Yinsa na Zakewu namariphisa lumpuru
19
1 Yinsa khuvira sitati ya Yeriko ettaka olawa. 2 Ottuukho aariwo mwinyi mmote aari wiitthiwaaye Zakewu, nttunkhulu wa anamariphisa lumpuru na aari thaajiri. 3 Ye aari otakha omoona Yinsa, ila khuhisala awahi mwaasa woofupheya channu na atthu aari enkeene. 4 Aphano khutthira khulokoza khulawa khuwela mmutthi yoori awahi omoona, mwaasa yoori Yinsa aari weettela ovira attaaphale.
5 Yinsa n'oofiya puuro etile, khweekesa otulu khumoona khumuuza yoori: “Zakewu, waakuve wiishukhe, leelo kinttela omaka vaje vawo.” 6 Attaaphale, ye khwiishukha wa waakuvavo khumpokherela Yinsa na furaha.
7 Atthu apale akinoko aari woonaaye vitthu epile, khwaaza ottettha araka: “Nka mooneni otu onttela omaka vaje wa natwampi!”
8 Zakewu khulankha khweemela khumuuza Mbwana yoori: “Woone Mbwana! Kintta owenkha asikhini phantte moote ya maali zaka na apale kaari oweeyelaaye, kintta owaarutisela swaafu nne.”
9 Aphano Yinsa khulupa yoori: “Leelo vaje apha yafiyavo nusura maana otu na-ye peewu ya Eburahiima. 10 Mwaasa yoori Mwaana wa Pinaatamu ateela oweekesa apale aashikhiiyeeyo awoosuru.”
Nlikaniso wa nzurukhu khumi wa feeta
11 Yinsa aattameliyeevo Yeruzaleemu, atthu khusala oopuwela yoori Ofwalume wa Nnyizinku waari oteela orettikhana nasaapiru. Aphano Yinsa khulupa nlikaniso opu araka: 12 “Nlume mmote w'oojama wootafikhana, aasaafiriye khulawa nti woolepawo yoori athawaziwe ofwalume nawiisha aruti. 13 Ahinalawe khuwaakhuwela akarumeya awe khumi, wakhula mmote khumwinkha nzurukhu wa feetaa khuwooza yoori: ‘Mwirettele zanshara mpakha miiyo oruti.’
14 Ila atthu a mmuti mwawe khwiiya awiiphiiriwa, khunruma waziri onlotta olawa olupa yoori: ‘Khanimweepu wiiya mfwalume etthu.’
15 N'oothawaziwa ofwalume khurutela owawe, khulawa khuwaakhuwela akarumeya awe apale aawenkhiyeeyo nzurukhu wa feeta yoori ajuwe fwayita apattheliyeeyo wakhula ntthu.
16 Khuta otule wamwanzo khulupa yoori: ‘Mbwana, nzurukhu opule mmote mwaakinkhiyeeyo kapatthela fwayita, wafiya khumi.’
17 Mbwanaawe khunjipu yoori: ‘Waretta saana, o karumeya wa waamineya. Mwaasa yoori weeyo waamineya khwa vitthu vattitthiiru, apho onttela wiiya mfwalume wa sitati khumi.’
18 Otule waphiiri khuta khulupa yoori: ‘Mbwana, nzurukhu enu opule mwaakilikheliyeeyo, kapatthela fwayita wafiya mithaanu.’
19 Khumuuza yoori: ‘Kemaani, weeyo onttela wiiya mfwalume wa sitati thaanu.’
20 Otule wa wiishela khuta khulupa yoori: ‘Mbwana, nzurukhu enu opu, miiyo kaatthiiye mmufukho khuthokorela. 21 Miiyo keetta owoovani mwaasa woojuwa yoori mweeyo mwa awoopisa, mwinthuula etthu mwihithokoreleeni na mwinuurula mwihizaleeni.’
22 Mbwana otule khuri: ‘Karumeya wootakhala rooho! Kintta wuuphuka khwa mattakhuzi awo atthaapo! Weeyo waajuwiye yoori ki ntthu wa woopisa, kinthuulavo etile kihithokoreleeni na kinuurula etile kihizaleeni. 23 Khi wahaathuuliye nzurukhu aka ottha mpanko n'ooruti kisikana ottheerelaniye?’
24 Khuwooza apale aari attaaphale yoori: ‘Mwinnyakanye nzurukhu aya opo mwimwinkhe otule ariina khumi.’
25 Yo khujipu yoori: ‘Otu aya mwinlupaaye yoori nimwinkhe onaaye nzurukhu khumi!’
26 Mbwana khulupa yoori: ‘Kiniwuuzani khweele yoori otule ariina ontta weekezeliwa, otule ahina hatha etile ariina ontta onyakanyiwa. 27 Maatuwi aka apale ahaari okitakhelaaye ofwalume, mwiwaatiise apha ooliiwe kiwoonaka.’”
Ofiya wa Yinsa Yeruzaleemu
28 Paata ya wiisha olupa mattakhuzi apale, Yinsa khusala avira awelelaka eettaka Yeruzaleemu. 29 Asaleelaka ofiya nti wa Betifwaye na wa Betaaniya kharipu ya mwaako Oluveerab, khuwaalokozisa anakhiyoni awe awiri. 30 Khuwooza yoori: “Mwilawe mmuti mphule, mwifiyaka mwinlawa mwansikane mwaana wa puuru afukeleliwe woohaazi opakhiriwa. Mwimfukule mwintiise. 31 Amana apuwa ntthu awuuzelani yoori: ‘Mwinimfukulela-ni?’ Mwinjipu yoori: ‘Mbwaneetthu ti ye anintakhaaye.’”
32 Apale aawaarumiyeeyo khulawa khusikana nkhama etthiipile aalupiyeezo Yinsa. 33 Wakathi aari omfukulaavo mwaana wa puuru otule, ennyewe khuwoozela yoori: “Mweyo! Mwaana wa puuru oto mwinimfukulela-ni?”
34 Yo khujipu yoori: “Mbwaneetthu ti ye anintakhaaye.”
35 Aphano khuntiisela Yinsa, yo khuttattikhavo kuwo zaya vapuuru Ye khupakhiravo. 36 Ataaka Yinsa, atthu khusala attattikha kuwo zaya ntarikhi. 37 Wakathi aattameliyeevo vamwiishukhelo wa mwaako Oluveera, khuntti ya anakhiyoni ooshi khwiiya oofurahi khwaaza onyakula ansifwaka Nnyizinku khwa minjuza epile ooniiyeezo, 38 araka:
 
“Attottopeliwe mfwalume antaaye
khwa nzina la Mbwana.
Yiiyewo heeri pinkuuni
na siifwa otulu.”
 
39 Mafwarizeewu apale aari vakatthi wa atthu apale khusala amuuza Yinsa yoori: “Mwanliimu, owooze anakhiyoni awo anyamale.”
40 Ye khuwooza yoori: “Atthu apa amana anyamala, mawe pi anttelaaye onyakula.”
Yinsa onlila oonelaka huruma Yeruzaleemu
41 Wakathi Yinsa afiiyeevo Yeruzaleemu, nawoona sitati etile khulila, 42 araka: “Oo! Yeruzaleemu, eriwaka waari onjuwa otule aniwinkhaaye heeri leelo! Ila apho epo zaya zavitheya khwa weyo. 43 Onlawa wafiye wakathi maatuwi enu anttelaaye wuukukuttelani phantte zooshi ari mmaphotto mwaya. 44 Onttela ophwantteliwa vamote weeyo na aanaawo, khalinlawa osala hatha liwe vatulu wa liwe nzaaya, maana weeyo khumpokhereleeni Nnyizinku wakathi aateeliyeeyo owuusuru.”
Yinsa Nnyupa wa Nnyizinku
45 Yinsa khuvira Nnyupa wa Nnyizinku khusala aweekara apale aari wuuzanyisaamo, 46 awoozaka yoori: “Yaatikhiwa yoori: ‘Nyuupa yaka enttela wiiya nyuupa yoolompiwamo, ila mweeyo mwarettisa wiiya puuro ya malatarawu.’”
47 Wakhula siikhu Yinsa eetta onozela Nnyupa wa Nnyizinku, ila attunkhulu a mahaakhimu a tiini, anamanozela a kano na anamalokozela a atthu aari weekesa shawuri zoomuula, 48 ila khuhisala apattha nanna yooretta, maana atthu ooshi aari omwiitaalela Ye n'onsiileza.