Ojakisa wa Shiteefanu
7
1 Aphano, nttunkhulu wa mahaakhimu a tiini khumuuzela Shitefaanu yoori: “Shariya mattakhuzi apa onlokoveziwaaye?”
2 Shiteefanu khujipu araka: “Atwiizaku na apapazaku mwisiileze! Nnyizinku wa Nuuru ampuweleliye Eburahiima, papeetthu, wakathi ari nti wa Mesopotamiya ahinalawe wiikhala Harani, 3 khumuuza yoori: “Oleemo mmuti mwawo vakatthi wa ajamaazo, olawe nti kinttelaaye wuuthoonyeza.” 4 Eburahiima khulankha nti wa Akaliteeni, khulawa khwiikhala Harani. Paata yoofwa papaawe, Nnyiziniku khuntiisa nti opu mwiniikhalaaye. 5 Nnyizinku khawinkheene hatha eritho moote, wala puuro ya luwattho yawe, ila amwaahitiye yoori: ‘Paata ya weeyo, peewu yawe enlawa yapatthe olumwenku.’ Hatha nkhama wakathi aya opule eettiye hiina pure mwaana. 6 Nnyizinku anttakhulaniye khwa nanna etthiipo yoori: ‘Peewu yawe enttela osafirela nti wa malaponi, anlawa arettiwe oviitthwaana na ohukhumwiwa nyaakha miiya nne. 7 Miiyo kinhukhumu nti onttalaaye owaaretta oviitthwaana, attaapho aleewo okhulewa ate akaaputu puuro etthiiti.’ 8 Nnyizinku khumwinkha Eburahiima osiilana wa okiriya. T'iito, Eburahiima khunvokola Esiyaakha khunkhiriyisa siikhu yanaane yoovokoliwa wawe. Elottelanaka Esiyaakha khunvokola Yaakhumpa, khwa apaapa atthaapa khupuwa khumi na awiri.
9 Apapa zetthu aya atthaapo khusala anlazela nrima Yuusufu. Khumuuzanisa a mwiitthwaana khulawaniwa Misuri, ila Nnyizinku aari vamote na ye. 10 Khunkholelela muhoowa wawe wooshimo na khumwinkha akhili khumpatthisa oshapweyiwa mmakhono wa lipili Firawuuna, mfwalume wa Misuri. Mfwalume otu aamwinkhiye Yuusufu onsatoro wa Misuri na khumwinkha ottunkhulu wa atthu ooshi a vaje vawe.
11 Paata ya toole, khupuwa jala Misuri yooshi na Kanaani na ohoowa mwinkeene, amarehemu etthu khuhisala awahi opattha etthu-yoojiwa. 12 Yaakhumpa n'oosiila yoori eewaakho tiriku Misuri, khuwaaperekha amarehemu etthu swaafu yamwanzo. 13 Swaafu yaphiiri yoorutelawo amarehemu etthu, Yuusufu khujijuwisa vakatthi wa attwiize, Firawuuna khuwahi owaajuwa ajaama a Yuusufu. 14 N'oojijuwisa Yuusufu khuwaaruma atthu omweetala papaaze na ajamaaze ooshi, aari sapiini na athaanu atthu eene. 15 Aphano Yaakhumpa khusala alawa Misuri, ottuukho afwiyeewo ye na amarehemu etthu akina. 16 Mwiili aya khuthuuliwa khurutiseliwa Shekemu khuzikhiwa nlikulukupo ntthile oozanyiyeeyo Eburahiima na aana Hamori wa nzurukhu khata. 17 Ofiyaka wakathi Nnyizinku aari weettelaaye oretta etile aamwaahitiyeeyo Eburahiima, khuweekezela atthu etthu khwiiya a waatta nti wa Misuri. 18 Khwinkhiwa ofwalume ntthu nkina, ahaari ojuwaawe hatha etthu monkoni wa Yuusufu, khwiiya mfwalume wa Misuri. 19 Mfwalume otule khusukuliwela ajama etthu na khuwaahukhumu amarehemu etthu, awaakhanyerelaka owaalikha aana aya yoori ahiwahi owula.
20 Wakathi otthuupule khuvokoliwa Munsa, oto aari mwaana wooshapweya oomaasho wa Nnyizinku. Khwa nyeezi mittatthu eettaka oleliwa vaje wa apapaze. 21 N'oolikha oleliwa pi apapaze, mwaana wa Firawuuna khunthuula khusala anlela nkhama mwanawe wonvokola. 22 Munsa khuleliwa na ojuwa wooshi wa Amisuri, khwiiya ntthu woowahi khwa a mattakhuzi awe na khaazi zawe. 23 Apatthiyeevo hirimu ya nyaakha arupayiini, Munsa khulekela olawa owaathotola attwiize Meezirayeele. 24 Amooniyeevo Mmisuri anhukhumwaka Mwiizirayeele, khumpattha katapu mwaasa woohukhumwiwa, khumuula Mmisuri otule. 25 Ye aari woona yoori attwiize enlawa yaweeleye yoori Nnyizinku ontta onrumeyela yoori awoosuru, ila yo khayaari oweeleya hatha etthu. 26 Siikhu yaphiiri, Munsa khulawa vahali aari oshezaavo Meezirayeele awiri, khusala awooza yoori: ‘Alume, mweeyo mwa ntthu na ttwiiye; khi mwaasa aya niini mwilwaazanaka?’
27 Ila nlume otule aari onlwaazaaye nzaawe, khunsukhuma Munsa khumuuza yoori: ‘Paani oothawuliyeeyo yoori wiiye namalokozela etthu na namphuka milattu zetthu fweeyo? 28 Ontakha okuula nkhama omuuliyeezo Mmisuri taana?’ 29 N'oosiila mattakhuzi apale, Munsa khutthirela nti wa Midiyana, khusala eekhala ottuukho nkhama nletto, khuwaapattha aana awe awiri.
30 Avirisiyeevo nyaakha arupayiini ottuukhule, khumpuwelela nlayikha vamweeke wa moottho wa haari ozimaaye n'yaara, kharipu ya mwaako Sinaayi. 31 Munsa vakatthi wa moottho opule khwiiya wootikinisiwa. Khususela attaaphale yoori oonachache, khusiila huula ya Mbwana Nnyizinku: 32 ‘Miiyo ki Nnyizinku wa amarehemu apapazenu, Nnyizinku wa Eburahiima, Nnyizinku wa Esiyaakha, Nnyizinku wa Yaakhumpa.’ Munsa eettaka othukumela mwaasa wa woova, khuhisala awahi ofunula maasho awe. 33 Aphano Mbwana Nnyizinku khumuuza yoori: ‘Ovule jampali epo ziri mmoolu mwawo, mwaasa wa puuro li weeyo oriiyo nti ttakatthiifu. 34 W'eekhweele keetta owoona atthu aka ahukhumwiwaka nti wa Misuri. Kasiila olila waya khwiishuka yoori kiwoosuru apho. Ote nasaapi, miiyo kurutisele nti wa Misuri. 35 Otu ti napiyu Munsa, othuuto mwankatthaliyeeyo na mattakhizi apa yoori: ‘Ti paani oothawuliyeeyo yoori wiiye namalokozela etthu na namaphuka etthu?’ Ye aaperekhiwe ti Mwennyewe Nnyizinku yoori eeye namalokozela na namwawuni aya vakatthi wa nlayikha lampuweleliyeeyo vamweeke wa moottho wa haari ozimaaye. 36 Munsa othuuto awaalaziyeewo amarehemu etthu Meezirayeele nti wa Misuri, arettaka vitthu zootikinisa na minjuza za waatta nti wa Misuri, pahari yookhuttuwa na nyaara aavirisiyeemo nyaakha arupayiini.
37 Otu ti Munsa othuuto awooziyeeyo Meezirayeele yoori: ‘Nnyizinku onlawa ampuwise vakatthi wa attwiizenu napiya mmote nkhama miiyo.’ 38 Ye aari woothukumana, n'yaara na nlayikha laari onttakhulanaaye vamwaako Sinaayi na amarehemu etthu, khupwekherela mattakhuzi haayi yoori anuuze na fweyo.
39 Ila amarehemu etthu khukatthala oshututela, na theenya khunkhijilela na nroho mwaya khurutela Misuri. 40 Khumuuza Arawu yoori: ‘Onaattalele nluku yoori anilokoze maana Munsa aya otule anilaziyeeyo Misuri khanijuweeni etthu empatthiyeeyo.’ 41 Wakathi otthuupule khwaattala sanamu yoolattanana mompe. Khutiisela twaha na khuretta njampo khwa osifu etile aarettiyeeyo na makhono aya. 42 Ila Nnyizinku khuwaasusu na khuwenkha waaputu matthottowa nkhama etthiipo yaatikhiweeyo a kithaapu ya manapiyu yoori:
 
‘Kaari miiyo
otule mweeyo mwanliseliyeeyo
twaha na zaakha
nyaakhu epile arupayiini mweekhaliyeezo n'yaara,
mweeyo omathi wa Ezirayeele?
43 Olikha toowo, mwajeka
puuro ttakatthiifu ya Moloke
na matthottowa a nluku enu Reefwa
sanamu mweeyo mwaattaliyeeyo yoori
mwisale mwaaputu wa attaapho,
miiyo kintta wuuperekhani
ohali okinoko olikha Babiloniya.’
 
44 N'yaara amarehemu etthu aarina huma yoosiilana, nttumpho Nnyizinku aari ottakhulananaamo Munsa heema yaya eto yaattaliwe nkhama etthiipo Nluku anrumiyeezo Musa yoori aattale, alikanisanaka etile anthoonyeziweeyo. 45 N'oopwekherela heema etile yoosiilana, amarehemu etthu khuthuula khumwinkha olokozela Yoshuwa, wakathi athuuliyeevo nti wa omathi opule Nnyizinku eekariyeeyo. Heema yaya eto khwiiya nti otthuupo mpakha wakathi wa Daawuuda. 46 Otu khupwekherala mahala mmakhono wa Nnyizinku, khuveka yoori anjekele nyuupa Nnyizinku wa Yaakhumpa. 47 Ila ti Seleyimaana anjekeliye nyuupa yaya.
48 T'iito Nnyizinku khaniikhala nnyuupa yoojekiwa ti pinaatamu, nkhama etthiipo alupiyeezo napiyu yoori:
 
49 ‘Pinku khukulu yaka,
vathi tarikhi ya moolu aka.
Nanna-ni ya nyuupa
mweeyo mwinttelaaye okijekela?
alupaka Mbwana,
ama, onteela wiiya vayi
puuro yaka yoovumula?
50 Khihiye miiyo kaattaliyeeyo
vitthu zaya epo zooshi?’
 
51 Atthu ookifilina ootakhala rooho zaya epo zooshi! Mweeyo mwinlikanana na amarehemu enu aari okatthalaaye Rooho Ttakatthiifu! 52 Napiyu-ni amarehemu enu ahinlupattheeni? Yo amuula otule aari ohaayi wa anashariya, othuuto mwinrettiyeeyo onamalupattha na ohusuti. 53 Mweeyo mwipwekhereliyeeyo kano khwa khaazi za malayikha wala khuhi shutuleli.”
Ofwa wa Shiteefanu
54 Asiiliyeevo mattakhuzi apale khuwaapattha katapu nroho mwaya, khusala anlumele meeno. 55 Ila Shiteefanu wawiitaala wene Rooho Ttakatthiifu khweekesa otulu khoona siifwa za Nnyizinku na Yinsa ari nkhono-nlume wa Nnyizinku. 56 Khulupa yoori: “Kinoona pinku eri yoofukuwa na Mwaana wa Pinaatamu eemeliye nkhono-nlume wa Nnyizinku.”
57 Ye khwaaza okhuwa woonyakulavo, yo khuttiyela mashiilo aya na khunrikanyela. 58 Khunsusisela othetekele wa sitati khusala anoonya na mawe, oshahiti aya khunlikhavo shapu aari wiitthiwaaye Saawulu yoori asalane kuwo zawe epile aawaliyeezo. 59 Eettaka onvonya etthiipile, Shiteefanu khusala alompa araka: “Mbwanaaka Yinsa, pwekherela nafusi yaka.” 60 Attaaphale khukokhora khusala akuwa channu araka: “Mbwanaaka, ohiwaalokoveze twampi eti!” Nawiisha olupa mattakhuzi apale, khufwa.