8
1 Saawulu na-ye aari khuntti ya atthu atthaapale akhupaleliyeeyo wuuliwa Shiteefanu.
Saawulu oniwaalupattha anamalottela a Yinsa
Siikhu zaya epile yaapuwiye lupattha khuluweene ya anamalottela a Yinsa Yeruzaleemu. Ila maaswihaapa khayaawaasikaniye maana yo aarettiye amwazeyiye ari Yudeya mpakha Samariya. 2 Atthu akina ooshapweya rooho khunthuula Shiteefanu otule khulawa khunzikha eettaka onlilela. 3 Aphano Saawulu aari ojilipisa yoori eeshise khuntthi ya atthu apale aari onlottaaye Yinsa. Ye aari ovira nyuupa khwa nyuupa khusala awaakho alume na aakha apale aari onlottaaye Yinsa n'oowaattha nkalapooso.
Otafusiri wa Filiipe nti wa Samariya
4 Atthu apale omwaziyeyeeyo aari ovira alaleyaka hapari wakhula vahali aari ofiyaavo. 5 Filiipe eettiye sitati ya Samariya, n'oofiya khusala owooza atthu monkoni wa Yinsa. 6 Wakathi atthu asiiliyeevo saneene hapari epile aari olupaazo Filiipe na knoona minjuza aari arettaazo, yo aashineheliye mattakhuzi apale ye aari olupaaye. 7 Atthu akina aariina majini aari owaasaruwa eettaka onyakhula, alupa oorakala enkeene opiya ti sapiyeene na apale oorakala. 8 Sitati yaya etile waapuwiyeyo furaha khuluyeene.
Simawu Namajintta
9 Aarivo mwinyi mmote aari wiitthiwaaye Simawu, aari wiikhalaaye sitati ethiitile, aari nshawi, atthu ooshi asamariya aari onshankela vitthu za majintta aari orettaazo. Ye aari ojoona wiiya munumunu, 10 atthu ooshi, waaza nttunkhulu mpakha nsimaana na onttottopela araka: “Otu onaaye aariinaaye walankha pinkuuni, onjuwiwaaye yoori owahi nwulweene.” 11 Aphano, yo khusala alipana othuuuto mwaasa yoori aaziye raku oretta vitthu za majintta za owaatikinisa. 12 Ila paata ya Filiipe owaatafusirela monkoni wa hapari zooshapweya ya ofwalume wa Nnyizinku khwa nzina la Yinsa Al-Masiihu, yo khukhupali na khulawa khoosiwa, alume enkeene mpakha aakha. 13 Simawu othuuto aari orettaaye majintta, na-ye khunkhupali Yinsa khoosiwa, khusala onlottelela Filiipe wakhula phantte aari weettaaye, oonaka vitthu zootikinisa na minjuza miwuluzene zaari orettikhanaazo.
14 Wakathi maaswihaapa asiiliyeevo ari Yeruzaleemu, oriwa atthu a Samariya opokherela nttakhuzi la Nnyizinku, khumperekhawo Pheeturu na Yaahaya. 15 Yo n'oofiya khwaalompela atthu aya apale yoori apokherela Rooho Ttakatthiifu. 16 Maana khaarivo hatha mmote wa yo ompokhereliyeeyo Rooho Ttakatthiifu, ila eettiye woosiwa paasi khwa nzina la Bwana Yinsa. 17 Pheeturu na Yaahaya khuwaattela makhono atthu apale khupokherela Rooho Ttakatthiifu. 18 Simawu nawoona yoori ntthu aari opokherela Rooho Ttakatthiifu paata ya ottheeliwa makhono ti maaswihaapa, ye khulaza nzurukhu, 19 khuwooza maaswihaapa yoori: “Kintakha na-miyo mwikinkhe owahi nkhama otthuupo mwiriina, kisala kiwaattheela makhono atthu n'oopokherela Rooho Ttakatthiifu.”
20 Pheeturu khunjipu yoori: “Nzurukhu awo otthuupo ontta wuuthowelelisa! Weeyo onoona yoori tthuvo ya Nnyizinku enuuzanyiwa na nzurukhu? 21 Weeyo nkatthi wa khaazi yetthu eti Nnyzinku khaniwinkha hatha phantte maana rooho yawo khahi rooho saana. 22 Othupwiye vitthu zootakhala na olompe khwa nzina la Nnyizinku. Talili othuuto oswammihi khwa ofikhiri opo woovonyeya wa nroho mwawo, 23 kinoona yoori nroho mwawo ziwaamo pure vitthu zoovonyeya na washawashawiwa ti twampi.”
24 Simawu khujipu yoori: “Mwikilopele, yoori zooshi epo mwilupiyeezo khwa miiyo zihikirettikhanele.”
25 Paata ya Pheeturu na Yaahaya olawela oshahipi na otafusiri nttakhuzi la Nnyizinku khulankha khusala arutela Yeruzaleemu, olawaka aari ovira atafusiraka miti mikina za Samariya ethiitile.
Filiipe na Mwiitiyoopiya
26 Nlayikha la Mbwana khumuuza Filiipe yoori: “Weette ntarikhi elikhiya raku oviriwa eriiye phantte ya kusini elankhiyeeyo Yeruzaleemu eniishukhelaaye sitati ya Kaaza.” 27 Filiipe nawuuziwa khulankha khusala alawa. Ntarikhi khunsikana mwinyi mmote wa Etiyoopiya woohimemi, alankhaka Yeruzaleemu eettaka owawe. Oto aya aari nakhazi nwulu enkhiweeyo othokorela mizurukhu za Rayisi nwulu wa Etiyoopiya aari wiitthiwaaya Khantase. Eettiye Yeruzaleemu omwaaputu Nnyizinku. 28 Arutaka, apakhiriye varikisho khusala asoma kithaapu ya napiyu Ezaaya. 29 Aphano, Rooho Ttakatthiifu khumuuza Filiipe yoori: “Otthirele rikisho etile osala olottelela.”
30 Filiipe khutthirela rikisho etile khusikana khusala ansiila mwiitiyoopiya otule asomaka kithaapu ya napiyu Ezaaya, ye khumuuzela yoori: “Mattakhuzi apo mwinsomaaye aniweeleyani?” 31 Ye khujipu araka: “Anikeeleza toovi kihina ntthu wookeeleza?” Khumuuza Filiipe yoori owele varikisho attaaphale aarivo ye. 32 Mattakhuzi aari osomaaye mwiitiyoopiya otu a nkithaapu mpule ari olupa toono:
 
“Ye aathuuliwe nkhama pwittipwitthi eneettelaaye wuuliwa,
nkha pwittipwitthi yoohittakhuli
eri vakatthi wa apale ankasaaye ovuziwa pwittipwitthi,
Ye khaattakhuliye hatha etthu.
33 Ye aari woojipushuwisa ila khukattaliwa
khuretteliwa vitthu zoohiyi ya shariya.
Khi paani ariina ruhusa ya owaattakhula
apale aninlottaaye?
Ye ohaayi awe khahiyo wa vathi apha.”
 
34 Aphano, mwiitiyoopiya khumuuzela Filiipe yoori: “Mattakhuzi apa a nkithaapu eti ya Ezaaya aninlupa paani? Ye mwennyewe ama ntthu nkina?” 35 Paata ya toole, Filiipe khwaaza omuuza hapari zooshapweya mwiitiyoopiya otule, khwa mattakhuzi atthaapale ari osomaaye a nkithaapu ya Ezaaya.
36 Ari ntarikhi enttaka olawa ooshi, khufiya vahali aarivo maati. Mwiitiyoopiya otu khumuuza Filiipe yoori: “Apha awaapho maati. Niini ekhattazaaye woosiwa miiyo?” 37 Filiipe khunjipu yoori: “Khayiivo hatha etthu moote enkhattazaaye paata ya weeyo okhupali na rooho yawo yooshi.” Ye khujipu yoori: “Miiyo kinkhupali yoori Yinsa Mwaana wa Nnyizinku.” 38 Aphano, khweemesa rikisho etile, khwiishukha owiri, Filiipe khulawa khumoosa mwiitiyoopiya otule. 39 Wakathi ovuwiyeemo mmati, Rooho Ttakatthiifu khunthuula Filiipe, mwiitiyoopiya otule khuhimooni theenya, na-ye khurutela safari yawe etile aari weettaaye ari woofurahi saaneene. 40 Filiipe khulawaniwa sitati ya Azotu, khulikhiwa ottuukho ti Rooho Ttakatthiifu, khusala avira alawaka mpakha Sezareeya alaleyaka hapari zooshapweya wakhula vahali aari ofiyaavo.