Jesu pjacʉ bʉharirore ducuchʉ yoaha
2
1 Mahaa dachori baharo Jesu Capernaupʉ tjuaa wahaha.
Wʉhʉi to jichʉ masa tʉhoha.
2 Ã jia tói masa payʉ cahmachu tí wʉhʉre wahpata wijaa sʉrʉcaha.
à jiro Jesu tinare noaa buheare yahuha.
3 To ã yahuro wato,
pititiaro mʉa jipihtiri pjacʉ bʉharirore na wihiha.
4 Ti masa payʉ jichʉ ñʉa Jesu cahapʉ sãa masieraha.
à jia tina wʉhʉ buipʉ Jesu bui waroi mahanocã muji pahmare nawe,
pjacʉ bʉharirore to coãri cahsaro mehne duhu boroha Jesu cahai.
“Jesu ahrirore to dohatiare yʉhdʉchʉ yoarohca”,
ni tʉhotuha tina.
5 Ti ã ni tʉhotuchʉ masino Jesu sehe dohatirirore õ sehe ni yahuha:
—Macʉ,
mʉ ñaa yoari buhiri tiare cohã tuhsʉja —niha Jesu pjacʉ bʉharirore.
6 To ã nichʉ tʉhoa sã coyea judio masare buheina tópʉre dujiina ti basi õ sehe ni tʉhotumaha:
7 “Ahriro ã ni durucuero tjijaro.
Cohamacʉre ñano durucuro nina tiro.
Tiro masʉno mari yoaro seheta jiriro jira tiro cʉ̃hʉ.
à jiro to ñaa yoari buhiri tiare cohã masierara.
Cohamacʉ dihta masa ti ñaa yoari buhiri tiare cohã masina”,
ni tʉhotumaha tina.
8 Ti ã ni tʉhotuchʉ ñʉno Jesu ti tʉhotuare masino õ sehe niha:
—¿Dohse yoana mʉsa ã ni tʉhotujari?
9 “Mʉ ñaa yoari buhiri tiare cohã tuhsʉja”,
yʉ nichʉ “Mahñoriro jira”,
yʉhʉre nina mʉsa masierapanahta.
“Wahcãrʉca,
wahaga”,
yʉ nichʉ to tinichʉ ñʉna yʉ niri potocã jia jichʉ dóihta masinahca mʉsa.
10 Yʉhʉ masʉno Cohamacʉ warocariro ahri yahpapʉre masa ti ñaa yoari buhiri tiare cohã masija yʉhʉ.
Ahrire mʉsa masihto sehe õ seheta to wahachʉ yoaihtja —niha Jesu judio masare buheinare.
Tinare ã ninota pjacʉ bʉharirore õ sehe niha:
11 —Mʉhʉre niita nija.
Wahcãrʉcaga.
Mʉ coãri cahsarore na wahcãga mʉ ya wʉhʉpʉ —niha Jesu tirore.
12 To ã nichʉta pjacʉ bʉhariro cjiro wahcãrʉcʉ sʉ to coãri cahsarore na,
jipihtina ti ñʉrocaroi wijaa wahaha.
To ã yoachʉ ñʉa tina jipihtina ñʉ cʉa wahaha.
“Cohamacʉ tuariro jira” ni,
“Ne,
mari õ sehe yoaare ñʉera tihi”,
niha tina ti basi.
Jesu Levíre Mateo ti ni pisurirore “Yʉhʉ mehne macariro cjihto taga”, niha
13 Ã yoa pari turi Jesu bʉcʉpariro dʉhtʉ cahapʉ wahaha tjoa.
Tópʉ sʉro masa payʉ tiro cahai ti cahmachuchʉ ñʉno tiro buheha tinare.
14 Ã yoa tuhsʉ tópʉ jiriro wahamahno Levíre Alfeo macʉnore to dahrari tahtiapʉ boca sʉha.
Paina mehne pʉhtoa ya cjihtire wapa na cohtaina jiha Leví cʉ̃hʉ.
Tirore boca sʉro õ sehe niha:
—Yʉhʉ mehne macariro cjihto taga mʉhʉ —niha Jesu Levíre.
To ã nichʉta Leví sehe wahcã sʉrʉca,
Jesu mehne wahaa wahaha.
15 Ã yoa baharo Jesu sehe to buheina mehne Leví ya wʉhʉpʉ chʉro niha.
Jesu mehne wahaina sehe payʉ jiha.
Cãina pʉhtoa ya cjihtire wapa na cohtaina,
ã jichʉ paina masa “Ñaa dihtare yoara”,
ti niina mehne payʉ mesa cahai duji,
tina cʉ̃hʉ tiro mehne cʉ̃noi sʉho chʉa niha.
16 Tópʉ ti dujiri baharo paina sã coyea judio masare buheina,
fariseo masa ya curua macaina mehne Jesu to chʉ dujichʉ ñʉha tina.
à ñʉa õ sehe ni sinituha:
—¿Dohsearo ñano yoaina,
pʉhtoa ya cjihtire wapa na cohtaina mehne chʉjari Jesu?
—ni sinituha judio masare buheina Jesu buheinare.
17 Ti ã nichʉ tʉhoro piti dahre buhea mehne õ sehe ni yʉhtiha Jesu:
—Dohatieraina duhturure macaerara.
Dohatiina dihta duhturure macana.
Ñano yoaina dohatiina yoaro sehe jira.
à jicʉ ñano yoainare yahui tai nihi yʉhʉ.
Ti basi “Noaina jija sã”,
ni tʉhotuinare yahui tai nierahi yʉhʉ —niha tiro tinare.
Chʉ duhuare Jesure sinituha paina
18 Tí pjare João buheina,
fariseo curua macaina cʉ̃hʉ Cohamacʉre ño payoa taa,
chʉera tiha.
à jia masa Jesure õ sehe ni sinituha:
—João buheina,
fariseo buheina cʉ̃hʉ Cohamacʉre ño payoa taa chʉerara.
¿Dohse yoa mʉ buheina sehe chʉ duhuerajari?
—niha tina Jesure.
19 Jesu to tʉhotua mehne quiti dahre buhero tinare õ sehe ni yʉhtiha:
—Õ sehe jira tí:
Wamomaca dʉhteriro bose nʉmʉi to jichʉ tiro mehne macaina cahyaro mehne jierara.
Tuhsʉ,
chʉeraina jierara.
Tó seheta yʉ buheina cʉ̃hʉ yʉhʉ mehne jia,
chʉ duhu masierara.
20 Yʉ Pʉcʉ Cohamacʉ yʉhʉre to naari baharo pinihtare yʉ buheina mehne jisi yʉhʉ.
à jia tí pjapʉta yʉ buheina cʉ̃hʉ chʉ duhuahca —niha Jesu.
21 Panopʉ macaa buhea wahma buhea mehne ti buhe more duachʉ ñʉno õ sehe ni namoha Jesu tinare piti dahre buhero:
—Ne,
wahma cahsaro suhtiro cahsaro mehne mʉnano suhtirore sere õno cahmaerara.
Mari ã yoachʉ wahma cahsaro mari cosari baharo mʉnano suhtirore waja cahmachu,
pjibiaro tʉhnʉchʉ yoara.
22 Ã yoa ne se co bisia core wahiquiro cahsaro wajuru mehne mʉna wajuru mehne posaeraro cahmana.
Mari ã yoachʉ se co bisia pahmoapʉ mʉna wajurure tʉhrẽnocahna.
To tʉhnʉchʉ se co cʉ̃hʉ,
wajuru cʉ̃hʉ cohõa wahara.
à yoa se co wahma core wahma wajurupʉ posaro cahmana.
Mari ã yoachʉ se co cohõera,
wajuru cʉ̃hʉ cohõerara.
(Tó seheta wahma buhea mʉna buhea mehne buhe moreraro cahmana) —ni buheha Jesu tinare.
Sabado jichʉ Jesu buheina trigo parorire pahaha
23 Pa dacho Sabado jichʉ Jesu cʉ̃hʉ trigo wesepʉ wahaha.
To buheina sehe trigo parorire paha yʉhdʉ wahcãha.
24 Ti ã yoachʉ ñʉa õ sehe ni tuhtiha fariseo curua macaina Jesure:
—Tʉhosiniga sãre.
¿Dohse yoa tina Sabado mari sori nʉmʉ to jipachʉta dahrajari?
Marine dutiare yʉhdʉrʉcaa nina —niha tina Jesure.
25,26 Ti ã nichʉ tʉhoro Jesu tinare yʉhtiha.
“Yʉ buheina yʉhdʉrʉcaa nierara”,
nino taro õ sehe niha:
—Davi cjiro tiro mehne macaina mehne jʉca baaro,
Cohamacʉ wʉhʉpʉ sãa,
Cohamacʉ ya pãore chʉha.
à chʉro tiro mehne macaina cʉ̃hʉre tí pãore waha.
Tí pãore sacerdotea dihtare chʉ dutira.
Cohamacʉ dutia ti joari tjui painare tí pãore chʉ dutierara.
Tí pjare Abiata wama tiriro sacerdotea pʉhtoro jiha.
¿Davi cʉ̃hʉ tíre ti yoari cjirire Cohamacʉ yare ti joari tjui buherari mʉsa?
(Tí pãore chʉro Cohamacʉre yʉhdʉrʉcaro nieraha.
Michare ahri yaparire chʉa yʉ buheina cʉ̃hʉ Cohamacʉre yʉhdʉrʉcaa nierara) —niha Jesu tinare.
27 Ã ni tuhsʉ õ sehe ni namoha:
—Ã yoa Cohamacʉ Sabado dachore ti sori nʉmʉ cũno masa ya dacho cjihto cũno nire dahra wahyarinare so dutiro.
Tí dachore ño payohtina cjihtire cũno nierare masare Cohamacʉ.
28 Ã jicʉ yʉhʉ masʉno Cohamacʉ warocariro ahri dacho Sabado dachore masa ti yoahtire yahurirota jicʉ pʉhtorota jija —niha Jesu tinare.