Jesu wesere toari masʉno quitire buheha
4
1 Ã yoa pari turi bʉcʉpariro dʉhtʉ cahapʉ Jesu masare buhe dʉcaha tjoa.
à tópʉre buhe dʉcaro masa payʉ tiro cahapʉ ti cahmachuchʉ ñʉno Jesu sehe dohoriapʉ samu wijaa,
pahsaha.
à jia masa sehe bʉcʉpariro dʉhtʉ cahai ducuha.
2 Ã jiro Jesu payʉ to tʉhotua mehne quiti dahre yahuha tinare buhero taro:
3 —Ahri quitire tʉhoga mʉsa —niha tiro tinare.
—Toari masʉno toaro,
to toaa yaparire doca site cũno wahara.
4 To ã doca site cũ wahcãchʉ paye yapari mahai bora caha sʉha.
à bora caha sʉare tí yaparire minichahca duji ta,
chʉnocaha.
5 Ã yoa paye yapari sehe tãa wapa bui dihta se mininocã bui bora caha sʉha.
Tãa wapa buicã dihta mariea cureroi bora caha sʉ,
dói dumaha.
6 Ã dói duri jipahta,
nʉhcori mariaa,
sʉ̃ to tuaro sichʉ,
ñaia wahaha.
7 Paye yapari sehe tja watoi bora caha sʉha.
Tja sehe dia yʉhdʉa waha,
toaa sehere wajãnocaha.
à jia tja watoi jiare dicha mariachʉ yoaha.
8 Paye yapari sehe noari yahpai bora caha sʉha.
Noano du,
noano dicha tiha.
Paye yucʉ treinta yapari,
paye yucʉ sesenta yapari,
paye yucʉ cien yapari dicha tiha.
9 Ahrire tʉho duaina noano tʉhoga mʉsa —niha Jesu.
Jesu quiti mehne to buherire yahuha
10 Ã yoa ti sahsero jia doce to buheina,
paina Jesu mehne jiina cʉ̃hʉ tí quitire masi duaa,
Jesure sinitu ñʉha.
11 Ti ã sinitu ñʉri baharo Jesu õ sehe ni yahuha:
—Cohamacʉ masa bui pʉhtoro masare to noano sʉho jiare,
panopʉ paina ti masierari cjirire mʉsare masichʉ yoara Cohamacʉ.
Paina sehere ã yoaerara tiro.
à jicʉ tinare quiti mehne dihta buheihtja.
12 Ã jia tina ñʉpahta ñʉeraina cjiri yoaro sehe tjuara.
à jia tʉhopahta tʉho ñaha masisi.
Tina tʉho ñahaina jia,
ti ñaa yoarire cahya,
Cohamacʉre macaboa.
Ti ã macachʉ ñʉno,
tiro sehe ti ñaa yoari buhirire bonocaboa.
à jipachʉta tina sehe ne tʉho duaerara —niha Jesu.
Jesu wesere toari masʉno quitire yahu pahñoha
13 To ã niri baharo õ sehe ni yahu namoha tinare:
—¿Ahri quitire tʉhoerasinijari mʉsa?
¿Mʉsa ahri quitire tʉhoerana,
dohse paye quitire tʉhonahcari mʉsa?
—niha Jesu tinare.
à ni tuhsʉ tiro õ sehe ni yahuha tinare:
14 —Toari masʉno toaro,
to doca site cũa yapari noaa buhea yoaro sehe jira.
15 Ã yoa mahai boraa yapari noaa buhea yoaro sehe jira.
Cãina noaa buheare ti tʉhochʉ ñʉno Satana sehe ta,
tí buhea noaa buheare ti tʉho ñahamarire bochʉ yoara tinare,
minichahca tí yaparire ti chʉro seheta yoaro.
16 Ã yoa tãa wapa bui dihta se mininocã bui boraa yapari noaa buhea yoaro sehe jira.
à jia paina noaa buheare tʉho,
wahchea mehne dóihta tíre tʉho nʉnʉ wahcãna.
17 Ã tʉho nʉnʉ wahcãpahta tãa wapa buicã jia yucʉ nʉhcori mariea yucʉ yoaro sehe ahrina masa cʉ̃hʉ yoari pja cʉ̃no pjaerara.
à cʉ̃no pjaeraa,
yʉ yare ti cahmari buhiri paina tinare ti ñano yoachʉ,
ñano yʉhdʉa,
yʉ yare duhunocahna.
Paina tinare ti ñano yoachʉ tíre cʉ̃no pjaeraa,
yʉ yare duhunocahna.
18 Ã yoa tja watoi boraa yapari noaa buhea yoaro sehe jira.
19 Ã jia paina sehe noaa buheare tʉhoa,
ahri yahpa macaare wacũ nʉnʉ yʉhdʉara.
Niñerure bʉjʉa cahma,
paye baro cʉ̃hʉre payʉ cahma,
tíre goa pja yʉhdʉara tina.
Ti ã tʉhtotuchʉ tí sehe noaa buheare dʉcatara.
Ti ã dʉcatachʉ masa noaa sehere yoaerara.
Dicha maria yucʉ yoaro seheta jira.
20 Ã yoa noari yahpai boraa yapari noaa buhea yoaro sehe jira.
à jia paina sehe noaa buheare tʉhoa tíre cahmana.
Tíre masiina jia,
Cohamacʉ to cahmano seheta noaare yoara tina.
Cãina mahanocã noaare yoara treinta yapari dicha tiro seheta.
Paina bui curero noaare yoara sesenta yapari dicha tiro seheta.
Paina pjíro noaare yoara cien yapari dicha tiro seheta —ni yahuha Jesu tinare.
Jesu sihãria quitire buheha
21 Ã ni tuhsʉ õ sehe ni yahu namoha Jesu:
—Ne,
sihãriare ti sihãri baharo tiare dihi biato docapʉ cũerara.
à jia tiare coãri casario docapʉ cũerara.
Mʉanopʉ duhu payora noano buhria dutia.
22 Jipihti ti masierari cjirire baharo masa masiahca.
Sihãria to buhriachʉ mari ñʉ masino seheta panopʉre ti masierari cjirire masiahca masa.
23 Ahrire noano tʉhoga mʉsa.
24 Mahanocã masi duana mahanocã masinahca.
Pjíro masi duana pjíro masinahca.
à jina mʉsa tʉhona noano tʉho nʉnʉga.
25 Noano tʉho nʉnʉriro noano masinohca.
Tʉho nʉnʉerariro “Mahanocã tʉhoja”,
to nipachʉta tí sehe butia waharohca —niha Jesu tinare.
Jesu trigore toariro quitire buheha
26 Ã ni tuhsʉ õ sehe ni yahu namoha:
—Cohamacʉ masa bui pʉhtoro to sʉho jia trigore toariro yoaro sehe jira.
27 Toa tuhsʉ bohrearo to toari duare ñʉna tiro.
“¿Dohse du wijaa ta bʉcʉajari tí?”
ni ñʉ masierara toariro to basi.
28 Tí toari ti basi dicha tira.
Pari pũca ji mʉhtana.
Baharo pari paro wijaa bʉcʉara.
29 Tí parori bʉcʉa tuhsʉchʉ ñʉno pahara.
Pahari pja jira.
(To toaa ti bʉcʉarire to masieraro seheta Cohamacʉ yaina masa ti wahachʉ cʉ̃hʉre yahu pahño masierara masa) —ni buheha Jesu.
Mostaza yapa quitire yahuha Jesu
30 Ã ni tuhsʉ õ sehe ni buhe namoha Jesu piti dahre buhero:
—¿Ne Cohamacʉ masa bui pʉhtoro to sʉho jia yaba baro yoaro sehe jijari,
mʉsa tʉhotuchʉ?
¿Di quiti mehne tíre yahunahcari?
31 Mostaza yapacã yoaro sehe jira pʉhtoro Cohamacʉ to sʉho jia.
Tí yapacã to toachʉ mahabiari yapacã jira.
32 Ã jiparota tí yapacã noano dura.
à jiro pjibiadʉ wahara.
à jia tʉ dʉpʉri bʉjʉa dʉpʉri bʉcʉachʉ ñʉa minichahca peri tʉ dʉpʉripʉ suhti suhara.
(Pjibiadʉ to wahariro seheta mʉano macarirore mari pʉhtorore masiina mahainacã ti ji mʉhtapachʉta baharopʉ tina payʉ wahaahca) —niha Jesu.
Quiti mehne to buherire yahuha Jesu
33 Ã ni tuhsʉ,
tí quiti ti niriro seheta payʉ quitire tʉho ti cʉ̃no pjaro puro noaa buheare buheha tinare.
34 Quiti marieno yahueraha tinare.
Tuhsʉ,
ti sahsero jiinare Jesu noano yahu pahñoha to buheinare.
Jesu wihnonore yʉsʉ dutiha
35 Ã yoa tí dachoreta nahi borachʉpʉ Jesu to buheinare õ sehe niha:
—Basa,
sie coapʉ pahãjihna —niha tinare.
36 To ã nichʉ tʉhoa Jesu to jiriapʉ dohoriapʉ samu,
masare yahpapʉ ducuinare tóihta cũ,
to buheina dihta Jesure na pahãa wahaha.
à yoa paye bʉso mehne paina cʉ̃hʉ tinare piti ti pahãa wahaha.
37 Ti ã pahãchʉ wihnono tuaro taha.
à taro dohoriare pahcõri tuaro cjã sãaha.
Mahanocã dʉhsamaha ti miniboro.
38 To ã waharo watoi Jesu sehe dohoria oturopʉ suhti puti mehne to dapu ño tu tjiãhno carĩno niha.
à jia tina tirore wahcõha.
—Buheriro,
mari mini yariana tana nija.
¿Ã jica niera putiajari mʉhʉ?
—niha tina tirore.
39 Ti ã nichʉta Jesu sehe wahcã,
wihnonore:
—Tó purota wã duhuga —niha.
à ninota pahcõri cʉ̃hʉre:
—Yʉsʉa wahaga —niha bʉcʉparirore.
To ã nichʉta wihnono yʉhdʉa wahaha.
à jia pahcõri cʉ̃hʉ yʉsʉ boraa wahaha.
40 —¿Dohse ni cuimacanocana nijari mʉsa?
¿Mʉsa yʉhʉre wacũ tuaerasinijari?
—niha Jesu.
41 To ã yoachʉ ñʉa tina cʉa yʉhdʉa wahaha.
—Cue,
¿dohse jiriro baro masʉno jijari ahriro?
Ahri wihnono,
pahcõri cʉ̃hʉ to dutichʉ yʉhdʉrʉcaerara tirore —niha tina ti basi.