Khaazi za Maswihaapa
Oweziwa wa Yinsa
1
1 Warakha yaka yamwanzo khaatikhiye kiwuuzaka weeyo Tiyoofilu, monkoni wa zooshi epile Yinsa arettiyeezo na anozeliyeezo, 2 mpakha siikhu aweziweevo pinkuuni, paata ya owaanozela khwa owahi wa Rooho Ttakatthiifu atthu apale awaathawuliyeeyo yoori eeye maaswihaapa. 3 Yinsa n'oosisimuwa awaapuweleliye ajithoonyezaka nanna nannazene yoori ti ye entta osisimuwa. Khwiiya vamote na yo mpakha siikhu arupayiini enttaka omoona, opiyana mwaasa na ojama vamote, na attakhulaka vitthu monkoni wa ofwalume wa Nnyizinku. 4 Wakathi aari ojaavo na maaswihaapa awe Yinsa khuwaaza yoori: “Mwihileewo Yeruzaleemu, mwiwejele etile kiwuuziyeenini aahitiyeeyo Paapa. 5 Yaahaya awoosani na maati, ila nkatthi wa siikhu vattitthiiru, mweeyo mwinteela woosiwa na Rooho Ttakatthiifu.”
6 Yo khumuuzela: “Mbwama, wakathi aya pi otthuupo ontelaaye owminkha ofwalume wa Nnyizinku atthu a Ezirayeele?”
7 Yinsa khuwaajipu yoori: “Kahi pantte yenu ojuwa wakathi ama siikhu Paapa attattikhyeevo ofwalume awe. 8 Ila mweeyo mwinteela winkhiwa owahi wa Rooho Ttakatthiifu ewiishukelani, mwinteela wiiya mashahiti aka, waaza Yeruzaleemu na Yudeya yooshi, Samariya mpakha ohali wiisheliyeewo olumwenku.”
9 Paata ya wiisha olupa mattakhuzi apa, khuweziwa pinkuuni, eettaka omweekesesela olawaka khupuwa liwiku khunkutela khuhisala amoona. 10 Yo khusala nalelo ari wookhontola maasho aya enkesaka otulu ye eettaka olawa, khupuwa aluke awiri awaliye kuwo zoolakala, 11 khuwooza yoori: “Mweyo akalileya, otulu mwineekesa-niwo? Yinsa alaziweeyo vakatthi venu khuweziwa pinkuuni onteela oruti khwa nanna etthiipile mwimooniyeezo alawaka.”
Matiiyasi oninrentteri Yuuda
12 Aphano maaswihaapa khulankha vamwaako oniitthiwaaye Oluveera oriiyeeyo kharipu na sitati ya Yeruzaleemu. 13 N'oofiya khuwela nyuupa ya vatulu nhali amakiyeemo, maaswihaapa aya apo aari Pheeturu, Yaahaya, Yaakhumpa na Antere; Filiipe, Tome, Paturumeewu na Mateewuzhu; Yaakhumpa mwaana wa Alufayo, Simawu Zelooti na Yuuda mwaana wa Yaakhumpa. 14 Apo khaazi yaya yaari okhusanyeya na olompa wakhula siikhu, na aakha akinaaya vamote na Mariyamu mamaawe Yinsa na atthwiize.
15 Aphano siikhu moote mamuumini miiya na eeshiriini aakusanyeyiye vahali vamote. Pheeturu khulankha khweemela khulupa awoozaka mamuumini ooshi yoori: 16 “Atthwiizaku, zaarina yoorettikhana zooshi epile Rooho Ttakatthiifu alupeyeezo nkatthi ya nttakhuzi la Nnyizinku khwa Daawuuda monkoni ya Yuuda, othuuto awaalokoziyeeyo atthu olawa onkhola Yinsa. 17 Yuuda aya oto aari wa khuntti yetthu, aari oretta phantte ya khaazi ethiiti.
18 Ila mwaasa wa nzurukhu enkhiweeyo khumuuzanyisa Yinsa, nzurukhu aya khuuzanyela nshapa. Aakhweliye mmashapa mwawe nttumpho khufwa. Erukulu yawe khuphwetuwa marupo awe ooshi khumwazeyela vathi. 19 Atthu ooshi a Yeruzaleemu khujuwa. Apho nshapa ntthile khutthajiwa nzina khwa luuka yaya yo la Akelataama: liriina maana a ‘nshapa la taamu’.
20 Nliivuru la Zaburi yaatikhiwamo yoori:
 
‘Nhali mwawe ethamiwe ahiikhalemo hatha ntthu.’
 
Khwaatikhiwa theenya yoori
 
‘khaazi yawe asalane ntthu nkina.’
 
21 Apho ninthawula ntthu nkina nintthe nkhuntti mwetthu eeya shaahitiwa osisimuwa wa Mbwana Yinsa. Ila ona ya wiiya ntthu aari onilottakaaye mphule naari ovirakamo Yinsa ari haayi, 22 waaza wakathi opule Yaahaya aari woosavo mpakha siikhu Yinsa alaziweevo vakatthi vetthu aweziwaka pinkuuni.”
23 Aphano, khuthoonyiwa atthu awiri: Yuusufu aarina nzina likina la Barisapa, woojuwaniwa wiiya ntthu wa waaminey, na nlume nkina aari wiitthiwaaye Matiiyasi. 24 Nawiisha atthu khulompa araka: “Mbwana, weeyo ti onjuweeyo rooho za atthu ooshi. Khwa atthu apa awiri nintakha onithoonyeze onthawuliyeeyo 25 yoori akhole khaazi ya omaaswihaapa vamote na-fweyo, eti Yuuda ahitakheeni khweetta puuru yaari onsuhaaye.” 26 Paata ya toole khweekesiwa nasipu khusala enthoonya Matiiyasi. Khwa etthiipo ye khuphakanyeya na apale khumi na mmote aasaliiyeyo khwiiya khumi na awiri.