Jesu masa bajuaha
2
1 Tí pjare jipihtia yahpari macaina bui pʉhtoro Augusto jia tiha.
à jiro jipihtinare quihõ dutiha.
2 Ahrina masare ti coã quihõ dʉcachʉ Siria yahpa macaina pʉhtoro Cirenio wama tiriro jiha.
3 Ã jia jipihtina ti ñʉchʉsʉma panopʉ macaina ya macaripʉ ti wamare joa õa wahaha.
4 José cʉ̃hʉ Nazarepʉ Galilea yahpai jiri macapʉ jiina waha,
Judea yahpapʉ Belẽ wama tiri macapʉ sʉha.
Pʉhtoro Davi cjiro panopʉ macariro to masa bajuariro jiha Belẽ.
José Davi cjiro panamino ji turiariro jiro pʉhtoa masare to quihõ dutichʉ tʉhoro Belẽpʉ to wamare joa õ dutiro wahaha.
5 Ã jiro tiro María to namono cjihto mehne tópʉ to wamare joa õ dutiro sʉha.
Ticoro sehe wihãrirocãre cjʉaro caharicoro jiha.
6 Ã jiro Belẽpʉ sʉro ticoro niji wahcõha.
7 Tópʉre masa ti carĩri wʉhʉ ne mʉ sʉeraha tinare.
à jiro ticoro pohna ti tuhsʉ,
tirocãre suhtiro mehne coma,
wachʉa ti chʉri wahwai,
tja bui tirocãre duhu payoha.
Tirocã wahma to pohna ti mʉhtarirocã jiha.
Anjoa ovejare ñʉ wihboinare bajuaha
8 Tí ñamine campopʉ ovejare ñʉ wihboina ti yaina ovejare ñʉ wihboa niha.
9 Tópʉ ti jichʉ Cohamacʉ warocariro anjo tinare bajuaha.
To ã bajuachʉ Cohamacʉ to si sitea tinare buhriaha.
To ã si sitechʉ ñʉa,
ovejare ñʉ wihboina cuia wahaha.
10 Ti ã wahachʉ anjo tinare õ sehe ni yahuha:
—Noaa quitire mʉsare yahui taja.
Jipihtinare masare wahchechʉ yoarohca ahri quiti.
à jina yʉhʉre cuiena tjiga mʉsa.
11 Micha ñamine pʉhtoro cjiro Davi ya macapʉ mʉsare pichacapʉ wahaborinare yʉhdohtiro,
Cristo Cohamacʉ warocariro mari pʉhtoro masa bajua tuhsʉhre.
12 Suhtiro mehne comariro wachʉa chʉri wahwa bui ti duhu payoriro mʉsa ñʉhtiro tiro tjirohca —ni yahuha anjo tinare.
13 To ã nichʉta payʉ mʉano macaina ji mʉhtariro anjo mehne Cohamacʉre wahche payoha.
Õ sehe ni wahche payoha tina:
14 “Cohamacʉre mʉano macarirore ño payojihna.
à jia Cohamacʉ to cahĩina cuiro marieno cahmacheno marieno noano jijaro”,
ni wahche payoha anjoa peri.
15 Ã ni wahche payo tuhsʉ mʉanopʉ ti mʉjari baharo ovejare ñʉ wihboina sehe ti basi cahma durucuha:
—Ahrire Cohamacʉ marine to yahurire Belẽpʉ basa ñʉjihna —niha tina ti basi.
16 Ã nia ño duaro wahaa wahaha tina.
Maríare,
Josére boca sʉ,
wihãrirocãre wachʉa chʉri wahwai ti duhu payorirocãre ñʉha tina.
17 Ovejare ñʉ wihboina tirocãre ñʉ tuhsʉ anjo wihãrirocãre to yahurire yahu turiaha painare.
18 Ti ã ni yahu turiachʉ jipihtina tinare tʉho cʉaa wahaha.
19 Ahri jipihtiare María wacũ tʉhoturucuha.
20 Ã yoa ovejare ñʉ wihboina sehe anjo to yahuriro seheta jichʉ ñʉa,
“Cohamacʉ tuariro jira”,
ni wahcheha.
à ni wahche,
majare tjuaa wahaha.
Cohamacʉ wʉhʉpʉ Jesu pʉcʉsʉma tirocãre naaha
21 Cʉ̃ somana baharo wihãrirocã to pjacʉre mahanocã cahsarocãre yihso na tuhsʉ tirocãre tina Jesu wamoaha.
Jesure wahma to bocahto pano anjo sehe “ ‘Jesu’ ni wama pisuga tirocãre”,
ni yahu tuhsʉha.
à jia tirocãre “Jesu” ni wama pisuha.
22 Cohamacʉ dutia Moise to yahuriro seheta yoaa taa José,
María mehne Jerusalẽpʉ wahaha.
Tópʉ wahaha María to pohna tiri baharo to noaricoro to wahari baharo to ã waharire ñono taro.
à wahaa,
tina Jesucãre naa wahaha.
Tirocãre Cohamacʉre “Ahrirocã mʉ yairo cjihto jira”,
ni ñoa wahaha.
23 Õ sehe yoaha Cohamacʉ yare ti joari pũi to yoa dutiriro seheta.
“Jipihtina mʉsa pohna wahma bajua mʉhtainacãre Cohamacʉre ñoga.
‘Ahrirocã mʉ yairo cjihto jira’,
ni ñoga”,
ni dutia tiha Cohamacʉ.
24 Ã ño tuhsʉ Cohamacʉ to yoa dutiriro seheta tina minichahcare waa wahaha Cohamacʉre ño payoa.
Õ sehe dutia tiha Cohamacʉ:
“Bujaa pʉaro waga yʉhʉre.
O tina mariachʉ urítua wihãinacã pʉaro waga yʉhʉre ño payona”,
ni dutia tiha Cohamacʉ.
To yoa dutiriro seheta yoaha tina ticoro pjacʉ noari pjacʉ to waharire ñoa taa.
25 Jerusalẽi Simeo wama tiriro jiha.
Tiro quihõno yoariro,
Cohamacʉre ño payoriro jiro,
Cohamacʉ Israe masare to yoadohohtire cohtariro jiha.
Tiro Espíritu Santo to nino sehe yoariro jiha.
26 Ã jiro tiro to yariahto pano Cohamacʉ to warocahtirore Cristore to ñʉhti cjihtire tó pano yahu tuhsʉha Espíritu Santo tirore Simeore.
27 Ã jiro Espíritu Santo tirore to dutichʉ Cohamacʉ wʉhʉpʉ sãa wahaha.
To sãa sʉri baharo Jesu pʉcʉsʉma ti macʉnocãre na sãaha.
Cohamacʉ to dutiriro seheta yoaa niha.
28 Simeo sehe tirocãre wʉa na,
Cohamacʉre ño payo,
“Noana” ni,
tiro mehne durucuha.
Õ sehe niha tiro Cohamacʉre:
29-32 “Mipʉ pinihtare pʉhtoro,
mʉ niriro seheta jipihtina masare pichacapʉ wahaborinare yʉhdʉchʉ yoahtiro cjihtore warocahre mʉhʉ.
Tiro judio masa jierainare buhero mʉhʉre noano masichʉ yoarohca tinare.
Masare yʉhdohtiro Israe masʉnore mʉhʉ cũha.
Sã coyeirore Israe masʉnore mʉ cũchʉ jipihtina masia,
‘Israe masare noano yoara Cohamacʉ’,
niahca masa.
Ahrirocã sãre yʉhdʉchʉ yoahtiro jira.
à jicʉ ahrirocãre ñʉ tuhsʉcʉ,
mipʉre noano wahcheriro yariaihca”,
niha Simeo.
33 Simeo tirocãre to ã nichʉ Jesu pʉcʉsʉma sehe tʉho cʉaa wahaha.
34 Ã jiro Simeo tinare “Noano jiga mʉsa” nino,
tiro María Jesu pocorore õ sehe ni yahuha:
—Cohamacʉ ahrirocãre beseha.
To ã beseriro to jipachʉta judio masa payʉ tirore yʉhdʉrʉcaahca.
à yoaa tina pichacapʉ wahaahca.
Judio masare payʉ yʉhdohtirore Cohamacʉ beseha tirocãre.
Tiro Cohamacʉ yare yahuriro to jipachʉta masa payʉ tirore ñano ni yahu wajaahca.
35 Ti ã yoachʉ paina ti ñano wacũare masiahca.
à jico mʉhʉ tuaro cahyacohca —niha Simeo Maríare.
36 Tói Cohamacʉ yare yahu mʉhtaricoro Ana wama tiricoro jiha.
Ticoro Fanuel macono jiro,
Aser cjiro ya curua macaricoro jiha.
Bʉcoro waro jiha.
Ticoro nuhmino jiro manʉ tiha.
à yoa siete cʉhmari to manʉno mehne jiha.
Tó puro to jiri baharo to manʉno yariaha.
37 Ã jiro ochenta y cuatro cʉhmari waro wapewahyoro jia tiha ticoro.
à jiro ticoro dachopʉ cʉ̃hʉre ñamipʉ cʉ̃hʉre Cohamacʉ yare yoaro taro chʉaeraro,
Cohamacʉ mehne durucu,
Cohamacʉ wʉhʉre ne wijaaera tiha.
38 Simeo to durucuro watoi ticoro tina cahai wihiro,
wahchero Cohamacʉre “Noana”,
niha.
à jiro Jerusalẽ macainare pichacapʉ wahaborinare yʉhdohtirore cohtainare ticoro Jesucãre yahuha tina jipihtinare.
José, María, Jesu mehne Nazarepʉ tjuaa wahaha tjoa
39 Cohamacʉ to dutiriro seheta yoa tuhsʉa,
tina ti ya macapʉ Nazarepʉ tjuaa wahaha.
Galilea yahpai jiha tí maca Nazare.
40 Jesu sehe noano bʉcʉa,
tuariro wahaha.
à jiro tiro noano tʉho masiriro bʉcʉaha.
Cohamacʉ tirore noano yoaha.
Jesu wahma wahmʉa tariro jiro, Cohamacʉ ya wʉhʉi judio masare buheina mehne sʉhʉduro niha
41 Cʉhmaripe Jesu pʉcʉsʉma Jerusalẽpʉ pascua nʉmʉrine bose nʉmʉrine yʉhdoa wahaa tiha.
42 Ã jia Jesu doce cʉhmari to cjʉachʉ waro ti yoarucuriro seheta tina jipihtina Jerusalẽpʉ bose nʉmʉrine yʉhdoa wahaha tjoa.
43 Tí macapʉ sʉ,
tí bose nʉmʉrine yʉhdo tuhsʉ tina ti ya macapʉ majare tjuaa wahaha tjoa.
Wiho mejeta Jesu sehe ti ã majare tjuaapachʉta,
Jerusalẽpʉ tjuanocaha.
To pʉcʉsʉma sehe tíre to tjuarire masieraha.
44 “Paina mari mehne macaina mehne taca mari macʉ”,
ni tʉhotumaha tina.
à jia tina cʉ̃ dacho waro noano Jesu marieno waharucumaha.
Tí dacho pihtichʉ waro tina Jesure ti coyea watoi ã jichʉ ti ñʉ masiina watoi cʉ̃hʉre macamaha.
45 Wiho mejeta ne bocaeraha.
à jia tina pari turi Jerusalẽpʉ majare tjuaa wahaha tjoa,
tirore macaa wahaa.
46 Tia dacho baharo Cohamacʉ wʉhʉ wijaroi tirore boca sʉha.
Tói Jesu judio masare buheina watopʉ duji,
tinare tʉho,
tinare sinituro niha.
47 Tina jipihtina Jesure to quihõno yʉhtichʉ tʉhoa noano masirirocã to jichʉ ñʉa,
tina cʉaa wahaha.
48 Jesu pʉcʉsʉma cʉ̃hʉ tirore ñʉa,
tina cʉ̃hʉ cʉaa wahaha.
à jiro to pocoro tirore õ sehe niha:
—Macʉ,
¿dohseacʉ ã yoari mʉhʉ sãre?
Sã mʉ pʉcʉsʉma pjíro tʉhotu,
cahya,
macana nihi mʉhʉre —niha ticoro to macʉnore.
49 To ã nichʉ tʉhoro tiro to pʉcʉsʉmare õ sehe ni yʉhtiha:
—¿Dohseana yʉhʉre macari mʉsa?
Yʉ Pʉcʉ waro ya wʉhʉi ji to dutiriro seheta yoai nija.
¿Tíre masierajari mʉsa?
—niha tiro tinare to pʉcʉsʉmare.
50 To ã ni yahupachʉta tina to yahuare tʉho ñahaeraha.
51 Ã yoari baharo,
Jesu to pʉcʉsʉma mehne Nazarepʉ tjuaa wahaha.
Tju sʉ,
to pʉcʉsʉmare ne yʉhdʉrʉcaerariro jia tiha tiro.
Ahri jipihtia to yoarire ñʉno María noano tʉhotu,
wacũrucua tiha.
52 Ã yoa Jesu bʉcʉa,
noano tʉho masiriro wahaha.
Tó sehe jiriro to ji bʉcʉachʉ ñʉno,
Cohamacʉ sehe tirore noano ñʉ ji coa,
tuaro cahĩa tiha.
Masa cʉ̃hʉ tirore tó seheta noano ñʉ ji coa,
tuaro cahĩa tiha.