Osisimuwa wa Yinsa
24
1 Siikhu yamwanzo ya sumana, jumwaa-phiili supuyeene, aakha apale khusala alawa okhapuri okhule aazikhiweewo Yinsa athuuliye mafuttha oonukhela apale aattaliyeeyo. 2 Yo n'oofiya khoona liwe ntthile laafukaniweeyo nlako wa khapuri liri loolaziwavo. 3 N'ooviramo, mwiili wa Mbwana Yinsa khusikana ohimo. 4 Khwiiya oozinkuwa venkivene, attaaphale khuwaapuwelela atthu awiri awaliye kuwo za waara. 5 Aakha apale khuwaapattha woova khukokhora khufiyisa ajihi zaya vathi, atthu apale khusala awoozela yoori: “Mwinimweekesela-ni ntthu wa woona vakatthi wa alupa oofwa? 6 Ye khaamo mphu; asisimuwa, muupuwele mattakhuzi apale aawuuziyeenini ari nti wa Kalileya! 7 Aalupiye yoori: ‘Mwaana wa Pinaatamu ona ya winkheleliwa mmakhono wa anatwampi, akhomeliwe vansalapa, siikhu yattaatthu asisimuwe.’” 8 Aphano aakha apale khuupuwela mattakhuzi apale aalupiyeeyo Yinsa.
9 N'ooruti okhapuri okhule, khuwooza vitthu epile zooshi maaswihaapa apale khumi na mmote na atthu apale akinoko aariivo. 10 Aakha aya aari Mariyamu Mataleena, Yowaana na Mariyamu mamaawe Yaakhumpa na aakha akinoko aalawaniyeeyo ottuukhu. Yo khuwooza maaswihaapa vitthu epile. 11 Ila maaswihaapa khuhisala akhupali mattakhuzi aakha apale, oonaka yoori aari oololo. 12 Aphano Pheeturu khulankha khusala atthira alawaka okhapuri, n'oofiya khuthurumelamo khusikanamo jooraru, khusala aruti ari wootikinisiwa khwa epile zaarettikhaniyeezo.
Anakhiyoni eettaka Emawu
13 Siikhu ethiitile, anakhiyoni awiri a Yinsa khulankha khusala alawa nti waari wiitthiwaaye Emawu woolepelana Yeruzaleemu kiyasi ya phiima alufu khumi na moote. 14 Yo aari olawa attakhulaka monkoni wa vitthu epile zaarettikhaniyeezo. 15 Eettaka olawa etthiipile apiyaka mwaasa na akheetisanaka, Yinsa mwennyeweene khuwaatthoowela khusala alawa vamote na-yo. 16 Ila yo khumpuwa nkhama oowaariipa omaasho, khuhisala anjuwa yoori Yinsa aya aari othuutule.
17 Ye khuwoozela yoori: “Niini mwinnyakulisanelaaye ntarikhi mphu mweettaka weettetta?”
Yo khweemela omaasho waya athoonyezaka ohuzunikha. 18 Mmote wa yo aari wiitthiwaaye Keleyoopa, khumuuzela Yinsa yoori: “Niri weeyo o nletto mmote paasi wa Yeruzaleemu ohinjuwaaye vitthu zirettikhaniyeezo siikhu epi?”
19 Yinsa khuwoozela yoori: “Niini erettikhaniyeeyo?”
Yo khunjipu yoori: “Epile zinrettikhaneliyeeyo Yinsa wa Nazareeti. Ye aari napiyu woowahi khwa zooretta zawe na mattakhuzi awe vakatthi wa Nnyizinku mpakha wa atthu ooshi. 20 Ila attunkhulu a mahaakhimu a tiini na afwalume a mmuti mwetthu, khuruma ohukhumweliwa ofwa khulawa khukhomeliwa vansalapa. 21 Fweeyo naari ororomela yoori ti ye aari weettelaaye owoosuru atthu a Ezirayeele, thanku zirettikhane vitthu zaya epo leelo siikhu yattaatthu. 22 Neeya wooshanka mwaasa yoori aakha akina a nkhuntti mwetthu, aalawiye okhapuri leelo lifwajiri 23 khuhisikani mwiili awe, khuta khunuuza yoori ooniye malayikha, atthaapo pi alupiyeeyo yoori Ye asisimuwa ori haayi. 24 Khulawa ashirikha etthu akina okhapuri, khusikana etthiipile aalupiyeezo aakha apale, ila yo khuhimooni.”
25 Aphano Yinsa khuwooza yoori: “Atthu oorupaza weeleyiwa na oolipa waamini zooshi epi alupiyeezo manapiyu! 26 Al-Masiihu khaarina yoohoowa etthiipo, yoori eette nnuuru mwawe?” 27 Khusala aweeleza mattakhuzi ooshi aatikhiweeyo nkithaapu aari onlupaaye Ye, waaza kithaapu ya napiyu Munsa mpakha za manapiyu akinoko.
28 Asaleelaka ofiya nti opule aari weettaaye, Yinsa khusala ompuwa nkhama aari otakhaaye owaavikana. 29 Ila yo khunkhanyarela araka: “Ohivikane wiiye attaapha na-fweyo, njuwa linttela otupweela waripa.” Yinsa khuvira nnyupa khwiiya vamote na-yo.
30 Wakathi eekhaliyeevo vameeza vamote na atthaapale awiri, khuthuula phaawu khuparikhiya, khumeya khuwenkha. 31 Attaaphale, oowiiri maasho aya khufunuwa khunjuwa yoori ti Yinsa, na-Ye khunaanela. 32 Aphano khusala oozelana araka: “Wakathi opule naari ottakhulanaavo ntarikhi aneelezaka mattakhuzi a nkithaapu, rooho zetthu khazeetta onikaphula?”
33 Yo khulankha nasaapiru khusala arutela Yeruzaleemu, khuwaasikana maaswihaapa apale khumi na mmote na anakhiyoni akina a Yinsa akusanyeyiye vahali vamote, 34 alupaka yoori: “Khweele Mbwana asisimuwa, ampuwelela Simawu.” 35 Na-yo apale awiri khusala alupa epile ooniyeezo ntarikhi na nanna anjuwiyeezo Mbwana wakathi ameyiyeevo phaawu.
Yinsa oniwaapuwelela anakhiyoni awe
36 Anakhiyoni apale nalelo eettaka ottakhula etthiipile, Yinsa khuta vakatthi vaya, khulupa yoori: “Heeri yiiye vamote na-mweyo.”
37 Yo khwiiya oosuthuwa na woova amoonaka nkhama nshitapehe. 38 Yinsa khuwoozela yoori: “Mwasuthuwa-ni? Wala mishikili ziriiye nroho mwenu pi za niini? 39 Moone makhono aka na moolu aka yoori ti miyo! Mwikikhole moone, maana nshitapehe khuniiyana nyama wala makhonkolo nkhama etthiipo mweeyo mwinikoonaazo.”
40 Attakhulaka etthiipile, khuwaathoonyeza makhono awe na moolu awe. 41 Mwaasa wa furaha khuluyeene na oshanka, yo khuhisala aamini nalelo, aphano Yinsa khuwoozela yoori: “Mwinaaye etthu-yoojiwa mwikinkhe kije?” 42 Yo khumwinkha phantte ya swi yawoochiwa. 43 Khuthuula khusala arafuna attaapho yo amoonaka.
44 Nawiisha khulupa yoori: “Pi etthiipi kaawuuziyeenini wakathi opule kaari vamote na-mweyo, yoori zaarina yoorettikhana zooshi epile zaatikhiweeyo khwa miiyo nkithaapu ya kano ya napiyu Munsa na kithaapu za manapiyu akina na nzaapuuri.”
45 Aphano Yinsa khuwaapatthisa fwahamu yoori ziweeleye zawaatikhiwa za nkithaapu. 46 Khuwooza araka: “Yaatikhiwa yoori Al-Masiihu aarina yoohoowa na osisimuwa siikhu yattaatthu vakatthi wa anamfwa; 47 na khwa nzina lawe onlawa walaleyiwe othupwiya yoori ziswaamihiwe twampi, waaza Yeruzaleemu mpakha khapila zooshi za voolumwenku. 48 Mweeyo mwa amashaahiti wa vitthu zaya epi. 49 Miiyo kinlawa kooperekhezeni etile Paapa aahitiyeeyo, mweeye Yeruzaleemu ottuukho mpakha mwiitaazaniwe owahi wa pinkuuni.”
Owela wa Yinsa pinkuuni
50 Aphano Yinsa khuwaathuula anakhiyoni awe khulawana Betaaniya, n'oofiya khulansa makhono awe khuwaaparikhiya. 51 Awaaparikhiyaka etthiipile, khuwaasusa khusala aweziwa alawaka pinkuuni. 52 Yo khumwaaputu, khurutela Yeruzaleemu na furaha khuluyeene. 53 Wakhula siikhu aari othukumana vaje wa Nyuupa ya Nnyizinku ansifwaka Nnyizinku.