Cuatro mil bui masare chʉare waha Jesu
8
1 Tí pjare pari turi masa payʉ ti cahmachuri baharo chʉa maeraina ti jichʉ ñʉno Jesu to buheinare pjirocaha:
2 —Ahrina masa tia dacho waro yʉhʉ mehne ji tuhsʉra.
à yoa tinare puhi mariahna.
Ti puhi maerachʉ ñʉcʉ tinare pja ñʉja yʉhʉ.
3 Paina tina mehne macaina yoaropʉ tahre.
“Tinapʉ jʉca baaina mahai borari”,
nicʉ tinare chʉa marieno ti wʉhʉsepʉ waha duti duaeraja.
à jicʉ tinare puhi wa duaja —niha Jesu to buheinare.
4 —¿Dohse yoa mari õre masa marienopʉre pãore boca wabocari mari?
—niha to buheina sehe Jesure.
5 —¿Nohope curiri pão curirire cjʉajari mʉsa?
—ni sinituha Jesu.
—Siete curiri jira —niha tina.
6 Ti ã ni yʉhtichʉ tʉhoro,
tiro masare yahpai duji duti,
siete curirire pão curirire na,
Cohamacʉre “Noana”,
niha.
à ni tuhsʉ,
tí curirire nuha,
to buheinare wa,
masare witi dutiha.
To ã dutiri baharo to buheina sehe pãore masare witiha.
7 Ã jia wahi cʉ̃hʉre mahainacã cjʉaha tina.
à jiro tinare Cohamacʉre “Noana” ni,
wahi cʉ̃hʉre witi dutiha.
8 Ti witi tuhsʉchʉ tina chʉa,
yapi yʉhdʉa wahaha.
Ti yapi wahyorire siete pʉhʉse waro wahpo dapoha tina.
Tina cuatro mil bui masa jiha.
9,10 Ã yoa tuhsʉ Jesu masare coha sitiha.
Coha siti tuhsʉ to buheina mehne dohoriapʉ samuha.
Samu tuhsʉ Dalmanuta wama tiro cahapʉ wahaha.
Fariseo curua macaina Jesure Cohamacʉ tuaa mehne yoa ño dutiha
11 Ã yoa fariseo curua macaina wihi,
Jesu mehne cahma sayoha.
Tina Jesure Cohamacʉ tuaa mehne yoa ño dutia,
to yoa ño masierachʉ ñʉ duamaha.
12 Ti ã dutichʉ tʉhoro Jesu cahyaro mehne yajeri sãano,
õ sehe niha:
—¿Mʉsa mipʉ macaina dohse yoana mʉsa Cohamacʉ tuaa mehne yoa ñoare ñʉ duajari?
Potocã niita nija mʉsare.
Mipʉ macainare mʉsare Cohamacʉ tuaa mehne ne yoa ñosi yʉhʉ —niha Jesu.
13 Ã ni tuhsʉ waha,
pari turi dohoriapʉ samu,
sie coapʉ pahãa wahaha.
Fariseo curua macaina, Herode mehne macaina cʉ̃hʉre ñaare ti buheare yahuha Jesu
14 Ã wahaa,
pãore boa waha,
dohoriai cʉ̃ curita pãore cjʉaha tina.
15 Ã yoa Jesu cuaro mehne yahuha tinare:
—Noano yoanohbʉ.
Fariseo curua macaina,
Herode mehne macaina cʉ̃hʉ ti pão bʉcʉarore ñʉna noano yoaga.
Cua nina tí —ni yahuha.
16 To ã nichʉ tʉhoa tina to buheina sehe tíre ti basi õ sehe ni durucuha:
—Mari pãore mari na taerachʉ ñʉno ã nino nica ahriro —nimaha tina ti basi.
17 Ti ã nirire masino tinare õ sehe ni sinituha Jesu:
—¿Dohse yoana mʉsa pão borire wacũjari mʉsa?
¿Mʉsa masierasinijari?
¿Tʉho ñahaerasinijari?
¿Tʉho duaerajari mʉsa?
18 ¿Capari tiina jipanahta ñʉerajari mʉsa?
¿Ã jina cahmori tiina jipanahta tʉhoerajari mʉsa?
¿Mʉsa ahrire wacũerajari?
19 ¿Yʉhʉ cʉ̃ wamomaca pihtia pão curirire nuha,
cinco mil bui masare yʉ warire wacũerajari mʉsa?
¿Ti yapi wahyorire nohope pʉhʉsere pão curirire wahpo dapori mʉsa?
—niha Jesu tinare.
—Doce pʉhʉse —ni yʉhtiha tina tirore.
20 —¿Ã yoa yʉhʉ siete curirire pão curirire cuatro mil bui masare yʉ wari baharo nohope pʉhʉsere pão curiri wahpo dapori mʉsa?
—niha Jesu.
—Siete pʉhʉse —ni yʉhtiha tina tirore.
21 —¿Ã ñʉpanahta noano tʉho ñahaerasinijari mʉsa?
—niha Jesu tinare.
Jesu capari ñʉerarirore ñʉchʉ yoaha
22 Ã yoa tina Betsaidapʉ ti sʉchʉ ñʉa,
masa sehe capari ñʉerarirore na wihiha.
—Tirore ña payoga —ni,
tuaro siniha tina Jesure.
23 Ti ã sinichʉ tʉhoro,
Jesu capari ñʉerariro wamomacare ñaha,
tí maca dʉhtʉ cahapʉ tirore tʉã wahcãha.
Tópʉ na sʉ,
to caparire chahcho puti,
to wamomacari mehne tirore ña payoha.
—¿Mʉ ñʉchʉ bajujari?
—ni sinituha Jesu.
24 To ã nichʉ tiro sehe ñʉno,
õ sehe niha:
—Mʉare ñʉja.
Yʉ ã ñʉpachʉta tina yucʉri tinia yucʉ yoaro sehe bajura —niha capari ñʉerariro cjiro.
25 To ã nichʉ tʉhoro Jesu sehe to wamomacari mehne to caparire ña payoha tjoa.
To ã ña payori baharo capari ñʉerariro cjiro tuaro to ñʉchʉ to capari noano bajuha.
à yoaro jipihtiare noano ñʉha tiro.
26 To ã ñʉ masichʉ ñʉno,
Jesu tirore to wʉhʉpʉ warocaha.
—Macapʉ pinihtare wahai tjiga —niha Jesu tirore.
“Jesu potocã Cristo, Cohamacʉ to warocariro jira”, ni yahuha Pedro
27 Ã yoa Jesu to buheina mehne Cesarea Filipo wama tiri maca cahai jia macaripʉ waha namoha.
Tópʉ ti waharo wato,
Jesu õ sehe ni sinitu ñʉha to buheinare:
—¿Diro baro jicari yʉhʉ masa yʉhʉre ti tʉhotuchʉ?
—ni sinitu ñʉha tiro tinare.
28 To ã sinitu ñʉchʉ tʉhoa õ sehe ni yʉhtiha tina:
—“João masare bautisariro cjiro jira”,
nina paina.
Paina “Elia jira”,
nina.
Paina “Cohamacʉ yare yahu mʉhtaina cjiri mehne macariro jira”,
nina mʉhʉre —ni yʉhtiha to buheina tirore.
29 Ti ã ni yʉhtiri baharo Jesu õ sehe ni sinitu namoha tinare:
—¿Mʉsa sehe mʉsa tʉhotuchʉ diro baro jicari yʉhʉ?
—ni sinitu ñʉha tjoa.
—Mʉhʉ Cristo Cohamacʉ masare yʉhdo duti to warocariro jira —ni yʉhtiha Pedro.
30 To ã nichʉ tʉhoro Jesu õ sehe niha:
—Yʉhʉre “Cristo jira tiro”,
ni yahu sitesiniena tjiga painare —niha tinare.
Jesu to yariahtore, to masa wijaahto cʉ̃hʉre yahuha
31 Tinare to ã ni sinitu ñʉri baharo,
õ sehe ni buhe dʉcaha tiro:
—Yʉhʉ masʉno Cohamacʉ warocariro jija.
à jicʉ tuaro ñano yʉhdʉcʉhca.
Ãta waharo cahmana yʉhʉre.
Mari coyea judio masa,
bʉcʉna,
sacerdotea pʉhtoa,
mari judio masare buheina yʉhʉre cahmaeraa,
yʉhʉre wajã dutiahca.
Ti ã wajãchʉ tia dacho wahaboroi masa wijaaihca —niha Jesu tinare.
32 Ã nino ne tʉho wisiachʉ yoaro marieno yahuro niha tinare.
To ã nichʉ tʉhoro Pedro sehe pa sehe curerocã Jesure narʉcʉ sʉ,
tirore ã ni dutieraha.
33 To ã ni dutierachʉ tʉhoro Jesu to buheinare majare ñʉ,
tuhtiha Pedrore:
—Satana yoaro sehe durucui nina mʉhʉ.
à nii tjiga.
Mʉ tʉhotua masa ya jira.
Cohamacʉ ya jierara —niha tiro Pedrore.
34 Ã ni tuhsʉ masare to buheina mehne tiro cahapʉ pjiroca,
õ sehe niha:
—Cʉ̃iro yʉ yairo ji duaro,
to cahmano yoa duamarire duhunocanohca.
à jiro crusapʉ yʉ ñano yʉhdʉhtiro seheta tiro yʉ yairo to jiri buhiri ñano yʉhdʉparota yʉhʉre duhusi.
à jiro yʉ yare yoarucuriro jirohca.
35 Masʉno to mʉ sʉro to cahmano seheta yoariro pichacapʉ tiro waharohca.
à yoa masʉno yʉ yare ã yoarucuro,
noaa buheare ã yoarucuro,
jipihtia dachoripe yʉhʉ mehne mʉanopʉ jirucurohca.
36 ¿Cʉ̃iro masʉno ahri yahpa macaare jipihtiare cjʉariro pichacapʉ waharo yabare wapatajari tiro?
à jiriro ne wapataerara.
37 Pichacapʉ to wahachʉ ne dohse wapa wiohto basioerara.
Masʉno to jia tia wiho waro jierara.
38 Mipʉre ñaina,
Cohamacʉre cahmaeraina ti mʉ sʉro ti yoari dacho jiro nina.
Cãina yʉ wamare,
yʉ buheare ni dua bʉo tiboca.
Ti ã yoachʉ ñʉcʉ yʉhʉ masʉno Cohamacʉ warocariro noaina anjoa mehne yʉ Pʉcʉ to si sitero mehne tjua tacʉ yʉ wamare ni duapahta bʉo tiinare bʉo tisãaihca yʉhʉ cʉ̃hʉ —ni yahuha Jesu.