Ñaina dahra cohtaina quitire yahuha Jesu
12
1 Ã yoa Jesu to tʉhotua mehne õ sehe ni piti dahre buhe dʉcaha tinare:
—Wese pʉro se dari cjihtire toaha.
Toa tuhsʉ,
sahrĩnore dapo,
sere ti tʉ mʉtohti copare saha,
mʉari wʉhʉcã dahreha tiro.
Tuhsʉ,
tí wesere painare cʉ̃ bʉhʉsehe coa pahma cũno,
tí wesere ñʉ wihbo dutiha.
Ñʉ wihbo duti tuhsʉ,
pa yahpapʉ wahaha tiro.
2 Baharo se ñiri pja jichʉ wese pʉro tirore dahra cohtarirore wese macaa to ya coa macaa dichare na dutiro warocamaha.
3 Ã jia tí wesere ñʉ wihboina sehe tirore dahra cohtarirore ñaha,
cjãha.
à yoa tuhsʉ tirore dahra cohtarirore se tõhorine waerapahta tjuaa dutiha tirore.
4 Ã jiro wese pʉro pairo tirore dahra cohtarirore warocamaha tjoa.
à jia wesere ñʉ wihboina sehe tirore dahra cohtariro dapure cami dahre,
ñano yoaha tina tirore.
5 Tuhsʉ,
pairo sehere to warocachʉ ñʉ wihboina tirore wajãha.
Payʉ paina cʉ̃hʉre ã dihta yoa mʉjaha.
Paina sehere cjã,
paina sehere wajãha tina.
6 ’Ã jiro wese pʉro macʉno dihta dʉhsaha.
Tiro to cahĩriro jiha.
à jiro to macʉnore warocaha jʉna,
“Yʉ macʉ sehere ño payoahca”,
nino.
7 To ã ni tʉhotupachʉta tina ñʉ wihboina ti basi õ sehe ni durucuha:
“Wese pʉro macʉno baharo ahri wesere cjʉahtiro jira ahriro.
Tirore wajãjihna mari.
à jiro ahri wese mari ya wese tjuarohca”,
nimaha tina ti basi.
8 Ã nia tirore ñaha,
wajã,
wese dʉhtʉ cahapʉ na wahcã,
cohãnocahna tina tirore.
9 ’¿Ne wese pʉro taro dohse yoarohcari tiro wesere ñʉ wihboinare?
Õ sehe yoarohca tinare:
Tiro tinare wajãno,
paina sehere wesere ñʉ wihbo dutirohca.
10,11 ¿Cohamacʉ yare ti joari pũre ahrire buherari mʉsa?
Õ sehe ni joaa tiha:
“Ahriro Cristo tãca yoaro seheta jira.
Tãcare wʉhʉ dahreina ti cohãno seheta masa tirore cohãahca.
Ti ã yoapachʉta mipʉre wʉhʉ dahreina wʉhʉre yoaa ti cũ mʉhtari tãcare ti cũno seheta Cohamacʉ tirore pʉhto sõre.
Cohamacʉ sehe ahrire yoare.
To ã yoachʉ ñʉna,
‘Noa yʉhdʉara’,
ni tʉhotuja mari”,
ni joaa tiha panopʉ.
¿Tíre ne buherari mʉsa?
—niha Jesu tinare.
12 To ã nichʉ tʉhoa sacerdotea pʉhtoa,
sã coyea judio masare buheina,
bʉcʉna mehne õ sehe ni tʉhotuha:
“Jesu wesere ñʉ wihboina quiti mehne marine tuhtiro nina”,
ni tʉhotuha.
à ni tʉhotua Jesure ñaha duamaha.
à ñaha duapahta masare cui niha.
à cuia tirore cohã wahcãa wahaha.
Fariseo curua macaina, Herode ya curua macaina mehne gobierno macaa wapare sinituha Jesure
13 Waha,
tina fariseo curua macainare,
Herode ya curua macaina cʉ̃hʉre Jesure sinitu dutia warocaha tjoa.
Jesu ñano to yʉhtichʉ yoa duamaha tina,
tirore yahusãa taa.
14 Ã jia Jesu cahapʉ sʉa,
tirore mahño cũ sinitu ñʉmaha:
—Buheriro,
potocã durucuriro,
mahñoa marieriro mʉ jichʉ masija sã.
Cohamacʉ yare quihõno mʉ yahuchʉ cʉ̃hʉre masija sã.
à yoa cʉ̃iro pʉhtoro waro to jipachʉta tiro cʉ̃hʉre dórero marieno potota yahura mʉhʉ.
à jicʉ sãre yahuga.
¿Roma macariro jipihtina bui pʉhtoro jirirore gobierno macaare marine waparo cahmajari,
mʉ tʉhotuchʉ?
¿Mari dutia tirore wapa dutijari,
mʉ tʉhotuchʉ?
—ni sinitumaha tina Jesure.
15 Ti ã sinituchʉ tʉhoro ti yahusã duaare masino õ sehe ni sinituha tinare:
—¿Dohseana yʉ ñano durucuchʉ tʉho duajari mʉsa?
Mipʉre niñeru tʉre na tahga.
Tí tʉre ñʉjihna —niha Jesu tinare.
16 To ã nichʉ tʉhoa tina sehe cʉ̃ tʉre na taha.
Ti na wihichʉ Jesu õ sehe ni sinituha tinare:
—¿Diro baro masʉ wahãjari ahri tʉre?
¿Diro baro wama wahãjari?
—ni sinituha tiro.
—César,
masa bui pʉhtoro masʉ,
to wama cʉ̃hʉ wahãna —ni yʉhtiha tina.
17 Ti ã nichʉ Jesu õ sehe ni yahuha tinare:
—Tí pja pinihta masa bui pʉhtoro yare tiro sehere waga.
Cohamacʉ yare Cohamacʉ sehere waga —ni yahuha Jesu.
To ã nichʉ tʉhoa,
tʉho cʉaa wahaha.
Saduceo curua macaina Cohamacʉ to masoare sinituha Jesure
18 Ã yoa cãina Saduceo curua macaina Jesu cahapʉ wihiha.
Saduceo curua macaina sehe “Cohamacʉ yariainare masosi”,
ni tʉhotuina jimaha.
19 Ã jia tina õ sehe niha tirore:
—Buheriro,
õ sehe ni buhea tiha Moise cjiro:
“Cʉ̃iro to wahmino namo tiriro pohna mariaparota to yariachʉ ñʉno to bahʉrore to wahmino namono cjirore nʉoano cahmana.
à yoaro to wahmino mʉnano to pohna tiboro seheta pohna tiro cahmana to bahʉrore.
à jia to pohna to wahmino mʉnano pohna yoaro sehe jiahca”,
ni joaa tiha Moise cjiro —niha tina Jesure.
20 Tíre ni tuhsʉ,
ahri quitireta yahu namoha Jesure:
—Cʉ̃iro masʉno jiha.
Seis to bahana jiha.
Ti wahmino sehe namo ti,
pohna mariaparota yariaa wahaha.
21 Tuhsʉ,
pairo to bahʉro cʉ̃hʉ to wahmino namono cjirore cjʉamaha.
To ã nʉoari baharo to wahmino yoaro seheta pohna mariaparota yariaa wahaha tjoa.
à jiro ahriro bahʉro to wahmino mʉnano yoaro seheta pohna mariaparota yariaa wahaha tjoa.
22 Ã dihta wahaha cʉ̃iro pohna waro.
Ne pohna mariapahta yaria pihtia wahaha tina.
Ti namono cjiro cʉ̃hʉ ti baharota yariaa wahaha.
23 ¿Ne,
Cohamacʉ jipihtinare yariaina cjirire to masochʉ diro namono sehe jirohcari ticoro?
Tina jipihtina ticorore namo tirina cjiri jiha.
¿Ã jiro diro namono sehe jibocari ticoro pototi?
—ni sinituha tina.
24 Jesu õ sehe ni yʉhtiha tinare:
—Cohamacʉ yare ti joari pũre,
to masia cʉ̃hʉre ne masierara mʉsa.
à jia mʉsa tʉhotua sehe ne quihõno jierara.
25 Yariarina cjiri ti masa mʉjari baharo tina anjoa yoaro sehe jira.
Tina mʉa namo tierara tópʉre.
26 Yariarina cjiri ti masa wijaahto sehere mʉsare yahuihtja:
Tíre Moise cjiro noano yahu pahñoha.
To mahadʉcã jʉ̃ri quitire õ sehe ni yahuha tiro:
“ ‘Yʉhʉ Abrahã,
Isaa,
Jacobo ti pʉhtoro tjija’,
ni yahure Cohamacʉ yʉhʉre”,
ni joaa tiha Moise cjiro to joari tjui.
27 Ti yariari baharo “Ti pʉhtoro tjija”,
ni yahuha Cohamacʉ.
à niparota yariarina cjiri pʉhtoro jierara Cohamacʉ.
“Ti pʉhtoro tjija”,
to nia mehne catiina ti jichʉ masija mari.
Tiro catiina pʉhtoro jira.
à jina “Yariaina masasi”,
ni tʉhotuna quihõno tʉhotuerara mʉsa —niha Jesu tinare.
Cʉ̃no noa yʉhdʉro to dutiare yahuha Jesu
28 Ã yoa cʉ̃iro sã coyea judio masare buheina mehne macariro tina cahapʉ wihi,
ti cahma durucuchʉ tʉhoha.
Jesu to noano yʉhtiare tʉhoro õ sehe ni sinituha tirore:
—¿Cohamacʉ ya dutia noa yʉhdʉaro di baro sehe jijari,
mʉ tʉhotuchʉ?
—ni sinituha tiro Jesure.
29 Jesu tirore õ sehe ni yahuha:
—Ahri dutiata paye dutia yʉhdoro noa yʉhdʉara:
“Israe masa tʉhoga.
Cohamacʉ mʉsa pʉhtoro yʉhʉ cʉ̃irota jija.
30 Tuaro mʉsa yajeripohnari mehne,
noano mʉsa wacũa mehne,
mʉsa tuaa mehne yʉhʉre cahĩga”,
nina Cohamacʉ.
31 Ahri dutia baharo paye dutia noa yʉhdʉara:
“Mʉ basi mʉ cahĩno seheta mʉ cahai jiina cʉ̃hʉre cahĩga”,
nina Cohamacʉ.
Ahri pʉaro dutia jipihtia paye dutia yʉhdoro jira —ni yahuha Jesu tirore.
32 To ã nichʉ tʉhoro judio masare buheriro õ sehe niha:
—Ã tjira.
Buheriro,
potocã nina mʉhʉ.
Cohamacʉ cʉ̃irota jira.
Pairo tiro yoaro sehe jiriro mariahna.
Mʉ nia potocã tjira.
33 Cohamacʉre tuaro mari yajeripohnari mehne,
mari wacũa mehne,
mari tuaa mehne tirore cahĩno cahmana marine.
Yʉ cahai jiinare yʉ basi yʉ cahĩno seheta tina cʉ̃hʉre cahĩno cahmana yʉhʉre.
Wahiquinare wajã jʉ̃ mʉo mari wari mehne mari ño payochʉ noa nimana.
Ahri yʉhdoro Cohamacʉre masa cʉ̃hʉre mari cahĩa noa yʉhdʉara.
Mʉ ã nia potocã tjira —niha judio masare buheriro Jesure.
34 To ã noano yʉhtichʉ tʉhoro Jesu õ sehe ni yahuha tirore:
—Mahanocã dʉhsara mʉhʉre Cohamacʉre mʉ noano masihto —niha tirore.
To ã nichʉ tʉhoa paina cuia,
ne sinitu ñʉeraha tirore.
¿Diro baro coyeiro jijari Cristo?
35 Ã yoa Cohamacʉ wʉhʉi buhero õ sehe niha Jesu:
—“Cristo Davi cjiro panamino jira”,
ni buhera mari coyea judio masare buheina.
¿Dohse yoa ã ni buhejari tina?
36 Davi cjiro to basi Espíritu Santo to dutiriro seheta õ sehe ni yahua tiha:
“Cohamacʉ yʉ pʉhtorore õ sehe nire:
‘Õi yʉ poto bʉhʉsehei dujiga.
à jicʉ mʉhʉre ñʉ tuhtiinare mʉhʉre yʉhdʉrʉcabasaihca yʉhʉ’,
nire Cohamacʉ yʉ pʉhtorore”,
ni joaa tiha Davi cjiro.
37 Ã ni joaro Davi cjiro pʉhtoro tia tiha Cristore.
¿Davi cjiro Cristo ñʉchʉno cjiro jiparota dohsearo Davi sehe pʉhtoro tiari Cristore?
Cristo Davi cjiro pʉhtoro jira —ni yahuha Jesu.
To ã ni buhechʉ payʉ masa wahchea mehne tʉhoha tirore.
Jesu judio masare buheina ti ñaare yahuha
38 Ã yoa tiro buhe namono õ sehe niha:
—Mari coyea judio masare buheina ti ñaa yoaare noano ñʉga.
à jina ti yoaro sehe yoaena tjiga.
Tina yoaa suhti sãa,
masa ti ñʉrocaroi majarea,
pache duaropʉ paina pʉhtoare noano ño payo ti sinino sehe ti piti bocasinichʉ cahmana tina.
39 Ã cahmaina jia,
mari judio masa buhea wʉhʉsei noaa dujia dihtare duji duara.
Tuhsʉ,
bose nʉmʉ jichʉ tó cʉ̃hʉre noaa dujia dihtare cahmana tina.
40 Tina wapewahya numia ya wʉhʉsere ti ya cʉ̃hʉre mana tí numiare.
à yoaina jia,
tina masa ti ñʉrocaroi yoari pja Cohamacʉ mehne durucumana masare ñʉ dutia.
Ti ã yoari buhiri paina bui curero tinare Cohamacʉ pjíro buhiri dahrerohca —niha Jesu tinare.
Wapewahyoro to warire yahuha Jesu
41 Ã yoa Jesu niñeru wihbori caro cahapʉ dujiha.
Tí caropʉ masa ti niñeru duhu sãachʉ ñʉ dujiro niha.
(Tí niñeru Cohamacʉ wʉhʉre ti cahnochʉ ti wapahti jiha.)
à jia pache pʉa tí caropʉ pjíro duhu sãaha.
42 Ã yoa wapewahyoro pjacʉoricoro tí caropʉ ta,
pʉa tʉcãre duhu sãaha.
Pʉa tʉ cʉ̃ centavo posa jira.
43 Tí tʉrire to duhu sãachʉ ñʉno to buheinare pjirocaha:
—Potocã niita nija mʉsare.
Ahricoro wapewahyoro pjacʉoricoro sehe niñeru wihbori caropʉ duhu sãano paina jipihtina ti wari yʉhdoro wahre ticoro sehe.
44 Paina pache pʉa pjíro ti wapachʉta ti ya pjíro dʉhsara.
Ahricoro sehe pjacʉoricoro jiparota jipihtia to chʉhtire to nuchʉboacãre wa pahñohre —ni yahuha Jesu.