Namalokozela wa ojama wa Nnyizinku
3
1 Mattakhuzi apa pi ookhweele: amana ntthu atakha wiiya namalokozela wa Ojama wa Nnyizinku, onhithajiya khaazi yooshapweya. 2 Namalokozela wa Ojama wa Nnyizinku eeye ntthu woohaakanyereliwi etthu, eeye nlume wa wiiyana muukha mmote, woojiinanela, woojiitthaaza, wooshitahiwa, woomakeleya na ankhitiraaye osomisa. 3 Ahiiye ntthu woohapaliwa ama woohusuti, eeye ntthu woovilela na wa heeri. Ahiiye ntthu wontuvela nzurukhu. 4 Eeye ntthu wa weettettisa vaje vawe saana, wooshututeliwa pi aanaawe na wooshitahanana. 5 Nkhama ntthu khaneettettisa saana vaje vawe, onlokozela toovi ojama wa Nnyizinku? 6 Namalokozela wa Ojama wa Nnyizinku ahiiye ntthu anttaaye onjuwaru Yinsa, maana enwaheya ompattha ojikhupali, khukwelana ophukiwa otthuupo aphukiweeyo Sheethwani. 7 Apho, namalokozela wa Ojama wa Nnyizinku eeye ntthu wooshitahiwa pi atthu apale oohiiyi a Ojama wa Nnyizinku, yoori ahikwele mmiraakho za Sheethwani eeya wootaraweya.
Anamarumeyela a ojama wa Nnyizinku
8 Khwa nanna etthiipo anamarumeyela na-yo eeye atthu ooshitahiwa, ahiiye amwanomwaano, ahiiye oohapaliwa wala oowaatuvela opattha fwayita yoohiiyi ya haakhi. 9 Eeye atthu oohikheetiwi pi rooho zaya na oojilipisana mwentto wa amini athoonyeziweeyo ti Nnyizinku. 10 Na-yo ahinenkhiwe orumeyela ana yawooniwa khapula mwentto aya, amana ahoonaniwi mwentto wootakhala phi aninkhiwaavo orumeyela. 11 Khwa nanna etthiipo na-yo aakha anrumeyelaaye eeye ooshitahiwa, eeye atthu oohittakhuli pure, oosuluheya na awaamineya khwa zooshi. 12 Anamarumeyela eeye alume awiiyana muukha mmote, oowaalela aanaaya saana na aweettettisa vaje vaya. 13 Amana arumeyela saana ampattha shitaha khuluyeene na okhomaala nkatthi wa amini ariinaaye na Yinsa Al-Masiihu.
14 Kiniwaatikhela weeyo Timootiyu warakha eti, keekeselaka oteela wuuthotola nasaapi, 15 ila amana kirupaza, warakha eto entta owuuza nanna yoojeettettisa vakatthi wa Ojama wa Nnyizinku. Opu wiiyiyeeyo kerezha ya Nluku Woohaayi, nripu na nchina l'ookhweele. 16 Khaavo hatha ntthu mmote antakhaaye okheeti yoori etile Nnyizinku athoonyeziyeeyo monkoni wa Yinsa Al-Masiihu ti yootikinisa:
 
Ye aajithoonyeziye nkhama pinaatamu
khuhakikhiwa ti Rooho Ttakatthiifu,
khooniwa pi malayikha,
khulaleyiwa tuniya zooshi,
khukhupaliwa voolumwenku,
khuweziwa pinkuuni nkatthi wa nuuru.