ducuriro Cohamacʉre to sinino watoi mʉano parĩ mʉa wahaha.
22 To parĩ mʉari baharo Espíritu Santo buja yoaro sehe Jesu buipʉ duji taha.
To ã duji tachʉ mʉanopʉ durucuro coa taha:
—Mʉhʉ yʉ macʉ yʉ cahĩriro jira.
Mʉhʉ mehne wahcheja —nino coa taha mʉanopʉ.
Jesu coyea panopʉ macainare yahua jira ahri
23 Jesu to buhe dʉcari cʉhmare treinta cʉhmari cjʉaha tiro.
“Tiro José macʉno jira”,
ni tʉhotumaha masa.
José sehe Elí macʉno jiha.
24 Elí Matat macʉno jiha.
Matat Leví macʉno jiha.
Leví Melqui macʉno jiha.
Melqui Jana macʉno jiha.
Jana José macʉno jiha.
25 José Matatías macʉno jiha.
Matatías Amós macʉno jiha.
Amós Nahum macʉno jiha.
Nahum Esli macʉno jiha.
Esli Nagai macʉno jiha.
26 Nagai Maat macʉno jiha.
Maat Matatías macʉno jiha.
Matatías Semei macʉno jiha.
Semei Josec macʉno jiha.
Josec Joiadá macʉno jiha.
27 Joiadá Johanán macʉno jiha.
Johanán Resa macʉno jiha.
Resa Zorobabe macʉno jiha.
Zorobabe Salatie macʉno jiha.
Salatie Neri macʉno jiha.
28 Neri Melqui macʉno jiha.
Melqui Adi macʉno jiha.
Adi Cosam macʉno jiha.
Cosam Elmodam macʉno jiha.
Elmodam Er macʉno jiha.
29 Er Josué macʉno jiha.
Josué Eliezer macʉno jiha.
Eliezer Jorim macʉno jiha.
Jorim Matat macʉno jiha.
30 Matat Leví macʉno jiha.
Leví Simeo macʉno jiha.
Simeo Juda macʉno jiha.
Juda José macʉno jiha.
José Jonan macʉno jiha.
Jonan Eliaquim macʉno jiha.
31 Eliaquim Melea macʉno jiha.
Melea Mená macʉno jiha.
Mená Matatá macʉno jiha.
Matatá Natán macʉno jiha.
32 Natán Davi macʉno jiha.
Davi Jesé macʉno jiha.
Jesé Obed macʉno jiha.
Obed Booz macʉno jiha.
Booz Sélah macʉno jiha.
Sélah Nahasón macʉno jiha.
33 Nahasón Aminadab macʉno jiha.
Aminadab Admín macʉno jiha.
Admín Arní macʉno jiha.
Arní Esrom macʉno jiha.
Esrom Fares macʉno jiha.
Fares Juda macʉno jiha.
34 Juda Jacobo macʉno jiha.
Jacobo Isaa macʉno jiha.
Isaa Abrahã macʉno jiha.
Abrahã Taré macʉno jiha.
Taré Nahor macʉno jiha.
35 Nahor Serug macʉno jiha.
Serug Ragau macʉno jiha.
Ragau Péleg macʉno jiha.
Péleg Éber macʉno jiha.
Éber Sélah macʉno jiha.
36 Sélah Cainán macʉno jiha.
Cainán Arfaxad macʉno jiha.
Arfaxad Sẽ macʉno jiha.
Sẽ Noé macʉno jiha.
Noé Lame macʉno jiha.
37 Lame Matusalẽ macʉno jiha.
Matusalẽ Enoco macʉno jiha.
Enoco Jared macʉno jiha.
Jared Mahalaleel macʉno jiha.
Mahalaleel Caina macʉno jiha.
38 Caina Eno macʉno jiha.
Eno Sete macʉno jiha.
Sete Adão macʉno jiha.
Adão Cohamacʉ to yoariro jiha.