Yinsa na ojiya wootikinisa
21
1 Paata ya toowo Yinsa khuwaapuwelela anakhiyoni awe opheya nshini wa ntthatta liniitthiwaaye Tiperiyaatia. Ti nanna ye aajithonyeziyeeyo: 2 aari vamote Simawu Pheeturu, Tome aniitthiwaaye Maphapo, Natanayeele wa nti wa Kanaani ya Kalileya, na aana a Zepeteewu na anakhiyoni akina awiri. 3 Simawu Pheeturu khuwooza ashirikha awe yoori: “Kinttela ojiya.” Akinoko aya khulupa yoori: “Fweeyo nintta wuulotta!” Yo khulawa na khweetta mmwaatiya, ila osikhu aya opule khuhipatthi hatha etthu.
4 Ekhunkumu ya lifwajiri Yinsa aarettiye ari vapatari, ila anakhiyoni awe khuhinjuwi.
5 Ye khuwoozela yoori: “Aanaaka, mwapattha swi?”
Yo khujipu yoori: “Wala!”
6 Ye khulupa yoori: “Mweeselele ntthavi phantte ya nkhono nlume ya mwaatiya, mwintta opattha.” Yo khweesa, khuhisala awahi ofuttha ntthavi mwaasa wa swi waatta.
7 Nakhiyoni wa Yinsa woophetacha khumuuza Pheeturu yoori: “Oto aya ti Mbwana!” Wakathi Simawu Pheeturu asiiliyeevo elupiwaka yoori aari Mbwana, khuwala juupa, maana eettiye ovula na khujeeselela mmaati. 8 Anakhiyoni akina khuta na mwaatiya, eettaka ofuttha ntthavi liitaaliye swi, aari kiyasi ya phiima miiya asaleela ofiya vapatari. 9 Wakathi afiiyeevo vapatari, khoona vahali waariivo moottho, na swi vatulu a makhala; na erivo phaawu.
10 Aphano Yinsa khuwooza yoori: “Mwitiise swi vattitthiiru etthiipo mwijiyiyeeyo nasaapi.”
11 Aphano Simawu Pheeturu khuwela mmwaatiya khupurulela ntthavi vathi. Liri lawiitaala swi miiya na hamusiini na ttatthu khuluzeene, ila ntthavi khuhivaruwi. 12 Aphano Yinsa khuwooza yoori: “Mwite mwije!” Khuhiivo hatha nakhiyoni awe mmote aminyaliyeeyo khumuuzela yoori: “Weeyo aya o paani?” Maana anjuwiye yoori otu ti Mbwana. 13 Yinsa khuwaattama khuthuula phaawu, khuwenkha na khuretta etthiipo khwa swi. 14 Eto yaari swaafu ya ttaatthu Yinsa ajithoonyezaka vakatthi wa anakhiyoni awe, paata ya osisimuwa nkhapuri.
Yinsa oninkaphula Pheeturu
15 Paata ya wiisha oja Yinsa khumuuzela Simawu yoori: “Simawu, mwaana wa Yaahaya, onikipheta zayita apa?”
Ye khuri: “Aa Mbwana, hatha na-weyo onjuwa yoori miiyo kinuupheta.”
Yinsa khumuuza yoori: “Ojise pwittipwitthi zaka.”
16 Khumuuzela theenya swaafu ya phiiri yoori: “Simawu, mwaana wa Yaahaya, weeyo onikipheta?”
Ye khujipu yoori: “Aa Mbwana, hatha na-weyo onjuwa yoori miiyo kinuupheta.”
Yinsa khumuuza yoori: “Oshuke pwittipwitthi zaka.”
17 Khumuuzela theenya swaafu yattaatthu, yoori: “Simawu, mwaana wa Yaahaya, weeyo onikipheta?”
Pheeturu khunyoonyeya mwaasa wa Yinsa omuuzela swaafu ya ttaatthu, yoori: “Weeyo onikipheta?” Ye khuri: “Mbwana, weeyo onjuwa vitthu zooshi na onjuwa yoori miiyo kinuupheta.”
Yinsa khumuuza yoori: “Ojise pwittipwitthi zaka. 18 Miiyo kiniwuuza khweele yoori, wakathi opule waari shaapu, weetta ojiwalisa, khweetta wakhula aphale ontakhaavo, ila amana wuuluvala onteela owookolela makhono, azaawo oothuule aweettane ohali ohintakhaawo weettawo.” 19 Yinsa aalupiye toowo yoori athoonyeze nanna ya ofwa Pheeturu aari weettelaaye onsifwana Nluku. Nawiisha, khumuuza yoori: “Okilotte!”
20 Pheeturu azukuluwiyeevo khumoona yoori nakhiyoni otule Yinsa aari omphetachaaye etta owaalotta. Oto ti aari mpavu wa Yinsa wakathi wa etthu-yoojiwa ya osikhu, na ti othuuto eenameliyeeyo vamweyo wa Yinsa khumuuzela yoori: “Mbwana paani anttelaaye wuuzukuluwela?” 21 Wakathi Pheeturu amooniyeevo khuri: “Mbwana, khi otu?”
22 Khunjipu Yinsa yoori: “Hatha nkhama miiyo katakha yoori ye eeye haayi mpakha miiyo oruti, weeyo enuujali niini? Ila weeyo okilotte miiyo.” 23 Khwa etthiipo khumwazeyela vakatthi wa attwi yoori nakhiyoni otule khaari oteela ofwa. Ila Yinsa khaalupiye yoori khaari oteela ofwa; aalupiye yoori: “Nkhama miiyo katakha yoori eeye haayi mpakha miiyo oruti, weeyo enuujali niini?”
24 Otu ti nakhiyoni anlazaaye oshaahiti wa vitthu zaya epo na aatikhiyeeyo. Ninjuwa yoori oshaahiti awe pi wookhweele.
25 Yinsa aretta vitthu kiina theenya zawaatta. Eriwaka wakhula moote yeettiye waatikhiwa, kinoona yoori hatha voolumwenku wooshi khayaari wiiyavo puuro zootthiiwavo kithaapu zaari weettelaaye waatikhiwa.